I Yesu mopakaosa sadua batua nu tadulako surudado toRoma
7
1 Awetu roomo i Yesu mololita i tau wori, laumo ia i kota Kapernaum. 2 I kota etu, ria sadua tadulako nu surudado toRoma. Ria sadua batuana anu napokakaia mpii, batuana etu maruminsi kaduana ai ina mamate. 3 Awetu niepe nu tadulako etu kariana i Yesu i rara nu kotana, natudumo sira basangkia totomanara toYahudi lau merade tulungi si Yesu, bona mai mopakaosa batuana. 4 Kadongkara si Yesu, merade tulungi mpii sira si Yesu, raulira, “Tadulako ei, sintoto Nutulungi, 5 lawi ia mampokaasi kita toYahudi, ai iamo anu mokira doina rapopowangu tombi penombaaki.” 6 Lako ni se etu, laumo i Yesu simbela-mbela ai sira.Gompimo i Yesu i tombi nu tadulako etu, tadulako etu motudumo basangkia rangana lau mampomberumpaka i Yesu bona rapadongkara tewaina anu manguli, “Tua, baria Iko paraluu mai i tombiku, lawi baria aku sintoto modoko Iko i tombiku. 7 Ai maingu aku lau si Iko, lawi baria aku sintoto mampomberumpaka Iko. Nauda santepo ngkida pololitaMu Nuuli, batena maosa batuaku. 8 Ewa aku ei, ria toiwongkoku ai ria mbui toiwoiku. Ane kuposawaaka sadua surudadoku, kuulika: ‘Lau iko!’ Sangangaa lau ia. Ane kuronde surudadoku anu ntanina: ‘Mai iko!’ Sangangaa mai ia. Ane kuulika batuaku: ‘Babei etu!’ Sangangaa nababei.”
9 Tingkara i Yesu mampetingai pololita nu tadulako etu. Etumo mpane mampembalilingi Ia tau wori anu meula si Ia, Naulika sira, “Mabose mpuu pepotuu nu tau ei! Nauda i toSaraeli, baria mani ria sadua Kusumba anu mabose pepotuuna ewa tau anu baria toYahudi ei.” 10 Roo awetu, mesolamo sira ranga nu tadulako etu lau i tombina. Nisumbara, maosamo batua anu madua etu.
I Yesu mopatuwu mpesola sadua anantomoane
11 Baria masae lako ni se etu, laumo i Yesu i kota anu rasanga Nain. TopeguruNa ai tau wori anu ntanina lau mbui sira simbela-mbela ai Ia. 12 Gompimo sira i boboka bente kota, raitara sadua tomate anu rakowa lau i raoa kota. Tomate etu, sadua anantomoane, ana sadudua nu sadua tobemba. Maisi tumpu kota lau mamporangai tinana. 13 Awetu naita ni Yesu towawine etu, maasi raraNa, mpane Naulika, “Ineemo iko motumangi!” 14 Nagompilisimo popakowaa tomate etu, mpane Napetui. Mengkaroomo sira tau anu mokowa. Nauli ni Yesu, “Anantomoane! Pengkawangumode!” 15 Tuwu mpesolamo anantomoane anu mamate etu. Kasaliu momeso ia mpane mololita. Nauli ni Yesu i tina nu anantomoane etu, “Tina, eimo anamu.”
16 Tau anu mangita apa anu mewali etu, maekamo sira ope-ope, mpane mepuumo sira motoia i Pue Ala, raulira, “Sadua nabi anu tepakabose mpii ria i olota! Dongkamo i Pue Ala si kita tauNa.” 17 Bambari kono i popatuwu mpesola ni Yesu anantomoane etu, tesawukamo i sumalele tana Yudea ai i ope-ope boea ai kota anu gompi.
I Yesu ai i Yohane Toperiu
18 Topeguru ni Yohane Toperiu mopadongka si Yohane ope-ope anu nababei ni Yesu. Etumo mpane i Yohane moronde rodua topeguruna, 19 naulika sira, “Laumo komi si Yesu mpane nipekune: ‘Ba Iko mpuumo Datu Topesorema anu nadandi ni Pue Ala? Ba ria mani anu ntanina anu kipegia?’”
20 Lau mpuumo sira topeguru ni Yohane anu rodua etu, raulikara i Yesu, “I Yohane Toperiu motudu kami mai si Tua mampekune, ba Iko mpuumo Datu Topesorema anu nadandi ni Pue Ala? Ba ria mani anu ntanina anu kipegia?”
21 Ni tempo etu mbui, i Yesu mopakaosa saki nu tau wori anu madua, Napopeloso seta lako i tau anu napesuangi, mpane Napakaosa tau anu mabilo bona meita sira. 22 Mewali, Nasonoi ni Yesu i topeguru ni Yohane, Nauli, “Pesolamode komi, mpane nipetumbuika i Yohane apa anu niitamimo ai anu niepe: Anu mabilo meitamo, anu mapalu molumakomo, anu ketangga maosamo, anu mabongo meepemo, tau anu mamate tuwu mpesolamo, ai Bambari Malompe tebambarimo i tau anu mesiasi katuwura.a 23 Matono mpuu sira tau anu baria bata-bata rarana mepotuu si Aku.”
24 I pesola nu tudua ni Yohane Toperiu etu, napepuumo ni Yesu mololita i tau wori kono si Yohane, Nauli, “Apa tunggaiami lau i pada lori ni banimpia? Ba mampenoka ngkida komi mangita owo anu nawui nu pambui wilau wimai? Baria!b 25 Mewali, apada anu nipenoka lau nipeita? Ba mampenoka komi mampeita tau anu merae sampina? Baria mbui, lawi tau anu merae pesampira ai anu pebuku katuwura meari ngkida sira i tombi nu datu. 26 Mewali, apada anu nipenoka lau nipeita? Ba mampenoka komi mampeita nabi? Ane awetu peundeami, mamonso mpuu i Yohane sadua nabi. Agaiana Kuulika komi, ia melumbu lako i nabi-nabi anu ntanina. 27 Lawi i Yohane etumo, anu natunggai i rara Sura Ngkora Magali anu manguli ewa ei:
‘Eimo tau anu Kutudu moilodo,
bona mopatimama dalaMu lako baria mani Iko Kutudu.’” (Maleaki 3:1)
28 Mpane nauli mbui ni Yesu, “Bona niinsani! Lako i ope-ope tau anu rapoanaka dunia ei, baria ria sadua anu melumbu kabosena katuwuna lako si Yohane Toperiu. Mogaloda sadua tau anu tepakoi katuwuna i rara peparenta ni Pue Ala, melumbu kabose nu katuwuna mpane i Yohane Toperiu.”
29 Lolita ni Yesu etu rapetingai ope-ope tau, tepesua toperuru asele. Tau wori etu mampokonomo kamonsona ope-ope tunggaia ni Pue Ala, lawi roomo sira mampoperiu si Yohane. 30 Agaiana toParisi ai guru-guru agama mosapuaka sira tunggaia ni Pue Ala si sira, lawi baria sira mampoperiu si Yohane.
31-32 Ai nauli mbui ni Yesu, “Tau anu tuwu ei-ei, pensani rapandiri ewa anakoi anu mowadi-wadi i pobalu-balua, anu santobu raulira masisimbuku i santobuna:
‘Kipotawuika komi tulali,
agaiana baria komi madota matono-tono,
kipoduluaka komi ai dulua nu kawiora rara,
agaiana baria komi madota motumangi.’
33 Lawi i Yohane Toperiu mai, baria ia mangkoni roti, ai baria ia manginu anggoro, etumo mpane niulika: ‘Ia napesuangi nu seta!’ 34 Mpane Ana Manusia, dongka manginu ai mangkoni Ia. Agaiana nisapuaka mbui Ia, niuli: ‘Peita! Topesioro, tau malangu, ranga nu toperuru asele ai tomadosa!’ 35 Agaiana kamatopa lako si Pue Ala, tongawa i rara nu katuwu nu tau anu modoko.”
Sadua towawine mobasaika lana anu mawongi si Yesu
36 Ria sadua toParisi, sangana i Simo, anu moronde i Yesu mangkoni i tombina. Lau mpuumo i Yesu i tombina, mpane momeso mangkoni. 37 I rara nu kota etu, ria mbui sadua towawine anu paka mampobalu wotona. Awetu naepe i Yesu ria mangkoni i tombi nu toParisi etu, laumo ia mangkeni sabotolo lana wongi anu masuli mpii balukina. 38 Maimo towawine etu gompi i paa ni Yesu. Maruminsi potumangina, mewali masii paa ni Yesu ai ue matana. Roo awetu, nabolesi wuluana napopoparisi ue matana i paa ni Yesu mpane naiki, ai nabasaika ai lana anu mawongi.
39 Awetu naita nu toParisi anu moronde i Yesu mangkoni i tombina, babeia nu towawine etu, nauli nu rarana, “Ane tau ei monso-monso mpuu Ia sadua nabi, sangangaa Nainsani kaimana towawine anu mampetui Ia, ai sangangaa Nainsani mbui towawine dou tuwu i rara dosa.”
40 Nauli ni Yesu i toParisi etu, “Simo ria anu Kupenoka Kuulika iko.”
Nauli ni Simo, “Guru, ulimode.”
41 Nauli ni Yesu, “Ria rodua tau anu moinda i sadua tau anu mokiraka sira doi rapebolo. Inda nu sadua lima atu doi pera, ai inda nu tau sadua lima mpulu doi pera ngkida. 42 Nakeningkabariana rabukura mobaiari indara, nauli nu tau anu mokiraka sira doi etu: ‘Bariamo paraluu nibaiari indami.’ Mewali, lako i tau anu rodua etu, ima anu ina melumbu asina i tau anu mokiraka sira doi rapebolora?”
43 Nasonoi ni Simo, “Mangula pampekiriku, tau anu maisi indana si ia.”
Nauli ni Yesu, “Mamonso pesonomu.” 44 Roo awetu, i Yesu mototoki towawine etu, mpane mololita si Simo, Nauli, “Peita towawine ei. KadongkaKu i se ei ni mpongone, baria Aku nupasilolongaka ue Kupopobakosi paaKu. Agaiana towawine ei mobakosi paaKu ai ue matana, mpane naparisi ai wuluana. 45 Iko, baria Aku nuiki. Agaiana towawine ei baria ia mengkangkaroo moiki liliu paaKu mepuu i kadongkaKu ni mpongone. 46 Iko, baria mowaloingi wooKu ai lana.c Agaiana towawine ei, mobasaika paaKu ai lana anu mawongi. 47 Etumo mpane Kuulika iko: Kamaasina anu mabose etu, mopatongawa dosana anu mabose teampunimo. Ane tau anu saudi dosana raampuni, saudi ngkida mbui asina.”
48 Roo awetu, nauli ni Yesu i towawine etu, “Teampunimo dosamu.”
49 Etumo mpane mololitamo sira tau anu mangkoni simbela-mbela ai Ia, raulira sadua ai sadua, “Imada Tau ei, mpane Nabuku moampuni dosa?”
50 Lako ni se etu, nauli ni Yesu i towawine etu, “Nakenimpepotuumu si Aku, etumo mpane tepawiamo iko lako i suku dosamu. Mesolamo iko, kalompe ngkatuwu mamporangai iko.”