I Paulu i lio ni Festus
25
1 Lako tolu eo i Festus dongka i propinsi Yudea, mangokamo ia lako i Kaisarea lau i Yerusale. 2 Awetu ia dongka i se etu, kapala-kapala tadulako menomba ai tadulako nu toYahudi laumo sira si Festus mopadongka pesalaira si Paulu. 3 Merade sira si Festus bona lako i kalompe rarana, natudu tau mangkeni i Paulu lau i Yerusale. Molentano akalara ngkida bona i Paulu rapopatera i tongo nu polumakoara. 4 Agaiana nasonoi ni Festus, “Baria pensani! I Paulu batena ratarunggu i Kaisarea, ai aku saduduaku motunggai polo mesola aku i se etu. 5 Aginamo tadulakomi lau simbela-mbela ai aku i Kaisarea, bona kupetingai pololitami, babila ria mpuu babeiana anu masala.”6 I Festus meari saminggu labi i Yerusale, lako mesolada lau i Kaisarea. Ewa ineilena, nagulumo sira ope-ope tadulako, mpane naparentai sira surudado, bona i Paulu rakenira mai i poterusua, raparesa kara-karana. 7 Kadongka ni Paulu i se etu, riamo sira toYahudi anu lako i Yerusale anu meongko motoleliki i Paulu, mpane mosalai ia. Maisi mpangkana pesalaira rapadongkara mopakanawu i Paulu, agaiana popadongkara etu, baria rabukura mopatongawa. 8 Roo awetu, i Paulu mopadongkamo notona, nauli, “Mogalo saudi baria ria kamasala anu kubabei! Baria aku moliungi atura nu toYahudi ba mopakakeraki Tombi ni Pue Ala ba moewa Datu Mabose i Roma!”
9 Nakeningka napenoka ni Festus mandoa rara nu toYahudi, etumo mpane naulika i Paulu, “Ba nuunde lau i Yerusale, bona kara-karamu kupomeso-mesoka si dou?”
10 Nasonoi ni Paulu, “Ei-ei, meongko aku i lio nu topobotusi ni Datu Mabose, datu nu toRoma. Ai batena topoparenta nu toRoma anu sintoto mobotusi kara-karaku, nuinsani mpuu, tua gubernur, kabariana ria salaku i toYahudi. 11 Ane mamonso mpuu ria salaku anu sintoto rasukuka aku duduuku mamate, timama aku modoko pesuku etu. Agaiana ane baria mamonso popadongka nu toYahudi, baria ria sadua tau anu pensani mosusu aku i rara nu palera. Sangangaa kupadongka kara-karaku si Datu Mabose!”
12 Awetu naepe ni Festus pololita ni Paulu, mololitamo i Festus ai singka tadulakona. Roo awetu naulika i Paulu, “Nakeningka nuperadena mopadongka kara-karamu i Datu Mabose, batena ina lau mpuu iko i kota Roma mampombelioka i Datu Mabose.”
I Paulu i lio ni Agripa ai i Bernike
13 Baria masae lako ni se etu, Datu Agripa ai toina towawine i Bernike lau i kota Kaisarea, motabe i Festus, nakeningka raongkona mewali gubernur. 14 Basangkia eonamo sira i Kaisarea, napadongkamo ni Festus kara-kara ni Paulu si Datu Agripa, nauli, “Ria i se ei sadua tau anu rataha ai anu kara-karana baria nabotusi ni Feliks, ni tempona mani meparenta. 15 Ni tempoku i Yerusale, kapala-kapala tadulako menomba ai totomana nu toYahudi, mopadongka si aku peraira si Paulu ai raperadera bona rasuku. 16 Kusonoi sira: mangula aturara nu toRoma, tau anu rasalai baria pensani kasaliu rasusu rasuku. Sangangaa rapomeso-mesoka sala kara-karana mampombelioka ia iwalina, ai sangangaa rakiraka ia tempo mopadongka notona.
17 Lako ni se etu, basangkia dua tadulako nu toYahudi mai sira simbela-mbela ai aku lako i Yerusale. Kadongkaku i se ei, baria masae kupegia. Ewa ineilena, kuparentai sira tau mangkeni mai i Paulu bona kupomeso-mesoka kara-karana. 18 Ni tempona topesalai aretu meongko i lioku mopadongka sira pesalaira. Nipenokaku ria babeiana anu madaa mpii anu rasalaika ia, agaiana anu rasalaika ia etu, baria ewa etu. 19 Anu kusumba, wule posisala pesumbaa mpekirira i agamara. Mampombesonoingi sira sadua tau anu rasanga i Yesu. I Yesu etu mamate, agaiana nauli ni Paulu, tuwu mpesola. 20 Mewali, mawuli raraku mobotusi kara-kara etu. Etumo mpane kupekune i Paulu, kuulika: ‘Ba nuunde lau i Yerusale, bona kara-karamu rapomeso-mesoka si dou?’ 21 Agaiana naperade ni Paulu bona kara-karana rapopempone si Datu Mabose. Mpane naperade mbui bona rataha liliu ia, duduuna kara-karana nabotusi nu Datu Mabose. Etumo mpane kutudumo bona i Paulu rataha liliu duduuna ria parentaku motudu tau mangkeni ia lau si Datu Mabose.”
22 Lako ni se etu, i Datu Agripa mangulika i Festus, “Kupenoka mbui mangepe pololitana.”
Nauli ni Festus, “I neiledamo, ina nuepe pololitana.”
23 Ewa ineilena, dongka mpuumo i Datu Agripa ai i Bernike, radoko sira i rara mpebilara anu maruminsi. Mesuamo sira i rara nu tombi poterusua simbela-mbela ai toiwongko-toiwongko nu surudado ai totomana i kota etu. Naparentaimo ni Festus tau sira, bona i Paulu rakeni mai mampombelioka sira. 24 Lako ni se etu, i Festus mololita, nauli, “Datu Agripa, totomana ai ope-ope anu terusu i se ei! Tau ei rasalai nu ope-ope toYahudi, malompe i Yerusale, awetu mbui anu i se ei. Monganga-nganga sira merade si aku bona tau ei rasuku mamate. 25 Naudapae baria ria salana anu kusumba bona sintoto ia rapopate. Agaiana naperade mpii ni Paulu bona kara-karana napadongka si Datu Mabose i kota Roma, etumo mpane kupakanotomo bona rakeni ia si Datu Mabose. 26 Agaiana baria mani kuinsani kaapana anu kuuki i rara nu suraku lau si Datu Mabose. Mewali, etumo mpane kukeni mai i liomi, pelumbunamo si tua Datu Agripa anu kubila. Tunggaiaku, bona awetu roomo poparesa ei, kuinsanimo apa anu kuuki. 27 Lawi pesumbaa nu pekiriku, baria sintoto mampopempone kara-kara nu tau lau i pobotusia ni Datu Mabose, ane baria rapakanoto apa anu rasalaika ia.”