I Peturu ai i Yohane mopakaosa sadua tau anu mapalu
3
1 Sambela tempo, awetu tinti tolu rembe eo, i tempona pekakaeaara nu toYahudi, i Peturu ai i Yohane lau sira i Tombi ni Pue Ala. 2 I boboka anu rasanga Boboka Merae, ria sadua tomoane anu mapalu mepuu lako kokoi mani ia. Eo-eona tau etu rakeni kowo lau momeso i boboka etu i Tombi ni Pue Ala bona merade-rade i tau anu mesua i se etu. 3 Awetu naita i Peturu ai i Yohane mesua, kasaliu merade asi ia si sira. 4 I Peturu ai i Yohane mampelensei tau anu mapalu etu. Nauli ni Peturu si ia, “Totoki kami mai!” 5 Natotoki mpuumo sira manaa-naa, lawi nasarumaka ina mansumba doi lako si sira. 6 Agaiana nauli ni Peturu, “Baria ria doi si kami. Agaiana apa anu ria si kami, etu anu kikiraka iko: i rara nu kuasa ni Yesu Kerisitu toNasare etu, polumakomode!” 7 Lako ni se etu, napatoromo ni Peturu pale kuana nu tau anu mapalu etu, mpane napopeongko. Mewali ungangkidamo maroso paana. 8 Mewali mensende-sendemo ia meongko, mpane molumako wilau wimai. Roo awetu, mesuamo ia i rara nu Tombi ni Pue Ala simbela-mbela ai i Peturu ai i Yohane, molumako ia mpane mensende-sende motoia i Pue Ala. 9 Mawori tau mangita ia molumako, ai motoia ia i Pue Ala. 10 Tingkara mpuu sira, agaiana mawuli rarara mangita anu mewali etu, lawi rainsanira ka iana tau anu mapalu anu merade-rade eo-eona i Boboka Merae i Tombi ni Pue Ala.Pololita ni Peturu i rara nu Tombi ni Pue Ala
11 Mewali, tau anu mapalu anu lako rapakaosa etu meula liliu si Peturu ai si Yohane. Kadongkara i karawaa nu Tombi ni Pue Ala, i karawaa etu ria tambale anu rasanga Tambale ni Salomo, mawori tau mai sira megagu lawi tingkara sira. 12 Awetu naita ni Peturu tau wori aretu, naulika sira, “Poka-pokaku toSaraeli! Mangkiada mpane nipotingkara apa anu niitamimo ei? Mangkiada mpane nitotoki liliu kami? Nipenokami tau ei molumako nakeningkamakuasaki, ba nakeningkamatunduki si Pue Ala? Baria! 13 I Pue Ala anu rapenombai nu ulububuta ni banimpia, anu rapenombai ni Burahima, i Isaki ai i Yako, i Pue Alamo anu mopakabose TuduaNa, iamo i Yesu. Poka-poka, i Yesu etu anu nisusumi si Pilatu, ai anu nisapuakami i lio ni Pilatu i tempona ina napawia. 14 Magali ai manoto raraNa, agaiana nisapuaka ai niperade i Pilatu bona napalewaka komi sadua topepopate. 15 Nauda i Pue Yesu etu anu mokira katuwu malompe, agaiana nipopateda Ia, agaiana napatuwu mpesola Ia ni Pue Ala. Kami ei sabiNa anu mangita katuwuNa mpesola i Pue Yesu. 16 Kuasa lako i sanga ni Pue Yesu etu, anu mopakaroso paa nu tau anu mapalu ei. Mewali, apa anu niitamimo ai anu nisabiki ei, etu mewali nakenimpepotuuna ai pepotuuki si Pue Yesu. Mewali tau ei maosamo.
17 Poka-poka, komimo ai tadulakomi anu mampopate i Pue Yesu. Agaiana kuinsani apa anu nibabei etu, nibabei ewa etu nakeningkabariana niinsani lempona anu nibabei. 18 Agaiana nauda awetu, lako i apa anu nibabei etu, tepabukeimo apa anu nauli ni Pue Ala ni banimpia, anu rapadongka nu ope-ope nabiNa anu manguli: Datu Topesorema sangangaa mansumba kapari. 19-20 Poka-poka, etumo mpane sangangaa menonso komi lako i dosami ai mengkoru komi si Pue Ala, bona Naampuni dosami. Lako i se etu, i Pue Ala ina mopakaroso rarami, Natudu mai i Pue Yesu si komi. Lawi Iamo anu napakanoto ni Pue Ala mewali Datu Topesorema. 21 Ei-ei, i Pue Yesu meari i suruga, ai batena ria liliu i suruga duduuna dongka tempona i Pue Ala mopakabou sinangkana, ewa anu rapadongka nu nabi-nabiNa sira ni banimpia.
22 Poka-poka, ria lolita ni nabi Musa ni banimpia kono si Pue Yesu anu manguli ewa ei:
‘I Pue Ala ina moongko sadua lako i pokami
bona mewali nabi ewa aku ei.
Sangangaa nipeulai apa anu naulika komi nu nabi etu.
23 Ima anu baria mampeulai apa anu nauli nu nabi etu,
ina rapatani lako i tau ni Pue Ala,
ai batena baria ina mansumba katuwu malompe anu baria mokasopoa.’ (Pepopainga 18:15,18,19)
24 Nabi-nabi anu mopadongka lolita lako si Pue Ala, mepuu lako si nabi Semueli ai nabi-nabi anu ntanina anu meunsu lako si Semueli, ope-ope sira mobambari apa anu mewali i tempo ei. 25 Komimo anu mansumba apa anu nadandi ni Pue Ala ni banimpia, anu rapadongka nu nabi-nabi aretu. Komimo anu mansumba pewati lako i dandi ni Pue Ala i ulububuta ni banimpia. Lawi ni banimpia i Pue Ala mongkora si Burahima ewa ei:
‘Lako i pemuleamu,
ope-ope tau i wongko dunia ina mansumba pewati.’ (Pewalina 22:18)
26 Etumo mpane i Pue Ala mampelisi i Pue Yesu BatuaNa, mpane Natudu lau si komi toYahudi. Ni tempona natudu ni Pue Ala mai i dunia, mpolinguruna Natudu mai si komi toYahudi, bona Nawati komi ai Nanini komi mampenonsoi sinangka babeiami anu madaa.”