I Paulu i Epesu
19
1 Tongo ni Apolo i Korintu, i Paulu mampolumakoi boea-boea anu i bulu i tana Galatia ai Frigia, mpane roo awetu mendolumo ia lau i kota Epesu. Ni se etu momberumpa ia ai basangkia dua topepotuu. 2 Napekune sira, nauli, “Ba nisumbamimo Inosa Magali ni tempomi mepotuu?”Rasonoira, “Oo, baria mani, lawi baria mani kiepe kariana Inosa Magali etu!”
3 Napekune mpesola ni Paulu, nauli, “Ane ewa etu, rariu komi mangula patudu ni ima?”
Rasonoira, “Mangula patudu ni Yohane Toperiu.”
4 Lako ni se etu, naulika sira ni Paulu, “Periu ni Yohane iamo tanda pampenonsoita dosata. Agaiana i tempona i Yohane meriu, napadongka i toYahudi bona mepotuu sira i tau anu ina dongka i luwuna, sangana i Yesu.” 5 Awetu raepera pololitana, rariumo sira i rara sanga ni Pue Yesu. 6 I Paulu moonamo palena i wongko woora, mpane mendolu mpuumo Inosa Magali mokuasai sira. Ungangkidamo sira mololita i rara basa anu nakiraka nu Inosa Magali anu baria rainsanira, mpane mopadongka sira lolita lako si Pue Ala. 7 Kaworira anu nariu ni Paulu, totona sampulu rodua tomoane.
8 Tongo ni Paulu i kota Epesu, mepaguru liliu ia i tombi penombaa nu toYahudi. I rarana tolu mbula, mopatudu ia tau anu terusu i se etu, ai baria ria kaekana mopakanotoka sira kono i peparenta ni Pue Ala bona rapotuura. 9 Agaiana ria basangkia dua tau anu makoo rarara anu baria raundera mepotuu. I lio nu tau wori, mosapuaka mpuu sira patudu ni Pue Yesu. Etumo mpane i Paulu mopalengimo sira lau simbela-mbela ai basangkia dua tau anu mepotuu si Kerisitu i pearia anu mabose pepagurua ni Tiranus ni banimpia. Eo-eona i Paulu mepatudu i se etu. 10 Etumo bagona i rarana rompae, duduuna ope-ope tau i propinsi Asia mangepe sira Ngkora ni Pue, malompe toYahudi awetu mbui anu baria toYahudi.
11 I Pue Ala mokiraka kuasa si Paulu mobabei tanda-tanda anu metingkarai mpuu. 12 Nauda wule lensona ba komona ngkida rakeni i tau madua, batera kasaliu maosa ai meloso mpuu sira ope-ope seta anu mampopesiasi sira.
Ana ni Skewa
13 Ria basangkia topepakulii nu toYahudi anu lau kaimba-imbaara, mampopeloso seta anu mampesuangi tau. Topepakulii aretu mampetandaka sira manguli sanga ni Pue Yesu bona mampopeloso seta aretu. Raulira i seta aretu, “I rara sanga ni Yesu anu nakeni ni Paulu, kupopeloso komi!” 14 Ria pitu dua anakoi tomoane anu mobabei etu, ana nu sadua kapala tadulako menomba nu toYahudi, sangana i Skewa.
15 Nasonoi nu seta etu, “Ane i Yesu kuinsani mboto, ai i Paulu kuinsani mbui. Komi ei, ba ima komi mpane pebaimo komi mampopeloso aku!” 16 Tau anu napesuangi nu seta etu ungangkidamo melumpa mpane mosoko sira. Baria rabukura moewa, lawi maroso mpuu ia. Mewali melangka sira lau i raoa mabela-bela sira ai meloa, lawi sampira nasepa-sepamo.
17 Ope-ope tau anu meari i Epesu, malompe toYahudi awetu mbui anu baria sira toYahudi, raepera apa anu mewali etu. Etumo mpane maeka sira, mewali sanga ni Yesu kalalaua rapomabose. 18 Lako ni se etu mbui, mawori tau anu mepotuumo si Yesu, mopangaku i lio nu tau wori babeiara anu baria sintoto. 19 Mawori topopanginsani mangkeni sura-sura panginsanira, ragulu mpane rasuwe i lio nu tau wori. Balukina sura panginsanira etu ane raimba, totona lima mpulu nsobu doi pera. 20 Mewali, lako i pewalina anu metingkarai etu, kalalaua tetambai tau anu mampetingai Ngkora ni Pue, ai nakeningkamakuasana Ngkora etu, tetambai mbui tau anu mepotuu.
I Demetrius moparia posisala i kota Epesu
21 Awetu liumo anu mewali etu, i Paulu motunggai ina lau i tana Makedonia ai Akaya, mpane roo awetu ina lau mbui ia i kota Yerusale, nauli, “Roo aku i Yerusale, sangangaa lau aku i kota Roma.” 22 Lako ni se etu, natudumo sira rodua tau anu modurei ia moilodo lau i Makedonia, sangara, i Timotiu ai i Erastus. I Paulu ria mani i propinsi Asia.
23 Ni tempo etu, ria posisala anu mabose mpii i kota Epesu. Posisala etu mewali nakeningkariana patudu kono si Pue Yesu. 24 Lawi i kota Epesu etu, ria sadua tomoane anu mapande mobabei parewa lako i salaka, sangana i Demetrius. Bagona iamo mobabei tombi-tombi kokoi poanitua anu rapake menomba i anitu towawine anu rasanga i Artemis. Ai lako i bago etu, ia ai topobagona mansumba maisi doi. 25 Sambela tempo, narondemo sira topobagona ai topobago ntanina anu mapande mobabei salaka, naulika sira, “Poka-poka, niinsani mboto, lako i bagota ei maisi mpii pansumbaata. 26 Naudapae ewa etu, niita ai niepemo apa anu nababei nu sadua tau anu rasanga i Paulu. Nauli ni Paulu etu, apa anu nababei nu manusia bona rapenombai baria ria kuasana. Nakenimpepatuduna etu, mawori sira tau anu meula si Paulu, ai baria wule i Epesu. I sumalele propinsi Asia, batena ewa etu mbui. 27 Mewali, poka-poka, anu tapokaeka mpii iamo: inee luwu bagota ei bariamo raunde nu tau. Baria wule etu ngkida, tombi penombaata i anitu towawine Artemis bariamo ina tepakabose, duduuna sanga ni Artemis anu makuasa bariamo rabila. Molentano, anituta ei iamo anu rapenombai nu ope-ope tau i Asia ai i sumalele dunia.”
28 Awetu raepera lolita ni Demetrius etu, marumpumo sira mpane monganga-nganga sira, raulira, “Kita toEpesu, tatoiamo Artemis tapenombai!” 29 Posisala etu tolele duduuna i sumalele kota. Lako ni se etu, laumo sira tau wori mosoko rodua toMakedonia anu mamporangai i Paulu i polumakoana iamo i Gayu ai i Aristarkus, ai rakenimo sira i tombi poterusua mabose i rara nu kota. 30 I Paulu mampenoka ina mesua i rara nu poterusua mabose etu. Agaiana pokana sampepepotuuna moombo ia bona inee ia lau. 31 Ria mbui sira basangkia dua tuana (simada ni Paulu i propinsi Asia) anu motudu tau mangulika i Paulu bona inee ia lau i poterusua mabose etu.
32 Ni tempo etu, maruminsi pogeo-geo nu tau i poterusua mabose. Ria sira anu manguli ewa ei, ria sira anu manguli ewa etu, lawi tau anu terusu i se etu, kaworina baria sira manginsani apa puuna mpane terusu sira. 33 Ria sira anu manguli sadua toYahudi anu rasanga i Aleksander anu mewali puu nu posisalara, lawi ia anu rapopeongko nu toYahudi mopadongka lolita i tau wori. Etumo mpane i Aleksander moonamo palena mopakandii sira, lawi napenoka mampololita notona. 34 Agaiana, awetu raita nu tau wori ka iana toYahudi, monganga-nganga liliumo sira rojaa kasaena, raulira, “Toiamo Artemis anu tapenombai, kita toEpesu!”
35 Kasopoana, pensani sira napakandii nu sadua topoparenta nu kota. Topoparenta nu kota etu mangulika sira, “Poka-pokaku toEpesu! Baria ria sadua tau anu baria manginsani kotata ei, anu mokadipuraka tombi penombaa i anitu towawine Artemis ai watuna anu magali manawu lako i langi. 36 Baria ria sadua anu pensani mosapuaka etu. Etumo mpane sangangaa mandii sala kita, inee nakeningkamaramedana rarata, ka tadika-dikanamo. 37 Lawi tau aretu, nikenimo sira mai, agaiana baria sira mosilakai tombi penombaata ba mopakoi sanga nu anituta. 38 Mewali, ane i Demetrius ai rangana anu sampopobago mampenoka mosalai ba ima-ima, batena rapadongka i topobotusi kara-kara. Lawi riamo tempo anu tepakanoto, ai i tempo etu tadulakota pensani mampomeso-mesoka kara-karata ewa anu mewali ei. 39 Mewali, poka-poka, ane ria mani kara-karami, kara-kara etu sangangaa rapomeso-mesoka i poterusua mangula atura nu topoparenta. 40 Lawi apa anu tababei ei mewulungati mpuu. Pensani kita rarai nu topoparenta Roma. Ina raulira moparia kita peewa. Ai ane rarai mpuu kita, apamo anu ina tauli, lawi baria ria puuna pogombota ei.” 41 Awetu roomo ia mololita, napopesolamo sira ope-ope.