Topepotuu si Pue Ala bariamo sira tetaka i Atura ni Musa, lawi mosintuwumo sira ai i Kerisitu
7
1 Niinsanimo poka, tongota mani tuwu, tuwu kita i rara kuasa atura nu topoparenta. Agaiana ane mamatemo kita, bariamo ria kuasana atura etu si kita. 2 Rapana: sadua towawine anu motombimo, ane tuwu mani tomoanena, batena tetaka ia i tomoanena mangula atura posamboko. Agaiana ane mamatemo tomoanena, tepawiamo ia lako i atura anu motaka ia i tomoanena. 3 Mewali, ane towawine etu mombekadipuraka ai tomoane ntanina tongona mani tuwu tomoanena, rauli mebualosi ia. Agaiana ane mamatemo tomoanena, bariamo ia tetaka ai atura etu. Naudapae motombi mpesola ia ai tomoane ntanina, bariamo ia teimba masala.4 Ewa etu mbui komi poka i Atura ni Musa, komi mamatemo mampoliungi kamate ni Kerisitu. Etumo mpane, rapoposintuwumo komi ai i Kerisitu. Napatuwu mpesola Ia ni Pue Ala lako i kamate, bona mewali mobundu kita si Pue Ala.
5 Ni banimpia, i tempota baria mani mepotuu si Yesu Kerisitu, tuwu mani kita mangula peundea nu manusia, ai Atura ni Musa mosuweki peundeata bona mobabei kita dosa. Peundea aretumo anu mampopewali kita mamate. 6 Agaiana ei-ei, bariamo kita tetaka i Atura ni Musa anu mokuasai kita ni banimpia, lawi ei-ei mamatemo kita simbela-mbela ai i Kerisitu. Mewali, bariamo kita mangula dala anu masae, iamo mampeulai atura anu teuki. Agaiana ei-ei, mangulamo kita dala anu bou, anu natudoka kita nu Inosa Magali.
Nakenimpeewata i Atura ni Musa, tongawamo kamadosata
7 Ane awetu, apa anu pensani tauli? Atura ni Musapae anu masala? Manoto baria! Agaiana atura etumo anu mopatudu aku kono i dosa. Rapana: baria ina kuinsani apa anu rauli mopaoi, ane Atura ni Musa baria manguli, “Inee mopaoi.” 8 Mampoliungi parenta etu, kuasa nu dosa mansumba tempo mosuweki sinangka peundea nu raraku anu mopaoi; lawi ane Atura ni Musa baria ria, dosa mbui baria makuasa.
9 Ni banimpia, lako baria mani kuinsani Atura ni Musa, pesumbaa nu pekiriku katuwuku ei malompe. Agaiana awetu kuinsani parenta etu, kuasa nu dosa mepuumo mokuasai katuwuku, 10 anu mampopate aku. Naudapae kamonsona Atura ni Musa etumo, anu mpolinguruna ratunggai bona mokira katuwu si aku. 11 Lawi mampoliungi Atura ni Musa etu, kuasa dosa mandoa tempo mopakanawu aku ai mampopate aku.
12 Mewali, Atura ni Musa etu mepuu lako si Pue Ala, ai sinangka parenta i rara atura etu lako si Pue Ala, mewali Atura ni Musa etu, manoto ai malompe. 13 Mewali, riapae anu malompe etu mopadongka kamate si aku? Manoto baria! Kuasa dosada anu mampopobundu Atura ni Musa anu malompe etu anu moparia kamate si aku. Ai lako i Atura ni Musa anu malompe etu, dosa anu ria i raraku mewali tongawa, ai kamonsona dosa etu madaa mpii.
Baria tabuku mampeulai Atura ni Musa lawi dosa ria i rarata
14 Tainsani mpuu, poka, Atura ni Musa etu magali, anu lako si Pue Ala; agaiana aku ei manusia anu madosa, lawi nakuasaimo aku nu kuasa dosa. 15 Kupowuli babeiaku ei, lawi babeia anu malompe anu kupenoka kubabei, baria kubabei, ai apa anu kukasisi, etuda anu kubabei! 16 Agaiana ane kubabei babeia anu baria kuunde, lempona kupokono Atura ni Musa anu malompe etu. 17 Mewali, kamonsona baria nakenimpeundeaku mpane mobabei aku anu madaa etu, agaiana kuasa nu dosa etuda anu mokuasai raraku. 18 Peundeaku, kuunde mobabei apa anu malompe agaiana baria kubuku, etumo mpane kuinsani aku ei tau anu madosa baria ria anu malompe i rara nu katuwuku. 19 Baria kubabei babeia anu malompe ewa peundeaku. Agaiana anu kubabei liliu, iamo babeia anu madaa anu baria kuunde. 20 Agaiana ane kubabei babeia anu baria kuunde, kamonsona baria aku anu mobabei etu. Kuasa nu dosada anu mobago anu mokuasai katuwuku.
21 Mewali, eimo anu mewali liliu i rara nu katuwuku, iamo: Bela-belana kuunde mobabei anu malompe, agaiana kasopoana anu madaa ngkida anu kubabei. 22 I raraku kuunde mpii Atura ni Pue Ala. 23 Agaiana i raraku kuinsani, i rara nu katuwuku ria mbui kuasa dosa, anu mosomboki kuasa atura anu malompe, anu ria i raraku. Etumo mpane tetaka aku i kuasa nu dosa etu.
24-26 Mapari mpuu katuwuku ei! I rara pampekiriku kuunde mpuu mampeulai Atura ni Pue Ala, agaiana mobabei liliu aku dosa, lawi kuasa dosa mokuasai katuwuku. Ima anu ina mopawia aku lako i katetakaku lako i kuasa nu dosa ei? Agaiana kuuli maisi kalompena si Pue Ala anu mosoremamo aku mampoliungi i Yesu Kerisitu, Pueta!