Yeso na batʉtʉmbwa kakɨ tɛkɛbɛ na baba
10
1 Yeso ʉmaka ndɨ babɨbya kakɨ tɛkɛbɛ na baba. pá kʉwa ndɨ ngu yikpumyo malɨmba, yiukuso bokolobu bayasɨ na bʉpɔ ba nzʉyɨ dhidhidhi. 2 Mino ka batʉtʉmbwa bi ndɨ nɨma : mʉtʉ wa mambwa nɨ Simoni (nɨnɔ bamakaga ndɨ gɔnɨ bɛ Pɛtɛlɛ) na mamakɨ bɛyɔ ka Andɨlɨya, Yakɔbɔ mika Zɛbhɛdhayɔ, na mamakɨ bɛyɔ ka Yuani, 3 kumbuso yi, Filipi, Bhatulumei, Tʉma, Matayɔ nɨnɔ a ndɨ ndɔmbɛ wa manzanza, Yakɔbɔ mika Alʉfayɔ, Tadhei, 4 Simoni nɨnɔ a ndɨ gɔnɨ bemoti ka lidu ka Bazɨlɔtɨ, sɛ kʉwa Yudha Isikalioti nɨnɔ agabha ndɨ Yeso.Yeso utikini batʉtʉmbwa tɛkɛbɛ na baba
(Malɨkɔ 6.7-13; Luka 9.1-6)
5 Kʉwa wa, Yeso ʉtɨka ndɨ batʉtʉmbwa tɛkɛbɛ na baba bi nɨbɔ, ʉpá ndɨ mʉtʉʉ bɛ : « Makindonitɔgʉ ka batʉ nɨbɔ bakɛgʉ Bayudha na makingyonitɔgʉ ka bagʉdʉ ka Basamalia. 6 Luki limoti, windoni ka Baɨzaleli aka. Ka lɨngʉnʉ, ɨbʉ ba mʉdɔngɔnɨ abhɛ bakɔndɔlɔ nɨbɔ bobungogoni ndɨ.
7 « Ko pisi, ubikyogoni bambanzʉ bɛ : ‹ Bʉngama ba kʉgʉ wa lɨsyɛ atikpudiniku ! › 8 Uukusoni batʉ ba bokolobu, mubhililiso bamanda, uukusoni bakebu-kebu na mokpumyo malɨmba. Bamʉpá ndɨ ka payaya, ibunu, upóni nɛkɨ gɔnɨ bɛngɛnɨ payaya aka.
9 « Kʉsɔ wa fuku kunu makovonitɔgʉ gʉtʉgʉ ɔlɔ aka, ikanɨ buyi, ikanɨ bangwɛyɨ ba ya lɨgabhʉ lapʉ. 10 Makuvonitɔgʉ bakʉgba ka lɨgʉndʉ, ikanɨ botu bayɨba, ikanɨ bɛkpakʉ, ikanɨ mʉdhʉkpɔ. Ka lɨngʉnʉ, okwononi kapá mʉgya-ligubho malɨlɨ kakɨ.
11 « Ngbingo yi nɨnɔ mogulyogo banʉ mino ka gʉdʉ ikanɨ ka mugi mimoti bɛnɛ, mukisoni mʉtʉ nɨnɔ akwanana kamʉtɨlya. Na wikoni kʉ kakɨ aka kadhwɛ ko ngbingo nɨnɔ mopupo ndɛkɛ mino. 12 Nɨyɔ mogulyogo banʉ mino ka ndabʉ, uusogoni bɛ : ‹ Mazɨyɔ iki pa imoti na ibunu ! ›a 13 Kiko nɨ batʉ ba ndabʉ yi nɨyɔ bamutilyini, mazɨyɔ mi nɨmɔ asɨkana wa. Luki limoti, kiko nɨ bakamutilyigʉ, midhukulo kambwa na mazɨyɔ mi nɨmɔ.
14 « Kiko nɨ bakamutilyigʉ na bakamumukonigʉ ka ndabʉ imoti bɛnɛ ikanɨ ka gʉdʉ, puponi wa, mɨbhʉmaga libungu la magʉ kunu. 15 Nakamʉbɨkya lɨngʉnʉ ambɛ, ka lɨsyɛ lɨkɔ mʉngɨmbɔ, batʉ ba gʉdʉ yi nɨnɔ bigyogyiso ndɛkɛ kʉgbɛ kaʉkɨtaga batʉ ba Sɔdhɔmʉ na Gɔmɔlɔ !
Babɨbya bigyogyisotʉ banʉ
16 « Ukononi ! Ɨmɨ, nakamʉtɨka mʉdɔngɔnɨ abhɛ bakɔndɔlɔ lugo ka bosukopi. Yɛkɨ a bɛyɔ, wikoni nɛkɨ bakɨmɨnya abhɛ banzʉka na bitombiii abhɛ bonzuwo. 17 Wibuulyonito, kyɛ bambanzʉ bamulikisogotʉ ndɛkɛ ko bongbongu na bamʉtɨna pimbo kʉsɔ wa bandabʉ kabʉ ba ya likungoni. 18 Bɨndagatʉ ndɛkɛ na ibunu kambwa ka bangama ba bewili na kambwa ka bangama budhingi-dhingi ko bhulyo kamɨ. Kʉwa wa, miko ndɛkɛ badhɛmʉ kamɨ kambwa kabʉ na kambwa ka batʉ nɨbɔ bakɛgʉ Bayudha.
19 « Luki limoti, ngbingo yi nɨnɔ bamusiliso ndɛkɛ mino kambwa kabʉ, makigbomisonitɔgʉ bamʉ bɛ tanzɨna sɛ pɨyɛ bʉ ? Ikanɨ bɛ tabɨkya sɛ pɨyɛ ɨkɨ ? Iyo, ko ngbingo yi nɨnɔ aka nɔ, Kunzi amʉpátʉ nɨlɔ mabɨkya. 20 Ka lɨngʉnʉ, kɛgʉ ibunu bɔ manzɨna ndɛkɛ, luki limoti, Lɨmbɛngɨ ka Obhonu lɔ anzɨnaga ndɛkɛ kʉsɔ kunu.
21 « Ko ngbingo yi nɨnɔ, mʉmbanzʉ agabhaga ndɛkɛ mamakɨ bɨkpɛ ka kukwakʉ, bhabha agya mikakɨ bɛgɛyɔ. Bomiki buikyonilyo ndɛkɛ ɨbʉ babʉkʉta kabʉ na bumwisiso. 22 Bambanzʉ basɨ bamʉmʉya ndɛkɛ ko bhulyo yo lino kamɨ. Luki limoti, nɨnɔ okibhyo ndɛkɛ kadhwɛ ka mulibo, inisonotʉ na muukuso. 23 Ngbingo yi nɨnɔ bamʉgyagya ndɛkɛ mino ka gʉdʉ bemoti, mapɨkɨta ka nɨnɔ wagɔ. Nakamʉbɨkya lɨngʉnʉ ambɛ, makamagʉ kolingyo giyo yasɨ ya Ɨzɛlɛlɨ nɨ Mika Mʉmbanzʉ kanodhukugʉ.
24 « Miki wa ɨkɔlɔ kakɨtagɨgʉ muwonisili kakɨ. Na mʉgya-ligubho kakɨtagɨgʉ mombukwono dhakɨ. 25 Okwononi miki wa ɨkɔlɔ iki mʉdɔngɔnɨ abhɛ muwonisili kakɨ, na mʉgya-ligubho abhɛ mombukwono dhakɨ. Kiko mbɛɨ nɨ bamokini ngama wa lɨvananza bɛ Bhelizebhuli, angɛnɛngɛnɛ kʉwa batʉ ba lɨvananza la ndabʉ kakɨ aka !
Nɨnɔ okwononi kabanga
26 « Yɛkɨ a bɛyɔ, makubongonitɔgʉ bambanzʉ. Ka lɨngʉnʉ, masɨ nɨmɔ a makɨsʉma, inisonotʉ ndɛkɛ bɨngbanganya na masɨ nɨmɔ a ko dhikidi, ipupisotʉ. 27 Masɨ nɨmɔ nakamʉbɨkya kʉsɔ wo bhiti, bikyoni ka bʉngbanganya. Na masɨ nɨmɔ nakamʉbɨkya ko dhikidi, dokoni ka bakugbondo, matʉbɨlaga.
28 « Makubongonitɔgʉ batʉ nɨbɔ bakwanana kamwɔ nzʉyɨ aka nɨ bakomwigʉ lɨmbɛngɨ. Luki limoti, mubongoni Kunzi nɨnɔ akwanana ɨyɨ kamwɔ nzʉyɨ na lɨmbɛngɨ pa imoti kʉsɔ wo buku.
29-31 « Ambɛ, bakʉgabhagɨgʉ mbɛɨ bakyɔkyɔdɔ baba ka ambuma bemoti aka ? Luki limoti, gʉtʉgʉ bemoti kabʉ kakwananɨgʉ kogwoku wasɨ nɨ Obhonu kobhoilyigʉ. Makobongonitɔgʉ, ibunu, ma na ɨzangɨya kaʉkɨtaga bakyɔkyɔdɔ bakpʉ ! Na gʉtʉgʉ tukatʉ ta bamʉ kunu aka, Kunzi akaibho ɨsabʉ yi yasɨ.
32 « Mʉtʉ wasɨ kɛbɨnɨkyana kambwa ka bambanzʉ, ɨmɨ, nabɨnɨkyana ndɛkɛ bɛgɛyɔ kambwa ka Bhabha nɨnɔ a kʉgʉ wa lɨsyɛ. 33 Luki limoti, mʉmbazʉ kɛmanganya kambwa ka bambanzʉ, ɨmɨ, namanganya ndɛkɛ bɛgɛyɔ kambwa ka Bhabha nɨnɔ a kʉgʉ wa lɨsyɛ.
Yeso akabɨkya bɛ bambanzʉ bɨgbananagatʉ
34 « Makotomononitɔgʉ bɛ nodhoku ndɨ kapá mazɨyɔ ka ɔbɨlɨ. Nakodhokugʉ ndɨ kapá mazɨyɔ, luki limoti nodhoku ndɨ kaudhwonoso bambanzʉ lugo kabʉ. 35 A bɛyɔ, nodhoku ndɨ kagbonoso miki na abhakɨ, kagbonoso mʉsɨka na amakɨ, kagbonoso muzyozyo na tɨtakɨ. 36 Bomuyoniso ka mʉmbanzʉ opupogo ndɛkɛ kʉsɔ wa ndabʉ kakɨ aka. › b
37 « Mʉtʉ wasɨ nɨnɔ apaga abhakɨ ikanɨ amakɨ kɛkɨtaga ɨmɨ, ɨyɨ, kokwononigʉ kɛbɨbya. Na nɨnɔ apaga mikakɨ mʉlʉkʉ yi ikanɨ nɨnɔ mʉsɨka yi kɛkɨtaga ɨmɨ, nɨnɔ gɔnɨ kokwononigʉ kɛbɨbya. 38 Mʉtʉ nɨnɔ kanobhinikigʉ mʉsalabha kakɨ na kɛbɨbya, kakwananɨgʉ kaiko mʉbɨbya kamɨ. 39 A bɛyɔ, mʉmbanzʉ kapa kaukuso ɔbɨlɨ kakɨ, abungusotʉ. Luki limoti, nɨnɔ abunguso ko bhulyo kamɨ, inisonotʉ ndɛkɛ bata na ɨyɨ.
Bambanzʉ nɨbɔ bakamʉtɨlya, bakɛtɨlya ɨmɨ bɨkpɛ
(Malɨkɔ 9:41)
40 « Kiko nɨ mʉmbanzʉ amutilyini, etilyi ɨmɨ. Nɨnɔ etilyi, atilyi nɨnɔ etikoku ndɨ. 41 Na kiko nɨ mʉmbanzʉ atilyini mugyalandʉ kyɛ a mugyalandʉ, bakalya ndɛkɛ mʉtʉ yi nɨnɔ mʉdɔngɔnɨ abhɛ mugyalandʉ. Kiko nɨ atilyini mʉmbanzʉ wongbingbili kambwa ko Kunzi, kyɛ a wongbingbili, bakalya ndɛkɛ mʉdɔngɔnɨ abhɛ mʉtʉ wongbingbili gɔnɨ.
42 « A bɛyɔ, nakamʉbɨkya ambɛ, mʉmbanzʉ kapá gʉtʉgʉ kɔpɔ wo libo ladhɛ aka ka bemoti ka bomiki nɨbana, lugo ka babɨbya kamɨ, mʉtʉ yi nɨnɔ inisonotʉ ndɛkɛ na apɛpɛ kakɨ. »