Pogombo mabose i Yerusale
15
1 Sambela tempo, basangkia dua toYahudi lako i Yudea anu mepotuu si Pue Yesu lau sira i kota Antiokia. ToYahudi aretu mopatudu sira tau anu mepotuu si Kerisitu i Antiokia, raulira, “Ane baria komi ratindi mangula atura anu nakira ni Musa, batena baria komi mansumba katesorema!” 2 I Paulu ai i Baranaba mampombeseseka sira, moewa mpii patudura etu. Kasopoana, rabotusi bona i Paulu, i Baranaba, ai basangkia dua tau lako i jumaa i Antiokia lau mobambari kara-kara etu i suro ni Pue Yesu ai i tadulako-tadulako ntanina i Yerusale.3 Mewali, raporangai sira nu jumaa i Antiokia dongka i raoa nu kota Antiokia, mpane rapopangokara. Lako ni se etu, molumakomo sira lau i Yerusale. I polumakoara etu, i tana Fenisia ai Samaria, mampololita sira adiwa tau anu baria sira toYahudi mepotuumo sira si Yesu. Bambari etu mopakatono rara nu ope-ope poka sampepepotuura. 4 Kadongkara i Yerusale, radoko lompe sira nu jumaa ai suro ni Pue Yesu ai tadulako ntanina anu ria i se etu. I Paulu ai Baranaba motuntuka sira ope-ope anu nababei ni Pue Ala i polumakora ni banimpia mobambari Ngkora Magali i tana nu tau anu baria sira toYahudi.
5 Agaiana ria mbui sira basangkia dua toParisi anu mepotuumo si Yesu. Meongkomo sira tau aretu, raulira, “Tau anu baria sira toYahudi anu mepotuu si Yesu, sangangaa ratindi mpane ratudu mampeulai Atura ni Musa!”
6 Etumo mpane terusumo sira suro ni Pue Yesu ai tadulako-tadulako ntanina mampomeso-mesoka kara-kara etu. 7 Awetu masaemo sira mombesonoi, meongkomo i Peturu, nauli, “Poka-poka, niinsani mpuu apa anu mewali si aku. Basangkia mpaena naliu, Napelisi aku ni Pue Ala lako i olomi, mpane Natudu aku mobambari Ngkora ni Pue Ala kono si Yesu Kerisitu i tau anu baria sira toYahudi, bona bambari etu raepera ai rapotuura mbui. 8 Ai i Pue Ala anu manginsani rara nu tau sira, modoko tau anu baria sira toYahudi. Mopatongawa ka Nadokora tau aretu, Nakiraka sira Inosa Magali ewa anu mewali si kita ni banimpia. 9 Kita toYahudi ai sira anu baria sira toYahudi, baria Napopontani ni Pue Ala. Napakagali rarara lawi mepotuu sira si Yesu. 10 Mewali poka-poka, mangkiada mpane nipenoka moparia karumpu ni Pue Ala? Mangkiada mpane nipenoka mopakasusa sira ai maisi parenta anu mapari ai palia anu mantimi mpii? Mepuu i ulububuta ni banimpia duduuna dongka si kita ei-ei, baria tabuku mampeulai ope-ope parenta ai palia etu! 11 Kamonsona, mansumba kita katuwu malompe baria lako i pangulata parenta ai palia anu ewa etu, agaiana nakeningkabula rara ni Pue Yesu si kita. Awetu mbui si sira.”
12 Mewali mandiimo sira ope-ope tau anu terusu aretu, mpane mampetingai sira lolita ni Baranaba ai i Paulu kono i tanda kuasa anu rababei ai kuasa ni Pue Ala, i tau anu baria sira toYahudi. 13 Awetu i Baranaba ai i Paulu roomo mololita, i Yakobua mopadongkamo pololitana, nauli, “Poka-poka, nipetingai apa anu kuulika komi. 14 I Simo Peturu roomo mopadongka adiwa mpolinguruna i Pue Ala mampopetudoka adiwa asiNa i tau anu baria sira toYahudi. Ria sira anu Napelisi bona mewali tauNa. 15 Sintoto mpuu apa anu rauki amimo nu nabi-nabi ni banimpia, lawi ria teuki ewa ei:
16 Nauli ni Pue:
‘Roo awetu, ina mesola mpesola Aku.
Ina Kuwangu mpesola kadatua ni Daudi,
anu ewa tombi anu madungkamo,
mpane mopakalompeki anu mageromo,
mpane Kupakatogo mpesola,
17 bona ope-ope tau ntanina
anu baria sira toYahudi,
pensani mbui sira menomba si Aku,
lawi Kurondemo sira mewali tauKu.’
18 Awetumo panguli ni Pue anu mopakanoto tunggaiaNa ni banimpia.” (Amos 9:11-12)
19 Napaliliumo ni Yakobu pololitana, nauli, “Mewali, eimo pesumbaa nu pekiriku poka-poka. Inee kita mopakapari katuwu nu tau anu baria sira toYahudi anu mepotuu ai mengkoru si Pue Ala. 20 Aginamo tauki sambua sura mopatudu sira bona inee sira mangkoni pangkoni anu rapopenomba i anitu, inee sira mangkoni raa ai inee sira mangkoni bau binata anu baria ralaliki nsalaa raana. Mpane taulika mbui sira bona inee sira mobabei babeia anu merikati. 21 Lako i ope-ope Atura ni Musa, parenta anu basangkia aretu ngkida anu tapadongkaka sira, ntena sira mopakansandaa toYahudi. Lawi mepuu ni banimpia dongka ei-ei, toYahudi anu meari i boea-boeana mobasa Sura Atura ni Musa i eo-eo penombaara, i tombi penombaa. Mpane Atura etu rapatuduka ope-ope tau i boeara.”
Sura anu rapakatu i tau anu mepotuu si Kerisitu anu baria sira toYahudi
22 Roo awetu, suro-suro ni Pue Yesu ai tadulako ntanina ai ope-ope tau anu mepotuu si Kerisitu anu terusu i se etu, mampelisi sira basangkia dua rangara bona ratudu lau i Antiokia simbela-mbela ai i Paulu ai i Baranaba. Anu rapelisi aretu, rodua tomoane anu rabila nu poka-pokara sampepepotuura, sangara: i Silas ai i Yudasi anu rasanga mbui i Barsabas. 23 Sura anu rakeni nu suro anu rodua aretu, teuki ewa ei:
“Kami, suro ni Pue Yesu, ai tadulako nu jumaa i se ei, mopakatu kami sura ei si komi poka-poka sampepepotuuki anu baria komi toYahudi i kota Antiokia, ai i tana Siria ai Kilikia. Maisi tabea!
24 Ria kiepe basangkia dua tau lako si kami i se ei anu lau si komi mopakasawu ai mopakawuli komi i rara mpepotuumi ai pololitara. Mewali, bona niinsani: baria kami anu motudu sira. 25 Etumo mpane mogombo kami i se ei, mpane sampepekiri kami mampelisi basangkia dua rangaki anu kitudu lau si komi simbela-mbela ai i Baranaba ai i Paulu anu kipokaasi, 26 anu mosusumo sira katuwura si Pue Yesu Kerisitu nakenimpampopolumakora bago anu nakiraka sira ni Pue Ala. 27 Mewali, ei-ei kitudumo i Yudasi ai i Silas lau si komi. Sira etu ina mopadongkaka komi apa anu sintoto ai isi nu suraki ei.
28 Poka-poka, eimo pobotusi anu napomakono nu Inosa Magali, ai kipokono mbui. Kiulika komi bona inee komi rapakasusa ai mampopengaa parenta, agaiana batena ei ngkida anu paraluu kipadongkaka komi: 29 inee komi mangkoni pangkoni anu rapopenomba i anitu. Inee mangkoni raa, ai inee mangkoni bau binata anu baria ralaliki nsalaa raana. Ai inee sira mobabei babeia anu merikati. Ane nipakarao ope-ope babeia ei lako i katuwumi, mobabeimo komi anu malompe. Dongka i se eimo pololitaki.”
30 Awetu roomo sira mombetabe, tau anu iba aretu rapopangokamo sira lau i kota Antiokia. Kadongkara i Antiokia, raguluramo ope-ope topepotuu si Pue Yesu bona rakiraka sira sura anu rakenira. 31 Awetu roomo sura etu rabasa i tau wori, matono sira mpane tepalindomo rarara. 32 I Yudasi ai i Silas iamo rodua nabi anu mobambari Ngkora ni Pue Ala, masae sira mololita mopatudu poka-poka sampepepotuura bona mopakaroso rarara. 33 Meari sira basangkia eona simbela-mbela ai tau anu mepotuu si Kerisitu i Antiokia, mpane roo awetu i Silas ai i Yudasi rapopangokamo sira mesola lau i Yerusale. Rauli nu toAntiokia aretu, “Malompe-lompe komi i dala. Nipadongkaka kowo kami tabeaki si sira anu motudu komi mai.” 34 [Agaiana i Silas, napakanotomo saduduana bona meari liliu i Antiokia.]
35 I Paulu ai i Baranaba, masae saudi sira meari i Antiokia. Sira ai tau wori ntanina mepatudu ai mobambari Ngkora ni Pue i tau i se etu.
I Paulu ai i Baranaba mogaa
36 Lako ni se etu, nauli ni Paulu si Baranaba, “Mesolamo kita lau mosondaki poka-poka sampepepotuuta i ope-ope kota anu tapoliungi ni banimpia ni tempota mobambari Ngkora ni Pue, bona taita adiwa katuwura.”
37 I Baranaba mampenoka mangkeni i Yohane Markus i polumakoara etu, 38 agaiana nauli ni Paulu, “Baria malompe ia taporanga, lawi napalengi kita ni banimpia i tana Pampilia ai baria tetida mamporangai kita duduuna roo bagota.” 39 Mewali, mombesonoi i Paulu ai i Baranaba, duduuna mogaa sira. I Baranaba mangala i Markus naporanga, mpane mensawimo sira i kapala tasi lau i lewuto Siprus. 40 I Paulu mampelisi i Silas naporanga. Mpane poka-poka sampepepotuura i kota Antiokia mampekakaekamo sira bona i Pue Ala mokadipuraka sira i rara asiNa i tongo nu polumakoara, mpane mampopangokamo sira. 41 I Paulu ai i Silas mampolumakoi tana Siria ai Kilikia, mopakaroso rara nu tau anu mepotuu si Kerisitu anu ria i se etu.