Lolitaka Nu Suro 14

I Paulu ai i Baranaba i Ikonium

1 Apa anu mewali i kota Antiokia, etu mbui anu mewali i Ikonium. I Paulu ai i Baranaba lau i tombi penombaa nu toYahudi, mpane mobambari Ngkora Magali i tau anu terusu sira i se etu, duduuna mawori sira toYahudi ai tau anu baria sira toYahudi mepotuu si Yesu. 2 Agaiana toYahudi anu baria mepotuu mosuweki rara nu tau wori anu baria toYahudi, bona mokasisi sira tau anu mepotuu si Pue Yesu. 3 I Paulu ai i Baranaba meari basangkia kasaena i kota etu. Baria sira maeka mobambari bambari kono si Pue. Ai i Pue mokiraka sira kuasa mobabei tanda anu metingkarai bona manoto i ope-ope tau kamonsona Ngkora Magali anu rakenira. Ngkora Magali etu mampololita kabula rara ni Pue Ala anu mokira katuwu malompe i manusia.

4 Etumo mpane tumpu boea aretu baria sira sintuwu. Lawi ria sira anu mampetingai lolita nu toYahudi, ai ria mbui sira anu mampetingai lolita nu suro ni Pue Yesu. 5 Mewali toYahudi ai tau anu baria sira toYahudi, simbela-mbela ai tadulako-tadulakora, sintuwumo sira bona i Paulu ai i Baranaba rapopesiasi mpane rawatui. 6 Agaiana i Paulu ai i Baranaba manginsanida tunggaiara. Etumo mpane melangkamo sira lau i kota Listra ai Derbe i tana Likaonia ai i pearia-pearia anu gompi i se etu. 7 Ni se etu, mobambari mbui sira Ngkora Magali.

I Paulu rawatui i Listra

8 I kota Listra, ria sadua tomoane anu mapalu lako i karapoanakana. Momeso liliu ngkida ia, lawi baria maroso paana ai baria mpuu nabuku molumako. 9 Tau mapalu etu momesomo mampetingai i Paulu mololita. Awetu naita ni Paulu tau mapalu etu, nainsanimo kapensanina rapakaosa nakenimpepotuuna. 10 Etumo mpane nauli ni Paulu masisimbuku si ia, “Peongkomode!” Meongko mpuumo tau anu mapalu etu, mpane kasaliu melumpa ai molumako.

11 Awetu raita nu tau wori apa anu nababei ni Paulu, monganga-nganga sira i rara nu basara, iamo basa Likaonia, raulira, “Eimo anitu-anitu anu tapenombai, mendolu mai i dunia, ewa lense nu manusia!” 12 Roo awetu, i Baranaba rasangara i Seus, sanga nu datu anitura. Mpane i Paulu rasangara i Hermes, anitura anu paka mobambari tewai lako i anitu-anitura, lawi i Paulu anu paka mololita. 13 Ni tempo etu, ria sadua tadulako menomba topobalia, bagona mosusu popenomba i tempona topoanitu mosusu popenombara i anitu Seus, i tombi penombaa Seus i raoa nu kota. Topobalia etu mangkeni basangkia mbaa japi tuama ai bunga-bunga lau i boboka bente nu kota simbela-mbela ai tau wori. Tunggaiara mosambale japi etu, bona mampenombai sira i Paulu ai i Baranaba.

14 Awetu raepe nu suro ni Pue Yesu anu rodua aretu apa anu ratunggai nu tau wori, mosepa-sepamo sira sampira, lempona kabariana raundera tunggaia nu tau wori aretu, mpane melangka sira lau i olo nu tau wori, mololita sira masisimbuku, raulira, 15 “Oo! Apada anu nibabei ei? Kami ei, manusia biasa mbui kami ewa komi. Mai kami mangkeni Bambari Malompe si komi, bona nipawia penombami i anitu anu baria mobundu, mpane menomba komi si Pue Ala anu tuwu, lawi Iamo anu mampopewali langi, dunia, tasi ai sinangka isina. 16 Ni banimpia, i Pue Ala mopatumbeika rara nu manusia mangula peundeara saduduara. 17 Agaiana nauda ewa etu, baria malinga raraNa mokiraka tanda-tanda anu mopakanoto kaimana Ia. Nababeika komi apa anu malompe, Nakiraka komi uda lako i langi, Napopowua tuda-tudami i tempona, Nakiraka komi pangkoni, mpane Nakiraka komi katono rara.” 18 Naudapae ewa etu pololita ni Paulu ai i Baranaba i tau wori aretu, agaiana mapari mani raepera moombo tau wori aretu, bona ntena sira mangkeni popenombara si Paulu ai Baranaba.

19 Baria masae lako ni se etu, basangkia dua toYahudi lako i kota Antiokia ai Ikonium dongka i boea Listra. ToYahudi aretu mosuweki rara nu tau wori i Listra bona lau sira mowatui i Paulu. Awetu roomo ia rawatui, wotona radii lau i raoa nu kota mpane rapalengira i se etu, lawi rapenokara mamatemo ia. 20 Agaiana tongo nu tau anu mepotuu si Kerisitu i Listra meongko motoleliki i Paulu, ungangkidamo mengkawangu ia, mpane kasaliu mesua ia i rara nu kota. Ineilena, laumo i Paulu ai i Baranaba i kota Derbe.

I Paulu ai i Baranaba mesola lau i Antiokia

21 I kota Derbe, i Paulu ai i Baranaba mobambari mbui sira Ngkora Magali, duduuna mawori tau mepotuu si Yesu. Roo awetu, mesolamo sira lau i kota Listra ai Ikonium, mpane pulo sira lau i kota Antiokia i tana Pisidia. 22 I ope-ope boea anu rapolumakoira, i Paulu ai i Baranaba mopakaroso rara nu tau anu mepotuu si Yesu ai mopakaroso pepotuura, raulika sira, “Sangangaa mampolumakoi kita maisi mpangkana kapari lako baria mani kita mesua i rara peparentaa ni Pue Ala.” 23 I polumakoara etu, i Paulu ai i Baranaba mampelisi mpane moongko tadulako-tadulako nu jumaa i boea-boeana. Mopuasa ai mekakae sira, merade bona i Pue mokadipuraka sira lawi Ia ngkida pesarumakaara.

24 Roo awetu, i Paulu ai i Baranaba mopapulomo sira polumakoara moliu i tana Pisidia dongka i tana Pampilia. 25 Lako ni se etu, mobambarimo sira Ngkora ni Pue Ala i kota Perga, mpane mendolu sira lau i wiwi nu tasi dongka i kota Atalia. 26 Lako i kota Atalia etu, mensawimo sira i kapala tasi mesola lau i kota Antiokia i tana Siria. I kota Antiokia etumo, pepuuana polumakora mobambari Ngkora ni Pue anu ei-ei lako raparoo. [I pepuuana polumakora etu, tau anu mepotuu si Kerisitu anu mpolinguruna i Antiokia mampekakaeka sira mpane merade bona i Pue Ala mokadipuraka sira i sukana kabula nu raraNa tongora mampopolumako bagora etu]. 27 Kadongkara i Antiokia, raguluramo ope-ope topepotuu si Pue Yesu, mpane ratuntukara apa anu nababei ni Pue Ala i polumakoara. Mampololita mbui sira adiwa i Pue Ala mobungkasika sira dala bona tau anu baria sira toYahudi mepotuu mbui sira si Yesu. 28 Roo awetu, i Paulu ai i Baranaba meari sira masae saudi i kota etu simbela-mbela ai tau anu mepotuu si Yesu.