Bhɨbhʉ ka basɨka tɛkɛbɛ
25
1 « Ka lɨsyɛ li nɨlɔ, bokingyoso ndɛkɛ bʉngama ba kʉgʉ wa lɨsyɛ na basɨka tɛkɛbɛ. Ɨbʉ, bʉva ndɨ batala kabʉ, baga katɨlya mombukwono dhumo wa ndʉwa. 2 Lugo kabʉ, kubukumoti ba ndɨ nɨbɔ bakimibho. Na kubukumoti bagɔgɔ batʉ bʉzɨnga. 3 Nɨbɔ bʉzɨnga bʉva ndɨ batala kabʉ aka, nɨ bakovigʉ molingo magɔgɔ mʉmatɨla kʉsɔ yi. 4 Luki limoti, nɨbɔ bakimibho, bʉva ndɨ batala na molingo magɔgɔ kʉsɔ wa basupa. 5 « Nɨyɔ mombukwono dhumo wa ndʉwa olipyo nɨ kanodhukugʉ, boko bi nɨbɔ basɨ bapʉnga ndɨ kazɨngaga tɔtɔ, balalaga ndɨ.
6 Lugo wo bhiti, lɨyʉ limoti abɨkya ndɨ bɛ : ‹ Winoni ! Mombukwono dhumo wa ndʉwa a ko pisi ! Gyoni, togoni katɨlya ! › 7 Kʉwa wa, boko basɨ bozuzuko ndɨ, bʉtʉnaga batala kabʉ.
8 « Basɨka bʉzɨnga bʉbɨkya ndɨ nɨbɔ bakimibho bɛ : ‹ Tiponi gɔnɨ mino ɨkya molingo, kyɛ batala kusu bakolimikogo. › 9 Luki limoti, busikisyo ndɨ bɛ : ‹ Kalɨ ! Molingo mi nɨma a makɛdɛ, kakwananɨgʉ katɨtʉlyana basɨ ! Windoni koluwo mokunu ka batʉ nɨbɔ bagabhaga. ›
10 « Ngbingo yi nɨnɔ bɨnda ndɨ mino, mombukwono dhumo wa ndʉwa osiloku. Bawai dhabʉ kubukumoti nɨbɔ ba ndɨ bakɨtʉlya, bingyo ndɨ pa imoti na ɨbʉ ka ndabʉ wo dhumo. Kumbuso yi, badhʉla ndɨ mupumi.
11 « Kumbuso, nɨbɔ bʉzɨnga bigoku ndɨ, babɨkya bɛ : ‹ Hiii Mombukwono dhosu ! Mombukwono dhosu ! Tiukwilyonɔ baka ! › 12 Luki limoti, osikisyo ndɨ bɛ : ‹ Nakamʉbɨkya lɨngʉnʉ ambɛ, nakamumibhigʉ ! › »
13 Yeso abɨkya bata ndɨ bɛ : « Wikoni nɛkɨ bakɨtʉlya ! Kyɛ makibhigʉ lɨsyɛ ɨkanɨ ngbingo.
Lizuni ka bagya-ligubho nɨbɔ bʉpága ndɨ buyi
14 « Bokingyoso ndɛkɛ Bʉngama ba kʉgʉ wa lɨsyɛ na mʉtʉ bemoti nɨnɔ a ndɨ na lɨgʉndʉ. Kambwa katʉkya, ʉmaka ndɨ bagya-ligubho kakɨ, ʉgbananɨlyaga makpʉmʉka kakɨ. 15 Kabyɛnɛnɛ no ngu ka mʉmbanzʉ yɨkaka-yɨkaka, apá ndɨ mʉgya-ligubho bemoti buyi kubukumuti. a Wagɔgɔ, apá ndɨ buyi bɨba. Na wagɔgɔ bata, apá buyi bumoti. Kumbuso yi, aga ndɨ ɨyɨ.
16 « Mʉgya-ligubho nɨnɔ bapá buyi kubukumuti, aga ndɨ na ibu koikosogo, inisono ndɨ bata na bagɔgɔ kʉgʉ yi kubukumuti. 17 Nɨnɔ bapá ndɨ buyi bɨba, aga ndɨ ɨyɨ koikosogo bɛgɛyɔ, inisono ndɨ na bagɔgɔ kʉgʉ yi bɨba gɔnɨ. 18 Luki limoti, nɨnɔ bapá ndɨ buyi bumuti, ɨnda ndɨ kakpɔ lɨbyɛ, olumbo na asʉma ndɨ buyi ka mombukwono dhakɨ kʉ bɛyɔ.
19 « Nɨyɔ masyɛ akɨtaga mudhingi, mombukwono dhabʉ igoku ndɨ. bɨkya kʉwa ndɨ bagya-ligubho kakɨ bi nɨbɔ bɛ batʉmbʉlyagɨ ɨsabʉ ya makpʉmʉka kakɨ. 20 Mʉgya-ligubho nɨnɔ bapá ndɨ buyi kubukumuti, odhoku, apá na bagɔgɔ kubukumuti kʉgʉ yi. Abɨkya ndɨ bɛ : ‹ Hiii mombukwono dhosu ! Wɛsa ndɨ no buyi kubukumuti. Wɨna ! Ninisono ndɨ bata na bagɔgɔ kubukumuti gɔnɨ. ›
21 « Mombukwono dhakɨ abɨkya ndɨ bɛ : ‹ A bɨnza, wa mʉgya-ligubho wanza na wa lɨngʉnʉ ! Wo bi mʉtʉ wa lɨngʉnʉ kobuulyogo makpʉmʉka makɛkɛkɛ, nubhiso banʉ ngama kobuulyogo makpʉmʉka makpʉkpʉ. Dhoku, togwi magyagya pa imoti ! ›
22 « Mʉgya-ligubho nɨnɔ bapá ndɨ buyi bɨba, odhoku ndɨ gɔnɨ ɨyɨ, abɨkya ndɨ bɛ : ‹ Hiii mombukwono dhosu ! Wɛsa ndɨ no buyi bɨba aka. Wɨna ! Ninisono ndɨ bata no buyi bagɔgɔ bɨba kʉgʉ yi. ›
23 « Mombukwono dhakɨ abɨkya ndɨ bɛ : ‹ A bɨnza, wa mʉgya-ligubho wanza na wa lɨngʉnʉ ! Wo bi mʉtʉ wa lɨngʉnʉ kobuulyogo makpʉmʉka makɛkɛkɛ, nubhiso banʉ ngama kobuulyogo makpʉmʉka makpʉkpʉ. Dhoku, togwi magyagya pa imoti ! ›
24 « Kʉwa wa, mʉgya-ligubho nɨnɔ bapá ndɨ buyi bumuti, odhoku, abɨkya ndɨ bɛ : ‹ Hiii Mombukwono dhosu, nibhogotʉ ambɛ wa mʉdɨya kʉgbɛ. Wobhuulyogo kʉ wakakʉnagɨgʉ mino. Na wanyɔgɔ masɔlɔ kʉ wakokunigʉ mino. 25 Kinili, nabangatʉ ndɨ, naga kasʉma buyi kakʉ kʉsɔ wa lɨbyɛ. Wɨna ! Va buyi kakʉ nɨba. ›
26 « Mombukwono dhakɨ asikisyo ndɨ bɛ : ‹ Wa mʉgya-ligubho wanyɛ na wakagyagɨgʉ ligubho ! Wibhogotʉ ndɨ bɛ nobhuulyogo kʉ nakakʉnagɨgʉ mino na nanyɔgɔ masɔlɔ kʉ nakokunigʉ mino. 27 Yɛkɨ a bɛyɔ ! Ko bhulyo ɨkɨ wakobhisogʉ ndɨ buyi kamɨ ka bhaki, kyɛ ngbingo yi nɨnɔ nigoku mino, nodhuku kava nɨ obukutogini ? 28 Mukupyoni buyi bi nɨba ! Mapá mʉtʉ yi nɨnɔ a ndɨ nobu tɛkɛbɛ.
29 « ‹ Ka lɨngʉnʉ, mʉmbanzʉ kiko no luki, bamatɨlyatʉ lagɔgɔ, kadhwɛ kʉ kwa kʉ luki li nɨlɔ obhwo ndɛkɛ mino kʉgbɛ. Luki limoti, mʉtʉ yi nɨnɔ kɛgʉ no luki, bakʉpya ndɛkɛ gɔnɨ gʉtʉgʉ lɨkɛdɛ nɨlɔ a nolu. 30 Mʉgya-ligubho yi nɨmʉ kɛgʉ na ɨzangɨya, mudikitoni kunzi ko bhiti. Kʉ, bigomisogo ndɛkɛ mino na bɨlya manzʉ bɨkyalʉ-kyalʉ. ›
Bɛyɔ Mika Mʉmbanzʉ akɔ ndɛkɛ mino mʉngɨmbɔ ka ɔbɨlɨ
31 « Ngbingo yi nɨnɔ Mika Mʉmbanzʉ odhoku ndɛkɛ mino kʉsɔ wa ɨbhɨbha kakɨ, pa imoti na bamalaika basɨ, iko ndɛkɛ ko kiti kakɨ wa bʉngama, kʉsɔ wa ɨbhɨbha ya kʉgʉ wa lɨsyɛ. 32 Bambanzʉ bo giyo yasɨ bamʉmʉkana ndɛkɛ kambwa kakɨ. gbanana ndɛkɛ bambanzʉ dhidhidhi mʉdɔngɔnɨ bɛyɔ mububulyo ʉgbananaga mino bamɛmɨ na bakɔndɔlɔ. 33 Ubhiso ndɛkɛ bakɔndɔlɔ ka nakpangbala wa kumbanzɨkanɨkɔ kakɨ. Na bamɛmɨ ubhiso ka kulekuke.
34 « Nɨbɔ ba ka kumbanzɨkanɨkɔ, ngama ʉbɨkya kʉwa ndɛkɛ bɛ : ‹ Dhoniku, ibunu nɨbɔ Bhabha amudukulyoni ndɨ bʉbʉnga. Voni lisimo la bʉngama nɨlɔ bamubungusilyogo ndɨ katʉkya ko ngbingo nɨnɔ aka nɔ bagya ndɨ mino ɔbɨlɨ. 35 Ka lɨngʉnʉ, na ndɨ kaɨmʉkana nza, mɛpátʉ ndɨ malɨlɨ. Na ndɨ na mʉsasa, mɛpá libo limwo. Na ngbingo nɨnɔ na ndɨ mino mubhiko, mɛtɨlyatʉ ndɨ. 36 Ngbingo yi nɨnɔ na ndɨ mino ndumbu, mɛpátʉ ndɨ botu. Na ndɨ no kolobu, modhokutɔ ndɨ kɛnda. Ko ngbingo yi nɨnɔ na ndɨ mino ka ligbito, modhokutɔ ndɨ kɛnda. ›
37 « Kʉwa wa, batʉ bongbingbili basikisyo ndɨ bɛ : ‹ Mombukwono dhosu, ngbingo tino nɔ tʉmɨna ndɨ mino na nza tʉpá malɨlɨ ? Ikanɨ na mʉsasa tʉpá libo limwo ? 38 Ngbingo tino nɔ wa ndɨ mino mubhiko tʉtɨlya ? Ikanɨ wa ndɨ ndumbu tʉpá botu ? 39 Na ngbingo tino nɔ tʉmɨna ndɨ mino no kolobu, ikanɨ ka ligbito taga kaʉnda ? ›
40 « Kʉwa wa, ngama usikisyo ndɛkɛ bɛ : ‹ Nakamʉbɨkya lɨngʉnʉ, lasɨ nɨlɔ magyɨlya ndɨ bemoti lugo ka bomiki bakɛkɛ nɨba ɨkanɨ bemoti lugo ka bomika-mama, mɛgyɨlya ndɨ ɨmɨ bɨkpɛ. ›
41 « Kʉwa wa, ʉbɨkya ndɛkɛ nɨbɔ bikonono ndɛkɛ ka kulekuke kakɨ bɛ : ‹ Tukyoni buwobhi na ɨmɨ, ibunu migbongisisoni ! Windoni kʉsɔ wo buku ba bɛnzɛ na bɛnzɛ. Buku bi nɨbɔ ibungusyogo ndɨ ko bhulyo ka mumuyoniso na bamalaika kakɨ ! 42 Ka lɨngʉnʉ, na ndɨ kaɨmʉkana nza, makɛpágʉ ndɨ malɨlɨ. Na ndɨ na mʉsasa, makɛpágʉ ndɨ libo limwo. 43 Ngbingo nɨnɔ na ndɨ mino mubhiko, makɛtɨlyagʉ ndɨ. Ngbingo nɨnɔ na ndɨ mino ndumbu, makɛpágʉ ndɨ botu. Na ngbingo nɨnɔ na ndɨ mino no kolobu ikanɨ ka ligbito, makodhokugʉ ndɨ kɛnda. ›
44 « Kʉwa wa, ɨbʉ basikisyo ndɨ gɔnɨ bɛ : ‹ Mombukwono dhosu, ngbingo tino nɔ wa ndɨ mino kaɨmʉkana nza, ikanɨ mʉsasa, ikanɨ wa ndɨ mubhiko, ikanɨ wa ndɨ ndumbu, ikanɨ no kolobu, ikanɨ ka ligbito nɨ takusingyigʉ ? ›
45 Ngama usikisyo kʉwa ndɛkɛ bɛ : ‹ Nakamʉbɨkya lɨngʉnʉ, lasɨ nɨlɔ makagyɨlyagʉ ndɨ bemoti lugo ka bomiki bakɛkɛ nɨba, makɛgyɨlyagʉ ndɨ ɨmɨ. ›
46 Batʉ bi nɨbɔ bopupo ndɛkɛ wa, baga kaigyogyiso ka bɛnzɛ na bɛnzɛ. Luki limoti, nɨbɔ bongbingbili, bogulyo ndɛkɛ ka ɔbɨlɨ wa bɛnzɛ na bɛnzɛ. »