I Yohane Toperiu mobambari Ngkora ni Pue
3
1 Ni tempo etu, raitamo i Yohane Toperiu i pada lori i tana Yudea. Ni se etu mepuu ia mobambari Ngkora ni Pue 2 nauli, “Penonsomode komi lako i dosami, lawi bariamo masae i Pue Ala mepuu meparenta i dunia anu bou.” 3 I Yohane etumo anu natunggai lolita ni nabi Yesaya ni banimpia anu manguli ewa ei,“Ria tau anu mongare-ngare i pada lori nauli,
‘Ina dongka i Pue!
Nipatimama dalaNa,
nipakanoto dala anu ina Napoliungi.’” (Yesaya 40:3)
4 Pesampi ni Yohane rababei lako i wulu onta. Pampouna lako i kolimba.a Pangkonina kakomba ai tinasa. 5 Mawori tau anu dongka mampenoka sira mampetingai pololitana. Ria sira lako i kota Yerusale ai lako i sumalele tana Yudea. Ria mbui lako i boea-boea anu i wiwi ue Yarade. 6 Dongka sira mai mopangaku dosara, mpane nariu sira ni Yohane i ue Yarade.
7 Mawori mbui tau anu mampeulai patudu nu Parisi ai Saduki, dongka sira mampoperiu si Yohane. Awetu naita sira dongka, naulika sira, “Komi tau anu madaa! Ba nipenokamipae, pensani komi tepawia lako i pesuku ni Pue Ala anu ina morumpa komi i luwuna? 8 Ane monso-monso menonso komi lako i dosami, sangangaa nipatongawa i babeiami. 9 Inee nauli nu rarami: ‘Kita ei, pemulea ni Burahima. Baria kita ina nasuku ni Pue Ala.’ Pololitami etu baria mamonso! Nipetingai: Ane naunde ni Pue Ala, pensani watu arei Napopewali pemulea ni Burahima. 10 Ina dongka pesuku ni Pue Ala ewa owase anu matimamamo i puu nu kau anu ina ratowo. Umba ngkida kau anu baria malompe powuana ratowo mpane ratende i rara nu apu.”
11 Nauli mbui ni Yohane, “Kuriu komi ai ue, tanda pampenonsoimimo dosami. Agaiana ina dongka sadua tau anu melumbu kuasaNa lako si aku. Mogaloda molonsuka Ia kandupaNa, baria aku sintoto. Ia anu ina moriu komi ai Inosa Magali ai apu. 12 Ia rapandiri ewa sadua tau anu motapisi gandu bona tepatani gandu anu moisi ai anu mawara. Gandu anu moisi napopesua i rara nu tambaru, mpane gandu anu mawara natende i apu anu tuwu liliu.”
I Yesu nariu ni Yohane
13 Ni tempo etu, dongkamo i Yesu i ue Yarade lako i tana Galilea, dongka mampoperiu si Yohane. 14 Agaiana baria ia madota moriu i Yesu, mpane naulika, “Kamonsona, aku eida anu sintoto Nuriu. Mangkiada mpane Ikoda anu mai si aku?”
15 Agaiana nasonoi ni Yesu, Nauli, “Nuriu ngkimo Aku. Sintotomo anu nubabei ei bona tepabukei ope-ope peundea ni Pue Ala.” Lako i se etu, nariu mpuumo Ia ni Yohane.