Sura ni Suro Paulu anu mpolinguruna napakatuka jumaa i kota
Korintu
1
1-3 Sura ei anu lako si aku i Paulu, kupakatu si komi i jumaa-jumaa i kota Korintu anu napelisimo ni Pue Ala nakenimposintuwumi ai i Yesu Kerisitu, simbela-mbela ai ope-ope tau anu meari imba ngkida, anu mekakae si Pue Yesu Kerisitu, iamo Puera ai Pueta mbui. Aku, naongko ni Pue Ala mewali suro ni Yesu Kerisitu, mangula peundeaNa. Maisi tabea lako si aku ai lako si Sostenes pokata sampepepotuu! Mekakae kami si Pue Ala Tuamata ai si Pue Yesu Kerisitu, bona Nawati komi i kabula nu raraNa ai mokiraka komi kalompe nu katuwu.I Paulu manguli maisi kalompena si Pue Ala
4 Poka-poka, baria aku mengkangkaroo manguli maisi kalompena si Pue Ala nakeningka komina, lawi nidokomo katesorema lako i kabula rara ni Pue Ala nakenimposintuwumi ai i Yesu Kerisitu. 5 Lawi nakenimposintuwumi ai i Kerisitu, sinangka pewati anu mobundu i katuwumi, Nakirakamo komi: Napopainsanika komi patudu anu mamonso, ai Nakirakamo komi kapande mopadongka patudu etu. 6 Ope-ope etu, mopatongawamo karoso nu pepotuumi i bambari kono si Kerisitu anu kipadongkaka komi. 7 Bariamo ria kamakurana pewati anu nisumba, lawi nisumbamo pangka-pangkana kapande lako i Inosa Magali, tongomi mampegia kadongkaNa mpesola nu Pueta i Yesu Kerisitu. 8 Ina Napakaroso pepotuumi duduuna i kasopoa dunia, bona i tempona dongka mpesola Pueta i Yesu Kerisitu, bariamo ria kamasalami. 9 Tapotuu i Pue Ala batena mopabukei dandiNa si kita, ai Napelisimo kita bona mosintuwu ai AnaNa, iamo i Yesu Kerisitu, Pueta.
I Paulu mokambaroka toKorintu lawi baria sira mosintuwu
10 Poka-poka, lako i kuasa anu nakiraka aku nu Pueta i Yesu Kerisitu, kuperade bona mosintuwu komi ope-ope. Inee komi moparia posisala. Sangangaa mosintuwu komi ai sampepekiri komi. 11 Pokaku, tunggaiaku manguli ewa etu, lawi ria sira pokata santombia ni Kloe anu mopadongka si aku kariana posisalami. 12 Ria komi anu manguli “Aku meula si Paulu.” Ria komi anu manguli “Aku meula si Apolo.” Anu ntanina mbui manguli “Aku meula si Peturu.”a Ria mbui anu manguli “Aku meula si Kerisitu.” 13 Malompepae ane komi anu meula si Kerisitu, baria komi mosintuwu? Ba nipenokami aku anu mamate rapaku i kau anu rapopombesape mosuru dosami? Ba, ria mbuida komi anu rariu bona mewali komi topeguruku? Baria! 14 Kuuli maisi kalompena lawi wule i Krispus ai i Gayu ngkida anu kuriu, anu ntanina baria ria, 15 bona ntena sira ria anu manguli kuriu komi mewali topeguruku. 16 Oo, i Setepana mbui wei santombira, aku mpuu anu moriu sira. Agaiana i raoa lako si sira, panginsaniku bariamo ria tau ntanina anu kuriu. 17 I Kerisitu moongko aku mewali suroNa, baria meriu, agaiana Naongko aku bona mobambari Bambari Malompe lako si Pue Ala. Ane kubambari Bambari Malompe etu, baria aku mololita nakeningkapandeku, bona inee ria tau anu mampotuu pololitaku nakeni nu kapandeku, agaiana bona manginsani sira kuasa nu kamate ni Kerisitu i kau anu rapopombesape.
Lako i Bambari Malompe tainsani kuasa ai katopa ni Pue Ala
18 Mewali tapadongka bambari anu manguli, i Kerisitu rapopate i kau anu rapopombesape mosuru dosa manusia. Ane tau anu ina mesua i naraka mangepe bambari etu, raulira, “Etu lolita kadoio.” Agaiana kita anu nasoremamo ni Pue Ala lako i suku nu dosata mangepe bambari etu, tauli, “Etumo kuasa ni Pue Ala!” 19 Lawi, i rara Sura Ngkora Magali, i Pue Ala manguli ewa ei:
“Ina Kupakapaia katopa nu manusia,
ai ina Kupakatonto kapande nu tau.” (Yesaya 29:14)
20 Mewali, apa bunduna tau anu mapande ewa: guru agama nu toYahudi, ai tau anu mapande mololita i rara nu dunia ei? Lawi ope-ope kapande nu manusia etu, Napopewalimo ni Pue Ala mbero-mbero ngkida. 21 Lawi lako i kapande nu manusia, baria kita pensani manginsani i Pue Ala. Agaiana, lako i katopa ni Pue Ala ngkida, Nabotusi ima ngkida anu mepotuu i Bambari Malompe, tau etu ina Nasorema sira lako i suku nu dosara. Agaiana ane kipadongka Bambari Malompe, i tau anu baria mepotuu manguli “Etu lolita nu todoio.” 22 ToYahudi, baria sira mepotuu ane baria sira kipopeitaka tanda kuasa. Ai toYunani, baria sira mepotuu ane baria sira kipakanotoka ai kapande nu manusia. 23 Agaiana mopadongka kami kamate ni Kerisitu anu rapaku i kau anu rapopombesape, bambari etu rapodua rara nu toYahudi. Tau anu baria sira toYahudi, bambari etu raimbara ngkida lolita kadoio. 24 Agaiana i tau sira anu narondemo ni Pue Ala mewali tauNa, malompe toYahudi, malompe toYunani, ane tau aretu mangepe sira Bambari Malompe ai mepotuu si Kerisitu, manginsanimo sira kuasa ai katopa ni Pue Ala. 25 Mangula pololita nu manusia, kamate ni Kerisitu raimba kadoio, agaiana kamonsona kadoio etu, melumbu lako i katopa nu manusia. Mangula lolita nu manusia, tunggaia ni Pue Ala etu baria ria kuasana, agaiana kamonsona melumbu kuasana lako i kuasa nu manusia.
26 Poka-poka, nikaendo katuwumi lako baria mani komi naronde ni Pue Ala mewali tauNa. I tempo etu, baria komi mawori anu matopa ba anu makuasa ba anu mawane lantimi i petotoki nu manusia, 27 lawi i Pue Ala mopelisi tau anu baria mapande i petotoki nu manusia, bona tau anu mapande ina rapakaea. Naoaka mampelisi sira anu baria makuasa, bona tau anu makuasa ina rapakaea. 28 Naoaka mampelisi sira anu tepaiwoi katuwura, tau anu baria rahaile, anu baria mobundu katuwura i petotoki nu manusia, bona manoto apa anu rauli nu manusia mobundu i dunia, kamonsona baria mobundu. 29 Mewali, baria ria tau anu pensani mampemabose. Baria ria sadua anu pensani manguli, “Nakeningkapandeku, etumo mpane napelisi aku ni Pue Ala.” 30 I Pue Ala saduduaNa mopasintuwu kita ai i Yesu Kerisitu. Nakenimposintuwuta ai i Yesu Kerisitu, tainsanimo katopa ni Pue Ala: i Kerisitu anu mopakanotomo kita i petotoki ni Pue Ala, anu mopakagalimo kita, ai mosorema kita lako i suku dosata. 31 Mewali, ewa anu teuki i rara Sura Ngkora Magali,
“Ima anu motoia wotona
malompe mani ane petoiana etu, motoia apa anu nababei ni Pue Ala.” (Yeremia 9:24)