I Yesu rapoanaka i Beteleme
2
1 Ni tempo etu, Datu Mabose Agustus meparentai bona ope-ope tau i sumalele kadatua Roma, rauki sangara bona rainsani kaworira. 2 Poimba nu tau anu mpolinguruna ei, rapopolumako ni tempona i Kirenius mewali gubernur i tana Siria. 3 Ope-ope tau lau mampopeuki sangara sadua-sadua, i boea nu tomanara.4-5 Awetu mbui i Yusupu mangokamo lako i kota Nasare simbela-mbela ai i Maria sampomanuna, anu tongona mampaiwoto. Mangoka sira lako i tana Galilea, mempanai lau i tana Yudea monontosi kota Beteleme, i tana karapoanakaana i Datu Daudi ni banimpia. Ni se etu, i Yusupu mampopeuki sangana, ai i Maria sampomanuna lawi pemulea ni Daudi ia. 6 Kadongkara i Beteleme, dongkamo tempona i Maria moana. 7 Moanamo ia sadua tomoane, anana anu torapowutu mpii. Anana etu nalempingi ai bana bou anu rapatimamara amimo, mpane nadampa i rara pangkonia nu binata, lawi ni se etu bariamo ria tombi anu pensani rapearii.
Toporewu ai malaeka
8-9 Gompi i kota Beteleme, ria basangkia toporewu anu mokampai dimbara i pada. Ungangkidamo dongka sadua malaeka ni Pue Ala i olora, ai peawa ni Pue Ala mowangkasi sira etumo mpane maeka sira. 10 Naulika sira nu malaeka etu, “Inee komi maeka, lawi mai aku mangkeni bambari malompe si komi, bambari anu rapokatono nu ope-ope tau. 11 Kawengi ei i kota ni Datu Daudi, rapoanakamo sadua Topesorema anu mangkeni katuwu malompe si komi, iamo i Kerisitu,a Pueta. 12 Eimo katongawaana bona niinsani kamonsona pololitaku: Ina nisumba sadua analei anu ralempingi ai bana bou, ai radampa i rara nu pangkonia ba panginua nu binata.”
13 Toporewu aretu, ungangkidamo raitara mawori malaeka simbela-mbela ai malaeka anu mpolinguruna ni mpongone. Malaeka aretu, motoia sira i Pue Ala, raulira:
14 “Motoiamo kita i Pue Ala anu i suruga!
Tau i dunia anu napokatono ni Pue Ala
ina mansumba sira kalompe nu katuwu.”
15 I pesola nu malaeka aretu lau i suruga, mogombomo sira toporewu aretu, raulira, “Laumo kita i Beteleme mampeita apa anu mewali anu napadongka ni Pue si kita ni mpongone.” 16 Awetu roomo sira mogombo, kasaliu lau sira mampomberumpaka i Maria ai i Yusupu ai analei etu, anu radampa i rara nu pangkonia ba panginua nu binata. 17 Awetu raitara analei etu, rapadongkaramo apa anu naulika sira nu malaeka kono si Ia. 18 Tingkara sira ope-ope tau anu mangepe lolita nu toporewu aretu. 19 Agaiana napairara ai napepekiri liliu ni Maria, ope-ope anu mewali etu.
20 Roo awetu, toporewu aretu mesolamo sira, ai tongora molumako motoia sira ai mopakabose sira i Pue Ala, lawi ope-ope anu raepera ai anu raitara monso-monso mewali, ewa anu naulika sira nu malaeka.
Analei etu rakeni i Tombi ni Pue Ala
21 Awetu walu eomo tinuwuNa, analei etu ratindi mangula ada nu toYahudi. Mpane ni tempo etu, rasanga Ia i Yesu mangula lolita nu malaeka lako baria mani nakantimika nu tinaNa.
22-24 Tempona matoangkamo i Maria, mangula ada agamara anu teuki i Atura ni Musa,b rakenira i Yesu lau rasusura i Tombi ni Pue Ala i Yerusale. Rakenira mbui popenombara ewa anu tepakanotomo i rara Atura ni Musa, iamo samboko tosi tokuku ba rombaa tosi manggebodo. Teuki mbui i rara Atura ni Musa, ewa ei, “Ope-ope anakoi tomoane anu torapowutu, sangangaa rasusu si Pue Ala bona mewali tauNa.”
I Simeo ai i Hana
25-26 I Yerusale, ria sadua tau anu rasanga i Simeo. I Simeo etu, iamo tau manoto anu mengkoru si Pue Ala, ai anu mampotuu kaina dongkana tempona i Pue Ala mopawia toSaraeli. Ai naporangai ia Inosa Magali anu manguli kabariana mani ina mamate ane baria mani ia mangita Datu Topesorema anu nadandi ni Pue Ala. 27 I Simeo etu nakenimo nu Inosa Magali mesua i Tombi ni Pue Ala i tempo ni Yusupu ai Maria mangkeni i Yesu rasusu si Pue Ala mangula Atura ni Musa. 28 Naalamo anakoi etu, naawi mpane motoia ia i Pue Ala, nauli:
29 “O Pue, ei-ei bariamo mangkia-ngkia ane mamate aku.
Matono raraku, lawi tepabukeimo dandiMu.
30 Niitaku mpuumo Datu Topesorema anu lako si Iko Pue,
31 anu Nupasilolongaka ope-ope tau.
32 Datu Topesorema etu ewa pewangka
anu ina mowangkasi rara nu tau anu baria sira toSaraeli, bona rainsanira Iko, Pue.
Ai Ia etu ina moparia pebila
si kami tauMu, toSaraeli.”
33 Tingkaramo i Maria ai i Yusupu mangepe pololita ni Simeo kono i anara. 34 Roo awetu, i Simeo mowati sira mpane mangulika i Maria tina nu anakoi etu, “Nakeningkadongkanamo Anamu ei, mawori toSaraeli ina mansumba pesuku, agaiana mawori mbui tau anu ina Napawia lako i pesuku. Ia mewali tanda lako si Pue Ala, mewali pepopainga i manusia i kamasalara, agaiana ina mawori tau moewa Ia, 35 duduuna tongawa apa anu ria i rara nu pekirira. Iko Maria, ina narumpa kapari. Ina maruminsi kawiorana nu raramu, ewa nabelai guma.”
36-37 I Tombi ni Pue Ala, ria mbui ni se etu sadua nabi towawine. Sangana i Hana, ana ni Fanuel, pemulea ni Aser. I Hana etu, walu mpulu iba mpaemo tinuwuna. Ni banimpia motombimo, agaiana pitu mpae ngkida lako ni se etu, namatemo tomoanena. Mepuu lako ni tempo etu, bemba ia ai meari liliu i Tombi ni Pue Ala. Eo-eona ai wengi-wengina i Hana menomba si Pue Ala, mekakae ai mopuasa. 38 Awetu naita i Yesu i Tombi ni Pue Ala, nauli maisi kalompena si Pue Ala, mpane mampololita kono i Anakoi etu, i ope-ope tau anu tongora mampegia karapawiara tumpu kota Yerusale lako i iwalira.
Mesola i Nasare
39 Awetu i Yusupu ai i Maria roomo mampopolumako ope-ope atura mangula Atura ni Musa, mesolamo sira lau i kota Nasare i tana Galilea. 40 Anara etu, kalalaua mabose ai kalalaua maroso. Melumbu katopaNa ai kalompeNa, ai nawati Ia ni Pue Ala.
I Yesu i Tombi ni Pue Ala
41 Pae-paena, tina ai tuama ni Yesu lau sira i Yerusale mampomabose eo anu rapomabose nu toYahudi, anu rasanga Eo Posusa Pasa.c 42 Sondomo sampulu rompae tinuwu ni Yesu, laumo sira i posusa etu ewa saweweina. 43 Liumo eo mabose etu, mesolamo sira lau i kotara. Agaiana i Yesu baria meula si sira. Ria mani Ia i Yerusale, agaiana baria rainsani nu tomanana. 44 I pesolara etu, rapenokara ba ria mboto Ia simbela-mbela ai rangara sampopolumakoara. Saeoamo sira molumako, lako rakadelorada i rangara ai i pokara. 45 Nakeningkabariana rasumbara, mesola mpesola sira lau i Yerusale mangkadelo Ia. 46 Tolu eomo rakadelora, lako rasumbarada i Tombi ni Pue Ala, tongoNa momeso i olo nu guru-guru agama, mampetingai ai mampepekune si sira. 47 Ope-ope tau anu mangepe pololitaNa manguli, “Mapande mpuu nu Anakoi etu!” 48 Awetu tomanaNa mangita Ia, rapotingkarara. Etumo mpane nauli nu tinaNa, “Anaku, mangkiada mpane Nubabei ewa ei? Aku ai tuamaMu, mapari raraki mangkadelo Iko!”
49 Nasonoi sira, “Mangkiada mpane nikadelo aku? Bariapae niinsani, Aku sangangaa ria i rara nu tombi nu TuamaKu?” 50 Agaiana baria rainsanira lempo nu lolitaNa.