Matiu 1

Bambari Malompe anu nauki ni

Matiu

Pemulea ulububu ni Yesu

1 Eimo tunturakana ulububu ni Yesu Kerisitu pemulea ni Datu Daudi, pemulea ni Burahima. Mepuu lako si Burahima dongka si Daudi, sanga nu ulububu ni Yesu, eimo sira:

2 I Burahima mampemuleka i Isaki;

i Isaki mampemuleka i Yako;

i Yako mampemuleka i Yehuda ai poka-pokana;

3 i Yehuda mampemuleka i Peres ai i Sera, lako si Tamar;

i Peres mampemuleka i Hesron;

i Hesron mampemuleka i Ram;

4 i Ram mampemuleka i Aminadab;

i Aminadab mampemuleka i Nahason;

i Nahason mampemuleka i Salmon;

5 i Salmon mampemuleka i Boas, lako si Rahab;

i Boas mampemuleka i Obed, lako si Rut;

i Obed mampemuleka i Isai;

6 ai i Isai mampemuleka i Datu Daudi.

Mepuu lako si Datu Daudi dongka i karatawanira toYahudi i kota Babeli, eimo sanga nu ulububu ni Yesu:

I Daudi mampemuleka i Salomo lako i towawine ni Uria;

7 i Salomo mampemuleka i Rehabeam;

i Rehabeam mampemuleka i Abia;

i Abia mampemuleka i Asa;

8 i Asa mampemuleka i Yosapat;

i Yosapat mampemuleka i Yoram;

i Yoram mampemuleka i Usia;

9 i Usia mampemuleka i Yotam;

i Yotam mampemuleka i Ahas;

i Ahas mampemuleka i Hiskia;

10 i Hiskia mampemuleka i Manase;

i Manase mampemuleka i Amon;

i Amon mampemuleka i Yosia;

11 i Yosia mampemuleka i Yekonya ai pokana sira.

I tempo etu toYahudi ratawani sira i kota Babeli.

12 Mepuu lako i karatawanira toYahudi i kota Babeli dongka i karapoanakana i Yesu, eimo sira sanga nu ulububu ni Yesu:

I Yekonya mampemuleka i Sealtiel;

i Sealtiel mampemuleka i Serubabel;

13 i Serubabel mampemuleka i Abihud;

i Abihud mampemuleka i Elyakim;

i Elyakim mampemuleka i Asor;

14 i Asor mampemuleka i Sadok;

i Sadok mampemuleka i Akim;

i Akim mampemuleka i Eliud;

15 i Eliud mampemuleka i Eleasar;

i Eleasar mampemuleka i Matan;

i Matan mampemuleka i Yako;

16 i Yako mampemuleka i Yusupu tomoane ni Maria.

I Maria etumo anu mampoanaka i Yesu anu rauli i Kerisitu.

17 Mewali, mepuu lako si Burahima dongka si Daudi, sampulu iba lapi ulububu ni Yesu. Mepuu lako si Daudi dongka i karatawanira toYahudi i kota Babeli, sampulu iba lapi mbui. Ai mepuu lako i karatawanira toYahudi i kota Babeli dongka i karapoanakana i Yesu Kerisitu, sampulu iba lapi mbui.

Tunturaka karapoanakana i Yesu

(Luk. 2:1-7)

18 Eimo tunturakana karapoanakana i Yesu Kerisitu. Tempo ni Maria tina ni Yesu mombepepambolii mani ai i Yusupu, aminamo mampaiwoto lako i kuasa nu Inosa Magali, lako baria mani sira mosamboko. 19 I Yusupu anu mombepepamboliimo ai i Maria, tau anu manoto pangkeniakana. Etumo mpane nauli nu rarana, “Ina kubotuki ngkandii ia”, lawi baria naunde mopakaea i Maria i lio nu tau wori. 20 Tongo ni Yusupu mampepekiri ewa etu, malaeka ni Pue dongka si ia i rara nu pangipina, mangulika ia, “Yusupu, pemulea ni Datu Daudi! Inee iko maeka mampotombika i Maria, lawi Anakoi anu napaiwoto etu mewali lako i kuasa nu Inosa Magali. 21 Ina moana ia sadua Anakoi tomoane. Anakoi etu, sangangaa nusanga ‘i Yesu’,^a lawi Ia anu ina mosorema tauNa lako i dosara.”

22 Ope-ope etu mewali bona tepabukei apa anu nauli ni Pue mampoliungi nabiNa ni banimpia:

23 “Sadua anantowawine ina mampaiwoto,

ai moana sadua tomoane.

Anakoi etu ina rasanga Imanuel.” (Yesaya 7:14)

Imanuel lempona, “I Pue Ala mamporangai kita.”

24 Roo awetu mematamo i Yusupu, napeulai mpuumo apa anu naulika ia nu malaeka ni Pue Ala etu. Mewali nasambokomo i Maria, 25 agaiana baria mani sira sawoto-woto duduuna moana i Maria. Awetu rapoanakamo Anakoi etu, nasanga ni Yusupu Anakoi etu i Yesu.