I Timotiu meula si Paulu ai si Silas
16
1 I Paulu mopaliliu polumakoana lau i kota Derbe ai Listra. I kota Listra etu, ria sadua tomoane anu mepotuu si Yesu, sangana i Timotiu. Tina ni Timotiu, toYahudi anu mepotuu mbui si Yesu. Tuamana toYunani. 2 I Timotiu etu rabila nu ope-ope poka-pokana sampepepotuuna i kota Listra ai i Ikonium. 3 Peundea ni Paulu bona i Timotiu mamporangai ia, i polumakona mobambari Ngkora Magali. Etumo mpane i Timotiu natindi nsalaa mangula Atura ni Musa. Tunggaiana bona ntena ia rapakoi nu toYahudi, lawi ope-ope toYahudi i tana etu manginsani ka toYunanina tuamana. 4 Lako ni se etu, i Paulu ai rangana sira mangoka mbuimo sira. I ope-ope boea anu rapolumakoira, mopadongka liliu sira i tau anu mepotuu si Kerisitu apa anu rabotusi nu suro ni Pue Yesu ai tadulako ntanina i Yerusale, mpane mopatudu sira bona parenta-parenta anu rapakanotomo, rapeulaira. 5 Lako ni se etu, kalalaua marosomo pepotuu nu tau anu mepotuu si Kerisitu ai eo-eona kalalaua maworimo tau anu mepotuu.I Paulu mangita sambua pampatongawa i Troas
6 Inosa Magali baria mopaliu i Paulu ai i Silas mopadongka Ngkora ni Pue Ala i propinsi Asia. Etumo mpane tebalikimo tunggaiara, mewali laumo sira i tana Frigia ai Galatia. 7 Kadongkara i tompo nu tana Misia, ina pulo sira lau i tana Bitinia, agaiana Inosa Magali anu lako si Pue Yesu moombo sira bona inee sira lau i se etu. 8 Etumo mpane moliu sira i tana Misia mpane mendolu sira lau i boea Troas anu i wiwi nu tasi. 9 Ni tongo mbengi tongora maturu i Troas, i Paulu mangitamo sambua pampatongawa. Naita sadua tomoane anu lako i tana Makedonia anu meongko i liona, nauli si Paulu, “Powetamode mai i Makedonia. Nutulungi kowo kami!” 10 Awetu i Paulu roomo mangita pampatongawa etu, mangkadipurakamoa kami mpane maliga kami mangoka lau i tana Makedonia, lawi manoto si kami ka Natuduki ni Pue Ala mobambari Ngkora Magali i tau anu ria sira i se etu.
I Paulu i Pilipi, i Lidia mepotuu si Yesu
11 Mangokamo kami lako i Troas mensawi i kapala tasi lau i lewuto Samotrake, mpane ewa ineilena lau kami i kota Neapolis. 12 Roo awetu, mendolu kami lako i kapala tasi, mpane molumako kami lau i kota Pilipi. Kota Pilipi etu, iamo sambua kota anu mabose sangana i propinsi Makedonia anu raparenta nu toRoma. Meari kami i kota etu basangkia eona.
13 Ni eo penombaa nu toYahudi, lau kami i wiwi ue i raoa nu kota, lawi nipenokaki ria pearia nu toYahudi mekakae ni se etu. Basangkia towawine mai mogulu, etumo mpane momeso kami mpane mololita si sira. 14 Lako i olo nu towawine aretu, ria sadua towawine anu rasanga i Lidia lako i kota Tiatira. I Lidia etu, topobalu-balu bana anu masuli balukina, ai menomba ia si Pue Ala. I Pue Ala mopakanoto rarana, duduuna nadoko apa anu napatuduka ni Paulu. 15 Roo awetu, i Lidia ai ope-ope tau anu meari i tombina rariumo sira. Roomo sira rariu, i Lidia mobawaimo kami lau meari i tombina, nauli, “Ane niimba aku manoto i rara nu pepotuuku si Pue Yesu, laumo kita i tombiku.” Etumo mpane lau mpuumo kami i tombina mangula pamperadena.
I Paulu ai i Silas ratarunggu i Pilipi
16 Sambela tempo, kalauki i pekakaeaa nu toYahudi, mampomberumpaka kami sadua towawine anu batua katuwuna. Towawine etu paka napesuangi nu seta, ai nakeningka nakuasaina nu kuasa seta etu, pensani ia mopadongka apa anu ina mewali. Etumo mpane toiwongkona mansumba maisi doi. 17 I polumakoaki ai i Paulu, towawine etu meula liliu si kami, ai monganga-nganga liliu, nauli, “Tau arei tudua ni Pue Ala lako i suruga! Kamaira i se ei, mopadongkaka komi dala bona mansumba katesorema.” 18 I rarana basangkia eona, ewa etu liliu ngkida pololitana, duduuna maluta mpane marumpumo i Paulu mampetingai. Lako ni se etu, membalilimo i Paulu, nauli i anitu anu mampesuangi towawine etu, “I rara sanga ni Yesu Kerisitu, peloso lako si ia!” Mewali meloso mpuumo seta etu.
19 Roo awetu, marumpumo sira toiwongko nu towawine etu, lawi bariamo sira pensani mansumba doi lako si ia. Etumo mpane laumo sira mosoko i Paulu ai i Silas mpane radiira rakenira lau i pobalu-balua mampombelioka topoparenta. 20 Kadongkara i lio nu topoparenta nu toRoma, raulira, “Tau arei toYahudi anu mai sira mopakaguneo kotata ei. 21 Mopatudu sira tau ada anu mosisala ai aturata nu toRoma. Kita toRoma baria pensani modoko ba mampeulai ada ai patudura etu.” 22 Tau wori mbui meula mosalai sira. Mewali, topoparenta etu motudumo sira tau bona sampi ni Paulu ai i Silas rasepa-sepa mpane rarurugii sira. 23 Awetu roomo sira rarurugii kasaliu ratarunggu sira. Kapala nu topetarunggu ratudu mokampai lompe i Paulu ai i Silas. 24 Etumo mpane rapopesua sira i lonta nu petarunggua anu mbai taliku mpii, mpane paara rombali rapopesua i kau anu rakalolungi mpane rasilu.
25 Ni tongo mbengi, i Paulu ai i Silas mekakaemo sira mpane modulua motoia i Pue Ala. Tau ratarunggu anu ntanina mampetingai sira modulua. 26 Ni tempo etu, ungangkidamo mewali linu anu masimbuku duduuna meseli peongkoa tombi petarunggua mokale-kale. Mpane boboka tombi petarunggua tebungkasimo ai rante-rante anu rapoposilu ope-ope tau anu ratarunggu tepawia mbui. 27 Awetu kapala nu petarunggua etu malike ai naita ope-ope boboka nu petarunggua etu tebungkasimo, tingkara ia. Mewali nawukamo gumana ina menoo ia, lawi nipenokana melangkamo sira ope-ope tau anu ratarunggu. 28 Agaiana i Paulu mokambaroka ia lako i rara nu petarunggua, nauli, “Inee iko menoo, ei mboto kami ope-ope!”
29 Roo awetu, kapala nu topetarunggu etu mamperade sulo, mpane melangkamo ia mesua i rara nu petarunggua. Moradamo wotona molingkudu i lio ni Paulu ai i Silas, 30 mpane nakeni sira lau i raoa, naulika sira, “Tua, apa kowo anu sangangaa kubabei bona mansumba aku katesorema?”
31 I Paulu ai i Silas mesono, raulira, “Iko ai ope-ope tau anu i rara nu tombimu mepotuumo komi si Pue Yesu, bona mansumba komi katesorema lako si Pue Ala.” 32 Lako ni se etu, i Paulu ai i Silas mobambarimo Ngkora ni Pue i kapala nu topetarunggu, ai i ope-ope tau anu i rara nu tombina. 33 Mewali, ni kawengi etu kapala nu topetarunggu mobakosi belara. Mpane ni kawengi etu mbui ia ai ope-ope tau anu i rara nu tombina rariu sira. 34 Roo awetu, kapala nu topetarunggu etu mangkeni i Paulu ai i Silas lau i tombina, napakoni sira. Matono mpuu sira santombi etu, lawi mepotuumo sira si Pue Ala.
35 Ewa ineilena madondo topoparenta nu toRoma, motudu pulisi lau i petarunggua mangulika kapala nu topetarunggu, “Pawiamode tau anu rodua aretu anu rasoko ni wengi.” 36 Awetu naepe nu kapala nu topetarunggu parenta etu, naulimo si Paulu ai si Silas, “Ria parenta lako i topoparenta anu mangulika aku bona rapawia komi. Mewali, pensuwumode komi, ai malompe-lompe komi i dala.”
37 Agaiana nauli ni Paulu i pulisi aretu, “Kami ei toRoma mbui kami. Lako baria mani rapomeso-mesoka kara-karaki, rarurugiimo kami i lio nu tau wori mpane ratarunggu kami! Mpane ei-ei nipenoka nipopangoka ngkandii kami! Baria kiunde! Nuulika sira, sirada anu sangangaa mai mopawia kami.”
38 Mesolamo pulisi aretu mangkeni mpesola tewai ni Paulu i topoparenta. Awetu raepe nu topoparenta i Paulu ai i Silas etu toRoma mbui sira, maekamo sira. 39 Laumo sira merade ampu si Paulu ai si Silas, mpane raporangai sira lau i raoa nu petarunggua, raulira, “Kiperade mpii lambumo komi lako i kota ei.” 40 Mewali, lambu mpuumo i Paulu ai i Silas lako i petarunggua etu lau i tombi ni Lidia. I tombi ni Lidia mampomberumpakamo sira pokara sampepepotuura, mpane rapakaroso rarara. Roo awetu, lambumo sira mopalengi kota Pilipi.