I Paulu lau mpesola i tana nu toYunani
20
1 Awetu roomo posisisala i Epesu, i Paulu mogulumo tau sira anu mepotuu si Yesu mpane mopakaroso rarara. Roo awetu, metompamo ia napapulomo polumakoana lau i tana Makedonia. 2 I polumakoana etu, nasondaki sira tau anu mepotuu si Kerisitu, mpane napadongkaka sira maisi lolita bona maroso rarara. Lako ni se etu, lau mbui ia i tana Akaya, tana nu toYunani, 3 mpane meari i se etu tolu mbula kasaena. Liumo tolu mbula, napenoka mensawi i kapala tasi mesola lau i tana Siria. Agaiana ria bambari anu manguli kariana tunggaia nu toYahudi ina mampopate ia. Etumo mpane nabotusi, “Aginamo mesola aku mampoliungi tana Makedonia.” Mewali, mesolamo ia lau i Siria, mampoliungi Makedonia. 4 I polumakona etu, ria mbui basangkia dua rangana anu lau simbela sira ai ia. Sangara, i Sopater ana ni Perus anu lako i Berea, i Aristarkus ai i Sekundus anu lako i Tesalonika, mpane i Gayu anu lako i Derbe. Ria mbui i Timotiu ai rodua toAsia iamo i Tikikus ai i Tropimus. 5 Mewali, lako i tana Makedonia, sira aretu mampeilodongi kami, mpane rapegiara kami i kota Troas. 6 Liumo eo anu rapomabose nu toYahudi anu rasanga Posusa Roti anu Baria Raragii, mensawi mbuimo kami i kapala tasi mopalengi kota Pilipi. Sopomo lima eo, momberumpa mpesola kami ai rangaki i Troas, mpane i se etu meari kami saminggu kasaena.I Eutikus manawu lako i pelogaa
7 Kawengimo ni eo Minggu, mogulumo kami mangkoni simbela ai poka-pokaki sampepepotuuki i Troas i pokaendoki kamate ni Pue Yesu. I Paulu mepatudu ai mololita duduuna masae wengi, lawi tunggaiana ewa ineilena ina mangokamo ia. 8 Tombi poterusuaki etu mawane, mpane terusu kami i lonta anu i wongko mpii. Maisi sulo rasuwe. 9 I poterusuaki etu, ria sadua anantomoane, sangana Eutikus, anu momeso i pelogaa. Pelogaa etu katolu unsuna lako i tana. Tongo ni Paulu mololita, matetunduamo anantomoane etu mpane leta, etumo mpane manawumo ia i tana. Mendolumo sira rangana lau moongko, agaiana mamatemo ia. 10 Mendolu mbui i Paulu lako i tombi lau mokalupui anantomoane etu, nauli, “Inee komi maeka, tuwu mani ia.” 11 Roo awetu, mempone mpesolamo i Paulu lau i wongko mobinse-binse roti, mpane mangkoni simbela sira. Mololita mbuimo i Paulu duduuna dongka madondo, mpane lako mangokada ia. 12 Anantomoane anu manawu mpongone tuwu mboto mani ia, etumo mpane rangana anu mangkeni lau i tombina matono sira.
Lako i Troas lau i Miletus
13 Moilodomo kami mampensawii kapala tasi lau i kota Asos, bona kipomberumpaka i Paulu i se etu. Etu anu naatoro ami ni Paulu, lawi napenoka molumako lau i Asos. 14 Momberumpa mpuumo kami i Asos, mpane mensawimo i Paulu simbela-mbela ai kami lau i kota Mitilene. 15 Lako ni se etu, kipapulomo polumakoaki, mpane ineilena gompimo kami i lewuto Kios. Karombengina dongkamo kami i lewuto Samos, mpane saeoa lako ni se etu dongka kami i kota Miletus. 16 I Paulu mopakanoto kabariaki mensopi nsalaa i kota Epesu bona ntena gaga kami masae i propinsi Asia. Napenoka mopakaliga polumakoki, lawi naunde dongka i Yerusale lako baria mani dongka eo mabose anu rauli Pentakosta.
Pololita ni Paulu i tadulako nu tau anu mepotuu si Kerisitu anu ria i Epesu
17 Lako i Miletus, i Paulu mopakatumo bambari lau i Epesu, bona tadulako nu jumaa anu ria i se etu mai sira mampomberumpaka ia. 18 Dongkamo sira i Miletus, naulika sira ni Paulu, “Poka-poka, niinsani mpuu adiwa pangkeniakaku simbela-mbela ai komi. Lako i mpolinguruna i kadongkaku i propinsi Asia duduuna ei-ei, 19 mengkaiwoi aku i rara nu pobagoku i olomi. Ai mawori mbela aku motumangi i pampopolumakoku bago ni Pue i se ei. Ai maisi mbui kapari anu kusumba lako i tunggaia nu toYahudi anu mampenoka mampopate aku. 20 Niinsani poka-poka kabariaku maeka mopadongkaka komi sinangkana anu mobundu i rara nu katuwumi. Kupaguruka komi poka-poka, malompe tongomi terusu ewa ei, awetu mbui i tombimi. 21 Kupopaingaaka liliu komi, malompe komi toYahudi awetu mbui komi anu baria toYahudi, bona menonso komi lako i dosami, mpane mepotuu komi si Pueta i Yesu Kerisitu.
22 Ei-ei ina lau aku i Yerusale mangula parenta nu Inosa Magali si aku. Baria kuinsani ba apa anu ina mewali i wotoku si dou. 23 Agaiana ei kuinsanimo: i ope-ope boea anu kupolumakoimo, Inosa Magali mopakanoto bateku ina ratarunggu ai mansumba kapari. 24 Nauda ewa etu, baria mpuu kupailodo wotoku, bona kuparoo ngkia bago anu napotuuka aku ni Pue Yesu. Pobagoku ei, mopadongka Bambari Malompe anu mopatongawa kabulana rara ni Pue Ala si kita.
25 Mewali, poka-poka, komi anu kusondakimo ai kupopainsanikamo kono i peparenta ni Pue Ala. Ei-ei, manotomo i raraku kabariakumo ina niita. 26 Etumo mpane kupakanotoka amimo komi eo ei: ane ria komi anu baria mansumba katuwu anu bou, bariamo salaku. 27 Lawi baria aku maeka mopadongkaka komi ope-ope tunggaia ni Pue Ala si komi. 28 Mainga-inga komi bona ntena komi madosa, ai nikadipuraka lompe mbui ope-ope tau anu mepotuu si Kerisitu anu napotuuka komi nu Inosa Magali. Sangangaa nikadipuraka sira, ewa sadua toporewu mamporewu dimbana, lawi i Pue Ala mampopewalimo sira mewali tauNa, mampoliungi kamate nu anaNa, i Pue Yesu. 29 Kuinsani mpuu poka-poka, ane lambu aku lako i se ei, batena ina dongka sira tau anu madaa anu mopakasawu tau anu nikadipuraka aretu, ewa serigala mampopesiasi dimba. 30-31 Mainga-inga komi lawi ria mbui sira tau i olota anu ina mopakawuli tau anu mepotuu si Yesu bona rakeni simbela-mbela ai sira i dala anu mepakanawu. Nikaendo, poka-poka, i rarana tolu mpae, baria aku mengkaroo mopatuduka komi sadua-sadua, malompe mabaa awetu mbui kawengi, mpane mawori mbela moili ue mataku motumangisi komi.
32 Ei-ei poka-poka, mekakaemo aku si Pue Ala bona Ia ngkida anu mokadipuraka komi. Kukiraka komi lolita bona mampeulai liliu komi Ngkora ni Pue anu mopakanotoka kita kabulana rara ni Pue Ala si kita. Lawi i Pue Ala ngkida anu makuasa mopakaroso rarata ai mokiraka kita pewati anu Napatimama amimo i tau anu Napelisimo mewali anaNa. 33 Baria sambela kupokailu anu-anu nu tau ntanina ewa salaka, bulawa ba sampi. 34 Niinsani mboto poka-poka, mobago aku ai paleku saduduaku, bona kubuku mobaluki sinangkana anu kuparaluu ai anu naparaluu nu rangaku sira, anu meula si aku. 35 I pangka-pangkana, kupopeitakamo komi kaadiwata sangangaa mobago motulungi rangata anu baria rabukura. Lawi i Pue Yesu saduduana anu manguli: ‘Matono mani rara nu tau anu mokira mpane anu modoko.’”
36 Awetu i Paulu roomo mololita, molingkudumo ia simbela-mbela ai ope-ope rangana, ai mekakaemo sira. 37 Mpane motumangimo sira ope-ope mokalupui i Paulu, raulikara, “Malompe-lompe iko i dala.” 38 Mawiora mpuu rarara, mangepe lolita ni Paulu anu manguli, kabarianamo ina raitara. Mewali, laumo rapatiatira i Paulu dongka i kapala tasi.