Sura ni Suro Paulu anu napakatuka jumaa i kota
Roma
I Paulu iamo suro ni Pue Yesu i tau anu baria sira toYahudi
1
1 Sura ei lako si aku, i Paulu, suro ni Yesu Kerisitu. I Pue Ala anu mampelisi aku ai motudu aku mangkeni Bambari Malompe anu lako si Ia. 2 Bambari malompe etu, anu nadandikamo ni Pue Ala mampoliungi nabi-nabiNa ni banimpia, ewa anu teuki i rara nu Sura Ngkora Magali. 3 Bambari Malompe etu mampololita kono i Ana ni Pue Ala, i Yesu Kerisitu, Pueta. I Yesu Kerisitu i kamanusiaNa, rapoanaka Ia lako i pemulea ni Datu Daudi. 4 Ai i Yesu mbui iamo Ana ni Pue Ala. Etu rapatongawa ai kuasa anu baria pensani tesoka kamakuasana mampoliungi pengkawanguNa lako i kamate.5 Ai nakeningka i Yesuna, i Pue Ala mokiraka aku kabula nu raraNa mewali suroNa, bona motete aku ope-ope tau lako i sumalele dunia bona mepotuu ai mengkoru sira si Pue Yesu. 6 Ewa etu mbui komi topepotuu i Roma. Komi mbui rarondemo mewali tau ni Yesu Kerisitu. 7 Etumo mpane kupakatuka komi sura ei i ope-ope topepotuu si Pue Ala i Roma. Lawi i Pue Ala mampokaasi komi ai moronde komi mewali tau ni Pue Ala. Mekakae aku bona i Pue Ala Tuamata ai i Pue Yesu Kerisitu mowati komi ai mokiraka komi kalompe nu katuwu.
I Paulu mampenoka lau i Roma
8 Mpolinguruna kuuli maisi kalompena si Pue Ala mampoliungi i Yesu Kerisitu nakeningka komina. Lawi karoso nu pepotuumi si Pue Yesu tebambarimo i sumalele dunia. 9 I rara pekakaeku batena kukaendo liliu komi. I Pue Ala anu kupobagoka ai kabuke-buke nu raraku i rara nu pobambariku Bambari Malompe kono i AnaNa, Iamo sabiku, lawi apa anu kuuli manoto. 10 Mekakae aku bona ai peundea ni Pue Ala, Nakiraka aku tempo pensani mosondaki komi. 11 Kupenoka mpuu mampomberumpaka komi, bona kutibo-tiboka komi pewati anu lako i Inosa Magali anu mopakaroso pepotuumi. 12 Tunggaiaku bona aku mbui tepakaroso nakenimpepotuumi, bona kita momberosongi mporara kita sadua ai sadua.
13 Poka-poka, bona niinsani mawori mbelamo kutunggai lau mosondaki komi, agaiana ria liliu anu mesomboki. Tunggaiaku mosondaki komi, bona ria wua nu pobagoku i boeami, ewa wua nu pobagoku anu riamo i olo nu tau anu baria sira toYahudi i boea-boea ntanina. 14 Mewali, kupenoka mosondaki komi lawi moinda aku i ope-ope tau, iamo mobambari aku Bambari Malompe i ope-ope tau, anu baria sira toYahudi, malompe toYunani ba anu baria sira toYunani, malompe anu mosikola sira ba anu baria mosikola. 15 Etumo mpane kupenoka mpuu mobambari mbui Bambari Malompe si komi anu i Roma.
Bambari Malompe iamo roso lako si Pue Ala
16 Kupotuu mpii Bambari Malompe etu, lawi Bambari Malompe etu iamo roso lako si Pue Ala anu mesorema ope-ope tau anu mepotuu. Mpolinguruna i toYahudi, duduuna dongka mbui i tau anu baria sira toYahudi. 17 Lawi lako i Bambari Malompe etu, i Pue Ala motudoka dala bona manusia Naimba mewali manoto i petotokiNa. Nakenimpepotuu nu manusia si Pue Ala ngkida, teimba sira manoto i petotokiNa lako i mpolinguruna dongka i kasopoana. Lawi ria teuki i rara Sura Ngkora Magali, anu manguli, “Tau anu mepotuu si Pue Ala manoto sira i petotokiNa, tau aretu ina mansumba katuwu anu malompe.”
Ope-ope tau madosa ai masala i petotoki ni Pue Ala
Manusia manginsani kariana i Pue Ala, agaiana baria sira madota menomba si Ia
18 Lako i suruga i Pue Ala mopatongawa karumpuNa nakeningkadaa nu manusia. Lawi kamadaa etu, mosomboki manusia manginsani patudu anu mamonso kono si Pue Ala. 19 Lawi apa anu rainsaniramo kono si Pue Ala tongawamo si sira, lawi napatongawamo ni Pue Ala si sira. 20 I tempona i Pue Ala moteru dunia, naudapae baria raita kamakuasaNa anu baria mokasopoa ai baria mbui raita ka Iana i Pue; agaiana mampoliungi sinangka anu Nateru, manusia pensani manginsani i Pue Ala. Etumo mpane baria ria manusia anu pensani manguli: Baria ia manginsani kanoto kono si Pue Ala. 21 Lawi naudapae manusia manginsani mpuu kariana i Pue Ala, agaiana baria sira motoia i Pue Ala ai baria rainsanira manguli maisi kalompena si Ia. Agaiana apa anu rapekirira baria ria bunduna, duduuna madedi rarara. 22 Mengkatopa sira, molentano kamonsona madoio sira. 23 Baria i Pue Ala anu tuwu liliu anu rapenombaira, agaiana menombada sira i watu-watu anu ewa lense nu anu pensani mamate iamo watu anu ewa lense: manusia, tosi, binata anu mopaa iba ai binata anu mendele.
24 Etumo mpane i Pue Ala mampogeaka ngkida manusia mangula peundea nu rarara anu madaa, duduuna mobabei sira apa anu merikati ai anu mopakakeraki wotora saduduara. 25 Baria sira mangula patudu ni Pue Ala, agaiana mangula ngkida sira patudu anu mepakanawu. Baria Topeteru anu rapenombaira, agaiana anu Nateru etuda anu rapenombai ai anu rapeulaira. Molentano anu meteru etuda anu sangangaa ratoia duduuna kasae-saeana. Amin!
26 Etumo mpane Napogeaka ngkida sira mangula peundea nu rarara anu mepakaea etu, lawi towawine sira bariamo raundera sawoto-woto ai tomoanera mangula ada posamboko, agaiana raunderada ai singka towawinera. 27 Ewa etu mbui tomoane, bariamo raundera sawoto-woto ai towawinera mangula ada posamboko, agaiana raunderada ai singka tomoanera. Etumo mpane mansumba sira pesuku anu sintoto ai babeiara anu madaa etu.
28 Nakeningkabariara mangunde mopangaku i Pue Ala i rara pampekirira, etumo mpane i Pue Ala mampogeaka pampekirira mewali madaa, duduuna mobabei sira anu baria sintoto. 29 Rarara ai pekirira buke ai babeia anu madaa, ewa: baria sira mamposondoka anu riamo si sira, raundera mopakarugi rangara, rarara buke ai kasina, mepopate sira, mobungka-bungka sira, mepodongkoka sira, mombepairara sira, mombekaisii lolita sira, 30 mombengkora-ngkora sira, mokasisi sira i Pue Ala, baria sira mombebila, mampemabose sira, mapande sira moparia posisala, moewa sira tomanara. 31 Anu rapekirira baria ria anu mobundu, baria sira mopabukei dandira, baria ria asira, baria sira motulungi singka rangara. 32 Naudapae manginsani mpuu sira atura ni Pue Ala, anu manguli ima-ima anu mobabei ewa etu, sangangaa rasuku mamate. Agaiana nauda ewa etu, batena ngkida rababeira babeia anu ewa etu mbui, pelumbunamo rasintuwuirada babeia nu tau anu ewa etu.