Yɨbʉkʉta ka Yeso
(Mat 1.18-25)
2
1 Ka masyɛ mi nɨmɔ, ngama mudhingi wa Lʉma bɛyɔ ka Ogisiti apá ndɨ mʉtʉʉ bɛ bʉtangɨ bambanzʉ kakɨ basɨ. 2 Lɨtatanga nɨlɔ la mambwa lɔ igyonoso ndɨ ko ngbingo yi nɨnɔ Kilinio a ndɨ mino ngama wa iwili ya Sulia. 3 Bambanzʉ basɨ bɨndaga ndɨ ka yikpikisiso, mʉmbanzʉ yɨkaka-yɨkaka ka mugi mi nɨmɔ ɨbʉkʉta mino.4 Yɛzɛfʉ atʉkya ndɨ gɔnɨ ɨyɨ ka gʉdʉ wa Nazalɛtɨ, kʉ ka iwili ya Galilaya, kaɨnda ka gʉdʉ wa Bhɛtɛlɛmʉ, mugi ma kɨbʉkʉta ka ngama Dhaudhi, ka iwili ya Yudhɛya. Ɨnda ndɨ kʉ bɛyɔ kyɛ a ndɨ ɨyɨ ka lɨvananza ka Dhaudhi, 5 kayikpikisiso ɨbʉ na Malia nɨnɔ ba ndɨ kavanana na ɨyɨ. Malia a sɛ kʉwa ndɨ wa na mʉma.
6 Ngbingo yi nɨnɔ ba ndɨ mino kʉ ka Bhɛtɛlɛmʉ, masyɛ kakɨ ma libukuti ɨtʉlyana. 7 Abʉkʉta miki mʉlʉkʉ yi, pʉta kakɨ. Atikyogo na botu ba ya bʉdhɨ, amongoso kʉsɔ wa kpokoyo nɨnɔ banyama balyalyaga ndɨ mino, kyɛ bakɛgʉ ndɨ bata ɨbʉ na pa ka ndabʉ ka bobhiko.
Malaika bemoti upupilyini bobubulyo ka banyama
8 Ka iwili yi nɨyɔ gɔnɨ yɔ, bobubulyo ka banyama basyɛgɛ ndɨ kunzi ko tutu, kaubuulyogo banyama kabʉ. 9 Malaika ka Mombukwono dhosu Kunzi upuponilyo, ɨbhɨbha ya mangbamʉ ka Mombukwono dhosu ukungulo. Babanga ndɨ kʉgbɛ. 10 Luki limoti malaika ʉbɨkya bɛ : « Makobongonitɔgʉ, kyɛ nodhuku kamʉpá mongoni manza nɨmɔ mʉpá ɨgyagya yidhingi ka bambanzʉ basɨ. 11 Na lɨsyɛ li nɨlɨ, Muukuso ibukutini ko bhulyo kunu kʉ ka mugi ka Dhaudhi, ɨyɨ nɨ Masiya, Mombukwono dhosu. 12 Mamibha miki yi nɨnɔ ka makpʉmʉka nɨma : Matakanya miki wa wɛsɛ batikyogini na botu ba ya bʉdhɨ, mumongoso kʉsɔ wa kpokoyo nɨnɔ banyama balyalyaga mino. »
13 Ambaza ka bamalaika osyoku bigbututu katʉkya kʉgʉ wa lɨsyɛ, pa imoti na malaika wagɔgɔ, bapʉnga kabhibhiso Kunzi, banabɨkya bɛ : 14 « Ɨbhɨbha ko Kunzi kʉgʉ wa lɨsyɛ kʉgbɛ, na mazɨyɔ kʉnʉ ka lɨtɔmbʉ kʉgʉ ka batʉ basɨ nɨbɔ ʉpaga ! »
Bobubulyo ka banyama banaga ka Bhɛtɛlɛmʉ
15 Ngbingo yi nɨnɔ bamalaika batʉkya mino kaɨga kʉgʉ wa lɨsyɛ, bobubulyo ka banyama babɨkyana lugo kabʉ bɛ : « Togoni nɛkɨ ka Bhɛtɛlɛmʉ, okwononi tɨnɨ nɨlɔ opupi kʉ, nɨlɔ Mombukwono dhosu Kunzi atiwonisili. »
16 Bɨnda ndɨ bɨgala-gala, batakanya Malia na Yɛzɛfʉ, sɛ kʉwa miki wa wɛsɛ mumongoso kʉsɔ wa kpokoyo nɨnɔ banyama balyalyaga ndɨ mino. 17 Nɨyɔ bamɨna, batʉmbʉlaga nɨlɔ malaika ʉbɨkya ndɨ ko bhulyo ko miki wa wɛsɛ yi nɨnɔ. 18 Batʉ basɨ nɨbɔ bʉkana ndɨ mongoni mi nɨmɔ, ʉmbanga kʉgbɛ. 19 Luki limoti Malia, a ndɨ kobuulyogo nɨmɔ masɨ ka lɨmbɛngɨ na katamana kʉgʉ yi kʉgbɛ. 20 Kumbuso yi, bobubulyo ka banyama bɨga ndɨ nɨ banabhibhiso Kunzi, banambɨmbɨlya ka masɨ nɨmɔ bʉkana ndɨ na nɨmɔ bɨna ndɨ, kyɛ masɨ igyonoso ndɨ mʉdɔngɔnɨ bɛyɔ aka yɔ malaika ʉbɨkya ndɨ mino.
Balukini miki
21 Nɨyɔ masyɛ bʉgɨna ɨtʉlyana wa miki ɨbʉkʉta mino, adhwɛ ko ngbingo kakɨ mʉkɔ, balʉka bɛ Yeso, lino li nɨlɔ malaika atwa ndɨ kambwa amakɨ kava mʉma.
Bogoni na Yeso kambwa ko Kunzi
22 Kʉwa wa masyɛ ma kibubiso kabʉ ɨtʉlyana mino, kabyɛnɛnɛ na mʉtʉʉ ka Musa, Yɛzɛfʉ na Malia baga ndɨ no miki ka Yelusalɛma kabhiso ka mabɔkʉ ka Mombukwono dhosu, 23 kyɛ, ikpiko ndɨ kʉsɔ wa Mʉtʉʉ ka Mombukwono dhosu bɛ : « Okwononi kapá abhɛ apɛpɛ ka Mombukwono dhosu miki mʉlʉkʉ yi wasɨ, nɨnɔ pʉta yi. » 24 Bɨnda ndɨ ka Yelusalɛma kapá gɔnɨ apɛpɛ bɛgɛyɔ mʉtʉʉ mi nɨmɔ ɨbɨkya ndɨ mino; « Bonzuwo baba : mʉlʉkʉ yi na mukokoyi yi, gʉtʉgʉ bomikya bamokpondi baba aka. »
25 Wɨna sɛ wa, alʉkʉ bemoti a ndɨ ka Yelusalɛma kʉ ina ndɨ bɛ Simioni. A ndɨ mʉtʉ wa lɨngʉnʉ na mʉtʉ mʉbanga Kunzi kʉgbɛ. Ikogo ndɨ kabʉnda mʉtʉ yi nɨnɔ akwanana ndɨ koukuso lɨvananza la Ɨzɛlɛlɨ. Lɨmbɛngɨ Lotu a ndɨ pa imoti na ɨyɨ. 26 Lɨmbɛngɨ li nɨlɔ awonisilo ndɨ bɛ kokwigʉ nɨ kanaminigʉ Masiya nɨnɔ Mombukwono dhosu Kunzi atikoku. 27 Akpamya ndɨ kogulyo ka Ndabʉ ko Kunzi. Ngbingo yi nɨnɔ Yɛzɛfʉ na Malia bɨnda mino no mikabʉ bɛyɔ ka Yeso, kabhiso ka mabɔkʉ ko Kunzi mʉdɔngɔnɨ bɛyɔ mʉtʉʉ abɨkyaga ndɨ mino, 28 Simioni adhungo, abhibhiso Kunzi, abɨkya bɛ :
29 « Mbɨya wanʉ, Eeeze Mombukwono dhosu, utulyosini bagɔmɛ kakʉ :
Wakwanana kʉwa kasa musunzu kakʉ kokwo ka mazɨyɔ,
30 kyɛ ninini muukuso kakʉ no miso kamɨ,
31 muukuso mi nɨmɔ wobungusyogo ndɨ ko miso ka bambanzʉ basɨ :
32 A lɨmɔmɔ li nɨlɔ uzigo banʉ bambanzʉ basɨ ba ɔbɨlɨ nɨbɔ bakumibhigʉ
na nɨlɔ apá banʉ ɨbhɨbha ka Ɨzɛlɛlɨ, lɨvananza kakʉ. »
33 Lɨkpʉmʉka lasɨ nɨlɔ Simioni a ndɨ kabɨkya kʉgʉ ka Yeso, ʉmbanga ndɨ babʉkʉta kakɨ. 34 Simioni akʉnga Kunzi bɛ udukulyi bʉbʉnga, abɨkya Malia amakɨ Yeso bɛ : « Kunzi atikoku ndɨ miki yi nɨmʉna ko bhulyo yi nɨyɔ bɛ budhingi ba bambanzʉ lugo ko bomikya baƗzalɛlɨ binisoni na mʉngɨmbɔ. Na budhingi bagɔgɔ binisoni na bungbingbili ko miso ko Kunzi. Iko banʉ likingyosi bɛ Kunzi akagya ligubho kakɨ nɨ bambanzʉ bakɛgʉ kabhaɨlya, 35 na bata opupiso banʉ mʉtamanagɨ masɨ nɨmɔ ɨsʉma ka mambɛngɨ ka bambanzʉ budhingi. Sɛ kʉwa ɨwɛ, Malia, wigomisogo ndɛkɛ ko bhulyo ko miki yi nɨmʉ abhɛ bakutumo dhʉkpa. »
Ana, mugyalandʉ muko yi akanzɨna ko bhulyo ka Yeso
36 Mugyalandʉ bemoti muko yi ina ndɨ bɛ Ana, ikogo ndɨ gɔnɨ ɨyɨ ka Yelusalɛma. A ndɨ mika Fanueli, ka lɨvananza ka Aseli. A kʉwa ndɨ mbɔkʉ-mbɔkʉ kʉgbɛ. Bagya ndɨ byanga madɨya na ɨka na mbʉnyakɨ nɨnɔ ava ndɨ nɨ a mbɛyɨ mʉsɨka aka. 37 Kumbuso yi, iko kʉwa ndɨ woko aka, na kʉ odhwiso ndɨ mino byanga batɛkɛbɛ bʉgɨna na bɨkwanganya. Katʉkyagɨgʉ ndɨ ka Ndabʉ ko Kunzi, luki limoti agyɨlyaga ndɨ Kunzi ligubho bhiti na lɨsyɛ : Avaga ndɨ ngbingo ko ginyo malɨlɨ na kakʉnga Kunzi. 38 Odhoku ndɨ ko ngbingo yi nɨnɔ gɔnɨ nɔ, apʉnga kabhibhiso Kunzi. tʉmbʉlyaga bambanzʉ basɨ nɨbɔ ba ndɨ kabʉnda bɛ pisi tino yɔ Kunzi ʉkʉlaga mino batʉ ba Yelusalɛma ka busunzu.
Babʉkʉta ka Yeso bigini na Yeso ka Nazalɛtɨ
39 Ngbingo yi nɨnɔ Yɛzɛfʉ na Malia bama mino kagya masɨ nɨmɔ mʉtʉʉ ka Mombukwono dhosu Kunzi akʉngaga ndɨ, bɨga na Yeso ka Galilaya, kʉ ka gʉdʉ wa Nazalɛtɨ. 40 Miki apʉnga ndɨ kopingo na kopingogo. A ndɨ mutumo na yimibho na bʉbʉnga ko Kunzi a ndɨ pa imoti na ɨyɨ.
Yeso otigolini ka Yelusalɛma
41 Byanga bayasɨ, abhakɨ na amakɨ Yeso badakaga ndɨ ka Yelusalɛma ka yɨnga ya pasɨka. 42 Wa Yeso otulyoso mino byanga tɛkɛbɛ na bɨba, badaka ndɨ na ɨbʉ bɛyɔ aka yɔ bagyaga ndɨ mino ka bʉndɛlɨ. 43 Ngbingo yi nɨnɔ yɨnga osyo mino, bɨga, luki limoti miki Yeso asɨkana kʉ ka Yelusalɛma nɨ abhakɨ na amakɨ bakibhigʉ. 44 Ba ndɨ kasɨma bɛ Yeso akakpakyana kʉsɔ wa ambaza ka bambanzʉ nɨbɔ ba ndɨ kaɨganana. Nɨyɔ bagya lɨsyɛ limoti kʉsɔ wa lɨgʉndʉ nɨ bakɛgʉ kamɨna, bapʉnga kʉwa ndɨ kakɨsa lugo ka bɛvananza kabʉ na bawai dhabʉ. 45 Luki limoti bakamɨnagʉ ndɨ. Kinili bɨga bata ndɨ mino kakɨsa kʉ kwa kʉ ka Yelusalɛma.
46 Kumbuso wa masyɛ masaa, batokonyoku kʉsɔ wa Ndabʉ ko Kunzi : A ndɨ mukuliko pa imoti na bowonisili ba mʉtʉʉ ka Musa, anʉmʉkana na anumuuso makpʉmʉka magɔgɔ. 47 Lɨkpʉmʉka ʉmbanga batʉ basɨ nɨbɔ ba ndɨ kamʉkana, kaɨna yimibho kakɨ na sikisyo kakɨ ka makpʉmʉka nɨmɔ ba ndɨ kamuusogo mɔ. 48 Ngbingo yi nɨnɔ abhakɨ na amakɨ bamɨna mino, lɨkpʉmʉka ʉmbanga kʉgbɛ, na kʉ amakɨ amuusi bɛ : « Mikamɨ, ɨkɨ pɨyɛ yɔ watigyi bi mino bɛyɔ ? Ibusu na abhakʉ, tomomini bɨgbagbagba kaʉkɨsa. »
49 Umigisyo bɛ : « Mo bi kɛkɨsa ko bhulyo ɨkɨ ? Makɛgʉ kaibho bɛ nokwononi kaiko kʉsɔ wa ndabʉ ka Bhabha ? » 50 Luki limoti, ba kɛgʉ ndɨ kaibho ɨsɨ ya lɨkpʉmʉka nɨlɔ a ndɨ kaʉbɨkya lɔ.