Pepatudu ni Yesu i tau wori i mungku
Tau anu matono
5
1 Awetu naita ni Yesu tau wori aretu mangula Ia, mempanaimo Ia lau i mungku mpane momeso. Awetu Ia momeso, laumo sira topeguruNa mogompilisi Ia. 2 Ni se etu, mepuumo Ia mepatudu, Nauli,3 “Matono mpuu komi anu niinsanimo kamaledemi anu wule mesarumaka si Pue Ala,
lawi komimo anu mewali tau ni Pue Ala i rara nu peparentaaNa.
4 Matono mpuu komi anu mapari rarami,
lawi i Pue Ala mopakalene komi.
5 Matono mpuu komi anu mengkaiwoi,
lawi mansumba komi apa anu nadandika ni Pue Ala.
6 Matono mpuu komi anu mampenoka mpii mewali manoto i petotoki ni Pue Ala,
lawi i Pue Ala mokiraka komi apa anu nikadelo etu.
7 Matono mpuu komi anu maasi i singka manusiami,
lawi i Pue Ala maasi si komi.
8 Matono mpuu komi anu magali rarami,
lawi komimo anu mangita i Pue Ala.
9 Matono mpuu komi anu mangkeni kalene i singka manusiami,
lawi komimo anu rauli ana ni Pue Ala.
10 Matono mpuu komi anu rapopesiasi nakenimpangulami peundea ni Pue Ala,
lawi komimo anu mewali tau ni Pue Ala i rara nu peparentaaNa.
11 Matono mpuu komi ane rakaisii lolita komi, rapopesiasi komi ai rasasalai komi nakenimpeulami si Aku. 12 Nabi-nabi ni banimpia, rapopesiasi mbui sira.
Mewali sangangaa maruminsi katonomi, lawi mabose surungina anu nisumba i rara nu suruga.”
Tau anu meula si Yesu rapandiri ewa bure ai pewangka
13 “Komi anu meula si Aku, komi ewa bure, lawi mangkeni komi kalompe i tau i dunia. Agaiana ane bure etu mewali matawoomo, pensani manipae minaana rapopominaa bure mpesola? Baria! Bariamo ria bunduna, batena ratende mpane nalongko-longko nu tau.
14 Komi anu meula si Aku, ewa pewangka anu mowangkasi ope-ope tau, ewa kota anu rawangu i wongko bulu, baria pensani tewuni. 15 Ai baria ria sadua tau anu mosuwe sulo mpane natuko ai gumba. Sulo etu batena naboli i peariana, bona pewangkana mowangkasi ope-ope tau i rara nu tombi. 16 Ewa etu mbui pewangka anu ria i rarami, sangangaa mowangkasi ope-ope tau. Nipakalompe babeiami bona ope-ope tau ina mangita babeiami anu malompe etu, mpane motoia sira Tuamami anu ria i suruga.”
Pepatudu ni Yesu kono i Atura ni Musa
17 “Inee nipenoka tunggaiana kamaiKu ei, bona moparisi Aku Atura ni Musa, ai patudu nu nabi-nabi ni banimpia. Agaiana maida Aku mopakanoto lempona Atura etu i kamonso-monsona. 18 Bona niinsani: Ane ria mani langi ai dunia ei, batena baria ria lako i sampangka lolita i rara Atura ni Musa ina raparisi nauda mogalo sambua titi ngkida, ane ope-ope Atura ni Musa etu baria mani mewali. 19 Etumo mpane Kuulika komi, ima anu moliungi sampangka ngkida parenta i rara Atura ni Musa, nauda anu raimba mangaa lako i ope-ope atura etu, ai mopatudu tau ntanina bona moliungi parenta etu, tau etumo anu tepaiwoi mpii i rara peparentaa ni Pue Ala. Agaiana ima anu mampeulai ope-ope parenta i rara Atura ni Musa ai mopatudu tau ntanina mampeulai parenta etu, tau etumo anu tepaiwongko mpii i rara peparentaa ni Pue Ala. 20 Bona niinsani: baria komi pensani mewali tau ni Pue Ala i rara peparentaaNa, ane baria melumbu pangulami peundea ni Pue Ala, mpane lako i guru-guru agama ai toParisi.”
Inee marumpu
21 “Niinsani mpii sawaa anu rakiraka ulububuta sira ni banimpia anu manguli: ‘Inee mepopate, ai ima anu mepopate sangangaa rabotusi kara-karana ai rasuku.’ 22 Agaiana ei-ei Kuulika komi: ima anu mokarumpui tau ntanina, ina rabotusi kara-karana. Ima anu mopakoi tau ntanina, ina rakeni ia i topobotusi kara-kara nu toYahudi. Ai ima anu mangulika tau ntanina ‘madoio’, sintoto mpuu ia ratende i rara nu apu naraka.
23 Mewali, ane rapana mesua iko i Tombi ni Pue Ala mosusu popenombamu i potunua popenomba, mpane ungangkidamo nukaendo kariana mani tau ntanina anu madua rarana si iko, 24 nuboli sala popenombamu etu i tumbiri nu potunua popenomba, mpane lau sala nupakalompe posintuwumi. Roodamo awetu, lako lauda iko mosusu popenombamu si Pue Ala.
25 Ewa etu mbui, ane rapana ria anu mampenoka mosalai iko i topobotusi kara-kara, lako baria mani komi dongka i topobotusi kara-kara, sangangaa nupari-pari bona pensani iko modame ai iwalimu etu. Lawi ane baria komi modame, ina nakeni iko i topobotusi kara-kara, mpane topobotusi kara-kara etu ina mosusu iko i pulisi, mpane pulisi ina mopasua iko i rara nu tarunggu. 26 Bona nuinsani: baria iko ina tepawia lako i petarunggua ane baria mani piri dendamu nubaiari.”
Inee mebualosi
27 “Niinsani mboto ria parenta anu rakiraka kita ni banimpia anu manguli: ‘Inee mebualosi.’ 28 Agaiana ei-ei Kuulika komi: ima anu mototoki sadua towawine mpane ria rarana mobabei babeia anu merikati i towawine etu, mebualosimo ia. 29 Ane rapana mata kuanamu anu mangkeni iko madosa, nudungkiki ngkimo mpane nutende. Aginamo sambali ngkida matamu, mpanena rombali matamu agaiana ope-ope wotomu ratende i rara nu naraka. 30 Ane rapana pale kuanamu mangkeni iko madosa, nupuaki mpane nutende. Aginamo sambali ngkida palemu, mpanena rombali palemu agaiana ope-ope wotomu ratende i rara nu naraka.”
Inee mogaa i posamboko
31 “Ria mbui patudu anu rakiraka kita ni banimpia anu manguli: ane ria sadua tomoane anu mampogaaki towawinena, sangangaa mokiraka ia sura mpogaa i towawinena. 32 Agaiana ei-ei Kuulika komi: ima anu mampogaaki towawinena, molentano towawinena etu baria mboto mebualosi, mampopewali ia towawinena mebualosi. Tomoane anu mampotombika towawine etu, tomoane etu mebualosi.”
Inee mosumpa
33 “Niinsani mbui kariana parenta anu rapadongkaka ulububuta ni banimpia anu manguli: ‘Inee iko mousuli lako i podandimu. Apa dandimu anu nupakaroso ai sumpamu i lio ni Pue Ala, sangangaa nupabukei.’ 34 Agaiana ei-ei Kuulika komi: inee mpuu nipepetandaka mosumpa mokabelai langi ba dunia. Lawi langi iamo pomesoa ni Pue Ala, 35 ai dunia iamo popatoaa ni Pue Ala paaNa. Ba inee komi mosumpa mokabelai kota Yerusale, lawi Yerusale etu kota ni Pue Ala, Datu anu Mabose. 36 Inee mbui komi mosumpa mokabelai woomi, lawi baria nibuku mopakabula ba mopakaeta wuluami, nauda sangkau ngkida. 37 Ane tunggaiami niuli io, niuli ‘Io.’ Ane tunggaiami niuli baria, niuli ‘Baria.’ Ane ntanina lako i se etu mensuwu lako i Datu nu Seta.”
Inee mesurungi
38 “Niinsani mboto kariana atura anu rapatuduka kita ni banimpia anu manguli: ‘Mata rapasuru ai mata, ngisi rapasuru ai ngisi.’ 39 Agaiana ei-ei Kuulika komi: babeia nu tau anu madaa si komi, inee nisurungi. Ane rapana ria anu mosopo kalimpimi mbai kuana, nikiraka mbui kalimpimi mbai kabeo. 40 Ane ria anu mosalai komi i topobotusi kara-kara mpane mamperade badumi, nikiraka mbui jubami. 41 Ane sadua surudado mopari-pari komi mangkeni keniana sakilo mete kakaraona, nikeni keniana etu rokilo mete kakaraona. 42 Ane ria anu merade ba apa ngkida, nikiraka. Tau anu mampenoka mebolo ba apa ngkida si komi, inee nipokabosika.”
Pokaasi iwalimu
43 “Niinsani mboto mbui patudu anu manguli: ‘Nipokaasi singka rangami, ai nikasisi iwalimi.’ 44 Agaiana ei-ei Kuulika komi: nipokaasi iwalimi, ai nipekakaeka sira tau anu mampopesiasi komi, 45 bona lako i pangkeniakami etu tongawa ka komina ana nu Tuamami i suruga. I Pue Ala mampopewangka eo i tau anu malompe ai i tau anu madaa. Napopendolu uda i tau anu manoto ai i tau anu motengko rarara. 46 Mewali ane nipokaasi tau anu wule maasi si komi ngkida, babeiami etu baria ina nasurungi ni Pue Ala. Lawi mogaloda toperuru asele anu niimba ewa topodongko, mampokaasi mbui sira tau anu maasi si sira. 47 Ane malompe rarami wule i simadami ngkida, apamo pelumbuana babeiami etu? Mogaloda tau anu baria manginsani i Pue Ala, ewa etu mbui babeiara. 48 Kamaasi ni Pue Ala i ope-ope tau baria ria kamakurana. Mewali, etu mbui anu sangangaa nibabei.”