Yeso aukusini zɛgɛsɨ
9
1 Yeso adaka ndɨ ka ɨngbɔlɔ yidhingi, azabha bata ibhombu, na aga ndɨ ka gʉdʉ kabʉ. 2 Kʉ bɛyɔ, badhulyoku ndɨ na zɛgɛsɨ wakanga ka kalagba. Ngbingo yi nɨnɔ Yeso ɨna ndɨ mino bhaya ka batʉ bi nɨbɔ, abɨkya zɛgɛsɨ nɔ bɛ : « Mikamɨ ! Wigwi lɨmbɛngɨ ! Bʉnyɛ kakʉ ipilyini. » 3 Kʉwa wa, bowonisili ba mʉtʉʉ bemoti-bemoti babɨkya ndɨ lugo kabʉ bɛ : « Mʉtʉ yi nɨmʉ akatʉmbwa Kunzi ! »
4 Luki limoti, Yeso andʉnga ndɨ tamanaga kabʉ. Umuuso kʉwa ndɨ bɛ : « Ko bhulyo ɨkɨ yɔ mo mino na tamanaga yanyɛ bɛyɔ ? 5 Ɨkɨ yɔ a yopoli kʉgbɛ, kabɨkya bɛ : ‹ Bʉnyɛ kakʉ ipilyini ›, ikanɨ kabɨkya bɛ : ‹ Wamaga, wakpakyana › ? 6 Ɨmɨ, nakapa ambɛ wibhoni bɨnza bɛ Mika Mʉmbanzʉ a no ngu yɨpɨlya bʉnyɛ wanʉ ka ɔbɨlɨ. »
Kʉwa wa, Yeso abɨkya ndɨ zɛgɛsɨ nɔ bɛ : « Wamaga ! Wava kalagba kakʉ, wɨga ka kʉ kakʉ. » 7 Alʉkʉ nɔ amaga ndɨ, ɨga kʉ kakɨ.
8 Ngbingo yi nɨnɔ bambaza ka bambanzʉ bɨna ndɨ mino bɛyɔ, bombomboyo ndɨ kʉgbɛ. Babhibhiso Kunzi nɨnɔ ʉpá bambanzʉ inguo yo ngu yi nɨyɨ.
Yeso amokini Matayɔ
9 Ngbingo yi nɨnɔ Yeso a ndɨ mino kakɨtaga, amɨna ndɨ alʉkʉ bemoti nɨnɔ ina ndɨ bɛ Matayɔ. Ɨyɨ Matayɔ a ndɨ wakiko kʉsɔ wa bhilo yilipiso manzanza. Kʉwa wa, Yeso abɨkya ndɨ bɛ : « Matayɔ ! Ibyeku ! » Wa aka wa, amaga ndɨ, abyɛ.
10 Kumbuso yi, Yeso ɨnda ndɨ kalyalya kʉ ka Matayɔ. Kʉ bɛyɔ, bandɔmbɛ budhingi na batʉ ba bʉnyɛ bodhoku ndɨ gɔnɨ wa. Ɨbʉ basɨ, bikonono ndɨ kalyalya pa imoti na Yeso na babɨbya kakɨ. 11 Ngbingo yi nɨnɔ Bafalisayɔ bɨna ndɨ mino bɛyɔ, bumuuso babɨbya ka Yeso bɛ : « Ko bhulyo ɨkɨ yɔ muwonisili kunu akalyalya pa imoti na bandɔmbɛ na batʉ ba bʉnyɛ ? »
12 Nɨyɔ Yeso ʉkana ndɨ mino bɛyɔ, ʉbɨkya bɛ : « Batʉ bapʉpʉ bakikogigʉ na mʉsasa ka mʉnganga, luki limoti, nɨbɔ ba bokolobu aka. 13 Windoni mbɛɨ katamanaga kʉgʉ wa isi ya mʉnzɨna mi nɨma : ‹ Ɨmɨ, nakɛgʉ kapa bɛ ipóni apɛpɛ, luki limoti, nakapa mʉpɨlya. › Ka lɨngʉnʉ, nakodhokugʉ ndɨ kaʉmaka batʉ bongbingbili, luki limoti, nɨbɔ banyɛ. › »
Yeso akanzɨna ko bhulyo yiginyo malɨlɨ ko ngbingo
14 Kʉwa wa, babɨbya ka Yuani Mubhatizai bakpudoku ndɨ Yeso, bamuuso bɛ : « Ibusu na Bafalisayɔ toginyogotʉ malɨlɨ ko ngbingo. Ko bhulyo ɨkɨ yɔ babɨbya kakʉ bakoginyogigʉ ɨbʉ ? » 15 Yeso usikisyo ndɨ bɛ : « Makasɨma bɛ bawai dhakɨ mombukwono dhumo wa ndʉwa bakwanana kalya kumbu ngbingo yi nɨnɔ ba mbɛɨ mino pa imoti aka ? Haaa, kɨgyananɨgʉ ! Luki limoti, ikotʉ ndɛkɛ na lɨsyɛ limoti nɨlɔ batʉmba ndɛkɛ mino mombukwono dhumo lugo kabʉ. Ka lɨsyɛ li nɨlɔ, boginyotʉ ndɛkɛ malɨlɨ ko ngbingo.
16 « Kɛgʉ na mʉmbanzʉ gʉtʉgʉ bemoti aka nɨnɔ odikogo kɨdaka ya mbɨya kʉgʉ wa kutuko kwa ndɛlɨ. Kagya bɛyɔ, kɨdaka ya mbɨya anʉwatʉ kutuko kwa ndɛlɨ na ngala ahʉmana bata kʉgbɛ.
17 « Na bakadukogɨgʉ gɔnɨ vinya wa mbɨya kʉsɔ wa bambɨkɛ ba ya ndɛlɨ-ndɛlɨ. Bakagya bɛyɔ, bambɨkɛ ʉlɨkagatʉ, vinya akɨka na bambɨkɛ bi nɨbɔ apʉtɨkana. Luki limoti, badukogo vinya wa mbɨya kʉsɔ wa bambɨkɛ ba ya mbɨya gɔnɨ. Kʉwa wa, makpʉmʉka nɨmɔ masɨ ibuulyogo bɨnza. »
Yeso aukusini muko, abhililiso mʉsɨka
18 Ngbingo nɨnɔ Yeso a mbɛɨ ndɨ mino kanzɨna aka na bambanzʉ bi nɨbɔ, ngama bemoti odhulyoku ndɨ. Ngama yi nɨnɔ obuno ndɨ moli kambwa kakɨ, abɨkya bɛ : « Mikamɨ mʉsɨka yi apʉnya kosiso lɨmbɛngɨ mbɨya wanʉ. Gʉtʉgʉ bɛyɔ, dhokunɔ baka, wabhisilyo mabɔkʉ kyɛ inisoni bata na ɔbɨlɨ. » 19 Kʉwa wa, Yeso amaga ndɨ, abyɛ ngama nɔ pa imoti na babɨbya kakɨ.
20 Kʉ bɛyɔ, a ndɨ na muko bemoti, nɨnɔ a ndɨ nɨ otulyosini byanga tɛkɛbɛ na bɨba nɨ a na bangʉ. Muko yi nɨnɔ odhoku ndɨ kumbuso ka Yeso, avɨla mʉ ma kutuko kakɨ. 21 Ka lɨngʉnʉ, a ndɨ katamanaga bɛ : « Kiko nɨ novilini kutuko kakɨ, naʉkatʉ. »
22 Ngbingo yi nɨnɔ Yeso ɨkwɛ ndɨ mino kumbuso, amɨna ndɨ muko yi nɨnɔ. Abɨkya kʉwa ndɨ bɛ : « Mikamɨ, wigwi lɨmbɛngɨ ! Bhaya kakʉ uukusini. » Na wa aka wa, muko yi nɨnɔ auka ndɨ.
23 Kumbuso yi, Yeso osilo ndɨ ka ndabʉ ka ngama yi nɨnɔ. Kʉ bɛyɔ, ʉtakanya ndɨ bambanzʉ nɨ banɨmbɨla mambʉ ma kukwakʉ na ambaza ka batʉ bagɔgɔ nɨ banagama.
24 Kʉwa wa, Yeso ʉbɨkya ndɨ bɛ: « Puponi wanʉ ! Mʉsɨka yi nɨmʉ kɛgʉ mukwo ! Luki limoti, a ka tɔtɔ ! » Ngbingo yi nɨnɔ bambanzʉ bʉkana mino bɛyɔ, batɨbha ndɨ bɨkyaaa. 25 Gʉtʉgʉ bɛyɔ, bopupo ndɨ. Kʉwa wa, Yeso ogulyo ndɨ ka ndabʉ ya kʉsɔ, agwi mʉsɨka nɨnɔ ka kʉbɔkʉkɔ. Wa aka wa, mʉsɨka nɔ abhɨlɨla ndɨ.
26 Mongoni mi nɨmɔ ada ndɨ kʉgbɛ kʉsɔ wa mugi masɨ.
Yeso uukusini batʉ bo kolobu ya mamɔmɔ baba
27 Ngbingo yi nɨnɔ Yeso atʉkya ndɨ mino wa, batʉ ba bokolobu ba ya mamɔmɔ baba bapʉnga ndɨ kabyɛ. Batʉ bi nɨbɔ ba ndɨ kapamɨkanaga bɛ : « Hiii, Mika Dhaudhi ! Tɨpɨlyanɔ baka ! »
28 Na ngbingo yi nɨnɔ Yeso ingyo ndɨ mino ka ndabʉ, batʉ ba bokolobu ya mamɔmɔ bi nɨbɔ bakpudoku ndɨ. Umuuso kʉwa ndɨ bɛ : « Matʉ na bhaya bɛ nakwananatʉ kagya lɨkpʉmʉka li nɨlɔ ? » Basikisyo ndɨ bɛ : « Iyo, Mombukwono dhosu. »
29 Kʉwa wa, Yeso ʉvɨlaga ndɨ miso, ʉbɨkya bɛ : « Igyonosi na ibunu mʉdɔngɔnɨ bɛyɔ bhaya kunu o mino. » 30 Miso kabʉ oukwikono ndɨ. Yeso ʉgbɨtyaga ndɨ bɛ : « Wiminyonito, mʉmbanzʉ gʉtʉgʉ bemoti aka kibhonitɔgʉ. » 31 Luki limoti, ngbingo yi nɨnɔ aka nɔ bopupo ndɨ mino, bapʉnga ndɨ kowowiso mongoni kʉgʉ ka Yeso kʉsɔ wa mugi mi nɨmɔ masɨ.
Yeso aukusini bobo
32 Ngbingo yi nɨnɔ balʉkʉ baba bi nɨbɔ baga ndɨ mino, badhulyoku ndɨ Yeso na bobo. Bobo yi nɨnɔ a ndɨ nɨ lɨlɨmba andungulyogini. 33 Yeso okpumyo ndɨ lɨlɨmba li nɨlɔ, bobo apʉnga kanzɨna. Bambaza ka bambanzʉ bombomboyo ndɨ kʉgbɛ, babɨkya bɛ : « Kʉsɔ wa mugi masɨ ma Ɨzɛlɛlɨ, takaninigʉ ndɛkɛ inguo ya lɨkpʉmʉka li nɨlɨ ! »
34 Luki limoti, Bafalisayɔ babɨkya ndɨ bɛ : « Ngama ka malɨmba nɔ apága ngu kokpumyo malɨmba. »
Yeso a no kumbu ka bambanzʉ
35 Yeso a ndɨ kolingyo bagʉdʉ no giyo yasɨ, anatɨwa kʉsɔ wa bandabʉ ba ya likungoni ka Bayudha. Anʉbɨkyaga bambanzʉ Mongoni Manza ma Bʉngama. Anoukuso bokolobu bayasɨ na bʉpɔ ba nzʉyɨ dhidhidhi.
36 Na ngbingo yi nɨnɔ Yeso ɨna ndɨ mino bambaza ka bambanzʉ, ukwilyo ndɨ kumbu. Ba ndɨ kaigyogyiso, bupini bɨdhapada mʉdɔngɔnɨ abhɛ bakɔndɔlɔ nɨbɔ bakɛgʉ na mububulyo.