Nakenimposintuwuta ai i Yesu, tepawiamo kita lako i kuasa dosa
(6:1–8:39)
Topepotuu si Pue Ala bariamo sira mosintuwu ai dosa, mosintuwumo sira ai i Kerisitu
6
1 Ane ewa etu, sangangaa mobabei dosa liliupae kita bona i Pue Ala kalalaua mampokaasi kita? 2 Manoto baria! Bariapae tepawiamo kita lako i kuasa nu dosa, mewali pensani manipae kita mobabei liliu dosa! 3 Ba, bariapae niinsani, i tempota rariu, rapoposintuwumo kita ai i Yesu Kerisitu? Ei lempona rapoposintuwu kita ai kamateNa. 4 Ai karariuta etu, kita ewa mamatemo simbela-mbela ai i Kerisitu ai rapaiwu kita simbela-mbela ai Ia. Bona adiwa i Kerisitu rapatuwu lako i kamate nakeni nu kuasa ni Pue Ala Tuamata anu meawa, ewa etu mbui pensani kita mampolumakoi katuwu anu mabou.5 Mewali, nakenimposintuwuta ai i Kerisitu i rara nu kamateNa, etumo mpane mosintuwu mbui kita ai i Kerisitu i rara pengkawanguNa lako i kamate. 6 Lawi tainsanimo, katuwuta lako baria mani kita mepotuu, rapopatemo simbela-mbela ai i Kerisitu i kau anu rapopombesape, mogero kuasa dosa i rara nu katuwuta, etumo mpane bariamo kita napobatua nu kuasa dosa. 7 Lawi ima anu mamatemo, tau etu tepawiamo lako i kuasa dosa. 8 Mewali, nakeningkamateta simbela-mbela ai i Kerisitu, tapotuu mbui ina tuwu kita simbela-mbela ai Ia. 9 Lawi tainsanimo, nakeningka rapatuwuNa mpesola lako i kamate mpane tuwu liliu Ia, kuasa nu kamate bariamo mokuasai Ia. 10 Kamate anu mewali si Kerisitu, iamo kamate i ponangiNa nu kuasa dosa. Etu mewali sambela ngkida duduuna kasae-saeana. Ai katuwu anu Napolumakoi ei-ei, iamo katuwu anu mampeulai peundea ni Pue Ala. 11 Ewa etu mbui, sangangaa moimba mbui komi wotomi mamatemo lako i kuasa nu dosa, agaiana tuwu komi mampeulai peundea ni Pue Ala mampoliungi posintuwumi ai i Yesu Kerisitu.
12 Etumo mpane, ineemo nipogeaka dosa makuasa mani i rara nu katuwumi i rara dunia ei, bona bariamo komi mampeulai peundea nu dosa. 13 Inee mbui komi mosusu wotomi i kuasa nu dosa bona rapopobundu i tunggaia-tunggaia anu madaa. Agaiana nisusu wotomi si Pue Ala, ewa tau anu ralimbamo lako i kamate lau i katuwu. Sangangaa nisusu wotomi si Pue Ala bona wotomi ei nipake mobabei peundea ni Pue Ala. 14 Dosa bariamo pensani mokuasai komi, lawi bariamo komi tuwu i rara nu Atura ni Musa, agaiana nakeningkabula rara ni Pueda.
Sangangaa mampeulai kita peundea ni Pue Ala
15 Mewali adiwa? Pensanipae kita mobabei dosa, lawi bariamo kita mampeulai Atura ni Musa, agaiana i rara nu kabula rara ni Pue Ala? Monso-monso baria! 16 Niinsanimo ane mosusu komi wotomi i sadua tau mewali batua, komi iamo batua nu tau etu. Ane mosusu komi wotomi nakuasai nu dosa, lempona batua nu dosa komi, anu mangkeni komi i kamate. Agaiana ane mosusu komi wotomi si Pue Ala, lempona mosintuwu komi ai Pue Ala.
17 Agaiana maisi kalompena si Pue Ala! Lawi ni banimpia napobatua mpuu komi nu dosa. Agaiana ei-ei, lako i rarami mpuu mengkoru si Pue Ala mangula patudu anu rapadongkaka komi. 18 Komi tepawiamo lako i dosa, ai ei-ei mewalimo komi batua anu mampeulai peundea ni Pue Ala. 19 Ngkora pandiriku ei kupake bona baria mapari niepe mampelempoi patuduku. Ni banimpia napobatua komi nu dosa, lawi wotomi nipogeaka mangula peundea nu rarami anu madaa ai anu baria sintoto, duduuna kalalaua madaada babeiami. Mewali ei-ei, aginamo nisusu wotomi si Pue Ala bona mewali komi tuduaNa duduuna manoto mpuu babeiami ai magali mbui katuwumi.
20 Ni banimpia tongomi mani napobatua nu dosa, baria komi nakuasai nu peundea ni Pue Ala. 21 Ai apamo wuana anu nipupu lako i kuasa nu dosa? Kamonsona ope-opena etu, ei-ei wule mampopewali komi maea, ai kasopoana mangkeni komi i kamate. 22 Agaiana ei-ei, i karapawiamimo lako i kuasa nu dosa ai i pewalimimo batua ni Pue Ala, nipupumo wuana iamo: kamagali anu mangkeni komi i katuwu anu bou anu baria mokasopoa. 23 Lawi surungi nu dosa iamo kamate, agaiana kabula rara ni Pue Ala iamo katuwu malompe anu baria mokasopoa, simbela-mbela ai i Yesu Kerisitu, Pueta.