Inee nusalai pokamu sampepepotuumu
14
1 Ria pokata sampepepotuuta anu baria mani maroso pepotuura. Sangangaa nidoko lompe sira tau aretu. Naudapae mosisala pesumbaa nu pekirira ai pesumbaa nu pekirimi, inee etu anu nipombesesei. 2 Rapana: ria tau anu maroso pepotuura anu manguli pensani kita mangkoni mampopengaa pangkoni. Agaiana ria tau ntanina anu baria mani maroso pepotuura manguli, batena daka-daka ngkida anu pensani takoni. 3 Komi anu mangkoni mampopengaa, inee komi mopapakoi rangami anu wule mangkoni pangkoni anu tepakanoto ngkida nakoni. Ai komi anu wule mangkoni pangkoni anu tepakanoto ngkida nikoni, inee mbui komi mosalai rangami anu mangkoni sira mampopengaa. Lawi i Pue Ala modoko mbui rangami etu mewali anaNa. 4 Baria ria komi anu makuasa mosalai singka rangami, iamo batua nu tua ntanina. Ba malompe pobagora ba baria, etu popakanoto nu tuaradamo. Ai batena ina malompe pobagora, lawi nabuku ni Pue mopakanoto dalara.5 Ria sira tau anu manguli, ria eo anu tepakanoto mobundu mpii, mpane lako i eo anu ntanina. Agaiana ria mbui sira tau ntanina anu manguli, ope-ope eo simbela ngkida. Pogeakamode sadua-sadua tau sangangaa mampotuu apa anu napekiri etu mamonso. 6 Tau anu mopailodo eo anu tepakanoto, etu rababei bona mobila i Pue. Tau anu mangkoni mampopengaa pangkoni, etu rakoni bona mobila i Pue, lawi manguli sira maisi kalompena si Pue Ala. Ewa etu mbui tau anu mangkoni pangkoni, anu tepakanoto ngkida nakoni, mobila mbui sira i Pue, ai manguli mbui sira maisi kalompena si Pue Ala. 7 Lawi kita topepotuu si Pue Ala, baria ria sadua tau anu tuwu, ai katuwuna etu mobundu si ia saduduana. Baria mbui ria anu mamate, ai kamatena etu mobundu si ia saduduana. 8 Katuwuta ba kamateta, mobundu si Pue Ala. Mewali ba tuwu kita ba mamate, batena tau ni Pue. 9 Etumo mpane, i Kerisitu mamate ai tuwu mpesola, mewalimo Pue nu ope-ope tau anu tuwu, ai tau anu mamate.
10 Mewali, mangkiada mpane mopakoi komi pokami sampepepotuumi? Mangkiada mpane nikaisii lolita mbui nu pokami sampepepotuumi? Lawi batena ina dongka tempona, ope-ope kita meongko i lio ni Pue Ala anu mobotusi kara-karata. 11 Lawi i rara Sura Ngkora Magali, nauli ni Pue Ala:
“Mamonso mpuu anu Kuuli ei,
ope-ope tau ina molingkudu i lioKu,
ai ope-ope tau sangangaa mopangaku ka Akuna i Pue Ala.” (Yesaya 45:23)
12 Mewali, sadua-sadua kita sangangaa mosonoi pampekune ni Pue Ala kono i babeiata.
Inee kita mobabei babeia anu mopakanawu pokata sampepepotuuta
13 Etumo mpane kuulika komi: inee kita mombesalai. Aginamo malompe-lompe kita, bona ntena ria babeiata anu mokelo-kelo pokata sampepepotuuta, duduuna madosa ia. 14 Nakenimposintuwuku ai i Pue Yesu, kuinsani ai kupotuu i raraku kabariana ria pangkoni anu rapalia i petotoki ni Pue. Agaiana ane ria sadua tau anu manguli pangkoni anu sampangka rapalia, batena mpuu masala ane nakoni. 15 Agaiana ane nupakadua rara nu rangamu sampepepotuumu, nakeningkaapana anu nukoni, babeiamu etu bariamo mopatongawa ka nupokaasina rangamu etu. Inee nubabei bona rangamu mansumba kanawuana, nakenimpangkonimu pangkoni anu tepakanoto ngkida nukoni. Lawi kamate ni Kerisitu mosorema ia mbui. 16 Mewali, ane ria anu tababei anu malompe mangula pansumbaata, agaiana mopakarugi pepotuu nu rangata, aginamo inee tababei, bona babeiata etu baria rasalai nu rangata. 17 Lawi i rara nu peparentaa ni Pue Ala, baria ada pangkoni ba ada panginu anu mewali puuna. Agaiana anu mewali puuna iamo, pangulata peundeaNa, rarata anu manoto, ai katono rara anu nakiraka kita nu Inosa Magali. 18 Ane ewa etu peulata si Kerisitu, kita ina napokatono ni Pue Ala ai nabila nu rangata.
19 Lawi tunggaiata sangangaa mopari-pari mobabei apa anu mampopewali kita mosintuwu ai rangata, ai anu modurei tau anu mepotuu mewali maroso. 20 Inee wule nakenimpangkonina, tapakarugi pobago ni Pue Ala i rara katuwu nu pokata sampepepotuuta. Kamonsona, ope-ope pangkoni baria tapodosa ane takoni. Agaiana masala komi ane nikoni pangkoni anu mobabei tau ntanina madosa. 21 Aginamo, inee kita mangkoni bau ba manginu kita anggoro ba mobabei kita apa ngkida anu mopakanawu pokata sampepepotuu. 22 Ane nupotuu kabariamu masala mobabei babeia etu, pesumbaa nu pekirimu etu sangangaa nupatoro i raramu saduduamu ngkida i lio ni Pue Ala. Morasi mpuu tau anu mobabei apa anu malompe mangula pesumbaa nu pekirina, ai baria sira mosasalai wotora saduduara. 23 Agaiana ane ria sadua tau anu bata-bata rarana mangkoni bau ba pangkoni ntanina, ai kasopoana nakoni ngkida, tau etu madosa. Lawi anu nababei etu baria mangula pepotuuna. Mewali, ane tababei apa anu baria mangula pepotuuta, babeiata etu tapodosa.