I Yesu mopatongawa wotoNa i topeguruNa anu pitu
21
1 Roo awetu, i Yesu mopatongawa wotoNa sambela mani i topeguruNa, i wiwi Rano Tiberias.a Ewa ei tunturakana: 2 Basangkia topeguruNa mogulu sira i se etu, iamo i Simo Peturu, i Tomas anu rauli Toporopa, i Natanael lako i boea Kana i tana Galilea, ana ni Sebedeus anu rodua, mpane rodua topeguruNa anu ntanina. 3 Nauli ni Simo Peturu i rangana, “Lau aku mojala.”Rauli nu rangana, “Lau mbui kami.” Lau mpuumo sira mensawi i duanga ai mojala i rano. Agaiana i rarana sambengia etu, baria mogalo sambaa anu kono jalara.
4 Awetu ina mensibemo eo, i Yesu meongko i wiwi rano, agaiana baria rainsanira ka i Yesuna. 5 Naulika sira, “Poka-poka, ba ria baumi?”
Raulira, “Baria ria mogalo sambaa.”
6 Naulika sira, “Nitende jalami mbai i kuana nu duangami, batena ina morasi komi.” Motende mpuumo sira jalara, ai bariamo rabukura modii, lawi maisi mpuu bau anu ria i rarana.
7 Lako ni se etu, topeguru anu napokaasi ni Yesu mangulika i Peturu, “Dou mai i Pue!” Awetu naepe ni Peturu pololitana, naunsamo baduna (lawi baria ia mebadu), mpane mengkanawu i ue monangu lau i lorena. 8 TopeguruNa anu ntanina, i duanga liliu mani, modii jala anu buke bau lau i wiwi rano. Baria sira karao lako i lorena, kira-kira sangatu mete ngkida. 9 Awetu sira mendolu i lorena, mangitamo sira gate apu anu tuwu i se etu, ai i wongko apu ria bau ai ria mbui roti.
10 Naulika sira ni Yesu, “Keni mai basangkia mbaa bau anu lako nipakala.” 11 I Simo Peturu moduanga mpane modii jalana lau i lorena. Jala etu buke bau anu mabose: sangatu lima mpulu tolu mbaa kaisina. Agaiana nauda ewa etu kaisina, baria mbui masepa jala etu.
12 Nauli ni Yesu, “Maingkomode komi mangkoni.” Baria ria sadua topeguruNa anu pebai mekune si Ia, nauli, “Ima Iko?” Lawi manotomo i rarara ka Iana i Pue Yesu. 13 Laumo i Yesu mangala roti ai bau mpane Nakiraka sira. 14 Etumo katolu mbelana i Pue Yesu mopatongawa wotoNa i topeguruNa mepuu lako i katuwuNa mpesola.
I Yesu mololita si Peturu
15 Awetu roomo sira mangkoni, i Yesu mangulika i Simo Peturu, “Simo ana ni Yohane, ba melumbu pampokaasimu Aku lako i pampokaasi nu rangamu sira aretu si Aku?”b
Nauli ni Peturu, “Io, Pue. Nuinsani mboto ka kupokaasiMu.”
Nauli ni Yesu, “Ane awetu, nukadipuraka sira ana dimbaKu.”
16 Roo awetu, i Yesu mekunemo si Peturu karombelana, “Simo, ana ni Yohane, ba nupokaasi Aku?”
Nauli ni Peturu, “Io, Pue. Nuinsani mboto ka kupokaasiMu.”
Nauli ni Yesu, “Ane awetu, nukadipuraka sira dimbaKu.”
17 Lako ni se etu, i Yesu mekunemo i katolu mbelana, “Simo, ana ni Yohane, ba nupokaasi Aku?”
Mawiora rara ni Peturu, lawi i Yesu mekune i katolu mbelana ba napokaasi mpuu. Mewali, nauli ni Peturu, “Pue, Nuinsani sinangkana. Nuinsani ka kupokaasiMu.”
Nauli ni Yesu, “Ane awetu, nukadipuraka sira dimbaKu. 18 Bona nuinsani: i tempomu mani mangura, pekomu nuwewe ai komo, mpane lau iko imba ngkida peundeamu. Agaiana ane matomanamo iko saeona, ina nususu palemu rataka nu tau ntanina mpane rakeni iko lau i pearia anu baria nuunde.” 19 Ai lolita ni Yesu etu, mopakanoto adiwa i Peturu ina rapopate bona sanga ni Pue Ala rapomabose. Roo awetu, nauli mbuimo ni Yesu si Peturu, “Peulamode si Aku!”
I Yesu mampololita kono i topeguruNa anu sadua
20 Roo awetu, membalilimo i Peturu, naita sadua topeguru ni Yesu anu Napokaasi, meula ntaliku si sira. (TopeguruNa etu iamo anu momeso i tumbiri ni Yesu ni banimpia tongora mangkoni ni kawengi, anu mekune si Yesu: Nauli “Pue, imada anu ina mampobalu Iko?”) 21 Awetu naita ni Peturu topeguru ni Yesu etu, napekune si Yesu, “Pue, apa anu ina mewali i rangaku etu?”
22 Nauli ni Yesu, “Rapana Kuunde bona tuwu liliu ia duduuKu dongka i karombelana, baria paraluu nuinsani! Meula ngkimo iko si Aku.”
23 Lako ni se etu, tebambarimo i topeula ni Yesu, kabariana ina mamate topeguruNa etu. Agaiana baria nauli ni Yesu si Peturu topeguruNa etu tuwu liliu, kamonsona anu nauli ni Yesu si Peturu, “Ane Kuunde bona tuwu liliu ia duduuKu dongka i karombelana, baria paraluu nuinsani!”
24 TopeguruNa etu anu mangita sinangka anu mewali ai anu mopadongka pesabiki. Iamo anu mouki sura ei. Ai tainsani kamonsona lolita ei.
Kasopoa lolita
25 Maisi mani anu nababei ni Yesu, agaiana ane sinangkana anu Nababei etu rauki i rara nu sura, sumalele dunia ei baria sondo rapambolii sura etu.