Tempona i Paulu i lewuto Malta
28
1 Kadongkaki ope-ope i lorena, lako kiinsanida sangana lewuto etu iamo Malta. 2 Malompe mpuu rarara topeari i boea etu, si kami. Radokora lompe kami ope-ope, rapatuwukara apu kami kipanderui, lawi keuda ai malengi. 3 Ni tempo etu, i Paulu lau morompu kau bangi mpane nadumpu. Tongona modumpuli kau i apu, ungangkidamo mensuwu sambaa ule anu moipo lako i se etu, lawi mapana nasonga nu apu. Ule etu motilo palena. 4 Awetu raita nu tau anu meari i boea etu, ule anu mengkalitoe i pale ni Paulu, rauliramo, “Tau etu topepopate! Nauda baria ia mansumba rugi i tasi, agaiana Anitu Topobotusi, baria ina mopaliu ia tuwu!” 5 Nataronta ngkida ule etu i rara nu apu, ai baria ria ba apa anu madaa anu mewali si ia. 6 Rauli nu tau sira anu meari i boea etu, mawoto luwui palena, ai ungangkidamo ina madungka mpane mamate. Masaemo rapegiara, agaiana baria ia mangkia-ngkia. Mewali tebaliki mbuimo pampekirira, etumo mpane raulira, “I Paulu etu iamo anitu!”7 Baria karao lako ni se etu, ria sambua bonde. Bonde etu, bonde ni Publius, gubernur i lewuto etu. Nakeningkalompe nu rarana, narondemo kami lau i tombina, mpane napotorare kami i rarana tolu eona. 8 Ni tempo etu, tuama ni Publius napawembe ai madua taina. Etumo mpane laumo i Paulu i paturuana, napaga ni Paulu tau etu, mpane napekakaeka. Mewali ungangkidamo maosa ia. 9 Nakenimpepakaosa ni Paulu etu, etumo mpane ope-ope tau anu madua i lewuto etu mai sira merade tulungi si Paulu, mpane ope-ope sira maosa lako i sakira. 10 Nakenimpebilara tau aretu, mokiraka sira maisi anu-anura si kami. Ai ane ina mangokamo kami, rakiraka kami apa ngkida anu kiparaluu i polumakoaki.
I Paulu mangoka lako i Malta lau i Roma
11 Sondomo tolu mbula kami i lewuto Malta, mangoka mbuimo kami mampensawii kapala tasi anu lako i Aleksandria. Kapala tasi etu masaemo mengkaroo i lewuto etu mampetumaka kaliuna tempo malengi. Kapala etu rapopatakai “Anitu Moropa”. 12 Mensopimo kami i kota Sirakusa, mpane meari kami tolu eona i se etu. 13 Lako ni se etu, kipaliliumo polumakoaki menana dongka i kota Regium. Ewa ineilena, pambui anu malompe mewui lako mbai monsau, mpane roeo lako ni se etu mendolu kami lako i kapala tasi i kota Putioli i tana Italia. 14 Ni se etu kimpomberumpakamo sira basangkia dua poka-pokaki sampepepotuuki. Raronde kami lau i tombira mpane rapotorarera kami i rarana saminggu. Lako ni se etu, molumakomo kami lau i Roma. 15 Tongoki mani i tongo dala, poka-pokaki sampepepotuuki anu i Roma raepera kaina dongkaki. Etumo mpane maimo sira mampomberumpaka kami i Pobalu-balua Apiusa ai i Posanggaraa Tolu. I pomberumpaki etu, i Paulu motoiamo i Pue Ala, mpane matono mpuu rarana.
Pobambari ni Paulu i Roma
16 Kadongkaki i Roma, i Paulu rapaliumo meari imba peundeana, agaiana nakampai liliu ia nu sadua surudado.
17 Liumo tolu eo, i Paulu morondemo sira totomana nu toYahudi bona rapomberumpaka ia. Awetu sira terusu, mololita ia, naulika sira, “Poka-pokaku toYahudi anu ria i Roma ei, baria kowo aku masala si kita ope-ope toYahudi. Baria mbui aku moliungi ada nu ulububuta. Agaiana nauda ewa etu, aku batena rasoko i Yerusale mpane rasusu aku i topoparenta nu toRoma. 18 Kara-karaku raparesa nu topoparenta nu toRoma, mpane rapenokara ngkida mopawia aku, lawi manotomo kabariana ria salaku anu sintoto rapopateka aku. 19 Agaiana ria sira toYahudi lako i Yudea anu moewa liliu aku. Etumo mpane kuperade bona rakiraka aku tempo mobua kara-karaku si Datu Mabose. Naudapae ewa etu, baria ria anu kusalaika sira pokata toYahudi. 20 Kuronde komi mai mampomberumpaka aku lawi kupenoka kupololita si komi kono i pepotuuku si Datu Topesorema anu rapotuu mbui nu toYahudi. Lawi nakenimpesarumaka nu toYahudi i Datu Topesorema, etumo mpane rataha aku i se ei.”
21 ToYahudi aretu mesono, raulira, “Baria ria sura anu kisumba lako i toYahudi i Yudea anu mampololita kono si iko. Ai baria mbui ria sadua tau lako si dou anu mai mangkeni bambari ba mampololita babeiamu anu madaa. 22 Kiunde mpuu mampetingai adiwa pepotuumu. Lawi kiepe lolita nu tau sira imba ngkida anu mosapuaka patudumu anu nupeulai.”
23 Roo awetu, rapakanotomo eo poterusura ai i Paulu. Dongka mpuumo eo anu rapakanoto, mawori tau terusu i pearia ni Paulu. Mepuu madondo dongka sindulau eo, i Paulu mopadongkakamo sira kono i peparenta ni Pue Ala, mpane mobasa isi Atura ni Musa ai sura nu nabi-nabi, napakanotoka sira kaimana i Yesu bona mepotuu sira si Ia. 24 Ria sira anu mampotuu pololitana, ria mbui sira anu baria mampotuu. 25 Nakenimposisalana pesumbaa nu pekirira, etumo mpane masawumo sira lako i poterusuara etu. Agaiana lako baria mani sira mogaa-gaa, i Paulu mangulika sira ewa ei, “Mamonso mpuuda lolita nu Inosa Magali anu napadongka ni nabi Yesaya i ulububuta ni banimpia, ewa ei:
26 Nauli ni Pue Ala:
‘Lau sira nuulika singka toSaraelimu ewa ei:
Mawori mbela raepera luwu, agaiana baria ina rainsanira luwu lempona anu raepera.
Mawori mbela raitara lompe luwu, agaiana baria ina rainsanira luwu apa lempona anu raitara.
27 Nakeningkatusunamo rarara,
tesumpangimo talingara ai ratukomo matara.
Bona baria sira meepe,
baria sira metotoki,
baria sira mampekiri.
Bona baria sira mesola si Aku,
ai baria sira Kupakaosa.’” (Yesaya 6:9-10)
28 Mewali, nauli mbuimo ni Paulu si sira, “Poka-poka, bona niinsani, ria Ngkora Magali anu mopakanoto dala ni Pue Ala mosorema tau lako i suku dosara. Ngkora Magali etu roomo sira rapadongkaka tau anu baria toYahudi. Siramo anu ina modoko bambari etu!” 29 [Awetu roomo i Paulu mololita ewa etu, lambumo sira toYahudi ai mombesonoi sira.]