Yeso nɨ pisi nɨyɔ ɨndaga kʉ ka Bhabha
14
1 Yeso ʉbɨkya ndɨ babɨbya kakɨ bɛ : « Makombomboyonitɔgʉ. Mubinikyononi Kunzi, mɛbɨnɨkyana gɔnɨ ɨmɨ. 2 Ka ndabʉ ka Bhabha bapa a bayakpʉ. Kiki bi bɛyɔ, nakakwananigʉ bi kamʉbɨkya ambɛ nogoni kamubungusilyogo yi. 3 Nakaaga kamubungusilyogo pa, nigokuto bata kamʉva, ibha kʉ ɨmɨ niko mino, wikoni ibunu kʉ gɔ kʉ. 4 Mibhatʉ kʉ no mino kaɨnda, mibhotʉ gɔnɨ pisi yi. 5 Tʉma abɨkya kʉwa ndɨ bɛ : « Mombukwono dhosu, takibhigʉ kʉ wo mino kaɨnda. Tibho kʉwa pisi lɨkɨ ? 6 Yeso abɨkya ndɨ bɛ : « Ɨmɨ nɨ pisi, lɨngʉnʉ na ɔbɨlɨ. Mʉmbanzʉ gʉtʉgʉ bemoti aka kakwananɨgʉ kaɨnda ka Bhabha nɨ kobyigʉ pisi kʉ kamɨ. 7 Makemibho bi bɨnza, mamibhotʉ gɔnɨ bi Bhabha. Katʉkya mbɨya wanʉ, mamibhotʉ na maminoni.8 Filipi abɨkya ndɨ Yeso bɛ : « Mombukwono dhosu, tɨwanya kʉwa asɨ Bhabha aka, ama kʉwa gʉtʉgʉ bʉbwa. » 9 Yeso asikisyo ndɨ bɛ : « Eze, Filipi, mututu kɛgʉ buwobhi wa tiko mino na ibunu, wakemibhagʉ ? Mʉtʉ yi nɨnɔ ɛmɨna, aminoni gɔnɨ Bhabha. Ko bhulyo ɨkɨ yɔ wo mino kabɨkya bɛ : ‹ Tɨwanya Bhabha ? › 10 Wakɛgʉ kabɨnɨkyana ambɛ ,ɨmɨ, na kʉsɔ ka Bhabha na Bhabha kʉsɔ kamɨ ? Mʉnzɨna masɨ nɨmɔ namʉbɨkyaga, kopupogɨgʉ na ɨmɨ, luki limoti, Bhabha nɨnɔ a kʉsɔ kamɨ nɔ agyaga mogubho kakɨ. 11 Ibinikyononi ngbingo yi nɨnɔ no mino kamʉbɨkya bɛ : ‹ Ɨmɨ na kʉsɔ ka Bhabha na Bhabha a kʉsɔ kamɨ. Makobinikyoni bɛyɔ, ibinikyononi gʉtʉgʉ asɨ ko bhulyo mogubho kakɨ aka. 12 A bɛyɔ, nakamʉbɨkya lɨngʉnʉ ambɛ : mʉtʉ yi nɨnɔ ebinikyoni, agya ndɛkɛ mogubho nɨmɔ nagyaga. Agyaga ndɛkɛ gɔnɨ makpʉmʉka makpʉkpʉ kʉgbɛ, kyɛ ɨmɨ nakaaga ka Bhabha. 13 Makpʉmʉka masɨ nɨmɔ makʉnga ndɛkɛ ko lino kamɨ, namʉgyɨlyatʉ ndɛkɛ ibha Bhabha avɨ ɨbhɨbha pisi ko Miki. 14 Makakʉnga luki ko lino kamɨ, namʉgyɨlyatʉ. »
Yeso uwonyogini babɨbya Lɨmbɛngɨ Lotu
15 Yeso omotiloku ndɨ bɛ : « Makɛpa, magya mʉtʉʉ kamɨ. 16 Ɨmɨ, nakʉnga banʉ Bhabha, amʉpɨ́ mʉtʉ wagɔgɔ nɨnɔ iko na ibunu ka bɛnzɛ na bɛnzɛ kamʉtʉngbʉlaga : 17 mʉtʉ yi nɨ Lɨmbɛngɨ nɨlɔ la lɨngʉnʉ. Batʉ ba ɔbɨlɨ bakakwananɨgʉ kabhaɨlya, kyɛ bakamɨnagɨgʉ na bakamibhogɨgʉ. Luki limoti, ibunu mamibhotʉ kyɛ ikogo buwobhi na ibunu, na a kʉsɔ wa mambɛngɨ kunu. 18 « Nakamʉsɨgʉ ndɛkɛ bokwino, nigokuto ndɛkɛ bata buwobhi na ibunu. 19 Otigoli yɨkɛdɛ, batʉ ba ɔbɨlɨ bakɛmɨnɨgʉ ndɛkɛ bata, luki limoti, ibunu, mɛmɨnatʉ. Ɨmɨ na na ɔbɨlɨ, ibunu miko ndɛkɛ na ɔbɨlɨ gɔnɨ. 20 Ka lɨsyɛ li nɨlɔ, mibhotʉ ndɛkɛ bɛ ɨmɨ na kʉsɔ ka Bhabha, ibunu kʉsɔ kamɨ na ɨmɨ kʉsɔ kunu.
21 Mʉtʉ yi nɨnɔ ibhogo mʉtʉʉ kamɨ, agya, ɨyɨ nɔ ɛpaga. Bhabha apa ndɛkɛ mʉtʉ yi nɨnɔ ɛpaga, ɨmɨ napa ndɛkɛ gɔnɨ, nimibhikoso kʉ kakɨ. »
22 Yudha yi nɨmʉ kɛgʉ ndɨ Yudha Isikalioti, amuuso Yeso bɛ : « Mombukwono dhosu, ko bhulyo ɨkɨ yɔ wiwoniso mino ku kusu aka nɨ kɛgʉ ka batʉ ba ɔbɨlɨ ? » 23 Yeso asikisyo ndɨ bɛ : « Mʉmbanzʉ kɛpa, agyatʉ nɨlɔ niko kabɨkya. Bhabha apatʉ, ibusu na Bhabha todhoku ndɛkɛ kʉ kakɨ, tiko kʉsɔ kakɨ. 24 Mʉtʉ yi nɨnɔ kɛpagɨgʉ, kagyagigʉ nɨlɔ niko kabɨkya. Mʉtʉʉ mi nɨmɔ makaʉkana kɛgʉ ma kamɨ, luki limoti a nɨmɔ ka Bhabha nɨnɔ etikoku ndɨ. 25 « Namubikyi bɛyɔ kyɛ na mbɛyɨ bata lugo kunu aka. 26 Luki limoti, mʉtʉ wagɔgɔ nɨnɔ nobikyi bi ambɛ odhoku ndɛkɛ kamʉtʉngbʉlaga nɨ Lɨmbɛngɨ Lotu nɨnɔ Bhabha atikoku ko lino kamɨ. Ɨyɨ amuwoniso ndɛkɛ makpʉmʉka masɨ, amutomosyo masɨ nɨmɔ namʉbɨkyaga ndɨ.
27 Namusilyi mazɨyɔ, namʉpá mazɨyɔ kamɨ. Ɨmɨ, nakamupígʉ mʉdɔngɔnɨ bɛyɔ batʉ ba ɔbɨlɨ bapága mino. Makombomboyonitɔgʉ ikanɨ kabanga. 28 Mukonito bi bɛyɔ namubikyi bi mino bɛ : ‹ Nogoni, luki limoti, nigokuto ndɛkɛ buwobhi na ibunu. › Kiko bi nɨ mɛpagatʉ, gwoni magyagya kyɛ nakaaga ka Bhabha. A bɛyɔ, Bhabha a mʉtʉ wa ɨbhɨbha kʉgbɛ kɛkɨtaga ɨmɨ. 29 Namubikyi lɨkpʉmʉka li nɨlɨ mbɨya wanʉ kanɨ kanigyonosigʉ, kyɛ ngbingo yi nɨnɔ igyonoso banʉ mino, binikyononito. 30 Nakɛgʉ bata na ibunu na mʉnzɨna manda kyɛ ngama wa ɔbɨlɨ yi nɨmʉ a kʉwa kodhoku. Ɨyɨ kakwananɨgʉ kagya luki gʉtʉgʉ limoti aka, 31 luki limoti, okwononi batʉ ba ɔbɨlɨ bibhi bɛ napagatʉ Bhabha, na ɨmɨ nagyaga mʉdɔngɔnɨ bɛyɔ ɛkpamya ndɨ mino. Womogoni, totukyini wanʉ. »