Tabeaku ai patudu anu kasopoana
16
1 Ai ei-ei, ina kupopainsanika komi kaimana i Febe. I Febe iamo sadua towawine anu mobago i jumaa Kengkrea. 2 Kuperade bona nidoko lompe ia i rara sanga ni Pue Yesu, lawi ia etu pokata sampepepotuuta. Ane ria ba apa-apa anu naparaluu, nikiraka ia lawi maworimo tau anu natulungi, tepesua aku.3 Nipadongka tabeaku si Priskila ai i tomoanena i Akwila. Sira etu, pokaku sampopobagoku anu mampopolumako bago ni Yesu Kerisitu. 4 Ni banimpia, kerapopate sira nakenimpotulungira aku. Kuuli maisi kalompena si sira, ai baria aku ngkida, agaiana ope-ope topepotuu si Kerisitu anu baria sira toYahudi manguli mbui maisi kalompena si sira. 5 Nipadongka mbui tabeaku i ope-ope pokata anu mepotuu si Kerisitu, anu mogulu menomba i tombi ni Priskila ai i Akwila.
Tabeaku si Epenetus anu kupokaasi. Iamo anu mpolinguruna mepotuu si Kerisitu i propinsi Asia. 6 Tabeaku mbui si Maria. Maruminsi pobagona si komi. 7 Nipadongka mbui tabeaku si Andronikus ai si Yunia. Sira aretu, singka toYahudiku anu ratarunggu simbela-mbela ai aku. Sira aretu rabila nu suro ni Pue Yesu, lawi masaemo sira mepotuu si Kerisitu. Lako baria mani aku mepotuu si Kerisitu, aminamo sira mepotuu.
8 Tabeaku si Ampliatus anu kupokaasi i rara sanga ni Pue Yesu. 9 Tabeaku si Urbanus, pokata sampopobagota anu mampopolumako bago ni Kerisitu. Tabeaku mbui si Stakis anu kupokaasi. 10 Tabeaku si Apeles, nauda ia narumpa maisi pampetandaka nakenimpeulana si Kerisitu, agaiana batena tetida ia meula liliu si Kerisitu. Tabeaku si Aristobulus sampoanaka. 11 Tabeaku si Herodion, singka toYahudiku. Tabeaku mbui i pokata sampepepotuu iamo i Narkisus sampoanaka.
12 Tabeaku si Trifena ai Trifosa anu mobago sira i rara bago ni Pue Yesu, ai i Persis anu kupokaasi, anu mobago mantimi mbui i rara bago ni Pue. 13 Tabeaku si Rupus ai i tinana anu kuimbamo tinaku. I Rupus etu, iamo topeula ni Pue Yesu anu rabila. 14 Nipadongka tabeaku si Asinkritus, i Flegon, i Hermes, i Patrobas, i Hermas ai ope-ope pokata sampepepotuu anu ria simbela-mbela ai sira. 15 Tabeaku si Filologus ai si Yulia, si Nereus ai pokana towawine, ai i Olimpas ai i ope-ope pokata sampepepotuuta anu ria simbela-mbela ai sira.
16 Mombetabe-tabe komi mewali tanda pombepokaasimi. Ope-ope tau ni Pue Ala anu i se ei, mopakatu tabeara si komi poka.
17 Poka-poka, kupopaingaaka mpii komi: sangangaa mainga-inga komi i tau anu mampopogaa-gaa komi i pepotuumi. Nikaraosi tau anu mampenoka mopakanawu komi i patudura anu mosisala ai patudu anu rapatuduka komi. 18 Lawi tau anu ewa etu babeiara, baria sira mampopolumako bago ni Kerisitu Pueta, mangula ngkida sira peundea nu rarara. Mopakanawu sira tau anu baria mani sira manginsani apa-apa ai pololita pererenasi anu mamomi. 19 Agaiana ane komi, ope-ope tau manginsani katetidami i patudu ni Pue Ala. Matono aku awetu kuepe babeiami etu. Peundeaku bona matopa komi mobabei babeia anu malompe, ai mokaraosi komi babeia anu madaa. 20 I Pue Ala puu nu lompe katuwu ina monangi ai mopakaropu kuasa Datu nu Seta, ai ina mokiraka kuasa si komi bona monangi komi kuasa Datu nu Seta.
Mekakae liliu aku si Pue Ala, bona mokiraka kita pewati mampoliungi Pueta i Yesu Kerisitu dongka si komi poka. Amin!
21 I Timotiu, rangaku anu sampopobago i se ei, mopakatu tabeana si komi. Ewa etu mbui i Lukius, i Yason ai i Sosipater singka toYahudiku sira.
22 Aku i Tertius, modurei i Paulu mouki sura ei, mopadongka mbui aku tabeaku i rara sanga ni Pue si komi.
23 I Gayu mbui mopakatu tabeana. Aku i Paulu, meari aku i tombi ni Gayu, ai topepotuu si Kerisitu i kota ei paka mogulu menomba i tombina. I Erastus, topopatoro doi nu topoparenta i kota ei, ai pokata mbui i Kwartus mopakatu tabeara.
24 Kusarumaka kabula rara ni Pue Yesu Kerisitu mowati komi ope-ope. Amin.
25 Toiamo i Pue Ala! Lawi Iamo anu makuasa mopakaroso pepotuumi, nakenimpangepemi Bambari Malompe anu kupadongkaka komi bona niinsani kaimana i Yesu Kerisitu. I atu mpaenamo, tunggaia ni Pue Ala etu, baria rainsani nu tau. 26 Agaiana ei-ei, tunggaia ni Pue Ala kono si Yesu Kerisitu anu raukimo nu nabi-nabi ni banimpia, rapatongawamo mangula parenta ni Pue Ala anu baria mokasopoa, bona ope-ope tau, mepotuu ai mengkoru si Ia. 27 Iamo i Pue Ala anu manginsani sinangkana, Ia ngkida Pue, baria ria karoduana! Nakenimpobago ni Yesu Kerisitu, tetoiamo i Pue Ala duduuna kasae-saeana. Amin!