Yeso akaʉsʉkʉsa babɨbya kakɨ magʉ
13
1 A ndɨ nɨ otigolini lɨsyɛ limoti kadhwɛ ka yɨnga wa Pasɨka. Yeso a kʉwa ndɨ kaimibho bɛ ngbingo kakɨ itulyonini katʉkya ka ɔbɨlɨ yi nɨmʉ na kaaga ka abhakɨ. paga ndɨ bavakʉkakɨ nɨbɔ bikogo ndɨ ka ɔbɨlɨ, idhukulogo kaʉpa kadhwɛ ka mulibo.2 Yeso na babɨbya kakɨ ba ndɨ kalya malɨlɨ ma bʉgɔgɔ. Abhɨlɨ a ndɨ nɨ amingyini Yudha mika Simoni-Isikalioti bɛ agabhɨ Yeso. 3 Yeso a ndɨ kaibho bɛ Abhakɨ apá ndɨ ngu ka makpʉmʉka masɨ, na gɔnɨ bɛ otukyoku ndɨ kʉ kakɨ ko Kunzi na a ndɨ kaɨga kʉ gɔ kʉ. 4 Ngbingo yi nɨnɔ ba mbɛyɨ ndɨ mino aka ka mɨza, amaga ndɨ, ɨnyɔ kutuko kwa mbanzɨ, ava kutuko kumoti bɛnɛ, ɨkpɨkɨla ka ɨdʉkʉfɨsɔ. 5 Kumbuso yi, oduko ndɨ libo ka sani, apʉnga kaʉsʉkʉsa babɨbya kakɨ magʉ na kaʉkpaga na kutuko nɨkwɔ ɨkpɨkɨla ndɨ ka ɨdʉkʉfɨsɔ. 6 Nɨyɔ adhwɛ ka Simoni Pɛtɛlɛ, ɨyɨ Pɛtɛlɛ amuuso ndɨ bɛ : « Mombukwono dhosu, ɨwɛ kʉwa nɔ wakɛsʉkʉsa magʉ ? » 7 Yeso asikisyo ndɨ bɛ : « Nɨlɔ nakagya mbɨya wanʉ wakibhigʉ, luki limoti, wibhotʉ banʉ. » 8 Pɛtɛlɛ aka ndɨ bɛ : « Ɨwɛ kɛsʉkʉsa ɨmɨ magʉ ? Kɨgyananɨgʉ ! » Luki limoti, Yeso aka na ɨyɨ bɛ : « Nakusukusi magʉ, takikigʉ ndɛkɛ bata pa imoti na ɨwɛ. » 9 Simoni Pɛtɛlɛ abɨkya ndɨ bata bɛ : « Mombukwono dhosu, kiko nɛkɨ nɨ a bɛyɔ, wakɛsukusonitɔgʉ asɨ magʉ aka. Luki limoti, ɨsʉkʉsatʉ gɔnɨ mabɔkʉ na mʉ ! » 10 Yeso abɨkya ndɨ bɛ : « Mʉtʉ yi nɨnɔ isukusogi, kɛgʉ bata na nza ya kɨsʉkʉsaga, akwanana kʉwa kaɨsʉkʉsa asɨ magʉ aka. A bɛyɔ, ibunu ma bɨngɔ, luki limoti kɛgʉ ibunu basɨ. » 11 A bɛyɔ, Yeso a ndɨ kamibho mʉtʉ nɨnɔ agabha banʉ, kinili abɨkya ndɨ bɛ : « Ibunu basɨ makɛgʉ bɨngɔ. »
12 Nɨyɔ ʉma kaʉsʉkʉsa magʉ, imokisyo bata ndɨ kutuko kakɨ kwa mbanzɨ, igoku bata kalyalya, umuuso ndɨ bɛ : « Mibhito isi ya lɨkpʉmʉka li nɨlɔ namugyilyi ? 13 Ibunu, mɛmakaga bɛ Muwonisili, Mombukwono dhosu; mabɨkyaga lɨngʉnʉ, kyɛ na bɛyɔ aka yɔ. 14 Kiko nɛkɨ nɨ ɨmɨ, Muwonisili na Mombukwono dhonu, namusukusini magʉ, ibunu makwanana gɔnɨ kasʉkʉsana magʉ lugo kunu. 15 A bɛyɔ, ɨmɨ namupí likingyosi, kyɛ gyoni ibunu mʉdɔngɔnɨ bɛgɛyɔ namugyilyi mino. 16 A bɛyɔ, nakamʉbɨkya lɨngʉnʉ ambɛ : musunzu kakwananɨgʉ kaiko ngama ka mombukwono dhakɨ, gʉtʉgʉ atʉtʉmbwa aka kakwananɨgʉ kakɨtaga mʉtʉ yi nɨnɔ atiki. 17 Mbɨya wanʉ mibhini lɨkpʉmʉka li nɨlɔ, makagya bɛyɔ namugyilyi mino, miko ndɛkɛ batʉ ba magyagya. »
18 Yeso omotiloku ndɨ bɛ : « Lɨkpʉmʉka li nɨlɨ, nakɛgʉ kamʉbɨkya ibunu basɨ. Ɨmɨ, nakaumibho batʉ nɨbɔ nupunogoni ndɨ. Luki limoti, okwononi itulyosi nɨlɔ ikpikogo ndɨ ka Mobiso Motu bɛ : ‹ Mʉtʉ yi nɨnɔ talyalyaga ndɨ na ɨyɨ, eityini ›.\f + \fr 13.18 \ft Mambʉ 41.10.\f * 19 Namubikyi lɨkpʉmʉka li nɨlɨ mbɨya yi nɨmʉ kambwa bɛ igyonosi. Ngbingo yi nɨnɔ igyonoso banʉ mino, mabɨnɨkyana banʉ bɛ ‹ ɨmɨ, natʉ ›. 20 A bɛyɔ, nakamʉbɨkya lɨngʉnʉ ambɛ : mʉmbanzʉ katɨlya mʉtʉ yi nɨnɔ natiki, etilyi ɨmɨ. Mʉmbanzʉ kɛtɨlya, atilyi gɔnɨ nɨnɔ etikoku ndɨ. »
Yeso obikyini bɛ Yudha agabhatʉ banʉ
21 Nɨyɔ Yeso ama ndɨ mino kanzɨna bɛyɔ, lɨmbɛngɨ alya ndɨ kumbu, abɨkya ndɨ bɨngbanganya bɛ : « A bɛyɔ, nakamʉbɨkya lɨngʉnʉ ambɛ bemoti kunu egabhatʉ banʉ. » 22 Babɨbya bapʉnga ndɨ kaandanana lugo kabʉ, nɨ bakɛgʉ kotombisyo bɛ akanzɨna ko bhulyo ka wanɨ. 23 Wa ba ndɨ mino kalyalya, bemoti ka babɨbya kakɨ nɨnɔ ɨyɨ Yeso apaga ndɨ, a ndɨ ka kpɔlɔ kakɨ. 24 Simoni Pɛtɛlɛ anʉta ndɨ mʉbɨbya yi nɨnɔ bɛ kyɛ amuusi Yeso ikanɨ a ndɨ kabɨkya lɨkpʉmʉka li nɨlɔ ko bhulyo ka wanɨ. 25 Mʉbɨbya yi nɨnɔ ɨgʉmya ndɨ ka Yeso, amuuso bɛ : « Mombukwono dhosu, wanɨ ? » 26 Yeso asikisyo ndɨ : « Nakolubho dhongbu ya mukati mi nɨma ko supu, mʉtʉ yi nɨnɔ napá, ibha ɨyɨ nɨnɔ. » Yeso olubho kʉwa ndɨ, apá Yudha Isikalioti mika Simoni. 27 Nɨyɔ aka yɔ Yudha ava, mumuyoniso ingyo ndɨ kʉsɔ kakɨ.Yeso aka ndɨ na ɨyɨ bɛ : « Nɨyɔ wakapa kagya, gya bɨgala-gala. »
28 Gʉtʉgʉ mʉtʉ bemoti aka lugo ka nɨbɔ ba ndɨ kalyalya wa, kotombisyogʉ ndɨ isi ya mʉnzɨna mi nɨmɔ. 29 A bɛyɔ, yɛkɨ Yudha nɔ obuulyogo ndɨ buyi, batʉ bagɔgɔ lugo ka babɨbya ba ndɨ kasɨma bɛ Yeso akabɨkya bɛ oluwi malɨlɨ nɨmɔ bakwanana ndɨ kalya ka yɨnga, ikanɨ ɨndɨ kaʉpá batʉ ba yangya luki lɨkɛdɛ. 30 Yudha ava kʉwa ndɨ dhongbu ya mukati mi nɨmɔ, ko ngbingo yi nɨnɔ aka nɔ, opupo ndɨ. A kʉwa ndɨ nɨ bhiti olipyini.
Mʉtʉʉ ma mbɨya
31 Nɨyɔ Yudha opupo, Yeso abɨkya ndɨ bɛ : « Mbɨya-mbɨya yi nɨmʉ, Mika Mʉmbanzʉ ovini ɨbhɨbha, Kunzi ovini gɔnɨ ɨbhɨbha pisi kʉ kakɨ. 32 [Kiko nɨ Kunzi ovini ɨbhɨbha pisi kʉ kakɨ,] ɨyɨ Kunzi mombukwono dhakɨ yi owonisotʉ gɔnɨ ɨyɨ ɨbhɨbha ko Miki pisi kʉ kakɨ bɨkwa. 33 Bomikamɨ, nakɛgʉ bata na ibunu ko ngbingo mʉnda. Mɛkɨsatʉ, luki limoti, mʉdɔngɔnɨ bɛyɔ nʉbɨkya ndɨ mino Bayudha, namubikyi kʉwa gɔnɨ ibunu mbɨya yi nɨmʉ bɛ : makakwananɨgʉ kaɨnda kʉ ɨmɨ no mino kaaga. 34 Nakamʉpá mʉtʉʉ ma mbɨya : ponononi lugo kunu. Mʉdɔngɔnɨ bɛyɔ ɨmɨ namʉpa ndɨ mino, ponononi ibunu bɛgɛyɔ. 35 Kiko nɨ ma na sɨpananɨsɔ lugo kunu, batʉ basɨ bibho ndɛkɛ bɛ ma babɨbya kamɨ. »
Yesu akabɨkya bɛ Pɛtɛlɛ amanganyatʉ
36 Simoni Pɛtɛlɛ amuuso ndɨ Yeso bɛ : « Mombukwono dhosu, wa sɛ kʉwa kaɨnda yanɨ ? » Yeso asikisyo ndɨ bɛ : « Kʉ no mino kaɨnda, wakakwananɨgʉ kɛbyɛ mbɨya wanʉ, luki limoti, wɛbyɛtʉ ndɛkɛ kumbuso. » 37 Pɛtɛlɛ amuuso bata ndɨ bɛ : « Mombukwono dhosu, ko bhulyo ɨkɨ nakakwananɨgʉ kaʉbyɛ mbɨya wanʉ ? Nawakɨtʉlya kapá ɔbɨlɨ kamɨ ko bhulyo kakʉ. » 38 Yeso asikisyo ndɨ bɛ : « Watʉ aka wakɨtʉlya kapá ɔbɨlɨ kakʉ ko bhulyo kamɨ ? A bɛyɔ, nakaʉbɨkya lɨngʉnʉ ambɛ : kambwa bɛ kɔkʉ alɨkɨ, wiko nɨ wemongonyini nganga yɨsaa. »