Roma 5

Nakeningka napasuruta ni Pue Yesu, malompemo posintuwuta ai i Pue Ala

1 Mewali ei-ei, napakanotomo kita ni Pue Ala, i petotokiNa nakenimpepotuuta. Etumo mpane malompe katuwuta i rara posintuwuta ai i Pue Ala mampoliungi i Yesu Kerisitu, Pueta. 2 Nakenimpepotuuta si Yesu Kerisitu anu mopasintuwu kita ai i Pue Ala, etumo mpane tainsanimo kabula nu rara ni Pue Ala i rara katuwuta ei. Ai matono rarata, lawi maroso pesarumakata. Nakenimpesarumakata etu, tainsani kaina tasumbana katuwu anu meawa lako si Pue Ala. 3 Ai baria etu ngkida, nauda kita narumpa kapari agaiana batena malene rarata, lawi tainsani lako i kapari etu mampopewali kita tetida. 4 Ai katetidata mampopenangi kita i rara nu pekelo, ai tainsani kaetunamo anu mopakaroso pesarumakata. 5 Ai pesarumakata etu, baria ina mopakoi rarata, lawi kamaasi ni Pue Ala roomo rakira i rarata. KamaasiNa etu, rakira mampoliungi Inosa Magali anu rakiramo si kita.

6 I tempona baria ria rosota, i Kerisitu mamate nakeningkamadosata, i tempo anu napakanoto ni Pue Ala, molentano kita tau anu karao lako si Pue Ala. 7 Lawi baria mpuu ria sadua tau anu madota mamate mopasuru tau, nauda tau etu baria masala. Pekiri i sadua tau anu malompe ria mbui tau anu pebai mamate. 8 Agaiana i Pue Ala mopatongawa asiNa si kita i tempona mani kita madosa, mampoliungi kamate ni Kerisitu.

9 Ei-ei, manotomo kita i lio ni Pue Ala mampoliungi kamate ni Kerisitu, ai manoto kaina Nasoremata mbui lako i karumpu ni Pue Ala mampoliungi i Kerisitu. 10 Ni tempota moiwali ai i Pue Ala, rapasintuwu kita ai Pue Ala mampoliungi kamate nu AnaNa, apa mani ei-ei i karoonamo kita mosintuwu ai i Pue Ala. Manotomo ina Nasorema mbui kita mampoliungi katuwu mpesola ni Kerisitu.

11 Ai baria etu ngkida, matono mpii rarata mampokatono kalompe ni Pue Ala, mampoliungi i Yesu Kerisitu, Pueta. Lawi mampoliungi i Yesu Kerisitu, malompemo posintuwuta ai i Pue Ala.

Nakeningkamadosa ni Adama, ope-ope tau manawu i rara dosa ai sangangaa mamate

12 Dosa riamo i dunia nakeni nu babeia sadua tau, ai lako i dosa etu moparia kamate. Etumo mpane kamate mangulele i ope-ope tau, lawi ope-ope tau madosamo. 13 Lako baria mani ria Atura ni Musa rakira, dosa ria amimo i rara dunia. Agaiana dosa baria raimba lawi baria ria atura anu raewa. 14 Agaiana nauda ewa etu, mepuu i tempo ni Adama duduuna dongka i tempo ni nabi Musa, kamate mangulelemo i ope-ope tau. Naudapae sira baria moewa parenta ni Pue Ala ewa anu naewa ni Adama, batena mamate mpuu sira simbela ai i Adama.

I Adama pensani rapandiri ewa i Yesu, sadua tau anu dongka i luwuna. 15 Agaiana babeia ni Adama ai i Yesu baria simbela. Lawi kabula rara ni Pue Ala si kita, melumbu kabosena lako i peewa ni Adama. Nakenimpeewa ni Adama, ope-ope tau mamate. Agaiana melumbu mpuu kabula rara ni Pue Ala anu Nakira ntoo i ope-ope tau mampoliungi i Yesu Kerisitu. 16 Kabula rara ni Pue Ala si kita, melumbu kabosena mpane lako i kamadosa ni Adama. Tau anu sadua etu moewa parenta ni Pue Ala, duduuna masala kita i petotoki ni Pue Ala ai sangangaa rasuku. Agaiana, i tempona maisimo kamasalata, dongkamo kabula rara ni Pue Ala si kita, mopakanoto kabariata masala i petotokiNa. 17 Lawi nakeningkamasala nu sadua tau etu, kamate mokuasai ope-ope tau. Agaiana melumbu mpuu kalompena babeia nu sadua Tau, iamo i Yesu Kerisitu. Mampoliungi i Yesu Kerisitu, i Pue Ala mokiraka kabula raraNa i ope-ope tau ai mampopewali sira manoto i petotokiNa. Ai ina monangi sira kamate ai dosa mampoliungi i Kerisitu.

18 Mewali, ane nakenimpeewa ni Adama, ope-ope tau sintoto rasuku, ewa etu mbui i Yesu nakenimpangulaNa peundea ni Pue Ala, mampopewali ope-ope tau tesorema lako i kamasalara, ai rakiraka sira katuwu malompe anu baria mokasopoa. 19 Nakeningkabariana mengkoru i Adama si Pue Ala, ope-ope tau madosa. Agaiana nakenimpengkoru ni Yesu si Pue Ala, ope-ope tau pensani mewali manoto i petotoki ni Pue Ala.

20 Atura ni Musa rakira bona ope-ope tau manginsani kamadosara. Agaiana kalalaua napari-pari nu ope-ope tau mampeulai atura etu, kalalaua moewa sira atura etu ai madosa sira si Pue Ala. Agaiana kalalaua mobabei dosa ope-ope tau, i Pue Ala kalalaua mampokaasi ope-ope tau. 21 Mewali ni banimpia nakuasaimo kita nu dosa, etumo mpane sangangaa mamate kita. Agaiana ei-ei, i Pue Ala mokuasai kita nakeningkabula raraNa, mpane raimba kita manoto i petotokiNa. Ai Nakiraka mbui kita katuwu malompe anu baria mokasopoa mampoliungi i Yesu Kerisitu, Pueta.