3
1 Ane ewa etu, apamo anu raporasi nu toYahudi, ai apamo bunduna petindi? 2 Mamonso, maisi pobunduana! Mpolinguruna ni banimpia, i Pue Ala mokira NgkoraNa i toYahudi. 3 Mewali, ane ria toYahudi anu baria tetida si Pue Ala, nakeningkabariara tetida etudapae, mpane i Pue Ala baria mopabukei dandiNa? 4 Baria! Naudapae ope-ope tau modongko, batena mamonso lolita i Sura Ngkora Magali anu teuki ewa ei:“O Pue, batena mamonso mpuu pololitaMu.
Nauda ba ima ngkida anu mosalai Iko,
agaiana kamanotoMu batena menangi.” (Dulua Petoia 51:6)
5 Mewali pangkeniaka ni Pue Ala anu manoto etu, kalalaua tongawa ane mobabei kita anu baria makono. Pekiri ria tau anu manguli, “Ane awetu, i Pue Ala baria manoto ane mosuku kita”. 6 Agaiana pampekirira etu baria manoto. Ane rapana i Pue Ala baria manoto, adiwa dalaNa mobotusi kara-kara i dunia ei? 7 Ria pesumbaa pekiri nu tau ntanina manguli, “Mangkiada mpane tau anu mobabei anu madaa etu, rasalai mani ewa tau anu madosa, ane babeiata anu baria makono, kalalaua mopatongawa kamanoto ni Pue Ala, duduuna tau motoia i Pue Ala?” 8 Ai mangkiada mpane baria tauli, “Mobabeimo kita anu madaa bona sanga ni Pue Ala kalalaua ratoia!”
Kalawiana ria tau anu mopakoi aku, manguli ka akuna anu mangulimo ewa etu. Tau anu manguli ewa etu, sintoto mpuu sira nasuku ni Pue Ala.
Ope-ope tau masala i petotoki ni Pue Ala
9 Mewali, ba kita toYahudi, melumbupae kamalompeta lako i tau anu baria sira toYahudi? Baria! Niulikumo ni mpongone, komi toYahudi ai ope-ope tau anu baria sira toYahudi batena masalamo. 10 Lawi ria teuki i rara Sura Ngkora Magali ewa ei:
“Baria ria sadua tau anu manoto.
11 Baria ria sadua tau anu mapande,
ai baria ria sadua tau anu mopari-pari bona manginsani i Pue Ala.
12 Ope-ope tau mokaraosi i Pue Ala,
ope-ope sira mobabei anu masala.
Bariamo mogalo sadua anu malompe babeiana. (Dulua Petoia 14:1-3, 53:1-3)
13 Mampopate sira tau ai pololitara anu raulira,
ai ngudura, mampololita pololita anu mepakanawu.
Pololitara buke pepakoi anu mepakapari,
ewa ipo ule anu mepopate. (Dulua Petoia 5:10, 140:4)
14 Ope-ope pololitara wule pekasisi. (Dulua Petoia 10:7)
15 Raundera mpii mampopesiasi ai mampopate tau.
16 Imba ngkida kalauaara, mangkeni sira kadaa ai kapari.
17 Baria rainsanira tuwu modame ai tau ntanina. (Yesaya 59:7-8, Pepatudu ni Salomo 1:16)
18 Baria sira mengkoru si Pue Ala.” (Dulua Petoia 36:2)
19 Ei-ei tainsanimo, lawi apa anu teuki i Atura ni Musa rapalau i tau sira anu i rara peparenta nu Atura etu. Mewali, baria ria sadua tau anu pensani manguli kamanotona. Ope-ope tau batena masala i petotoki ni Pue Ala. 20 Mewali baria ria sadua tau anu manoto i petotoki ni Pue Ala, nakenimpampopolumakona Atura ni Musa. Lawi lako i Atura ni Musa etumo, tau manginsani dosa.
Dala bona manusia mewali manoto i petotoki ni Pue Ala
Kita mewali manoto i petotoki ni Pue Ala nakenimpepotuuta si Pue Yesu
21 Agaiana ei-ei, i Pue Ala motudoka manusia adiwa dalana bona pensani mewali manoto i petotokiNa. Manusia baria mewali manoto i petotoki ni Pue Ala nakenimpangulara Atura ni Musa. Lawi tepadongka amimo ni banimpia i rara Ngkora anu nauki ni Musa ai nabi-nabi ntanina, 22 iamo i Pue Ala pensani mosintuwu ai manusia, ane manusia mepotuu si Yesu Kerisitu. Etu Nababei i ope-ope tau anu mepotuu si Kerisitu, lawi baria ria anu Napopontani. 23 Lawi ope-ope tau madosamo, etumo mpane bariamo pensani mopatongawa peawa ni Pue Ala. 24 Agaiana nakeningkabula rara ni Pue Ala ngkida, mpane manusia mewali manoto mpesola i petotoki ni Pue Ala, mampoliungi pesorema ni Yesu Kerisitu.
25 I Pue Ala mosusu i Yesu Kerisitu rapopate, bona ai kamateNa etu manusia rapakanoto tesorema lako i kamasalara ane mepotuu sira si Yesu Kerisitu. I Pue Ala mobabei etu, bona mopatongawa kamanotoNa. Lawi ni banimpia, nakeningkasabara ni Pue Ala, baria Nasuku manusia lako i dosara. 26 Mewali ei-ei, i Pue Ala mopatongawa kalompeNa, lawi kalawiana manoto pobotusiNa, ai Napakanoto sira tau anu mepotuu si Yesu.
27 Etumo mpane bariamo ria dalata mengkaiwongko i rara nu pololitata, lawi baria kita Nadoko nakeni nu babeiata anu malompe, agaiana nakenimpepotuutada si Pue Yesu. 28 Eimo tunggaiana pololitaku: Kamonsona, tau anu rauli manoto i petotoki ni Pue Ala, lawi nakenimpepotuura si Yesu Kerisitu, baria nakenimpangulara i Atura ni Musa. 29 Ia, baria wule Pue Ala nu toYahudi ngkida, agaiana Pue Ala nu ope-ope tau anu baria mbui sira toYahudi. 30 I Pue Ala sadua ngkida, lawi Iamo anu mampopewali toYahudi ai tau anu baria toYahudi manoto i petotoki ni Pue Ala, nakenimpepotuura si Yesu Kerisitu.
31 Baria nakenimpepotuuta si Yesu Kerisitu, motende kita Atura ni Musa. Agaiana nakenimpepotuuta si Yesu Kerisitu, mobila kita Atura ni Musa etu.