Malia akagbodyo Yeso na malazi ka magʉ
12
1 Masyɛ madɨya kambwa wa yɨnga ya Pasɨka, Yeso aga ndɨ ka mugi ma Bhetania, kʉ ka Lazalɔ nɨnɔ apupiso ndɨ ka mbʉkʉ. 2 Kʉ bɛyɔ, bambambambya ndɨ. Malata nɔ a ndɨ kaugugubhyo. Lazalɔ a ndɨ bemoti ka nɨbɔ ba ndɨ pa imoti na Yeso ka mɨza. 3 Kʉwa wa, Malia ava ndɨ supa ya malazi matʉmbɛ-tʉmbɛ na ma lɨgabhʉ lapʉ. Agbodyo kʉwa ndɨ na imu Yeso ka magʉ, akpaga no tukatʉ kakɨ. Sʉ ya malazi oumo ndɨ ndabʉ yasɨ. 4 Luki limoti Yudha Isikalioti, bemoti ka babɨbya ka Yeso, nɨnɔ agabha banʉ, abɨkya ndɨ bɛ : 5 « Ko bhulyo ɨkɨ yɔ bakogobhigʉ mino malazi mi nɨma ka bambʉma bamɨya basaa+\fr 12.5 \fq bambʉma bamɨya basaa\ft : Wanda gɔnɨ Yuani 6.7, bʉpá batʉ ba yangya buyi bi ? » 6 Kabɨkyagʉ ndɨ bɛyɔ kyɛ a ndɨ kaʉmɨnɨlya batʉ ba yangya kumbu, luki limoti, kyɛ a ndɨ mʉtʉ wo kubakʉ. Ɨyɨ nɔ obuulyogo ndɨ mʉmbɨ ma apɛpɛ na ibogotʉ ndɨ mino buyi bi. 7 Luki limoti, Yeso abɨkya ndɨ bɛ : « Mʉsa ! Ogyi bɛyɔ ko bhulyo lɨsyɛ nɨlɔ belumbo ndɛkɛ mino. 8 A bɛyɔ, miko ndɛkɛ pa imoti na batʉ ba yangya masyɛ masɨ. Luki limoti, ɨmɨ, takikigʉ ndɛkɛ pa imoti na ibunu aka. » Bangama bakagya dhikidi kamwisiso Lazalɔ
9 Ambaza mudhingi ka Bayudha ibho ndɨ bɛ Yeso a ndɨ ka Bhɛtania. Bɨnda kʉwa ndɨ kʉ, kɛgʉ asɨ ko bhulyo ka Yeso aka, luki limoti, kyɛ bamɨnɨ gɔnɨ Lazalɔ nɨnɔ ɨyi Yeso apupiso ndɨ ka mbʉkʉ. 10 Kʉwa wa, bokumu-kumu bʉkanana ndɨ gɔnɨ bɛ bamwisiso Lazalɔ, 11 kyɛ Bayudha bakpʉ ba ndɨ kopupo ka mʉdɔngɔ kabʉ ko bhulyo kakɨ, na kabɨnɨkyana Yeso.
Yeso akogulyo ka Yelusalɛma
12 Na bʉgala bi, ambaza wakpʉ nɨnɔ odhoku ndɨ ka yɨnga wa Pasɨka ʉkana ndɨ bɛ Yeso a gɔnɨ kodhoku ka Yelusalɛma. 13 Bava ndɨ mangʉ, baga katɨlya nɨ banapamɨkanaga bɛ :
« Ɨbhɨbha ko Kunzi !
Kunzi adukulyi mʉtʉ yi nɨnɔ akodhoku ko lino ka Mombukwono dhosu bʉbʉnga !
Kunzi adukulyi ngama wa Ɨzalɛlɨ bʉbʉnga. »
14 Yeso inisono ndɨ na mikya punda, adaka kʉgʉ yi. Igyonoso ndɨ mʉdɔngɔnɨ bɛyɔ ikpikogo ndɨ mino bɛ :
15 « Makobongonitɔgʉ, ibunu batʉ ba gʉdʉ wa Siona !
Winoni, ngama kunu odhunuku,
a wakiko kʉgʉ wa mikya punda. »
16 Babɨbya kakɨ bakotombisyogʉ mbɛyɨ ndɨ lɨkpʉmʉka li nɨlɔ bɨkwa. Luki limoti, ngbingo yi nɨnɔ Yeso ogulyo ndɨ mino kʉsɔ wa ɨbhɨbha, batamana sɛ kʉwa bɛ lɨkpʉmʉka li nɨlɔ ikpikogo ndɨ ko bhulyo kakɨ, bambanzʉ bagyɨlya ndɨ bɛyɔ aka yɔ.
17 Bambanzʉ basɨ nɨbɔ ba ndɨ pa imoti na Yeso ngbingo yi nɨnɔ apupisoku ndɨ mino Lazalɔ ka mbʉkʉ, na azuzukiso lugo ka bamanda, batʉmbʉlaga ndɨ nɨlɔ bɨna ndɨ no miso. 18 Kinili, ambaza ka bambanzʉ odhoku ndɨ katɨlya. A ndɨ nɨ ukonini bɛ Yeso agya ndɨ likingyosi li nɨlɔ. 19 Bafalisayɔ babɨkyana kʉwa lugo kabʉ bɛ : « Minini ! Makakwananɨgʉ bata kagya luki. Bambanzʉ basɨ ba kʉwa kumbuso kakɨ aka ! »
Batʉ bemoti-bemoti lugo ka Bagiliki bakakɨsa Yeso
20 Lugo ka batʉ nɨbɔ bodhoku ndɨ kabhibhiso Kunzi ngbingo wa yɨnga, Bagiliki bemoti-bemoti batʉ ndɨ gɔnɨ wa. 21 Bakpudoku ndɨ Filipi, nɨnɔ a ndɨ mʉtʉ wa gʉdʉ wa Bhɛtɛsaidha ka iwili ya Galilaya, babɨkya ndɨ bɛ : « Alʉkʉ, to bi kapa kamɨna Yeso. » 22 Filipi ɨnda ndɨ kabɨkya Andɨlɨa. Ɨbʉ basɨ baba bɨnda kabɨkya Yeso. 23 Yeso usikisyo ndɨ bɛ : « Ngbingo itulyonini nɨnɔ Mika mʉmbanzʉ ava mino ɨbhɨbha. 24 A bɛyɔ, nakamʉbɨkya lɨngʉnʉ ambɛ, lɨsɔlɔ kogwi ka lɨtɔmbʉ, okwo, iko ndɛkɛ asɨ ilu aka. Luki limoti, kokwo, abʉkʉta kʉwa bhumo yakpʉ. 25 Mʉtʉ yi nɨnɔ apaga ɔbɨlɨ kakɨ abungusotʉ. Luki limoti, nɨnɔ amʉyaga ɔbɨlɨ kakɨ ka lɨtɔmbʉ li nɨlɨ, iko ndɛkɛ na ɔbɨlɨ wa bɛnzɛ na bɛnzɛ. 26 Mʉmbanzʉ kapa kegugubhyo, ɛbɨbyɨ. Mʉgya-ligubho kamɨ iko ndɛkɛ kʉ gɔ kʉ ɨmɨ niko mino. Mʉmbanzʉ kiko mʉgya-ligubho kamɨ, Bhabha abhibhisotʉ. »
Yeso akanzɨna ko bhulo ya kukwakʉ kakɨ
27 « Mbɨya wanʉ, lɨmbɛngɨ egwini bʉpɔ. Nabɨkya bʉ ? Nabɨkyɨ sɛ kʉwa bɛ : Bhabhooo, iukusogonɔ baka ko ngbingo wa yigyogyiso yi nɨmʉ ? Luki limoti, ngbingo yi nɨnɔ nadhulyoku ndɨ nɨmʉna aka mʉ. 28 Bha, bhibhisonɔ lino kakʉ ! » Kʉwa wa, lɨyʉ otukyoku ndɨ kʉgʉ wa lɨsyɛ bɛ : « Nobhibhisoni lino kamɨ, nɨgɨlyatʉ ndɛkɛ bata kobhibhiso. »
29 Ambaza ka bambanzʉ nɨnɔ a ndɨ wakamaga wa, ʉkana ndɨ lɨyʉ li nɨlɔ, abɨkya bɛ : « Ngbangbata sɛ nɔ opomikoni ! » Bagɔgɔ bɛ : « Malaika nɔ anzinilyi ! » 30 Luki limoti, Yeso ʉbɨkya ndɨ bɛ : « Lɨyʉ li nɨlɨ kopupigʉ ko bhulyo kamɨ, luki limoti, ko bhulyo kunu. 31 Ngbingo itulyonini, Kunzi akapʉnga kakɔ mʉngɨmbɔ ma ɔbɨlɨ yi nɨmʉ. Mbɨya wanʉ, akakpumyo ngama wa ɔbɨlɨ yi nɨmʉ. 32 Wa bedokiso ndɛkɛ mino kʉgʉ, nuluto ndɛkɛ bambanzʉ basɨ kʉ kamɨ. » 33 Yeso abɨkya ndɨ bɛyɔ kowoniso bɛ inguo ya kukwakʉ tino kwɔ okwo ndɛkɛ.
34 Ambaza ka bambanzʉ asikisyo ndɨ bɛ : « Ibusu, tʉkana ndɨ kʉsɔ wa mʉtʉʉ bɛ Masiya iko ndɛkɛ ɨyɨ na ɔbɨlɨ aka kadhwɛ ka bɛnzɛ na bɛnzɛ. Wa kʉwa kabɨkya lɨkɨ bɛ : ‹ Okwononi bɛ badokisi Mika mʉmbanzʉ kʉgʉ. › Mika mʉmbanzʉ yi nɨnɔ nɨ wanɨ ? » 35 Yeso aka ndɨ na ɨbʉ bɛ : « Bʉngbanganya atʉ mbɛyɨ bata lugo kunu ko ngbingo mʉkɛdɛ. Kpokyononi na lɨsyɛ, kyɛ bhiti kamuumonito. Mʉtʉ nɨnɔ akpakyanaga no bhiti, kibhogigʉ bɛ akaaga yanɨ. 36 Binikyononi nɛkɨ bʉngbanganya ngbingo yi nɨnɔ ma mbɛyɨ mino na ɨbʉ aka, kyɛ mɨɨtɨ batʉ ba bʉngbanganya. »
Kumbuso Yeso kabɨkya bɛyɔ, ɨmagalya ndɨ ɨyɨ, isumoku.
Bayudha bokyini kabɨnɨkyana Yeso
37 Gʉtʉgʉ bɛyɔ Yeso agya ndɨ mino mokingyosi mʉmbanga-mbanga ko miso kabʉ bɛyɔ, bakabɨnɨkyanagʉ ndɨ, 38 kʉwa wa gʉ wa, mʉnzɨna nɨmɔ mugyalandʉ Isaya abɨkya ndɨ ɨtʉlyana :
« Mombukwono dhosu, wanɨ nɔ abɨnɨkyana ndɨ lɨkpʉmʉka nɨlɔ ta ndɨ kabɨkyaga ?
Mombukwono dhosu awoniso ndɨ wanɨ kʉbɔkʉkɔ kwo ngu kakɨ ? »
39 Kinili, bakakwananɨgʉ ndɨ kabɨnɨkyana, kabyɛnɛnɛ na nɨlɔ Isaya abɨkya ndɨ bata bɛ :
40 « Kunzi udhulogoni ndɨ miso,
ʉdhʉlaga yimibho.
Agya ndɨ bɛyɔ,
kyɛ bakinogonitɔgʉ bata,
yimibho kabʉ kotombisyogonitɔgʉ bata luki.
Kinili, bakoikosogʉ ndɨ ɔbɨlɨ kabʉ,
Ibha nuukusotʉ ndɨ ! »
41 Isaya abɨkya ndɨ bɛyɔ kyɛ ɨna ndɨ ɨbhɨbha ka Yeso kambwa, anzɨnagatʉ ndɨ ko bhulyo kakɨ.
42 Gʉtʉgʉ bɛyɔ, budhingi lugo ka bangama ka Bayudha babɨnɨkyanatʉ ndɨ. Bakɛgʉ ndɨ kapa kaipupiso kyɛ Bafalisayɔ bakukpumyoni ka ndabʉ ya likungoni kabʉ. 43 A bɛyɔ, Bafalisayɔ bapaga ndɨ ɨbʉ ɨbhɨbha ka bambanzʉ kakɨtaga nɨyɔ odhogoku ko Kunzi.
Bakɔ mʉngɨmbɔ pisi ka lɨkpʉmʉka ka Yeso
44 Kʉwa wa, Yeso apamɨkana bɛ : « Nɨnɔ ɛbɨnɨkyana, kɛbɨnɨkyanagʉ ɨmɨ aka, luki limoti, abɨnɨkyana gɔnɨ nɨnɔ etikoku ndɨ. 45 Nɨnɔ akɛmɨna, akamɨna gɔnɨ nɨnɔ etikoku ndɨ. 46 Ɨmɨ, nodhoku ndɨ ka ɔbɨlɨ abhɛ bʉngbanganya, kyɛ mʉtʉ wasɨ nɨnɔ ɛbɨnɨkyana kikonitɔgʉ ko bhiti. 47 Mʉmbanzʉ kʉkana lɨkpʉmʉka kamɨ nɨ kogyigʉ, nakakʉlyɨgʉ mʉkɔmbʉ. A bɛyɔ, nakodhokugʉ ndɨ kakɔ mʉngɨmbɔ ka ɔbɨlɨ, luki limoti, nodhoku ndɨ kaukuso. 48 Mʉmbanzʉ kɛmʉya, akya kabɨnɨkyana lɨkpʉmʉka kamɨ, a na zozi kakɨ. Mʉtɨwɨ nɨmɔ napága ndɨ mɔ abhiso ndɛkɛ ka mʉngɨmbɔ ka lɨsyɛ la mulibo. 49 A bɛyɔ, nakanzɨnagɨgʉ ko ngu kamɨ bɨkpɛ. Bhabha nɨnɔ etikoku ndɨ nɔ ɛkpamya ndɨ ɨyɨ mombukwono dhakɨ yi bɛ nakwanana kabɨkya ikanɨ katɨwa bʉnɨ. 50 Nakaibho bɨnza ambɛ, mʉtʉʉ ka Bhabha apága ɔbɨlɨ wa bɛnzɛ na bɛnzɛ. Kinili, nɨlɔ nabɨkyaga, ikogo mʉdɔngɔnɨ bɛyɔ aka yɔ Bhabha ɛkpamya ndɨ mino. »