I Yesu mololita ai i Nikodemus
3
1 Ria sadua tau anu rasanga i Nikodemus. I Nikodemus etu sadua toParisi ai sadua lako i tadulako agama Yahudi. 2 Awetu kawengimo, mai ia mampomberumpaka i Yesu, naulika, “Guru, kiinsani Iko sadua guru anu natudu mai ni Pue Ala, lawi baria ria tau anu pensani mobabei tanda kuasa ewa anu Nubabei, ane baria naporangai ni Pue Ala.”3 Nauli ni Yesu, “Bona niinsani, ane sadua tau baria rapoanaka mpesola, baria pensani mewali tau ni Pue Ala i rara nu peparentaaNa.”
4 Nauli ni Nikodemus, “Adiwamo kapensanina tau anu matuamo rapoanaka mpesola! Pensanipae mesua mpesola i rara tai nu tinana mpane rapoanaka mpesola?”
5 Nauli ni Yesu, “Bona niinsani: ane tau baria rapoanaka ai uea ai Inosa ni Pue Ala, baria pensani mewali tau ni Pue Ala i rara nu peparentaaNa. 6 Manusia mansumba katuwu nu wotona lako i tomanana. Agaiana katuwu nu inosana nasumba lako i Inosa Magali. 7 Mewali, inee nupotingkara pololitaKu ei anu manguli: sangangaa rapoanaka mpesola komi. 8 Pandirina, pambui mewui, taepe pewuina, agaiana baria tainsani lako imba kamaiaana ai imba kalauaana. Ewa etu mbui tau anu rapoanaka mpesola ai Inosa ni Pue Ala.”
9 Nauli ni Nikodemus, “Adiwa pewalina etu?”
10 Nauli ni Yesu, “Iko sadua guru agama nu toSaraeli anu rabila. Mangkiada mpane baria nuinsani lempona pololitaKu ei? 11 Mamonso pololitaKu ei: kami manguli apa anu kiinsani, kipololita apa anu kiita. Agaiana baria niunde modoko pololitaki. 12 Kutuntuka komi apa anu mewali i dunia, agaiana baria nipotuu pololitaKu. Apa mani ane Kutuntuka komi apa anu mewali i suruga. 13 Baria ria sadua lako i dunia ei anu mengkaore lau i suruga. Batena Ana Manusia ngkida, anu manginsani apa anu mewali i suruga lawi Iamo anu dongka lako i suruga.
14 Ni banimpia i pada lori, i nabi Musa mobabei ule lako i tambaga,b mpane naboli i wuntu nu kau sangkau mpane natindaka, ewa etu mbui Ana Manusia sangangaa rapakawane i kau anu rapopombesape, 15 bona ima anu mepotuu si Ia, ina mansumba katuwu malompe anu baria mokasopoa.”
16 Nakeningkabosena asi ni Pue Ala i ope-ope tau i dunia, etumo mpane Nakiramo AnaNa saduduaNa. Ima ngkida anu mepotuu si Ia, baria maropu, agaiana mansumba katuwu malompe anu baria mokasopoa. 17 I Pue Ala baria motudu AnaNa mai i dunia bona mosuku manusia. Agaiana tunggaiaNa motudu mai AnaNa bona mosorema manusia lako i suku dosara.
18 Tau anu mepotuu i Ana ni Pue Ala, baria sira rasuku. Agaiana tau anu baria mepotuu, manotomo kaina nasukura ni Pue Ala, lawi baria sira mepotuu i Ana ni Pue Ala anu saduduaNa. 19 Eimo puuna karasukura: Lawi dongkamo Ana ni Pue Ala i dunia mangkeni pewangka i ope-ope tau. Agaiana manusia mangunde mani kadediana mpane lako i pewangka, lawi madaa babeiara. 20 Ope-ope tau anu mobabei daa, mokasisi sira kamabaa. Baria sira madota mogompilisi kamabaa bona ntena raita nu tau babeiara anu madaa. 21 Agaiana tau anu manoto babeiara, mai sira i kamabaa bona babeiara raita ai tongawamo pangulara peundea ni Pue Ala.
Sambela mani i Yohane Toperiu mampololita kono si Yesu
22 Roo awetu, i Yesu ai topeguruNa lau sira i tana Yudea. Meari sira i se etu basangkia eona, ai i Yesu moriu sira tau. 23-24 Ni tempo etu, i Yohane baria mani ratarunggu. Meriu ia i boea Ainon, baria karao lako i boea Salim, lawi i se etu maisi ue. Eo-eona tau lau mampoperiu si Yohane.
25 Sambela tempo, basangkia dua topeguru ni Yohane mombesesemo sira ai sadua toYahudi, mampombesesei ada pobakosi mangula agamara. 26 Laumo sira si Yohane, raulikara, “Guru, ba nukaendo mani ni banimpia sadua tau anu simbela-mbela ai kita i sambuteka ue Yarade anu nutudoka kami? Ei-ei meriu mbui Ia, ai ope-ope tau lau si Ia!”
27 Nauli ni Yohane, “Kita manusia, apapae anu ria si kita ane baria kita nakiraka ni Pue Ala. 28 Ni banimpia, niepe mpuumo pololitaku anu manguli: ‘Aku, baria Datu Topesorema. Ai tunggaiana kamaiku, mai aku mopatimama dalaNa.’”
29 Napaliliu ni Yohane pololitana, nauli, “Pandirina, i posusa pebua, tomoane anu rabua, iamo anu motumpui towawine anu rabua ai ia. Ane tau anu mamporangai tomoane anu rabua, meongko ngkida sira mombeawe mpane mampetingai wotu. Matono sira mangepe lolita nu tomoane anu rabua. Ewa etu mbui aku, aku ewa tau anu mamporangai tomoane anu rabua etu, ai maruminsi katonoku mangepe lolita ni Yesu. 30 Lawi Iamo anu sangangaa kalalaua mabose katuwuNa, ai akumo anu sangangaa kalalaua kokoi katuwuku.”
31 I Yesu iamo anu dongka lako i suruga, ai melumbu kuasaNa lako i sinangkana. Tau anu lako i dunia, batena manusia biasa, ai pololitara mopadongka apa anu mewali i dunia. Agaiana i Yesu lako i suruga, anu melumbu kuasaNa lako i sinangkana. 32 Mololita Ia kono i apa anu Naita ai anu Naepemo, agaiana baria ria anu mampotuu pololitaNa. 33 Tau anu mampotuu pololitaNa, mopangaku kamonsona i Pue Ala. 34 Lawi Iamo anu natudu ni Pue Ala mampololita pololitaNa, lawi i Pue Ala mokiraka Inosa Magali si Ia anu baria ria sokana.