I Paulu i lio ni Gubernur Feliks
24
1 Lima eo lako ni se etu, Tadulako Menomba Mabose i Ananias ai basangkia dua tadulako nu toYahudi lau i Kaisarea, simbela-mbela ai sadua tau anu manginsani mpii atura Roma, sangana i Tertulus. Awetu sira dongka i se etu, laumo sira i lio ni Gubernur Feliks mopadongka pesalaira. 2 I Gubernur Feliks motudumo tau mangkeni mai i Paulu i liona, ai i Tertulus rakirakamo tempo mololita. I Tertulus mepuu mopadongka pesalaina si Paulu, nauli:“Tua Gubernur Feliks anu kibila! I rara nu poparentami, masana kiepe katuwuki. Ai nakeningkatopami, maisimo anu rapakalompe i sumalele nu tanaki. 3 Lako i ope-ope etu, kami ope-ope taumu imba ngkida kariaaki, kiuli, maisi mpuu kalompena ai lako i pebilaki anu mabose mpii. 4 Agaiana, bona baria kami maisi motende mbero tempomu, kiperade asi lako si tua bona nupetingai kowo pololitaki anu marede ei. 5 I Paulu ei moparia posisala kaimba-imbaana, mosuweki ia rara nu toYahudi i sumalele dunia moewa topoparenta. Ai ia eimo sadua tadulako nu tau anu mampeulai patudu ni Yesu toNasare. 6 Apa mani, mampenoka ia mopakakeraki Tombi ni Pue Ala. Etumo mpane kisokomo. [Ria tunggaiaki ni banimpia mampomeso-mesoka kara-karana mangula atura agamaki. 7 Agaiana toiwongko nu tadulako surudado i Lisias mandoa ia maliga lako i paleki. 8 Mpane natudu bona ima ngkida anu mampenoka mosalai sangangaa mai si tua gubernur.] Mewali, ane iko saduduamu moparesa ia, ina nuepe mpuu lako i nguduna kamonsona ope-ope pololitaki ei.” 9 Ope-ope toYahudi anu ria i se etu, meula mbui sira mosalai i Paulu ai mopakanoto kamonsona lolita ni Tertulus etu.
I Paulu mopadongka notona si Feliks
10 Roo awetu, i gubernur moonamo palena mokiraka tempo bona i Paulu mololita. Mololitamo i Paulu, nauli, “Matono mpuu aku, lawi rakiraka aku tempo mopadongka notoku i lio ni tua gubernur. Lawi kuinsani, i paenamo kasaena i gubernur mewali topobotusi i tanaki. 11 Aginamo nuparesa pololitaku ei: sampulu roeo naliu, lau aku i Yerusale menomba i Tombi ni Pue Ala. 12 Baria aku sambela rasumba mombesonoi ba mosuweki rara nu tau wori i Tombi ni Pue Ala ba i tombi-tombi penombaa, ba imba ngkida i rara nu kota. 13 Baria mbui ria sadua tau anu pensani mopatongawa kamonsona popadongkara ni mpongone anu rasalaikara aku. 14 Agaiana eimo anu kupangaku si iko tua: mampeulai aku patudu ni Pue Yesu anu rasapuaka nu iwaliku. Mangula patudu etu, menomba aku si Pue Ala anu rapenombai nu ulububuki ni banimpia, ai batena kupotuu ope-ope anu teuki i rara nu Atura ni Musa ai sura nu nabi-nabi. 15 Pesarumakaku si Pue Ala batena simbela ai pesarumaka nu iwaliku ei: kupotuu kaina riana tempo anu napakanoto ni Pue Ala mopatuwu mpesola ope-ope tomate, malompe anu manoto babeiara, awetu mbui anu madaa babeiara. 16 Etumo mpane lako i raraku mpii mobabei liliu aku apa anu malompe i petotoki ni Pue Ala, awetu mbui i petotoki nu manusia.
17 Basangkia mpaena, baria aku lau i Yerusale. Awetu lau mpesola aku mangkeni doi petulungi i pokaku toYahudi ai mangkeni aku popenombaku si Pue Ala, 18 basangkia dua toYahudi mansumba aku i Tombi ni Pue Ala. Ni tempo etu, roomo aku mobabei ada pobakosi woto mangula ada agamaki. Baria mawori tau anu simbela-mbela ai aku, ai baria mbui ria anu mogeo-geo. 19 Agaiana ria sira i se etu basangkia dua toYahudi lako i propinsi Asia. Kamonsona, kesirada anu sangangaa mai mosalai aku si tua gubernur, babila ria mpuu salaku si sira. 20 Agaiana baria sira ria i se ei. Mewali, pogeakamode iwaliku anu ria i se ei manguli ei-ei apa babeiaku anu madaa anu rasumba ni tempoku raparesa ni banimpia i lio nu topobotusi kara-kara nu toYahudi i Yerusale. 21 Batena pololitaku ei ngkida anu rasumbara anu rasalaikara aku ni banimpia i liora, anu manguli: ‘Aku ei raparesa, lawi kupotuu tau anu mamate batena tuwu mpesola.’”
22 I Gubernur Feliks manginsani mpuu apa anu rapotuu nu tau anu mepotuu si Kerisitu. Etumo mpane nauli, “Dongka i se eimo sala pomeso-mesota. Kubotusidamo kara-kara ei, ane dongka toiwongko nu tadulako surudado i Lisias.” 23 Roo awetu, naparentaimo ni gubernur tadulako nu surudado mokampai i Paulu. Agaiana baria ia ewa tau anu ratarunggu, ai rangana rapaliu lau mokiraka ia apa anu naparaluu.
I Paulu i lio ni Feliks ai Drusila
24 Basangkia eona lako ni se etu, dongka mbuimo i Gubernur Feliks ai towawinena, i Drusila. I Drusila etu toYahudi. I Feliks motudumo surudadona mangkeni i Paulu i liora, mpane mampetingai sira pololita ni Paulu mopadongka kono i pepotuuna si Yesu Kerisitu. 25 Agaiana awetu nauli ni Paulu: sangangaa manoto babeiata, ai sangangaa tabuku mokuasai peundea nu rarata, lawi ina dongka Eo Pesuku ni Pue Ala, maekamo i Gubernur Feliks, etumo mpane nauli, “Awetumo sala! Laumode! Kurondedamo iko luwu, ane ria tempoku.” 26 Kamonsona, pesarumaka ni Feliks kaina nakiraka ia ni Paulu doi bona napawia. Etumo mpane i Paulu paka naronde mololita ai ia.
27 Awetu liumo rompae, i Feliks napasurumo ni Perkius Festus mewali gubernur. Nakeningka napenoka ni Feliks mangala rara nu toYahudi, etumo mpane i Paulu napogeaka ratarunggu liliu.