Inee komi mampopetoia ane metulungi
6
1 “Mainga-inga komi, bona inee komi mampetudoka babeia anu malompe i rara mpoagamami, i lio nu tau wori bona raita. Lawi ane ewa etu babeiami, baria komi ina mansumba ba apa-apa lako i Tuamami, anu ria i suruga. 2 Mewali, ane motulungi komi tau anu mesiasi, inee nipopainsanika i tau wori, ewa anu rababei nu tau anu mengkalompe. Mampetudoka sira kalompe nu rarara i rara nu tombi penombaa ba i dala anu mabose, bona ratoia sira nu tau ntanina. Bona niinsani, etumo sarora. 3 Agaiana komi, ane mokiraka komi ba apa ngkida i tau ntanina, nikiraka ngkandii i sukana kabula nu rarami, 4 bona ntena rainsani nu tau wori. Agaiana Tuamami anu i suruga manginsani babeiami anu malompe anu tewunikai etu. Babeiami etu ina nasurungi nu Tuamami anu i suruga.”Inee komi mampopetoia ane mekakae
5 “Ane mekakae komi, inee komi ewa tau anu wule mengkalompe. Raundera meongko mekakae i rara nu tombi penombaa ba i porompengaa dala bona raita ai ratoia sira nu tau. Bona niinsani, etumo sarora. 6 Agaiana ane mekakae komi, sangangaa mesua komi i rara nu lontami, nituko lontami lako mekakaeda komi i Tuamami anu baria niita. Lawi Tuamami anu i suruga manginsani babeiami anu malompe anu tewunikai etu. Babeiami etu ina nasurungi nu Tuamami anu i suruga.
7 Ane mekakae komi, inee nipopenggoli-nggoli ewa tau anu baria manginsani i Pue Ala. Lawi pampekirira, ane rapakandoera pekakaera, pamperadera ina tepabukei. 8 Inee nipeulai babeiara! Lawi nainsani amimo nu Tuamami anu ria i suruga apa anu niparaluu lako baria mani niperade. 9 Mewali, mekakae komi ewa ei:
Tuamaki anu i suruga,
kitoia sangaMu.
10 Patongawamode peparentaMu i dunia,
popewalimode peundeaMu i dunia
ewa anu mewali i suruga.
11 Kiraka kami pangkoniki anu sondo i eo ei.
12 Ampunimode kamasalaki,
ewa poampuniki tau anu masala si kami.
13 Inee kami Nupogeaka rakelo,
agaiana kampaimode kami, ntena kami nakuasai anu madaa.
[Lawi Ikomo tumpuna Kadatua, ai Kuasa ai Peawa, duduuna kasae-saeana. Amin.]
14 Ane moampuni komi tau anu masala si komi, Tuamami anu i suruga ina moampuni mbui kamasalami. 15 Agaiana ane baria komi moampuni tau anu masala si komi, Tuamami anu i suruga baria mbui ina moampuni kamasalami.”
Inee komi mampopetoia ane mopuasa
16 “Ane mopuasa komi, inee nipopengkuru liomi ewa tau anu mengkalompe. Ane mopuasa sira, raoakara baria sira mobakosi liora ba baria sira mekao bona raita nu tau popuasara. Bona niinsani, etumo sarora. 17 Agaiana ane mopuasa komi, sangangaa mobakosida komi liomi ai mekaoda komi 18 bona ntena rainsani nu tau popuasami. Lawi Tuamami anu i suruga anu baria niita, manginsani babeiami anu malompe anu tewunikai etu. Babeiami etu ina nasurungi nu Tuamami anu i suruga.”
Inee morompu anu-anu i dunia
19 “Inee komi morompu anu-anumi i dunia. Lawi anu-anumi i dunia pensani nakoni nu kabubu ba mewali tagara. Pambolia nu anu-anumi etu, pensani nagero nu topanangka, mpane napanangka isina. 20 Aginamo nirompu anu-anumi i rara nu suruga. Anu-anumi etu baria ina matonto, lawi i suruga baria pensani nakoni nu kabubu, baria pensani matagara, baria pensani nagero nu topanangka mpane napanangka isina. 21 Lawi imba kariaana anu-anumi, i se etu liliu pekirimi.”
22 “Matamu iamo sulo nu wotomu, lawi ane malompe matamu, mabaa mbui wotomu. 23 Agaiana ane matamu mawurau, madedi petotokimu. Awetu mbui ane kamabaa anu ria i wotomu mewali madedi, melumbu mpii kamadedina wotomu.”a
24 “Baria ria sadua batua anu nabuku mampobagoka rodua tuana, lawi sadua ina napokaasi, sadua nakasisi. Sadua ina nakatetidai, sadua baria. Ewa etu mbui komi, baria komi pensani mampeulai peundea ni Pue Ala, ane rapobatua komi nu anu-anumi i dunia.”
Inee karao rarami
25 “Mewali, Kuulika komi: inee karao rarami kono i katuwumi ai niuli: ‘Apamo anu ina takoni ai tainu, ai apamo anu ina taposampi?’ Lawi katuwumi melumbu mani lako i pangkoni ai pesampi. 26 Peita tosi anu meloko i laerawa. Baria sira mantuda, baria sira mepae, baria ria tambarura. Nauda ewa etu, Tuamami anu ria i suruga batena mopakoni sira. Apa mani komi! I petotoki ni Pue Ala, melumbu katuwumi mpane lako i katuwu nu tosi. 27 Apamo pobunduana karao rarami? Naudapae karao rarami mampekiri mampopengaa, baria komi pensani motambai tinuwumi nauda wule saudi ngkida.
28 Mangkiada mpane karao rarami mampekiri pesampimi? Nipeita bunga i pada, baria sira mobago, baria sira mandau. 29 Agaiana Kuulika komi, mogaloda i Datu Salomo anu pebuku mpii, pesampina baria simbela peraena ai bunga aretu. 30 Mewali, ane i Pue Ala mampoperae owo i pada anu tuwu i eo ei, molentano owo etu wule tuwu eo ei mpane rasuwe ineilena, apa mani komi! Melumbu mani pekadipuraka ni Pue Ala si komi. Mangkiada mpane baria nipotuu pekadipurakaNa etu? 31 Mewali, inee karao rarami ai niuli: ‘Apamo anu ina takoni ai tainu, ai apamo anu ina taposampi?’ 32 Ope-ope etu nakadelo liliu nu tau anu baria manginsani i Pue Ala. Molentano Tuamami anu i suruga manginsani asa apa anu niparaluu. 33 Mewali, sangangaa nipailodo nikadelo peparenta ni Pue Ala i rara nu katuwumi ai sangangaa nibabei liliu babeia anu manoto i petotokiNa. Ane nibabei ewa etu, sinangkana anu niparaluu batena Nakiraka komi.
34 Mewali, inee karao rarami mampekiri apa anu ina mewali i neile. Kapari eo ei sondomo, inee mbui nitambai mampekiri apa anu ina mewali i neile.”