Lukasi 3

I Yohane Toperiu mopatudu tau wori

1 Sampulu lima mpaemo i Kaisar Tiberius meparenta i kota Roma, i Pontiu Pilatu mewali gubernur i tana Yudea, ai i Herode Antipas meparenta i Galilea. I Pilipu, poka ni Herode, iamo anu meparenta i Iturea ai i Trakonitis. I Lisanias anu meparenta i Abilene. 2 Anu mewali Tadulako Menomba Mabose ni tempo etu, i Hanas ai Kayapas. Ni pae etu, i Pue Ala mongkoramo si Yohane ana ni Sakaria i pada lori. 3 Etumo mpane i Yohane molumakoimo boea-boea anu i wiwi ue Yarade, mobambari Ngkora ni Pue Ala i tau wori, nauli, “Penonsomode komi lako i dosami, ai maimode komi kuriu bona dosami naampuni ni Pue Ala.” 4 Pobago ni Yohane etu mopabukei apa anu teuki i rara nu sura ni nabi Yesaya anu manguli ewa ei:

Ria sadua tau anu mongare-ngare i pada lori, nauli:

“Ina dongka i Pue!

Nipatimama dalaNa!

Nipakanoto dala anu ina Napoliungi!

5 Ope-ope lembo ina ratabusingi,

ope-ope bulu ai anu mobulu-bulu ina rapasindere.

Anu molengko-lengko ina rapakanoto,

anu mokalo-kalo ina ratabusingi.

6 Roo awetu, ope-ope tau ina mangita

adiwa i Pue Ala mosore manusia lako i suku dosa.” (Yesaya 40:3-5)

7 Mawori tau lau mampoperiu si Yohane, ai naulika sira, “Komi anu madaa babeiami, mangkiada mpane mai komi? Ba nipenokamipae pensani komi tepawia lako i pesuku ni Pue Ala, anu ina morumpa komi i luwuna? 8 Ane monso-monso nipenonsoimo dosami, sangangaa nipatongawa i babeiami. Ai inee nauli nu rarami: ‘Kita ei pemulea ni Burahima. Baria kita ina nasuku ni Pue Ala.’ Etu baria mamonso! Nipetingai: Ane naunde ni Pue Ala, pemulea ni Burahima pensani Napopewali lako i watu ei. 9 Ina dongka pesuku ni Pue Ala ewa owase anu matimamamo i puu nu kau anu ina ratowo. Umba ngkida kau anu baria malompe wuana ratowo mpane ratende i rara nu apu.”

10 Tau wori mekune si Yohane, raulira, “Ane ewa etu, apamo anu sangangaa kibabei?”

11 Nasonoi ni Yohane, “Ima anu morontau baduna, santau sangangaa nakiraka i tau anu baria ria baduna. Awetu mbui, ima anu kepangkoni, sangangaa nagaakika tau anu baria kepangkoni.”

12 Ria mbui sira toperuru asele anu lau mampoperiu si Yohane. Mekune sira, raulira, “Guru, apamo anu sintoto kibabei?”

13 Nasonoi sira, “Inee komi mesingara asele melumbu lako i apa anu rapakanoto nu topoparenta.”

14 Ria mbui sira surudado anu lau mekune si ia, raulira, “Adiwa mbui ai kami? Apamo anu sintoto kibabei?”

Naulika sira, “Inee komi morampaki anu-anu nu tau ntanina, ai inee komi mopakaeka tau bona rakiraka komi doi. Saromi sangangaa niposondoka.”

15 Ni tempo etu, tau wori mampegia sira kadongka nu Datu Topesorema anu nadandi ni Pue Ala. Etumo mpane mombepekune sira, ba i Yohane etumo Datu Topesorema. 16 Nasonoi sira ni Yohane, “Ane aku, kuriu ngkida komi ai ue. Agaiana ria sadua anu ina mai anu melumbu kuasaNa lako si aku. Mogalo mokakasi petapu nu kandupaNa, baria aku sintoto. Ia anu ina moriu komi ai Inosa Magali ai apu. 17 Ia rapandiri ewa sadua tau anu motapisi gandu bona tepatani gandu anu moisi ai anu mawara. Gandu anu moisi napopesua i rara nu tambaru, mpane anu mawara natende i rara nu apu anu tuwu liliu.”

18 Ni tempona i Yohane mangkeni Bambari Malompe i tau wori, mawori mpangka patudu anu napadongka si sira. 19 Mokambaroka ia i Herode Antipas gubernur i tana Galilea, lawi i Herode mandoa i Herodias towawine nu powutuna, mpane napotombika. Baria etu ngkida anu nakambaroka ni Yohane, agaiana maisi mani mbui babeiana anu madaa ntanina. 20 Agaiana i Herode, baria mopawia babeiana anu madaa etu. Natambaida ante motudu surudadona bona i Yohane rasokora mpane ratarunggu.

I Yesu nariu ni Yohane

(Mat. 3:13-17; Mrk. 1:9-11; Yoh. 1:32-34)

21 Lako baria mani i Yohane ratarunggu, mawori tau lau si ia bona rariu. I Yesu lau mbui mampoperiu si Yohane. Awetu roomo i Yesu rariu, ni tempona mekakae, tebungkasimo langi, 22 ai Inosa Magali mendolumo si ia ewa tosi manggebodo. Ai ria sambua wotu lako i suruga mai anu manguli, “Ikomo AnaKu anu Kupokakaia, ai Kupokatono.”

Ulububu ni Yesu

(Mat. 1:1-17)

23-38 Kira-kira tolu mpulu mpaemo tinuwuNa, napepuumo ni Yesu pobagoNa anu nakira ni Pue Ala si Ia. Mangula pesumbaa pekiri nu tau, i Yesu iamo ana ni Yusupu,

I Yusupu ana ni Eli,

i Eli ana ni Matat, i Matat ana ni Lewi,

i Lewi ana ni Malki, i Malki ana ni Yanai,

i Yanai ana ni Yusupu, i Yusupu ana ni Matika,

i Matika ana ni Amos, i Amos ana ni Nahum,

i Nahum ana ni Hesli, i Hesli ana ni Nagai,

i Nagai ana ni Maat, i Maat ana ni Matika,

i Matika ana ni Simei, i Simei ana ni Yosek,

i Yosek ana ni Yoda, i Yoda ana ni Yohanan,

i Yohanan ana ni Resa, i Resa ana ni Serubabel,

i Serubabel ana ni Sealtiel, i Sealtiel ana ni Neri,

i Neri ana ni Malki, i Malki ana ni Adi,

i Adi ana ni Kosam, i Kosam ana ni Elmadam,

i Elmadam ana ni Er, i Er ana ni Yesua,

i Yesua ana ni Elieser, i Elieser ana ni Yorim,

i Yorim ana ni Matat, i Matat ana ni Lewi,

i Lewi ana ni Simeo, i Simeo ana ni Yehuda,

i Yehuda ana ni Yusupu, i Yusupu ana ni Yonam,

i Yonam ana ni Elyakim, i Elyakim ana ni Melea,

i Melea ana ni Mina, i Mina ana ni Matata,

i Matata ana ni Natan, i Natan ana ni Daudi,

i Daudi ana ni Isai, i Isai ana ni Obed,

i Obed ana ni Boas, i Boas ana ni Salmon,

i Salmon ana ni Nahason, i Nahason ana ni Aminadab,

i Aminadab ana ni Admin, i Admin ana ni Arni,

i Arni ana ni Hesron, i Hesron ana ni Peres,

i Peres ana ni Yehuda, i Yehuda ana ni Yako,

i Yako ana ni Isaki, i Isaki ana ni Burahima,

i Burahima ana ni Tera, i Tera ana ni Nahor,

i Nahor ana ni Serug, i Serug ana ni Rehu,

i Rehu ana ni Peleg, i Peleg ana ni Eber,

i Eber ana ni Salmon, i Salmon ana ni Kenan,

i Kenan ana ni Arpaksad, i Arpaksad ana ni Sem,

i Sem ana ni Noho, i Noho ana ni Lamek,

i Lamek ana ni Metusala, i Metusala ana ni Heno,

i Heno ana ni Yared, i Yared ana ni Mahalaleel,

i Mahalaleel ana ni Kenan, i Kenan ana ni Enos,

i Enos ana ni Set, i Set ana ni Adama,

i Adama ana ni Pue Ala.