23
1 Kadongka ni Paulu i poterusuara, natotoki sira ope-ope topobotusi kara-kara aretu, naulika sira, “Poka-pokaku! Duduuna ei-ei, i rara nu katuwuku, lako i raraku mpii mobila i Pue Ala.” 2 Awetu i Paulu roomo mololita ewa etu, Tadulako Menomba Mabose i Ananias motudu tau sira anu i tumbiri ni Paulu mosopo nguduna. 3 Nauli ni Paulu i Tadulako Menomba Mabose, “I Pue Ala ina mosopo mbui iko, iko anu malompe i raoa ngkida! Kamonsona nubotusi kara-karaku mangula Atura ni Musa, agaiana iko saduduamu anu moliungi mpii Atura ni Musa, lawi nutudu sira tau mosopo aku!”4 Lako ni se etu, ria sadua tau i tumbiri ni Paulu anu mangulika ia, “Pebai mpuu iko manguli ewa etu i Tadulako Menomba Mabose!”
5 Nasonoi ni Paulu, “Oo, baria kowo kuinsani ka iana Tadulako Menomba Mabose. Ria mpuu mbui anu teuki i rara Sura Ngkora Magali ewa ei: ‘Inee iko mopakoi tadulakomu.’”
6 Nainsani ni Paulu, i olo nu tadulako aretu, ria sira anu mampeulai patudu nu Saduki, ria mbui sira anu mampeulai patudu nu Parisi. Etumo mpane mololita ia i topobotusi kara-kara aretu, nauli masisimbuku, “Poka-poka! Aku ei anu mampeulai patudu nu Parisi, lawi aku ei pemulea nu toParisi mbui. Eimo puuna mpane rapomeso-mesoka aku i se ei, lawi kupotuu tau anu mamate, batena tuwu mpesola.”
7 Awetu raepe nu tau anu mampeulai patudu nu Parisi ai Saduki pololitana etu, mombesonoi sira mpane bariamo sira mosintuwu. 8 Lawi tau anu mampeulai patudu nu Saduki mosapuaka katuwura mpesola tau anu mamate, ai baria sira mampotuu kariana malaeka, ai baria mbui sira mampotuu kariana tanuana. Agaiana tau anu mampeulai patudu nu Parisi, batera mampotuu ope-ope etu. 9 Kasopoana, maruminsi pombesonoira. Ria basangkia dua toParisi anu mewali guru meongko mpane mosonoi sira, raulira, “Mangula pesumbaa nu pekiriki, baria ria salana tau etu. Babila ria malaeka ba tanuana anu mololita si ia.” 10 Lako ni se etu, kalalaua tetambaimo pombesonoira, duduuna tadulako surudado etu maeka ia inee mpuupae luwu i Paulu ina radulura. Etumo mpane natudumo sira surudadona lau mangala i Paulu rakenira mpesola i tombira.
11 Karombengina i Paulu i tombi nu surudado aretu, ungangkidamo i Pue Yesu meongko i tumbiri ni Paulu, Nauli, “Pakaroso raramu. Kuposabimo iko i se ei i Yerusale, ai batena ina Kuposabi mbui iko i kota Roma.”
ToYahudi motunggai mampopate i Paulu
12 Ewa ineilena, basangkia dua toYahudi mogombo sira. I pogombora etu, mosumpa sira, raulira, “Baria mani kami mangkoni ba manginu ane i Paulu baria mani kipopate.” 13 Kaworira anu mogombo aretu, labi iba mpulu dua tau. 14 Mewali, laumo sira anu mosumpa aretu i kapala-kapala tadulako menomba ai i totomana nu toYahudi, raulira, “Mosumpamo kami, baria kami mangkoni ba manginu apa-apa ane baria mani kipopate i Paulu. 15 Mewali, kiperade i totomana ai i tadulako-tadulako topobotusi kara-kara nu toYahudi, bona nipakatu sura lau i toiwongko nu tadulako surudado nu toRoma, merade bona i Paulu rakenira mpesola mampombelioka komi, mpane raparesara mpesola kara-karana. Agaiana matimamamo kami mampopate ia i tongo dala luwu.”
16 Pinoana ni Paulu, ana nu toina towawine mangepe tunggaiara etu. Etumo mpane nagagumo lau i tombi nu surudado mopadongka tunggaiara si Paulu. 17 Roo awetu, i Paulu morondemo sadua tadulako surudado, naulika, “Nuporangai anakoi ei lau i toiwongkomi. Ria anu ina napadongka.”
18 Tadulako surudado etu mamporangai mpuumo anakoi etu lau i toiwongko nu tadulako nu surudado etu, nauli, “Tua, i Paulu anu ratarunggu i se ei, merade bona kukeni mai anakoi ei si kita. Ria anu ina napadongkaka komi tua.”
19 Mewali, toiwongko nu tadulako surudado etu mopatoromo pale nu anakoi etu, mpane nakeni lau i raoa, napekune, “Apa anu ina nuulika aku, anaku?”
20 Nasonoi nu anakoi etu, “Tua, ria sira toYahudi anu mogombo. Tunggaiara, ina mamperade si tua bona i neile pinotuamaku nukeni i lio nu topobotusi kara-kara nu toYahudi, raulira bona raparesa mpesola kara-karana. 21 Inee nupeulai pamperadera, lawi ria sira tau anu labi iba mpulu dua, anu mentawuni i dala mowunaka pinotuamaku. Mosumpamo sira bona baria mani sira mangkoni ba manginu ane baria mani sira mampopate pinotuamaku. Matimamamo sira, mampegia ngkidamo sira surungina pololitara lako si iko, tua.”
22 Nauli nu toiwongko nu tadulako surudado etu, “Inee nupololita ba si ima ngkida ka nuwungkesinamo tunggaiara etu.” Roo awetu, natudumo mesola.
I Paulu rakeni lau si Gubernur Feliks
23 Roo awetu, toiwongko nu tadulako surudado etu moronde rodua tadulako anu i woi lantira, naulika sira, “Patimama rongatu surudado, ai pitu mpulu surudado anu modara, mpane rongatu surudado anu metawala. Luwui kawengi tinti sasio, mangoka komi ope-ope lau i Kaisarea. 24 Nipatimama mbui dara anu pensani napensawii ni Paulu, nikeni lompe ia lau si Gubernur Feliks, inee ia nasumba marugi.” 25 Roo awetu, napakatumo nu toiwongko nu tadulako surudado etu sura, dongka si gubernur, ewa ei wotuna:
26 “Gubernur Feliks anu rabila. Maisi tabea lako si aku, Klaudius Lisias. 27 Tau ei rasoko nu toYahudi, saudi kerapopatera ni tempo etu. Agaiana kuepe tau etu toRoma. Etumo mpane laumo aku simbela-mbela ai surudadoku, kiala ia maliga lako i olora. 28 Nakeningka kupenokana manginsani apa anu rasalaika ia, etumo mpane kukeni lau i lio nu topobotusi kara-kara nu toYahudi. 29 Raparesaramo, agaiana baria ria salana anu rasumbara bona rapopatera ba ratarunggura. Rasalaira ngkida mangula atura agamara. 30 Roo awetu, kuepe kariana tunggaia nu toYahudi anu madaa si ia. Etumo mpane kupopekeni ia, si tua gubernur. Mpane kuulika sira iwalina i se ei, sangangaa lau sira mosalai ia i liomu.”
31 Awetu roomo sura etu nauki, surudado aretu lau mpuumo sira mangula parenta nu toiwongkora. Ni kawengi etu, i Paulu rakenimo lau i kota Antipatris. 32 Ewa ineilena madondo, surudado anu molumako ngkida, mesolamo sira lau i tombira. Surudado anu modara mangkenimo sira i Paulu pulo lau i Kaisarea. 33 Awetu sira dongka i Kaisarea, sura etu rakirakaramo i gubernur, mpane i Paulu mbui rasusuramo si ia. 34 Awetu i gubernur roomo mobasa sura etu, napekunemo i Paulu ka toapana. Awetu nainsani ni gubernur i Paulu lako i tana Kilikia, 35 nauli, “Ane ewa etu, ina kuparesa mpuu kara-karamu ane dongka sira iwalimu.” Roo awetu, natudumo surudadona mokampai i Paulu i tombi kadatua anu nawangu ni Datu Herode ni banimpia.