Tau anu malede ai tau anu maroso
15
1 Kita anu maroso pepotuuta si Pue Ala, sangangaa manoa kita i rangata anu baria mani maroso pepotuura. Inee kita mangkadelo kamatonota saduduata. 2 Agaiana ope-ope kita, sangangaa mobabei anu mopakatono rara nu rangata ai anu motulungi rangata, bona tetambai karoso nu pepotuura. 3 Lawi i Kerisitu mbui baria mangkadelo katonoNa saduduaNa, ewa anu teuki i rara nu Sura Ngkora Magali ni banimpia kono si Ia, “Ope-ope lolita anu mopakoi i Pue Ala, pepakoi etu ante aku mbui kono.” 4 Ope-ope anu teuki i rara nu Sura Ngkora Magali, teuki bona mopaguru kita. Lako i patudu anu tasumba i rara nu Sura Ngkora Magali etu, mewali kita tetida i rara nu kapari, ai tesuweki rarata duduuna maroso pesarumakata si Pue Ala.5 Mekakae aku, bona i Pue Ala mokiraka kita kamanoa ai katetida rara, ai motulungi komi bona tuwu komi i kasampempekiri, sintoto ai peundea ni Yesu Kerisitu, 6 ai bona sampepekiri komi motoia i Pue Ala, Tuama ni Yesu Kerisitu Pueta.
Bambari malompe i ope-ope tau
7 Mewali, kuulika komi: sangangaa nidoko lompe pokami sampepepotuumi, ewa i Kerisitu modoko mbui kita ope-ope. Lawi ane sintuwu kita ai pokata sampepepotuuta, i Pue Ala rapomabose nakeni nu babeiata etu. 8 Nipairara ei: i Kerisitu maimo i dunia motulungi toYahudi, bona mopatongawa ka Napabukei ni Pue Ala dandiNa i ulububuta toYahudi ni banimpia. 9 Kamai ni Kerisitu i dunia ei, mobungkasi dala bona tau anu baria sira toYahudi, pensani mbui sira motoia i Pue Ala, nakeningkalompe nu raraNa si sira. I rara Sura Ngkora Magali ria lolita anu teuki ewa ei:
“O Pue Ala, kupomabose Iko i olo nu tau anu baria sira toYahudi.
Modulua aku motoia sangaMu.” (2 Semueli 22:50; Dulua Petoia 18:50)
10 Ria mbui teuki i rara Ngkora Magali ewa ei:
“Komi anu baria toYahudi,
matono komi simbela-mbela ai toYahudi.” (Pepopainga 32:43)
11 Ria mbui lolita anu teuki ewa ei:
“Komi anu baria toYahudi, nitoiamo i Pue.
Komi ope-ope tau anu tuwu i dunia, nitoiamo i Pue!” (Dulua Petoia 117:1)
12 Ei mani mbui lolita anu nauki ni nabi Yesaya ni banimpia anu manguli ewa ei:
“Lako i pemulea ni Isai,a
ina dongka sadua tau anu moparentai sira tau anu baria toYahudi.
Ia etu anu ina mewali pesarumakaara.” (Yesaya 11:10)
13 I Pue Alamo pesarumakaata! Mekakae aku si Pue Ala, bona Nakiraka komi katono ai kalompe nu katuwu nakenimpepotuumi si Pue Yesu. Etu kuperade bona kalalaua maroso pesarumakami nakeningka nakuasaimi nu Inosa Magali.
Tunggaia ni Paulu mouki sura ei
14 Poka-pokaku! Kuinsani mpuu kaisina babeiami anu malompe. Niinsanimo patudu anu lako i Ngkora ni Pue, ai niinsani mombepatudu sadua ai sadua. 15 Agaiana nauda ewa etu, i rara nu suraku ei, baria aku makangki-kangki mopatudu komi, bona nikaendo liliu patudu etu, lawi etumo bago anu nakiraka aku ni Pue Ala nakeningkabula nu raraNa. 16 Napopewali aku topobago ni Yesu Kerisitu, ai Naposuro aku i tau anu baria sira toYahudi. Aku ei mewalimo ewa tadulako menomba, anu mopadongka Bambari Malompe lako si Pue Ala. Bona tau anu baria sira toYahudi kuimba ewa popenombaku anu mopakatono rara ni Pue Ala, lawi Inosa Magali mopakagali sira.
17 Mewali, nakenimposintuwuku ai i Yesu Kerisitu, matono raraku nakeni nu bago anu kupobago si Pue Ala. 18 Pebai aku mololita ewa etu, wule kono i apa anu roomo nababei ni Kerisitu mampoliungi aku, bona mampopewali tau anu baria sira toYahudi mengkoru si Pue Ala. Kupobago etu, malompe i pololitaku awetu mbui i babeiaku, 19 simbela-mbela ai tanda-tanda kuasa anu mewulii anu nababei nu kuasa Inosa Magali. Kupadongkamo Bambari Malompe i ope-ope tau, kupadongkaka sira kaimana i Kerisitu. Lako i kota Yerusale duduuna dongka i tana Ilirikum. 20 Eimo peundeaku bona mobambari liliu aku Bambari Malompe i tana ntanina anu baria mani mangepe kono si Kerisitu. Kalawiana baria kuunde mowangu tombi i wongko watu, anu napepuumo nu tosaduana. 21 Kupenoka mopabukei lolita i rara nu Sura Ngkora Magali anu manguli:
“Tau anu baria mani sira rabambarika kono si Ia,
ina manginsani mpuu sira kaimana Ia.
Tau anu baria mani mangepe bambari kono si Ia,
ina mangepe ai manginsani mpuu sira lempona bambari etu.” (Yesaya 52:15)
I Paulu moliwo ina lau i Roma
22 Nakenimpobambariku liliu Bambari Malompe i tana ntanina, i tau anu baria mani sira mangepe kono si Kerisitu, etumo anu mosalempori tunggaiaku lau mosondaki komi poka. 23 Agaiana ei-ei, sopomo pobagoku i tana ntanina etu. Mewali, pesarumakaku sangangaa ria tempoku mensopi i boeami mampomberumpaka komi, lawi i paenamo kupenoka lau mosondaki komi. 24 Mewali, kasopoana ina matono-tono aku simbela-mbela ai komi, nauda sampalai ngkida. Roo awetu, kusarumaka nidurei aku luwu, ane mangoka aku lau i Spanyol. 25 Agaiana ei-ei tongoku i dala lau i Yerusale, mangkeni petulungi i pokata sampepepotuuta si dou. 26 Lawi pokata sampepepotuuta i Makedonia ai i Akaya ei, mogulu sira doi bona rakirakara pokara sampepepotuura anu mesiasi katuwura i Yerusale. 27 Lako i katono nu rarara rababeira ewa etu. Ai kalawiana sangangaa motulungi sira toYahudi anu mesiasi aretu anu sampepepotuu ai sira. Lawi mampoliungi toYahudi, tau anu baria toYahudi mansumbamo sira pewati katesorema lako si Pue Ala. Etumo mpane, lako i kabula nu rarara motulungi sira tau ni Pue Ala i Yerusale, i pokirara anu-anu, anu raparaluu i rara nu katuwura eo-eona. 28 Mewali, lau nsalaa aku i Yerusale mangkeni petulungi anu tegulumo. Roodamo etu, mpane lako lauda aku i tana Spanyol moliu aku i kotami. 29 Ai kusarumaka ane dongka aku si komi, maisi pewati lako si Kerisitu ina kukenika komi.
30 Nakenimpepotuuta si Pue Yesu Kerisitu Pueta, ai nakenimpokale nu Inosa Magali, pensani kita mombepokaasi sadua ai sadua. Etumo mpane kuperade si komi bona komi mbui mekakae i kamonso-monsona simbela-mbela ai aku si Pue Ala. 31 Mekakae komi bona i Pue Ala mokampai aku lako i tau anu baria sira mepotuu, ane lau aku luwu i tana Yudea. Mekakae mbui komi bona pokata sampepepotuuta anu i Yerusale, radokora lompe petulungi anu kukeni ei. 32 Mpane, ane sintoto ai peundea ni Pue Ala, ina dongka aku i boeami i rara nu katono rara, ai ina malene kuepe i olomi. 33 Kusarumaka i Pue Ala anu mokiraka kita lompe nu katuwu ina mamporangai komi ope-ope. Amin!