ToMataeo mangkadelo i Yesu
2
1 Tempo ni Datu Herode meparenta, i Yesu rapoanaka i kota Beteleme i tana Yudea. I tempo poparenta ni Datu Herode etu, ria sira basangkia dua toMataeo anu dongka i Yerusale lako i tanara anu karao mbai i pensibea eo. ToMataeo aretu mapande moparesa tanda i betue. 2 Mekunemo sira i tumpu kota Yerusale, raulira, “Imba Datu nu toYahudi anu lako rapoanaka etu? Kiitamo tanda karapoanakaNa i betue mbai i pensibea eo. Etumo mpane mai kami, lawi kipenoka menomba si Ia.”3 Awetu naepe ni Datu Herode bambari etu, tingkara mpuu ia ai baria maroroo pampekirina, ewa etu mbui ope-ope tau i Yerusale. 4 Lako i se etu, narondemo sira ope-ope kapala tadulako menomba ai guru-guru agama Yahudi bona mai sira mogulu. Moterusumo sira ope-ope, mewali mekunemo i Datu Herode si sira, nauli, “Imba mpuu karapoanakaaNa Datu Topesorema anu nadandi ni Pue Ala ni banimpia?”
5 Mesono sira, raulira, “I kota Beteleme i tana Yudea, lawi riamo lolita ni Pue anu nauki sadua nabi ni banimpia, anu manguli:
6 ‘Beteleme tana Yehuda,
ina bariamo iko tepakoi lako i ope-ope kota anu tolele sangara i tana Yehuda.
Lawi lako si iko ina ria sadua tadulako,
anu ina motadulakoi tauKu toSaraeli.’” (Mika 5:2)
7 Awetu naepe ni Herode pesonora, naronde ngkandiimo sira toMataeo napekune, impia mpuu mpolinguruna niitara betue etu. 8 Roo i se etu, natudumo sira lau i Beteleme, naulika sira, “Laumode komi i Beteleme, nikadelo mpuu Anakoi etu. Ane nisumbamo, maimo komi niulika aku bona lau mbui aku menomba si Ia.”
9-10 Awetu raepera pololita ni Datu Herode, lau mpuumo sira. Tongora i dala, raitara mbuimo betue etu mbai i pensibea eo, mewali maruminsi kamatonora. Betue etu mampoilodoka sira duduuna mengkaroo i kariaa nu Anakoi etu. 11 Awetu sira dongka, mesuamo sira i rara nu tombi, mpane kasaliu raitara Anakoi etu simbela-mbela ai i Maria tinaNa. Motumpamo sira menomba i Anakoi etu, mpane mobungkasi sira pambolia nu anu-anura, rasusura rapopenombara si Ia. Popenombara etu iamo bulawa, dupa ai mur.a 12 Napopaingaaka sira ni Pue Ala i rara nu pangipira, Nauli, “Inee komi mesola si Herode!” Mewali i pesolara i tanara, baria sira mampoliungi Yerusale, mangulada sira dala ntanina mesola.
I Yusupu mangkeni i Maria ai i Yesu lau i tana Masiri
13 Awetu mesola toMataeo aretu, mampatongawa mbuimo malaeka ni Pue si Yusupu i rara pangipina. Nauli nu malaeka etu, “Yusupu! I Herode mangkadelo Anakoi etu, lawi napenoka napopate. Pematamode, kenimode Anakoi etu ai tinaNa mensila komi lau i tana Masiri! Meari nsalaa komi si dou duduuna mololita mpesola Aku si iko.”
14 Kawengi etu ngkimo, mematamo i Yusupu, mpane mangkeni i Yesu ai i Maria mensila lau i tana Masiri. 15 Mearimo sira i se etu duduuna i Datu Herode mamate.
Mewali, tepabukeimo Ngkora ni Pue anu napadongka nu nabiNa ni banimpia anu manguli ewa ei, “Lako i Masiri Kuronde AnaKu.”*
Anakoi i Beteleme rapopate
16 Awetu nainsani ni Herode karaakalangina nu toMataeo, maruminsi mpii karumpuna. Etumo mpane naposawaakamo surudadona sira lau mampopate ope-ope anakoi tomoane i Beteleme ai i boea anu gompi i se etu, mepuu i analei anu lako rapoanaka dongka-dongka i anakoi anu rompaemo tinuwura, etu napasintoto ai pesono nu toMataeo.
17 Anu mewali etu, mopabukei lolita ni nabi Yeremia ni banimpia anu manguli:
18 “I kota Rama raepe topotumangi ai topandawi.
I Raheli motumangisi kamate nu anana sira,
lawi bariamo ria anana sira,
etumo mpane baria ia madota rapakalene.” (Yeremia 31:15)
Pesola ni Yusupu, i Maria ai i Yesu lako i tana Masiri
19 Tongo ni Yusupu, i Maria ai i Yesu i tana Masiri mani, matemo i Datu Herode. Roo i se etu, i rara pangipi ni Yusupu dongka mbuimo malaeka ni Pue, 20 nauli nu malaeka etu, “Tau anu mampenoka mampopate Anakoi etu, mamatemo. Mewali, pematamode, keni Anakoi etu ai tinaNa, pesolamode komi lau i Saraeli.” 21 Memata mpuumo i Yusupu mangkeni Anakoi etu ai i Maria mesola lau i tana Saraeli. 22 Agaiana naepe ni Yusupu bambari, i Arkelaus ana ni Herode mopasuru tuamana mewali datu i tana Yudea i Saraeli. Mewali, i Yusupu maeka lau i se etu. Roo awetu, ria mbui anu napadongka ni Pue i rara pangipi ni Yusupu, etumo mpane lau sira i tana Galilea i Saraeli, 23 mpane meari sira i kota anu rasanga Nasare. Mewali tepabukeimo lolita nu nabi ni banimpia kono i Datu Topesorema etu, anu manguli ewa ei, “Ina rauli Ia, toNasare.”