I Paulu manguli notona si Datu Agripa
26
1 Mewali, nauli ni Agripa si Paulu, “I eo ei rakirakamo iko tempo mampololita notomu.”I Paulu moonamo palena mpane mepuumo ia mopadongka notona, nauli: 2 “Datu Agripa anu kubila! Ilodo kuuli, morasi mpuu aku, lawi pensani aku mampololita notoku i lio ni datu, mosonoi ope-ope perai nu toYahudi si aku. 3 Apa mani lawi i datu manginsani mpuu ada nu toYahudi ai patudu anu rapombesonoingi. Etumo mpane merade kowo aku bona sabara komi mampetingai lolita kono i notoku.
4 Ope-ope toYahudi manginsani lolitakana katuwuku mepuu lako i mpolinguruna, malompe i tempoku kokoi mani i tanaku saduduaku, ba i tempoku meari i olo nu pokaku sira i Yerusale. 5 Masaemo toYahudi manginsani babeiaku. Ane raundera, pensani sira motuntu lolitakana katuwuku. Aku ei toParisi mbui, anu maruminsi pangulaku ope-ope ada agamata toYahudi. 6 Etumo mpane raparesa aku i se ei, nakenimpesarumakaku i dandi ni Pue Ala i ulububuta ni banimpia. 7 DandiNa etu rapotuu mbui nu ope-ope pokata toYahudi i sampulu rontina anu menomba liliu sira si Pue Ala. Datu anu kubila, lako i pesarumakaku etu, etumo mpane rasalai aku nu toYahudi.a 8 Mpane komi pokaku toYahudi, mangkiada mpane baria nipotuu kamakuasa ni Pue Ala mopatuwu mpesola tomate?
9 Bona niinsani, ni banimpia pesumbaa nu pekiriku mbui, sangangaa kuewa topeula ni Yesu toNasare etu. 10 Mewali, kuewa mpuu sira i Yerusale. Ni tempo etu, kusumbamo sura kuasa lako i kapala-kapala tadulako menomba, mpane mawori tau ni Pue Ala kutarunggu. Ai kuunde mpii mbui ane rasuku mamate sira. 11 Mawori mbela kupopesiasi sira i rara nu tombi penombaa, mpane kupari-pari sira mosapuaka pepotuura si Yesu. Masodo mpuu aku mangita sira. Etumo mpane lau mbui aku i kota-kota anu karao mampopesiasi sira.”
I Paulu motuntu kono i dalana mewali tau anu mepotuu si Kerisitu
12 Napaliliumo ni Paulu manguli notona, nauli, “Datu anu kubila, etumo tunggaiaku lau i kota Damsik, lawi ratudu aku ai rakiraka sura kuasa lako i kapala-kapala tadulako menomba. 13 Lau aku i Damsik, agaiana awetu togomo eo i tongo dala, ungangkidamo kuita pewangka lako i langi anu melumbu lako i pewangka nu eo. Pewangka etu motoleliki kami. 14 Madungkamo kami ope-ope mpane kuepemo sambua wotu anu mololita si aku i rara basa Yahudi, Naulika aku: ‘Saulu, Saulu, mangkiada mpane nupopesiasi Aku? Iko saduduamu anu mamposurunga, ane nuewa liliu peniniKu.’
15 Mewali kupekune: ‘Ima Iko, i Pue!’ Nasonoi: ‘Akumo i Yesu, anu nupopesiasi! 16 Peongkomode! Kupatongawaaka iko wotoKu, lawi ria tunggaiaKu si iko: Kupelisimo iko mewali topobagoKu ai sabiKu. Sangangaa mopadongka iko i tau ntanina apa anu nuitamo i eo ei, ai apa anu Kupatongawaaka iko i eo-eo anu ina mai. 17 Ina Kutudu iko lau mobambari NgkoraKu i toYahudi ai i tau anu baria sira toYahudi, ai ina Kupawia iko lako i kuasara. 18 Kutudu iko lau mobungkasi matara bona mepotuu sira. Nunini sira lako i adara anu madedi lau i kamabaana bona tepawia sira lako i kuasa Datu nu Seta mpane nakuasai sira ni Pue Ala. Kutudu iko lau bona dosara ina naampuni ni Pue Ala nakenimpepotuura si Aku, ai napelisi sira ni Pue Ala.’”
I Paulu mopadongka kono i bagona mobambari Ngkora
19 “Datu Agripa anu kubila, etumo mpane kupari-pari mampeulai apa anu naulika aku ni Pue i rara pampatongawaNa si aku. 20 Mpolinguruna bambari etu, kupadongka i kota Damsik, roo awetu i Yerusale mpane i sumalele tana Yudea, ai i tau ntanina anu baria sira toYahudi, sangangaa menonso sira lako i dosara mpane mengkoru sira si Pue Ala, ai sangangaa mobabei sira apa anu malompe bona tongawa penonsora. 21 Etumo mpane rasoko aku nu toYahudi i Tombi ni Pue Ala. Rapenokara mampopate aku, 22 agaiana nauda ewa etu, duduuna ei-ei, i Pue Ala mokampai liliu aku. Mpane pensani mani aku meongko i se ei mopadongka kono si Pue Yesu i ope-ope tau, malompe i tau anu mawane lantina, awetu mbui i tau biasa. Apa anu kuuli ei, batena simbela ai apa anu napadongka amimo ni nabi Musa ai nabi-nabi ntanina ni banimpia 23 anu manguli: Datu Topesorema sangangaa rapopesiasi mpane rapopate, ai Iamo anu mpolinguruna tuwu mpesola lako i kamate. Mpane lako ni se etu, mobambari Ia Ngkora Magali i ope-ope tau, malompe toYahudi awetu mbui anu baria sira toYahudi.”
24 Etumo mpane tongona mani i Paulu mopadongka notona, mongangamo i Festus, nauli, “Magila iko Paulu! Kapandemu etu anu mangkeni iko magila.”
25 Nasonoi ni Paulu, “Gubernur anu kubila. Baria aku magila. Mamonso mpuu pololitaku ei, ai manoto mpuu pekiriku. 26 Datu Agripa manginsani mbui pewalina anu kuuli ni mpongone. Etumo mpane baria aku maeka mololita ewa etu i lio nu datu. Kupekiri baria ria anu baria mani naepe ni Datu Agripa, lawi ope-ope anu mewali ni banimpia etu, baria tewunikai. 27 Datu anu kubila! Ba nupotuu apa anu rauli nu nabi-nabi ni banimpia? Kuinsani nipotuu!”
28 Nasonoi ni Datu Agripa si Paulu, “Ba nipenokamupae ane kupetingai apa anu nupadongka etu, sampalai kaina mampopewaliku tau anu mepotuu si Kerisitu?”
29 Nasonoi ni Paulu, “I tempo anu sampalai ba i tempo anu masae, mekakae aku si Pue Ala bona i datu ai ope-ope tau anu mampetingai pololitaku i eo ei, ina mewali ewa aku. Agaiana, aku baria motunggai bona komi mbui rataka ewa aku i rara nu petarunggua ei.”
30 Kasopoana, meongkomo i Datu Agripa, Gubernur Festus, ai i Bernike simbela-mbela ai rangara, mpane lambumo sira lako i tombi poterusua. 31 Dongkamo sira i raoa, mololita sira, raulira, “Tau etu, baria kowo ria salana anu sintoto rapopateka ba ratarungguka ia.” 32 Lako i se etu, Datu Agripa mangulika i Festus, “Kamonsona, pensanimo ia rapawia, ane kebaria ia mobua kara-karana si Datu Mabose.”