I Yesu nakelo Datu nu Seta
4
1 Roo i se etu, i Yesu nakeni nu Inosa Magali lau i pada lori bona nakelo Datu nu Seta. 2 I se etu, i Yesu mopuasa iba mpulu eo iba mpulu mbengi kasaena, mewali maoromo Ia. 3 Ni tempo etu, dongkamo Datu nu Seta mangulika Ia, “Ane monso-monso mpuu Iko Ana ni Pue Ala, popewali rotimode watu arei!”4 Nasonoi ni Yesu, “I rara nu Sura Ngkora Magali teuki ewa ei: ‘Tau baria wule tuwu lako i roti, agaiana tuwu mbui lako i pangulara ope-ope lolita anu napadongka ni Pue Ala.’”*
5 Roo i se etu, Datu nu Seta mangkeni i Yesu lau i Yerusale kota anu magali, mpane naboli i wumbu nu Tombi ni Pue Ala, 6 naulika, “Ane monso-monso mpuu Iko Ana ni Pue Ala, pengkanawu lau lako i se ei, lawi ria teuki i rara nu Sura Ngkora Magali, ewa ei:
‘I Pue Ala ina motudu malaekaNa sira mokampai Iko,
ina rapatorora Iko bona ntena tesube paaMu i watu.’” (Dulua Petoia 91:11-12)
7 Nasonoi ni Yesu, “Agaiana ria mbui teuki i rara nu Sura Ngkora Magali anu manguli ewa ei: ‘Inee iko mampetandaka Pue Alamu.’”
8 Roo i se etu, Datu nu Seta mangkeni mbuimo i Yesu lau i wowo bulu anu mawane mpii, mpane natudoka ope-ope kadatua i dunia ai peawana, 9 nauli, “Ope-ope ei ina kukiraka Iko, ane motumpa Iko menomba si aku.”
10 Nasonoi ni Yesu, “Peloso Datu nu Seta! Lawi i rara Sura Ngkora Magali teuki ewa ei: ‘Sangangaa menomba iko si Pue Alamu. Batena sawaaNa ngkida anu nupopolumako.’” 11 Kasopoana, lambumo Datu nu Seta etu mopalengi i Yesu. Roo awetu dongkamo sira malaeka morora Ia.
I Yesu mampepuu bagoNa i Galilea
12 Baria mani masae lako i se etu, naepe ni Yesu bambari i Yohane Toperiu ratarunggumo. Etumo mpane lambumo Ia lau i kota Nasare i tana Galilea. 13 Lako i kota Nasare lau Ia meari i kota Kapernaum. Kapernaum etu, kota anu i wiwi rano Galilea, i tana nu toSebulo ai toNaftali. 14 Bona tepabukei lolita anu napadongka ni nabi Yesaya ni banimpia anu manguli ewa ei,
15 “Tana nu toSebulo ai toNaftali
i dala lau i rano Galilea,
i sambuteka ue Yarade,
ai tana Galilea anu napearii nu tau anu baria sira toYahudi.
16 Tau i se etu tuwu sira i rara nu kamadedi,
agaiana ei-ei, mangitamo sira pewangka anu mabose.
I tau anu nakuasai nu kamate,
dongkamo sadua tau, ewa eo anu mowangkasi sira.” (Yesaya 9:1-2)
17 Mepuu lako ni se etumo, i Yesu mopadongka Ngkora ni Pue Nauli, “Penonsomode komi lako i dosami, lawi bariamo masae i Pue Ala ina meparenta i dunia.”
I Yesu moronde topeguruNa anu mpolinguruna
18 Tongo ni Yesu molumako i wiwi rano Galilea, Naita rodua tau ntalitoi iamo i Simo anu rauli i Peturu ai i Andaria. Ni tempo etu, tongora mojala bau i rano, lawi etumo bagora. 19 Naulika sira ni Yesu, “Maingkomode komi niula Aku! Bariamo bau anu nijala, agaiana manusiamo.” 20 Rapalengira mpuumo jalara, ai mepuu ni eo etu, meulamo sira si Yesu.
21 Napaliliumo ni Yesu polumakoNa. TongoNa molumako, Naita mbui rodua tau ntalitoi: i Yakobu ai i Yohane, ana ni Sebedeus. Sira ai tuamara tongora mopakalompeki jala i rara nu duangara. Naronde ni Yesu tau ntalitoi etu, bona meula sira si Ia. 22 Rapalengira mpuumo duangara ai tuamara, mpane meula mbui sira si Yesu.
I Yesu mepatudu ai mopakaosa tau wori
23 I Yesu molumako i sumalele tana Galilea mepatudu i tombi-tombi penombaa. Mopadongka Ia Bambari Malompe kono i kadongkana peparenta ni Pue Ala, ai mopakaosa mbui Ia ope-ope tau anu madua ai anu baria masinokai wotora. 24 Pobago ni Yesu tebambari i sumalele tana Siria, duduuna mawori tau anu dongka si Yesu mampenoka mampomberumpaka Ia. Tau aretu mangkeni sira ope-ope tau anu mantodisa maisi mpangkana sakira ai kaparira, anu napesuangi nu seta, anu mosaki madungka, ai anu mapalu. Ope-ope sira etu napakaosa ni Yesu. 25 I tempo etu, mawori mpuu tau anu meula si Ia. Ria sira anu lako i tana Galilea, lako i Dekapolis,a lako i Yerusale, lako i tana Yudea, ai ria mbui anu lako i tana mbai sambuteka ue Yarade.