I Paulu mensawi kapala tasi lau i Roma
27
1 Etumo mpane, rapakanotomo sangangaa mangokamo kamia mensawi i kapala tasi lau i tana Italia. I Paulu ai basangkia dua tau ntanina anu ratarunggu rasusumo si Yulius, toiwongko nu tadulako surudado toRoma anu napelisimo ni Datu Mabose. 2 Kapala tasi anu kipensawii iamo sambua kapala tasi mabose mpii lako i kota Adramitium anu matimama lau monontosi boea-boea anu i wiwi nu tasi i propinsi Asia. Sadua rangaki anu meula i polumakoaki iamo i Aristarkus, anu lako i kota Tesalonika i tana Makedonia. 3 Mangoka mpuumo kami. Mpane ewa ineilena, mensopimo kami i kota Sidon. Malompe mpuu rara ni Yulius si Paulu, etumo mpane i Paulu nakiraka tempo mosondaki rangana i rara nu kota, bona apa anu naparaluu pensani rakiraka ia. 4 Lako ni se etu, kipaliliumo polumakoaki. Nakenimpewui nu pambui morumpa lio nu kapala tasi anu kipensawii, etumo mpane menana ngkida kami i lewuto Siprus mbai i pensibea eo, bona baria kami narumpa mpii nu pambui. 5 Roo awetu, mowetamo kami tasi anu mampombelioka tana Kilikia ai Pampilia, duduuna dongka kami i kota Mira i tana Likia, mpane mendolu kami i se etu. 6 I kota Mira etu, tadulako nu surudado mansumba sambua kapala tasi lako i kota Aleksandria anu lau i tana Italia. Etumo mpane napopelimba kami i kapala tasi etu.7 I rarana basangkia eo, maole mpuu polumakona kapala tasi anu kipensawii, mapari kiepe, kebaria kami dongka i kota Knidus. Nakenimpewui nu pambui lako i lioki mai, baria kipaliliu polumakoaki ewa anu ratunggai mpolinguruna. Etumo mpane kapala tasi anu kipensawii menana ngkimo i lewuto Kreta moliu i wuntu suo nu tana Salmone, bona baria kami narumpa mpii nu pambui. 8 Mapari mpii mani ni tempoki menana i lewuto Kreta etu. Kasopoana, dongkamo kami i sondaka nu kapala tasi anu rasanga Sondaka Merae, anu gompi i kota Lasea.
9 Nakeningkasaena tempo anu kipake i polumakoaki, liumo eo mabose posusa nu toYahudi. Ai ina dongka tempo malengi, bariamo malompe polumako i tasi. Etumo mpane i Paulu mampopaingaka kami, nauli: 10 “Poka-poka, mangula pesumbaa nu pekiriku, ane tapaliliu polumakoata, ina maisi karugiata. Baria wule kapala tasi ai keniata anu marugi, agaiana kita mbui ina mamate.” 11 Agaiana tadulako nu surudado etu, baria mampotuu lolita ni Paulu, napotuu mani lolita tumpu nu kapala ai tadulako nu topobago i kapala tasi etu. 12 Mewali, nakeningkabariana malompe Sondaka Merae etu i tempona malengi, etumo mpane mawori topobago i kapala tasi etu, merade bona sondaka etu kipalengimo, mpane kipetandaka pulo bona dongka kami i boea Feniks. Tunggaiara, bona i se etu mampetumaka kami kaliuna tempo malengi. Feniks etu iamo sondaka kapala tasi i Kreta anu malompe rapensopii i tempona malengi, lawi telimbangi saudi lako i pambui.b
Pambui mabose i tasi
13 Ni tempo etu, pewui nu pambui anu mbai monsau mai malompe, baria gaga marimbuku. Mewali, mangula pesumbaa nu pekirira topobago i kapala tasi anu kipensawii, pensani kami mopaliliu polumakoaki. Etumo mpane besi popotaha nu kapala tasic etu raoremo, mpane kapalaki molumako menana liliu i lewuto Kreta. 14 Agaiana, baria mani masae lako ni se etu, dongkamo pambui mabose lako i lore. Pambui etu, maruminsi pewuina lako i mataeo, etumo mpane rasanga, Pambui Mataeo. 15 Nakeningkabariana nabuku nu kapala tasi anu kipensawii morumpa nu pambui etu, etumo mpane bariamo kibuku moguli kapala anu kipensawii etu. Mewali rauli nu topobago nu kapala tasi etu, bona rapogeaka ngkimo nawui nu pambui. 16 Baria masae lako ni se etu, kapalaki nawuimo nu pambui lau mbai monsau lewuto anu kokoi anu rasanga Kauda. Awetu kami moliu lewuto etu, telimbangi kami saudi lako i pambui. Ni tempo etu, kipari-parimo modii sekoci.d 17 Sekoci etu, kioremo i wongko kapala tasi anu kipensawii, mpane kapalaki kitaka maroso-roso bona ntena marugi ane lau i kadesea ue i Biting Sirtis i Libia.e Etumo mpane somba nu kapala tasi anu kipensawii rapopendolumo mpane kapalaki rapatumbeikamo nawui nu pambui.
18 Nakeningka narumpaki nu uda ai pambui anu mabose, etumo mpane ewa ineilena mepuumo sira motende kenia nu kapala i rara nu tasi, bona mangaa ngkia kapalaki. 19 Katolu eona, parewa nu kapala ratende mbuimo i rara nu tasi. 20 Basangkia eona, baria kami mangita eo ba betue, ai baria ria katebalikiana pambui masimbuku. Mewali maparimo raraki, ai nipenokaki ba ina sangangaa mansumba kami rugi.
21 Nakenimpewui nu pambui anu mabose etu, basangkia eona baria sira pensani mangkoni. Lako ni se etu, meongkomo i Paulu i olora, naulika sira, “Poka-poka, ane kenipotuu pololitaku ni banimpia bona inee kita lambu lako i Kreta, kebaria kita marugi ewa ei. 22 Agaiana ei-ei kuulika komi, nipakaroso rarami! Baria kita ria sadua anu ina mamate, batena kapala tasi ei anu ina marugi. 23 Lawi ni mpongone kawengi, i Pue Ala anu kupenombai ai anu mokadipuraka aku, motudumo malaekaNa bona dongka si aku. 24 Nauli nu malaeka etu ewa ei: ‘Paulu, inee iko maeka. Lawi batemu ina lau mampombelioka Datu Mabose. Ai nakeningkamaasina i Pue Ala si iko, ope-ope tau i rara nu kapala tasi etu ina tesore mbui sira.’ 25 Etumo mpane sangangaa nipakaroso rarami. Lawi kupotuu mpuu pewalina apa anu Naulika aku ni Pue Ala. 26 Nauda magero kapala tasi ei, ina tesore ngkida kita ope-ope i sambua lewuto.”
27 Ni kawengi kasampulu iba eona, kapalaki nawui liliu nu pambui mabose i tasi Adria. Mewali awetu tongo mbengimo, raepe nu topobago i kapalaki, kapalaki kalalaua gompimo i lorena, lawi mangepemo sira balumba morumpa lorena. 28 Etumo mpane, sambua watu popesoka raulumo i tasi bona rainsani kandalana. Kandalana etu, rompulu ndopo. Roo awetu, raulu mbuimo duduuna toa, sampulu lima ndopodamo lako i tompo nu kandalana. 29 Maekamo sira topobago nu kapalaki lawi nipenokara ina morumpa kami watu rangka. Etumo mpane iba mbuana besi raulu i rara ue i taliku nu kapalaki, bona tetaha kapalaki. Ai pesarumakaki, bona maliga mabaa. 30 Lako ni se etu, topobago i kapalaki rapetandakara mensila lako i kapalaki. Mewali laumo sira mokakaleka besi popotaha nu kapala, i lio nu kapalaki, molentano kamonsona sekocida, anu rapopendolura i tasi. 31 Agaiana naita ni Paulu apa anu rababeira etu, etumo mpane naulika toiwongko nu tadulako ai surudadona anu i kapala etu, “Ane topobago arei mopalengi kapala tasi ei, ope-ope komi baria ina tuwu!” 32 Mewali surudado aretu mobotukimo popetoe nu sekocira, duduuna sekoci aretu manawu i tasi mpane malomemo.
33 Ina mensibemo eo, naulika sira ni Paulu, “Sangangaa mangkoni komi ope-ope! Sampulu iba eomo, nipegia ngkida apa anu ina mewali. Baria mani komi mampaka mangkoni. 34 Mewali, kuulika komi, mangkoni nsalaa komi saudi, bona maroso komi. Ai inee komi maeka baria komi mangkia-ngkia.” 35 Awetu i Paulu roomo mololita ewa etu, naalamo pangkoni, mpane mekakae si Pue Ala i lio nu ope-ope tau. Pangkoni etu natibo-tiboka sira, mpane ia saduduana mepuumo mangkoni. 36 Awetu raepera pololitana, maroso mpesolamo rarara, mpane mangkonimo sira ope-ope. 37 Ope-ope kami anu ria i kapala tasi etu, kaworiki rongatu pitu mpulu aono dua. 38 Awetu mabosumo sira mangkoni, topobago i kapalaki kasaliu motende sira keniaki i rara nu tasi, ewa gandu. Tunggaiara, bona mangaa saudi kapalaki.
Kapala tasi mapengka-pengka
39 Mewali, awetu mabaamo, topobago kapala tasi mangitamo sira lembo, agaiana lembona etu baria rainsanira. Raitara mbui suo nu tasi, ai tanambungina malompe. Etumo mpane ria tunggaiara bona ane pensani, mensore sira si dou. 40 Ope-ope koloro popotaka besi anu motaha kapala tasi rabotukimo, mpane besi aretu rapogeaka i rara nu tasi. Ni tempo etu mbui, koloro anu motaka popeguli kapala tasi rakakasimo, bona kapala tasi pensani rapopolengko. Somba nu kapalaki ratoemo i lio bona kapalaki pensani nawui nu pambui duduuna dongka i wiwina. 41 Agaiana, baria kami dongka i wiwina etu, lawi woo nu kapala tasi anu kipensawii tetaha i wungi, duduuna bariamo mokale-kale. Mbai i taliku nu kapalaki marupumo, narumpa balumba nu tasi anu mabose.
42 Lako ni se etu, ria tunggaiara surudado mampopate ope-ope tau anu rataha, bona ntena sira ria anu monangu lau i lorena mpane melangka. 43 Agaiana toiwongko nu tadulako surudado moombo sira, lawi naunde bona i Paulu inee rapopangkia. Etumo mpane natudumo bona tau anu manginsani monangu melumpa ilodo i tasi mpane monangu lau i lorena. 44 Roo awetu, natudumo sira bona tau anu baria rainsanira monangu mangala sira pata ba kapengkaa nu kapala tasi bona rapake lau i lorena. Etumo mpane baria kami mangkia-ngkia ope-ope dongka i lorena.