I Burahima mewali manoto nakenimpepotuuna si Pue Ala
4
1 Mewali, pensani taala pandiri lako i katuwu ni Burahima, ulububuta. Adiwa dalana i Burahima mewali manoto i petotoki ni Pue Ala? 2 Ane rapana i Burahima mewali manoto i petotoki ni Pue Ala nakeni nu babeiana, pensanimo ia mengkaiwongko i rara nu pololitana. Agaiana kamonsona baria ria puuna i Burahima mengkaiwongko i rara nu pololitana i lio ni Pue Ala. 3 Lawi ria teuki i rara Sura Ngkora Magali, ewa ei:“I Burahima mepotuu si Pue Ala,
nakenimpepotuuna etu, naimba ia ni Pue Ala tau anu manoto.” (Pewalina 15:6)
4 Tau anu mobago modoko sarona, sarona etu baria rakiraka ntoo si ia. Lawi sarona etu, batena nadoko nakeni nu pobagona. 5 Agaiana, tau anu teimba manoto i petotoki ni Pue Ala baria nakenimpobagora, agaiana nakenimpepotuura si Pue anu moampuni tau anu madosa.
6 Patudu ei simbela ai lolita ni Datu Daudi ni banimpia. Lawi i Daudi mampololita kono i katono nu tau sira, anu manoto i petotoki ni Pue Ala, baria nakeni nu babeiara. 7 Ewa ei:
“Matono mpuu tau anu teampuni salara,
ai anu raparisimo dosara.
8 Matono mpuu tau,
anu naparisimo ni Pue Ala dosara.” (Dulua Petoia 32:1-2)
9 Pewati anu napololita ni Daudi etu, baria wule rasumba nu tau anu ratindi, agaiana rasumba mbui nu tau sira anu baria ratindi. Lawi ewa anu roomo kuuli ni mpongone, i Pue Ala moimba i Burahima manoto nakenimpepotuuna ngkida. 10 Mewali niimpia i Burahima mewali manoto i petotoki ni Pue Ala? Lako baria mani ia ratindi, ba i karoonamo ratindi? Kalawiana lako baria mani ia ratindi, baria i karoonamo. 11 Karatindina etu, mewali tanda ka Nadokonamo ni Pue Ala mewali tau anu manoto i petotoki ni Pue Ala, lawi mepotuu ia si Pue Ala. Etumo mpane mewali ia tuama nu ope-ope topepotuu anu baria ratindi, bona kanoto ria si sira. 12 I Burahima mewali mbui tuama nu ope-ope topepotuu anu mangula atura nu petindi, ane rapotuura polumako nu pepotuu ni Burahima, lako baria mani ia ratindi.
I Burahima modoko dandi ni Pue Ala nakenimpepotuuna
13 Ni banimpia i Pue Ala modandi si Burahima ai i pemuleana, kaina Nakirakana sira dunia. Dandi ni Pue Ala etu si Burahima, baria nakenimpangulana Atura ni Musa, agaiana nakenimpepotuuna si Pue Ala, nadoko ia ni Pue Ala mewali tau anu manoto i petotokiNa. 14 Lawi ane rapana, tau anu mangula atura-atura ni Musa ngkida mansumba apa anu nadandi ni Pue Ala, kamonsona pepotuuta si Pue Ala baria mobundu, ai dandiNa baria ina mewali. 15 Lawi Atura ni Musa, wule moparia ngkida pesuku ni Pue Ala. Agaiana ane baria ria atura, baria ria mbui peliungi i atura.
16 Dandi ni Pue Ala etu, batena mewali nakenimpepotuu nu tau si Pue Ala. Etumo anu mewali sambua pempatoroa nu ope-ope pemulea ni Burahima, ai dandi etu nakiraka ntoo sira ni Pue Ala. Baria wule si sira anu tetida i Atura ni Musa ngkida, agaiana si sira mbui anu mepotuu si Pue Ala, simbela ewa i Burahima mepotuu si Pue Ala. Lawi i Burahima iamo tuama nu ope-ope tau anu mepotuu. 17 Nauli ni Pue Ala si Burahima, ewa ei, “Kupopewalimo iko tuama nu tau wori i sumalele dunia.” Ewa etumo i Pue Ala modandi si Burahima, ai i Burahima mepotuu si Pue anu mopatuwu tau anu mamate, ai anu wule mongkora, moparia Ia apa anu baria mani ria.
I Burahima mampotuu kamakuasa ni Pue Ala mopabukei dandiNa
18 I Burahima batena ngkida mesarumaka ai mepotuu, naudapae dandi etu ewa anu baria mesua i akalana ina mewali. Duduuna mewali ia tuama nu tau wori, ewa anu raNgkoraka si ia, ewa ei, “Pemuleamu ina mewali maisi mpii.” 19 Pepotuu ni Burahima baria malede, naudapae nainsani lawi wotona malede mpiimo. Lawi tinuwuna gompimo sangatu mpae ai i Sara towawinena bariamo pensani moana. 20 Baria bata-bata rarana i dandi ni Pue Ala, agaiana kalalaua tetambaida pepotuuna i dandi ni Pue Ala etu. Etumo mpane i Burahima motoia liliu i Pue Ala. 21 Ai mampotuu mpuu ia kamakuasa ni Pue Ala ina mopabukei dandiNa. 22 Etumo mpane i Burahima, nadoko ni Pue Ala mewali tau anu manoto i petotokiNa. 23 Lolita anu manguli “Radoko tau anu manoto i petotoki ni Pue Ala,” baria wule kono si Burahima saduduana ngkida, 24 agaiana si kita mbui. Kita mbui nadokomo ni Pue Ala mewali tau anu manoto i petotoki ni Pue Ala, lawi mepotuu kita si Pue Ala anu mopatuwu mpesola i Yesu Kerisitu, Pueta. 25 I Yesu etumo anu mokiraka wotoNa rapopate mosuru salata. Ai lako i se etu, i Pue Ala mopatuwu mpesola Ia bona rapopewali kita manoto i petotoki ni Pue Ala.