I Pue Ala baria mampopontani tau
2
1 Etumo mpane manusia, ima ngkida komi, baria ria puuna bona mosasalai tau ntanina. Lawi tempomi mosasalai tau ntanina, kamonsona mosalai mbui komi wotomi saduduami, lawi babeiami etu simbela ai babeiara. 2 Tainsani mpuu poka-poka, ane i Pue Ala mosuku tau anu mobabei daa anu ewa etu, pobotusiNa etu batena mamonso. 3 Agaiana komi manusia, komi saduduami nibabei mbui apa anu nisalaika tau ntanina! Ai nipenokami tepawia komi lako i pesuku ni Pue Ala? 4 Inee mpuupae niimba, baria mobundu kalompe rara ni Pue Ala ai kasabara ni Pue Ala anu mabose mpii! Manotomo ka niinsaninamo kamonsona i Pue Ala mopatongawa kalompe nu raraNa, lawi peundeaNa bona menonso komi lako i dosa-dosami.5 Agaiana nakenimpengkabatumi ai rarami baria madota mampenonsoi salami. Etumo mpane komi saduduami anu moparia pesukumi anu kalalaua mantimi. Ane dongka eo kasopoa dunia, i Pue Ala ina mopatongawa pesukuNa i kanoto-notona. 6 Lawi i Pue Ala mosurungi ope-ope tau, sintoto ai babeiana. 7 I Pue Ala mokiraka sira katuwu malompe anu baria mokasopoa, i tau sira anu matundu mobabei kalompe bona mansumba sira apa anu meawa, anu teadai, ai anu baria mokasopoa. 8 Agaiana tau sira anu mampekiri ngkida wotora saduduara ai baria sira madota mangula peundea ni Pue Ala, mangula ngkida sira peundeara anu madaa. Sira aretumo anu ina mansumba karumpu ai pesuku ni Pue Ala. 9 Ope-ope tau anu mobabei daa, batera mantodisa ai mansumba kapari, mepuu lako i toYahudi, duduuna dongka mbui i tau anu baria sira toYahudi. 10 Agaiana tau anu mobabei kalompe, ina mansumba sira peawa, pebila ai kalompe nu katuwu anu nakiraka ni Pue Ala, mpolinguruna i toYahudi, duduuna dongka mbui i tau anu baria sira toYahudi. 11 Lawi i Pue Ala baria mampopontani tau.
Tau ina rasuku sintoto ai atura anu napeulai
12 Tau anu baria sira toYahudi anu baria manginsani Atura ni Musa, madosa mbui sira. Etumo mpane batena rasuku mbui sira, sukuara etu baria mampeulai Atura ni Musa. Agaiana toYahudi madosa sira awetu rainsaniramo Atura ni Musa, etumo mpane batena rasuku sira sintoto ai Atura ni Musa etu. 13 Lawi tau anu manoto i petotoki ni Pue Ala, baria nakenimpanginsanira Atura ni Musa, agaiana nakenimpampopolumakora Atura ni Musa etu. 14 Tau anu baria sira toYahudi baria sira manginsani Atura ni Musa. Agaiana ane peundeara saduduara mobabei apa anu nauli nu Atura etu, rarara saduduara anu mewali Atura si sira, naudapae baria rainsanira Atura ni Musa. 15 Lawi nakeni nu babeiara anu sintoto ai peundea nu Atura ni Musa, tongawamo kariana parenta lako i Atura ni Musa etu anu teuki i rarara. Lawi sira saduduara sambela-sambela nasalai nu rarara: Ai ria mbui tempona, napakanoto sira nu pekirira.
16 Ewa etu mbui anu ina mewali i eo pobotusi kasopoa dunia. I tempo etu, sintoto ai Bambari Malompe anu kubambari, i Pue Ala mampoliungi Yesu Kerisitu, ina mobotusi ope-ope kara-kara anu tewunikai i rara nu manusia.
ToYahudi manginsani mpuu Atura ni Musa agaiana batena masala sira
17 Mewali, ei-ei adiwa ai komi poka? Manguli komi ka toYahudimi. Mesarumaka komi i Atura ni Musa ai mengkaiwongko komi i rara pololitami nakenimposintuwumi ai i Pue Ala. 18 Lako i Atura ni Musa, niinsanimo peundea ni Pue Ala, etumo mpane pensani komi mampopontani apa anu malompe ai apa anu madaa. 19 Nipotuu ka komina topenini nu tau anu mabilo ai mewali kamabaa si sira anu tuwu i rara nu kamadedi, 20 ai niuli ka komina topopaguru tau anu baria keada ai tau anu baria mosikola. Lawi patudu anu mamonso etu teukimo i rara Atura ni Musa anu ria si komi toYahudi.
21 Mewali, ane mopatudu komi tau ntanina, mangkiada mpane wotomi saduduami baria nipatudu? Nipatudu rangami bona ntena sira manangka, molentano komi mbui topanangka! 22 Niulika rangami inee mebualosi, molentano komi mbui mebualosi! Niuli baria komi menomba i anitu. Agaiana, mangkiada mpane ria komi anu mopanangka anu-anu lako i rara tombi penombaa anitu! 23 Mengkaiwongko komi i rara pololitami lawi riamo si komi Atura ni Musa anu napadongkaka komi ni Musa ni banimpia. Molentano wule mopakoi ngkida komi i Pue Ala i kabariami mampeulai Atura ni Musa etu. 24 I rara Sura Ngkora Magali teuki ewa ei, “Nakeningka komina toYahudi, etumo mpane i Pue Ala rapapakoi nu ope-ope tau anu baria toYahudi.”
ToYahudi ratindi mangula Atura ni Musa, agaiana batena masala sira
25 Komi toYahudi, ria pobunduana karatindimi, ane nipeulai mpuu Atura ni Musa. Agaiana ane baria nipeulai Atura ni Musa etu, bariamo mobundu karatindimi. 26 Ane tau anu baria sira toYahudi anu baria mani ratindi, mampeulai sira Atura ni Musa, batena nadoko sira ni Pue Ala ewa toYahudi anu ratindimo. 27 Mewali kasopoana, babeia nu tau anu baria sira toYahudi anu baria ratindi ina mopatongawa kamasalami toYahudi, anu nakariangimo Atura ni Musa anu teuki, ai ratindi mbui komi mangula Atura etu. Nauda ewa etu, baria komi mangula Atura ni Musa, agaiana sirada anu baria ratindi, anu mampeulai Atura ni Musa.
28 Lawi toYahudi anu kamonso-monsona baria wule nakeningka rapoanakana lako i toYahudi, ai tau anu monso-monso ratindi baria anu ratindi i kamanusiara ngkida. 29 Agaiana tau anu monso-monso rauli toYahudi, iamo tau sira anu mangula i Pue Ala lako i rarara mpii. Ai petindi anu kamonso-monsona, iamo rara anu nakuasai nu Inosa Magali. Tau etumo anu ina modoko petoia ni Pue Ala, baria petoia lako i manusia.