22
1 Nauli ni Paulu, “Uma-uma ai poka-pokaku! Nipetingai kowo aku, lawi ina kuulika komi notoku.”2 Awetu raepe nu tau wori i Paulu mololita i rara basara, mandii mpuumo sira. Napaliliumo ni Paulu pololitana, nauli, 3 “Aku ei toYahudi. Boea kabubua nu raaku, i Tarsus i tana Kilikia, agaiana lako anakoi mani aku meari aku i se ei i Yerusale. Mosikola aku i se ei, napaguru lompe sadua guru anu rabila mpii, sangana i Gamaliel. Napatudu mpii aku i ope-ope atura anu nakiraka ni Musa ulububuta ni banimpia. Matundu aku mampeulai ope-ope atura ni Pue Ala, simbela ewa komi mbui i tempo ei-ei. 4 Ni banimpia kupopesiasi sira tau anu mampeulai patudu ni Yesu. Ria sira anu kupopate. Ria mbui tau wori anu kusoko mpane kutarunggu, malompe tomoane awetu mbui towawine. 5 Tadulako Menomba Mabose ai ope-ope topobotusi kara-kara nu toYahudi pensani mopakanoto kamonsona pololitaku ei. Baria aku modongko, lawi ni banimpia siramo anu mokiraka aku sura kuasa anu mopaliu aku lau i pokata toYahudi i kota Damsik. Tunggaiaku lau i Damsik, bona mosoko tau anu mepotuu si Kerisitu anu ria i se etu, mpane kukeni sira i Yerusale bona rasuku.”
I Paulu mopadongka adiwa ia mepuu meula si Yesu
6 “Ni tongo eo, i rara polumakoki lau i kota Damsik ai awetu ina dongkamo kami, ungangkidamo ria anu mewangka lako i langi anu motoleliki aku. 7 Madungka aku i tana, mpane mangepe aku wotu anu manguli: ‘Saulu, Saulu, mangkiada mpane nupopesiasi Aku?’
8 Kupekune: ‘Ima Iko, i Pue!’
Nasonoi: ‘Akumo i Yesu toNasare anu nupopesiasi.’
9 Rangaku mangita mbui sira anu mewangka etu, agaiana baria raepera apa anu naulika aku nu wotu etu.
10 Roo awetu, kuuli: ‘Pue, apa anu sangangaa kubabei?’
Nasonoi ni Pue: ‘Peongkomode mpane lau iko mesua i rara nu kota Damsik. Si dou ina rapadongkaka iko ope-ope anu natuduka iko ni Pue Ala bona nubabei.’
11 Nakenimpewangka etu ni mpongone, mabilomo aku. Etumo mpane ranini aku nu rangaku dongka i kota Damsik.
12 I Damsik, ria sadua tomoane, sangana i Ananias. I Ananias etu, tau manoto ai maroso peulana i Atura ni Musa. Rabila ia nu ope-ope toYahudi anu meari i Damsik. 13 Maimo i Ananias meongko i tumbiriku, nauli: ‘Saulu pokaku, meita mpesolamo iko!’ Ni tempo etu, kasaliu meita mpesola mpuumo aku, ai kuitamo i Ananias. 14 Roo awetu, naulika mbuimo aku: ‘i Pue Ala anu rapenombai nu ulububuta ni banimpia, mampelisimo iko bona nuinsani apa peundeaNa, ai bona nuita i Yesu, Tudua ni Pue Ala anu manoto, ai bona nuepe pololitaNa. 15 Ikomo anu ina mewali sabiNa, mopadongkaka sira ope-ope tau apa anu nuita ai nuepe. 16 Mewali, apa mani anu nupegia? Peongkomode mpane laumode rariu. Pekakaemode si Pue Yesu bona dosamu Naampuni.’”
I Paulu mopaliliu pololitana
17 “Mewali, lako ni se etu, mesolamo aku lau i Yerusale, mpane tongoku mekakae i Tombi ni Pue Ala, kuita sambua pampatongawa. 18 Kuita i Pue Yesu mangulika aku: ‘Kalambumode maliga lako i Yerusale, lawi tau sira i se ei, baria sira ina mampotuu apa anu nupadongka kono si Aku.’
19 Kusonoi: ‘Pue, sangangaa radoko aku. Lawi tau i se ei manginsani mpuu babeiaku ni banimpia. Rainsanira adiwa kalauku i tombi penombaa mosoko ai morurugii sira tau anu mepotuu si Iko. 20 Ewa etu mbui, ni tempona sabiMu i Setepanu rapopate, aku ria ni se etu, ai ni tempo etu kupomakono karapopatena; akumo anu mokampai sampi nu tau anu mampopate ia.’
21 Roo awetu, i Pue mangulika mbuimo aku: ‘Sangangaa mangoka iko, lawi Kutudu iko lau i tana anu karao, i tau anu baria sira toYahudi.’”
22 Mandiimo sira tau wori mampetingai i Paulu mololita. Agaiana awetu nauli sangangaa lau ia i tau anu baria sira toYahudi, monganga-ngangamo sira mopakoi i Paulu, raulira masisimbuku, “Popate ngkimode! Bariamo ia sintoto tuwu!” 23 Tongora monganga-nganga liliu mopakoi ia, motende sira badura ai mosawuka sira awu i laerawa nakeningkasodora. 24 Etumo mpane toiwongko nu tadulako nu surudado etu, motudumo sira tadulako nu surudadona mangkeni i Paulu mesua i tombira, ina rarurugiira bona nauli apa puuna anu rakasisika ia nu toYahudi. 25 Awetu, i Paulu ratakamo i arii bona rarurugii, mololita ia i sadua tadulako nu surudado anu ria i se etu, nauli, “Pensanipae sadua toRoma rarurugii ane baria mani raparesa ai rabotusi kara-karana?”
26 Awetu naepe nu tadulako nu surudado etu pololitana, laumo ia i toiwongkona, nauli, “Tua, mangkiada mpane nutudu kami morurugii tau dou? Lawi tau dou toRoma!”
27 Roo awetu, toiwongko nu tadulako nu surudado etu ai tadulako nu surudado, lau sira si Paulu, toiwongko etu mekune, nauli, “Nuulika aku, mamonso mpuupae toRoma iko?”
Nasonoi ni Paulu, “Mamonso.”
28 Nauli nu toiwongko nu tadulako nu surudado etu, “Masuli ka kubaiarina i topoparenta, bona mewali aku toRoma.”
Nasonoi ni Paulu, “Ane aku kalawiana toRoma aku, lawi tomanaku toRoma.”
29 Roo awetu, surudado-surudado anu ina moparesa i Paulu momunduru sira. Ai toiwongko nu tadulako nu surudado etu maeka ia, lawi iamo anu motudu tau mosilu i Paulu, molentano i Paulu toRoma mbui.
I Paulu i lio nu topobotusi kara-kara nu toYahudi
30 Toiwongko nu tadulako nu surudado etu napenoka mpuu manginsani ba apa sala ni Paulu, mpane rasalai nu toYahudi. Etumo mpane ewa ineilena, naronde sira ope-ope kapala-kapala tadulako menomba ai topobotusi kara-kara nu toYahudi bona terusu sira ope-ope. Roo awetu, i Paulu rapawiamo lako i karasiluna mpane rakeni lau rapombeliokara.