Bambari Malompe sangangaa rabambari i rara kuasa Inosa Magali
2
1 Poka-poka, kadongkaku i boeami ni banimpia, kupadongkaka komi bambari anu lako si Pue Ala. Ni tempo etu, baria kupake basa nu tau anu mawane posikolana ba lolita lako i kamatopaku saduduaku. 2 Lawi kupakanotomo i raraku: mepuu i kadongkaku si komi ni banimpia duduuna ei-ei, baria aku mampololita anu ntanina, batena ngkida i Yesu Datu Topesorema anu rapaku i kau anu rapopombesape. 3 Tongoku mani ria simbela-mbela ai komi, malede ai morada aku nakeningkaekaku.a 4 Bambari anu kupadongkaka komi ni tempo etu, baria kupadongka nakeningkatopaku saduduaku, agaiana nakeningkamakuasa nu Inosa Magali. Etumo mpane, niinsani kamonsona bambari anu kupadongka. 5 Mewali, kubabei ewa etu bona mampotuu komi bambari anu kupadongka, baria nakeningkatopa nu manusia, agaiana nakeningkamakuasa ni Pue Alada.Inosa Magali mokiraka kita katopa
6 Nauda ewa etu, ane mololita kami i tau anu maroso pepotuura si Kerisitu, kalawiana mololita kami ai katopaki. Agaiana katopa etu, baria ewa katopa i dunia ei ba katopa nu tadulako i dunia ei, anu kamakuasana ina matonto. 7 Anu kipadongka, iamo katopa ni Pue Ala. Katopa etu, iamo pobotusi ni Pue Ala mokirakamo kita katuwu meawa i suruga. Tunggaia ni Pue Ala etu, Napakanoto amimo lako baria mani dunia ei Nateru. Agaiana ni banimpia, katopa ni Pue Ala etu, Nawuniangi mani i manusia. 8 Tadulako i dunia ei, baria mani kowo rainsanira katopa ni Pue Ala etu. Ane kerainsanira, kebaria rapakura i Pue anu meawa etu, i kau anu rapopombesape. 9 Agaiana ria teuki i rara Sura Ngkora Magali ewa ei:
“Apa anu baria mani raita ba raepe nu tau,
ai anu baria mani sambela mensuwu i pekiri nu manusia.
Etu Napatimamakamo sira ni Pue Ala,
i tau anu mampokaasi Ia.” (Yesaya 64:4)
10 Mewali, tainsanimo tunggaia ni Pue Ala, lawi tunggaiaNa etu Napopainsanikamo kita ai kuasa nu Inosa Magali. Ai baria ria anu tewunikai anu baria nainsani nu Inosa Magali, lawi Naparesa sinangka-nangkana, tepesua tunggaia ni Pue Ala anu baria mani rainsani nu tau. 11 Lawi anu manginsani rara ni Pue Ala, batena Inosa ni Pue Ala saduduaNa. Pandirina, anu manginsani rara nu sadua tau, iamo rarana saduduana. 12 Ai kita ei, baria modoko pampekiri nu tau anu baria mepotuu; agaiana modokoda kita Inosa ni Pue Ala, bona tainsani sinangka-nangkana anu nakiraka ntoo kita ni Pue Ala.
13 Mewali, ane kipadongka Bambari Malompe, baria kipadongka nakeningkatopaki mololita. Agaiana kipakanoto bambari etu, ai lolita anu lako i Inosa Magali i tau anu modokomo sira Inosa Magali. 14 Tau anu baria manginsani i Pue Ala, baria sira mampotuu patudu anu lako i Inosa ni Pue Ala, lawi raulira, “Patudu etu, wule kadoio ngkida.” Baria rabuku nu tau aretu, mampelempoi tunggaia nu patudu anu lako i Inosa ni Pue Ala etu, lawi anu mampopewali kita pensani mampelempoi tunggaia nu patudu etu, iamo Inosa Magali. 15 Tau anu modokomo Inosa Magali, pensani mampelempoi sinangka-nangkana, agaiana tau anu baria modoko Inosa Magali baria nabuku mampelempoi pampekiri nu tau anu modokomo Inosa Magali. 16 Lawi teukimo i rara Sura Ngkora Magali:
“Baria ria tau anu manginsani pekiri ni Pue Ala!
Baria ria tau anu pensani mopatudu Ia!” (Yesaya 40:13)
Agaiana kita ei, nakirakamo kita ni Pue Ala pampekiri anu simbela ai i Kerisitu.