Bangama bakagya dhikidi kamwisiso Yeso
26
1 Ngbingo yi nɨnɔ Yeso ama ndɨ mino kapága mʉtɨwɨ mi nɨmɔ masɨ, ʉbɨkya babɨbya kakɨ bɛ : 2 « Makaibho bɛ yɨnga wa Pasɨka iko banʉ kumbuso wa masyɛ maba. Basʉtatʉ Mika Mʉmbanzʉ kyɛ babhangɨlagɨ kʉgʉ wa mʉsalabha. » 3 Kʉwa wa, bokumu-kumu na bambɔkʉ ka Bayudha bamʉmʉkana ndɨ ka ndabʉ ko kumu-kumu bɛyɔ ka Kayafa. 4 Bagya ndɨ dhikidi kagwisiso Yeso bɨpɛlɛ na kamwisiso. 5 Luki limoti, ba ndɨ kabɨkya bɛ : « Takagwisisonitɔgʉ ka lɨsyɛ la Pasɨka. Takagya bɛyɔ, bambanzʉ bavɨkɨmanagatʉ. »
Muko bemoti akpozyini Yeso na malazi ka mʉ
6 Ngbingo yi nɨnɔ Yeso a ndɨ mino ka mugi ma Bhetania, ogulyo ndɨ ka ndabʉ ka Simoni nɨnɔ a ndɨ kebu-kebu. 7 Muko bemoti akpudoku ndɨ. Muko yi nɨnɔ a ndɨ na malazi ma lɨgabhʉ lapʉ kʉgbɛ kʉsɔ wo supa nɨnɔ bagya ndɨ na lɨtalʉ la alibhati. Ngbingo yi nɨnɔ Yeso a ndɨ mino kalyalya,
muko yi nɨnɔ akpazyaga ndɨ na malazi mi nɨmɔ ka mʉ. 8 Nɨyɔ babɨbya kakɨ bɨna ndɨ mino bɛyɔ, ʉtʉla. Babɨkya bɛ : « Ko bhulyo ɨkɨ yɔ akapʉta mino malazi bɛyɔ ? 9 Takwanana bi kagabha ka lɨgabhʉ lapʉ kʉgbɛ na kaʉpá batʉ ba yangya buyi bi ! »
10 Yeso andʉnga ndɨ yɨkpʉkpʉmʉkya kabʉ, umuuso kʉwa bɛ : « Ko bhulyo ɨkɨ yɔ mo mino kaɨkpʉkpʉmʉkya kʉgʉ ka muko yi nɨmʉ ? Nɨlɔ egyilyi, a yanza ! 11 Ka lɨngʉnʉ, miko banʉ pa imoti na batʉ ba yangya masyɛ masɨ. Luki limoti, ɨmɨ, takikigʉ banʉ pa imoti na ibunu aka. 12 Ngbingo yi nɨnɔ ekpozyi mino na malazi nɨma ka nzʉyɨ, akebungusyogo ko bhulyo ya lɨsyɛ nɨlɔ belumbo banʉ mino. 13 Ka lɨngʉnʉ, nakamʉbɨkya ambɛ : bapa ba yasɨ kʉ bikogo banʉ mino kapága Mongoni Manza mi nɨma ka ɔbɨlɨ wasɨ, batʉmbʉlagatʉ banʉ gɔnɨ nɨlɔ muko yi nɨmʉna ogyi. Na batamanaga ndɛkɛ mino. »
Yudha Isikalioti obingisyini kagabha Yeso
14 Kʉwa wa, Yudha Isikalioti, bemoti lugo ka babɨbya tɛkɛbɛ na baba ka Yeso, ɨnda ndɨ ka bokumu-kumu. 15 Umuuso ndɨ bɛ : « Nakamʉgabhɨlya, mɛpá ɨkɨ ? » Kʉwa wa, bapá bambuma ba yo buyi batɛkɛbɛ basaa. 16 Na katʉkya ka ngbingo nɨnɔ, Yudha apʉnga ndɨ kakɨsa pisi tino yɔ ʉgabhɨlya mino Yeso.
Yeso akalya Pasɨka na babɨbya kakɨ
17 Lɨsyɛ la mambwa la yɨnga wa Mukati wokofulu, babɨbya ka Yeso bakpudoku ndɨ, bamuuso bɛ : « Wakapa bɛ taga kaubungusilyogo malɨlɨ ma Pasɨka yanɨ ? »
18 Usikisyo ndɨ bɛ : « Windoni ka gʉdʉ, a ka alʉkʉ bemoti bɛnɛ. Na mabikyoku bɛ : Muwonisili akabɨkya bɛ : ‹ Ngbingo kamɨ a kʉwa buwobhi. Nakalya Pasɨka kʉ kakʉ pa imoti na babɨbya kamɨ. › » 19 Babɨbya bagya ndɨ mʉdɔngɔnɨ bɛyɔ Yeso ʉkpamya ndɨ mino, bamba malɨlɨ ma Pasɨka.
20 Nɨyɔ bʉgɔgɔ ogwo, Yeso iko ndɨ kalyalya pa imoti na babɨbya tɛkɛbɛ na baba. 21 Ngbingo nɨnɔ ba ndɨ mino kalyalya, abɨkya bɛ : « Nakamʉbɨkya lɨngʉnʉ ambɛ, bemoti kunu ɛgabhatʉ. » 22 Babɨbya balya ndɨ kumbu kʉgbɛ, bapʉnga kamuusogo bemoti-bemoti bɛ : « Mombukwono dhosu ! Ɨmɨ ? »
23 Yeso osikisyo bɛ : « Mʉtʉ nɨnɔ akamakyaga kʉbɔkʉkɔ ka sanɨ pa imoti na ɨmɨ nɔ ɛgabha banʉ. 24 Mika Mʉmbanzʉ okwotʉ, mʉdɔngɔnɨ bɛyɔ ikpikogo ndɨ mino kʉgʉ kakɨ. Luki limoti, kumbu ka nɨnɔ akagabha ! Iko bi bɨnza ka alʉkʉ yi nɨnɔ nɨ kɨbʉkʉtagʉ gʉtʉgʉ ndɨ ! »
25 Kʉwa wa, Yudha nɨnɔ a ndɨ kagabha, amuuso bɛ : « Muwonisili ! Ɨmɨ ? » Yeso asikisyo ndɨ bɛ : « Wobikyi nɨ ɨwɛ ! »
26 Ngbingo nɨnɔ ba ndɨ mino kalyalya, Yeso ava ndɨ mukati. Kumbuso kabhibhiso Kunzi, obunonogo, ʉpága babɨbya kakɨ. bɨkya kʉwa ndɨ bɛ : « Voni, malya, a nzʉyɨ kamɨ. » 27 Kʉwa wa, ava ndɨ kɔpɔ, kumbuso kabhibhiso Kunzi, ʉpá. bɨkya ndɨ bɛ: « Mwoni ibunu basɨ ! 28 Ka lɨngʉnʉ, nɨyɨ a bangʉ kamɨ. Bangʉ ya agɔmɛ ko Kunzi. Odukonogo ndɛkɛ ko bhulyo ka batʉ budhingi na ko bhulyo ya mʉpɨlya ma bʉnyɛ. 29 Nakamʉbɨkya ambɛ, nakamwigʉ ndɛkɛ bata vinya wa muzabhibhu, kadhwɛ ka lɨsyɛ nɨlɔ tamwo ndɛkɛ mino nɨnɔ wa mbɨya pa imoti na ibunu basɨ kʉsɔ wa bʉngama ka Bhabha. »
30 Kʉwa wa, bɨmbɨla ndɨ lɨmbʉ libhibhiso Kunzi. +\fr 26:30 Bayudha, ngbingo yi nɨnɔ bamaga ndɨ mino kalya malɨlɨ ma Pasɨka, bɨmbɨlaga ndɨ Mambʉ 113-118 na 136. Kumbuso yi, batʉkya ndɨ wa, baga ka ngʉpa ya Mizeituni.
Yeso obikyini bɛ Pɛtɛlɛ amanganyatʉ
31 Kʉwa wa, Yeso ʉbɨkya ndɨ babɨbya kakɨ bɛ : « No bhiti ya lɨsyɛ li nɨlɨ, ibunu basɨ meginyotʉ. Ka lɨngʉnʉ, ikpikogo ndɨ bɛ :
‹ Namwɔ ndɛkɛ mububulyo ka bakɔndɔlɔ.
Na ambaza kabʉ omisikono bingbwi. › b
32 Luki limoti, kumbuso ɨmɨ kopupo ka mbʉkʉ, metokonyoku ndɛkɛ ka Galilaya. »
33 Kʉwa wa, Pɛtɛlɛ abɨkya ndɨ bɛ : « Gʉtʉgʉ bɛngɛnɨ basɨ bakuginyo, luki limoti, ɨmɨ nakuginyigʉ ndɛkɛ ! »
34 Yeso asikisyo ndɨ bɛ : « Nakaʉbɨkya lɨngʉnʉ, no bhiti ya lɨsyɛ li nɨlɨ, kambwa kɔkʉ kaalɨka, wiko nɨ wemongonyini nganga yɨsaa. »
35 Pɛtɛlɛ asikisyo ndɨ bɛ : « Gʉtʉgʉ kiko bi kokwo pa imoti, ɨmɨ, nakʉmanganyɨgʉ ndɛkɛ ! » Na babɨbya bagɔgɔ basɨ babɨkya ndɨ bɛgɛyɔ.
Yeso akalʉmba kʉsɔ wo tiko ya Gɛtɛsɛmanɨ
36 Kʉwa wa, Yeso na babɨbya kakɨ baga ndɨ kʉ ka Gɛtɛsɛmanɨ. Ngbingo nɨnɔ badhwɛ ndɨ mino, ʉbɨkya ndɨ bɛ : « Wikonononi mbɛɨ wanʉ. Ɨmɨ, nakaɨnda mbɨya wanʉ kalʉmba kʉ. » 37 Kumbuso yi, baga ndɨ na Pɛtɛlɛ na bomika Zɛbhɛdhayɔ baba. Yeso apʉnga ndɨ kalya kumbu kʉgbɛ na otumo na kʉbangakʉ bɨdɛ.
38 Kʉwa wa, ʉbɨkya ndɨ bɛ : « Nakalya kumbu kʉgbɛ, buwobhi kokwo. Wikoni wanʉ, wiusyogoni pa imoti na ɨmɨ. »
39 Kumbuso yi, isisilo ndɨ kambwa yɨkɛdɛ, ogwo mokpukpu. Apʉnga kalʉmba bɛ : « Bhabhaooo ! Kiko nɨ akwananatʉ, ikidisyonɔ baka kɔpɔ wa yigyogyiso yi nɨmʉ ! Gʉtʉgʉ bɛyɔ, kikonitɔgʉ sɨpananɨsɔ kamɨ. Luki limoti, iki nɨsɔ kakʉ aka. »
40 Kumbuso yi, Yeso igoku wa ʉsa ndɨ mino babɨbya kakɨ, ʉtakanya ndɨ kʉwa bʉlalaga. Amuuso ndɨ Pɛtɛlɛ : « Wakokwononigʉ kaiusyogo pa imoti na ɨmɨ gʉtʉgʉ ka saa imoti aka ? 41 Wiusyogoni na malʉmba, kyɛ makingyonitɔgʉ ka kʉbɔbɔkʉ ! Lɨmbɛngɨ a na mʉsasa kagya bʉnza. Luki limoti, nzʉyɨ a na bʉpɔ. »
42 Yeso ʉsa ndɨ ka nganga ya yɨba, ɨnda ndɨ kalʉmba bɛ : « Bhabhaooo ! Kiko nɨ kokwononigʉ bi bɛ kɔpɔ wa yigyogyiso yi nɨmʉ akɨdɨ nɨ nakamwɨgʉ, sɨpananɨsɔ kakʉ igyonosi nɛkɨ ! »
43 Ngbingo nɨnɔ igoku ndɨ mino ka babɨbya kakɨ, ʉtakanya bata bʉlalaga. Batɔtɔ a ndɨ nɨ utiyosogini bomiso. 44 Kʉwa wa, Yeso ʉsa ndɨ bata, ɨnda kalʉmba ka nganga ya yɨsaa. Malʉmba mi a ndɨ mʉdɔngɔnɨ abhɛ nɨmɔ ma mambwa aka.
45 Kumbuso yi, igoku ndɨ kʉ babɨbya ba ndɨ mino, ʉbɨkya bɛ : « Ambɛ, ma asɨ ka batɔtɔ aka na kaimumbiso ? Ngbingo itulyonini ! Biko kasʉta Mika Mʉmbanzʉ ka mabɔkʉ ka batʉ banyɛ. 46 Zuzukoni, togoni ! Nɨnɔ akɛgabha osiliniku ! »
Bagwini Yeso
47 Ngbingo yi nɨnɔ Yeso a mbɛɨ ndɨ mino kanzɨna aka, bemoti lugo ka babɨbya kakɨ tɛkɛbɛ na baba nɨnɔ ina ndɨ bɛ Yudha opuponoku. A ndɨ pa imoti na ambaza mudhingi ka bambanzʉ. Batʉ bi nɨbɔ ba ndɨ na badhʉkpa na bɛngbɨngɨlɨ. Bokumu-kumu na bambɔkʉ ka Bayudha bɔ butikoku ndɨ. 48 Yudha nɨnɔ a ndɨ nɨ agobhini Yeso, ʉbɨkya ndɨ bɛyɔ agya mino bɛ : « Alʉkʉ nɨnɔ naputito, ibha ɨyɨ nɨnɔ. Mugwini ! »
49 Yudha akpudoku ndɨ Yeso bɨgala-gala, abɨkya bɛ : « Muwonisili ! numuusito ! » Aputito.
50 Ɨyɨ asikisyo ndɨ bɛ : « Wai ! Gyanɔ nɨlɔ wodhuku kagya. » Kʉwa wa, batʉ bi nɨbɔ bisisiloku ndɨ na bagwi Yeso.
51 Bemoti ka babɨbya ka Yeso anyɔ ndɨ dhʉkpa kakɨ, aipo mʉgya-ligubho ko kumu-kumu na akɔ kutiliko.
52 Luki limoti, Yeso abɨkya ndɨ bɛ : « Wigiso dhʉkpa kakʉ ka pa yi ! Ka lɨngʉnʉ, mʉtʉ wasɨ nɨnɔ abhʉmanaga na dhʉkpa, okwo ndɛkɛ na dhʉka aka gɔnɨ. v 53 Ambɛ, wakɛgʉ kaibho bɛ nakwanana kakʉnga Bhabha kesingyo ? Wa aka wa, etikyoku kakɨtaga bambaza tɛkɛbɛ na baba ka bamalaika.c 54 Luki limoti, kutikoku bamalaika bɛyɔ, Mobiso Motu akwanana kaɨtʉlyana lɨkɨ ? Ka lɨngʉnʉ, Mobiso mi nɨmɔ akabɨkya bɛ masɨ okwononi kaigyonoso bɛyɔ aka yɔ. »
55 Kʉwa wa, Yeso abɨkya ndɨ bambaza ka bambanzʉ bɛ : « Ko bhulyo ɨkɨ yɔ medhulyiku na badhʉkpa na bɛngbɨngɨlɨ kegwi abhɛ nakiko mʉtʉ wo kubakʉ ? Ka lɨngʉnʉ, masyɛ masɨ nikogo ndɨ katɨwa ka ndabʉ ya likungoni, luki limoti, makegwigʉ ndɨ. 56 Luki limoti, masɨ nɨmana akaigyonoso kyɛ ɨtʉlyanɨ bɛyɔ bogyalandʉ bokpikogo ndɨ mino. »
Wa aka wa, babɨbya basɨ basa ndɨ Yeso, bazanzʉkana.
Yeso akasamba ka Bhasa Yidhingi ka bangama ka Bayudha
57 Bambanzʉ nɨbɔ bagwi ndɨ Yeso, baga na ɨyɨ ka Kayafa nɨnɔ a ndɨ kumu-kumu. Bowonisili ba mʉtʉʉ na bagʉgʉ ba ndɨ bʉmʉmʉkana kʉ bɛyɔ. 58 Pɛtɛlɛ a ndɨ kabyɛ Yeso byɨ kadhwɛ kʉ kwa kʉ ka ndabʉ ko kumu-kumu. Ogulyo ndɨ, iko pa imoti na bazamʉ, kyɛ ɨnɨ bɛyɔ lɨkpʉmʉka ka Yeso isilyoku mino.
59 Bokumu-kumu na bangama bagɔgɔ basɨ ba Bhasa Yidhingi ba ndɨ kaʉkɨsa badhɛmʉ ba bɔngɔ, kyɛ binisoni no pisi kamwisiso Yeso. 60 Luki limoti, bakinisonogʉ ndɨ noyu, gʉtʉgʉ bɛyɔ batʉ budhingi bodhogoku ndɨ mino kabʉkʉlyaga bɔngɔ.
Ka mulibo, batʉ baba bodhoku ndɨ kabɨkya bɛ : 61 « Mʉtʉ yi nɨmʉ abɨkya ndɨ bɛ : ‹ Nakwanana kapanza ndabʉ ko Kunzi na kopiko bata kumbuso wa masyɛ masaa. › »
62 Kʉwa wa, kumu-kumu amaga ndɨ, amuuso Yeso bɛ : « Wakabɨkya bʉ ka bangbanga nɨbana bambanzʉ bakaʉpɨlyaga ba. Ambɛ, wakɛgʉ na lɨkpʉmʉka lisikisyo ? » 63 Luki limoti, Yeso adhaka ndɨ biwo.
Kumu-kumu abɨkya bata ndɨ bɛ : « Nakaumuuso ko lino ko Kunzi nɨnɔ a na ɔbɨlɨ, tɨbɨkya pisi ka silika, ɨwɛ nɨ Klisito, Miko Kunzi ? »
64 Yeso asikisyo ndɨ bɛ: « Ɨwɛ mombukwono dhakɨ wobikyini ! Luki llimoti, Nakamʉbɨkya ambɛ katʉkya mbɨya wanʉ, mamɨnatʉ Mika mʉmbanzʉ wakiko ka kumbanzɨkanɨkɔ ko Kunzi nɨnɔ wo Ngu. Na mamɨnatʉ ndɛkɛ gɔnɨ nɨ anodhoku kʉsɔ wa bɛkʉba kʉgʉ wa lɨsyɛ. »
65 Kʉwa wa, kumu-kumu yi nɨnɔ ɨnʉaga ndɨ botu. Abɨkya bɛ : « Atumbwini Kunzi ! Takɛgʉ bata na mʉsasa ka badhɛmʉ. Mapʉnya kaʉkana bɛyɔ atumbwi mino. 66 Makabɨkya bʉ ? » Basikisyo ndɨ bɛ : « Okwononi bamwi ! »
67 Kʉwa wa, babakyaga ndɨ Yeso na botikito ko miso na baipogo makɔfɨ. Bagɔgɔ baipogo ndɨ bangwasɨ, 68 banabɨkya bɛ : « Klisito ! Ndʉnga pisi ka bugyalandʉ ! Tɨbɨkya, wanɨ nɔ uipi ? »
Pɛtɛlɛ amongonyini Yeso
69 Ko ngbingo yi nɨnɔ, Pɛtɛlɛ a ndɨ ɨyɨ wakiko kunzi ka pa yangba. Kʉwa wa, mʉgya-ligubho bemoti mʉsɨka yi akpudoku ndɨ, abɨkya bɛ : « Ɨwɛ, watʉ ndɨ gɔnɨ pa imoti na Yeso mʉtʉ wa Galilaya. » 70 Luki limoti, Pɛtɛlɛ anganya ndɨ kambwa ka batʉ basɨ bɛ : « Ɨmɨ, nakibhigʉ nɨlɔ wakapa kabɨkya. »
71 Kumbuso yi, isisilo ndɨ miso ya mupumi ma pa yangba. Mʉgya-ligubho mʉsɨka yi wagɔgɔ amɨna ndɨ na ʉbɨkya batʉ nɨbɔ ba ndɨ wa bɛ : « Mʉtʉ yi nɨmʉna a ndɨ pa imoti na Yeso mʉtʉ wa Nazalɛtɨ. » 72 Pɛtɛlɛ anganya bata ndɨ, akɔ silika bɛ : « Ɨmɨ, nakamibhigʉ mʉtʉ yi nɨmʉ ! »
73 Kumbuso yɨkɛdɛ, batʉ nɨbɔ ba ndɨ wa bakpudoku ndɨ Pɛtɛlɛ, babɨkya bɛ : « Ka lɨngʉnʉ, wa gɔnɨ bemoti kabʉ. Gʉtʉgʉ mʉnzɨna kakʉ aka akowoniso bɨnza bɛ wa Mugalilaya ! » 74 Pɛtɛlɛ akɔ ndɨ silika, abɨkya bɛ : « Nigyogyisi ! Kiko nɨ nakabɨkya bɔngɔ. Nakamibhigʉ alʉkʉ yi nɨmʉ ! » Wa aka wa, kɔkʉ alɨka ndɨ.
75 Pɛtɛlɛ atamana ndɨ mʉnzɨna nɨmɔ Yeso abɨkya ndɨ bɛ : « Kambwa kɔkʉ kaalɨka, wiko nɨ wemongonyini nganga yisaa. » Kʉwa wa, opupo ndɨ kunzi, apʉnga ndɨ kagama no kumbu kʉgbɛ.