Yeso akapá mʉtɨwɨ ko bhulyo ya kugwisiso na ya kʉpɨlya bɛngɛnɨ
17
1 Yeso ʉbɨkya babɨbya kakɨ bɛ : « Bopisi baɨgya bʉnyɛ kɛgʉ na nyɨka, luki limoti kumbu ka mʉtʉ yi nɨnɔ ulutogo bɛngɛnɨ kagya bʉnyɛ ! 2 Akwanana bɛ bakpɨkɨlɨ lɨtalʉ lakpʉ ko singasʉ, badɨkɨta ko libo lidhingi, ibha kulutonito batʉ ba bhaya yɨkɛdɛ katʉkya ko pisi ya bungbingbili. 3 Wiminyonito bɨnza :Kiko nɨ mamakʉ ugyilyini bʉnyɛ, muyoyisatʉ. Na kʉkʉnga mʉpɨlya, wapɨlya. 4 Kiko nɨ ugyilyini bʉnyɛ nganga madɨya na ɨka ka lɨsyɛ limoti, odhoku kaʉkʉnga mʉpɨlya nganga madɨya na ɨka gɔnɨ, wapɨlya. »
Bhaya akwanana kagya makpʉmʉka mʉmbanga-mbanga
5 Batʉtʉmbwa babɨkya Mombukwono dhosu bɛ : « Tɨmatɨlya bhaya kusu. »
6 Mombukwono dhosu igisyo bɛ : « Makiko bi na bhaya gʉtʉgʉ kanɨ a yɨkɛdɛ aka abhɛ maya ma agbɛdɛ-gbɛdɛ, makwanana bi kabɨkya sɨbhʉkʉsɔ si nɨsɨna bɛ : ‹ Mukuko, wikunoku ka lɨmbɛngɨ lo libo lidhingi, › Amʉmʉkanatʉ bi. »
Bagya-ligubho bakwanana kagya ɨkɨ ?
7 « Tovini mbɛyɨ abhɛ mʉtʉ bemoti lugo kunu a na mʉgya-ligubho bemoti nɨnɔ akpɔgɔ botiko ikanɨ ubuulyogo bambaza ka banyama. Ngbingo yi nɨnɔ mʉgya-ligubho igogoku mino ko tiko, akwananatʉ kabɨkya bɛ : ‹ Dhoku bɨtwa kalyalya › ? 8 Kalɨ, luki limoti abɨkya bɛ : ‹ Ɨmbambɨlya malɨlɨ, kumbuso yi wigomosyono botu, wodhoku kegugubhyo ko ngbingo yi nɨnɔ niko mino kalyalya na komwo. Kumbuso yi wakwanana kʉwa gɔnɨ ɨwɛ kalyalya na komwo. › 9 Abhibhiso ndɨ mʉgya-ligubho kakɨ kyɛ a ndɨ nɨ ogyini nɨlɔ akpamya ndɨ ? Haaa, gʉtʉgʉ iki yi aka. 10 A mʉdɔngɔnɨ abhɛ ibunu gɔnɨ : ngbingo yi nɨnɔ mogyini mino masɨ nɨmɔ Kunzi amʉkpamyaga, bikyoni ambɛ : ‹ Ta bagya-ligubho aka, togyi ligubho nɨlɔ aka lɔ kusu. › »
Yeso uukusini bakebu-kebu tɛkɛbɛ
11 Ngbingo yi nɨnɔ Yeso a ndɨ mino kaɨnda miso ka Yelusalɛma, abyɛ ndɨ lugo wa mʉlɨlɨ ma iwili ya Samalia na Galilaya. 12 Nɨyɔ a kʉwa ndɨ buwobhi kosilo ka mugi mimoti bɛnɛ, bakebu-kebu tɛkɛbɛ bakpudoku ndɨ. Bamaga ndɨ byɨ na ɨyɨ, 13 bapʉnga kapamɨkanaga bɛ : « Muwonisili, Yeso aaa, kikiliki tikwilyanɔ baka kumbu ! »
14 Yeso ʉmɨna ndɨ, ʉbɨkya bɛ : « Windoni kʉ bokumu bo mino bamʉkpɨmɨ nzʉyɨ.a »
Ngbingo yi nɨnɔ ba ndɨ mino kaɨnda aka nɔ, baʉka. 15-16 Nɨyɔ mʉmbanzʉ bemoti lugo kabʉ nɨnɔ a sɛ ndɨ ɨyɨ muSamalia ɨna bɛ oukini, igoku ndɨ ka Yeso anabhibhiso Kunzi na lɨyʉ lapʉ. Ogwo ndɨ mokpukpu kambwa kakɨ, amigisyo ɨbhɨbha. 17 Kʉwa wa Yeso abɨkya bɛ : « Kɛgʉ bambanzʉ basɨ tɛkɛbɛ bɔ bouki ? Nɨbɔ bagɔgɔ kʉbɔmʉ ba sɛ kʉwa yanɨ ? 18 Lugo kabʉ basɨ, kɛgʉ na mʉtʉ gʉtʉgʉ bemoti aka nɨnɔ igiku kabɨkya bɛ : ‹ Kunzi avɨ ɨbhɨbha ›, kiki asɨ mʉbyɨ yi aka nɨmʉ. » 19 Kumbuso yi, Yeso abɨkya muSamalia bɛ : « Wamaga, waga. Bhaya kakʉ uukusini. »
Bʉngama ko Kunzi a lugo kunu
20 BaFalisayɔ bamuuso ndɨ Yeso bɛ : « Bʉngama ko Kunzi odhoku pɨyɛ ndɛkɛ ngbingo tino ? »
Umigisyo bɛ : « Bʉngama ko Kunzi kɛgʉ kodhoku abhɛ luki la kimibhisikoso. 21 Bakabɨkyɨgʉ ndɛkɛ bɛ : ‹ Winoni, ibu nɨba ! › ikanɨ ‹ Ibu nɨbɔ kʉʉ ! › Ka lɨngʉnʉ, Bʉngama ko Kunzi a lugo kunu. »
Lɨsyɛ li nɨlɔ mika Mʉmbanzʉ odhoku ndɛkɛ mino
22 Kumbuso yi Yeso ʉbɨkya babɨbya kakɨ bɛ : « Ngbingo wagɔ odhokuto ndɛkɛ nɨnɔ miko mino na mʉsasa kamɨna Mika mʉmbanzʉ gʉtʉgʉ ko ngbingo mʉkɛdɛ aka, luki limoti makamɨnɨgʉ. 23 Bambanzʉ bamʉbɨkya ndɛkɛ bɛ : ‹ A kʉʉ ! › ikanɨ ‹ A wanʉ ! ›, luki limoti makindonitɔgʉ kʉ, makubyonitɔgʉ mbangʉ kʉ bɛyɔ. 24 Ka lɨngʉnʉ, lɨsyɛ li nɨlɔ Mika mʉmbanzʉ odhoku ndɛkɛ mino, iko ndɛkɛ mʉdɔngɔnɨ abhɛ ngbangbata kangɨnana. Mʉdɔngɔnɨ bɛgɛyɔ ngbangbata angɨnanaga mino katʉkya ka mulibo ma ɔbɨlɨ na kadhwɛ ka magɔgɔ, bambanzʉ bamɨna ndɛkɛ Mika mʉmbanzʉ bɛgɛyɔ ka lɨsyɛ nɨlɔ opuponoku ndɛkɛ mino. 25 Luki limoti okwononi bɛ Mika mʉmbanzʉ igyogyisi mbɛyɨ kʉgbɛ, batʉ ba lɨsyɛ li nɨlɨna bambimbo. 26 Mʉdɔngɔnɨ bɛgɛyɔ igyonoso ndɨ mino ko ngbingo ka Nʉa, iko ndɛkɛ bɛgɛyɔ ngbingo yi nɨnɔ Mika mʉmbanzʉ odhoku ndɛkɛ mino. 27 Bambanzʉ bikogo ndɨ kalyalya, banomwo, banavanana kadhwɛ ko ngbingo yi nɨnɔ Nʉa ogulyo ndɨ mino kʉsɔ wa ɨngbɔlɔ yidhingi kʉgbɛ. Kʉwa wa tumo odhoku ndɨ bɨyakpa na bambanzʉ basɨ nɨbɔ bakɛgʉ ndɨ kʉsɔ wa ɨngbɔlɔ bolumwogo ndɨ. 28 Na bata a mʉdɔngɔnɨ bɛgɛyɔ igyonoso ndɨ mino ko ngbingo ka Lɔtɨ. Bambanzʉ bikogo ndɨ kalyalya, banomwo, banaluwo na banagabha makpʉmʉka, banadhɨma botiko na banopiko bandabʉ. 29 Luki limoti lɨsyɛ li nɨlɔ Lɔtɨ opupo ndɨ mino ka Sɔdhɔmʉ, Kunzi olukuso ndɨ buku na matamʉ mongido-ngido katʉkya kʉgʉ wa lɨsyɛ abhɛ mbwayɨ, ulumwisogo ndɨ bambanzʉ basɨ. 30 Igyonoso ndɛkɛ mʉdɔngɔnɨ bɛgɛyɔ ka lɨsyɛ li nɨlɔ Mika mʉmbanzʉ igoku ndɛkɛ mino kʉsɔ wa ɨbhɨbha kakɨ.
31 Ka lɨsyɛ li nɨlɔ, mʉmbanzʉ nɨnɔ ikogo ndɛkɛ kunzi, kingyigʉ ndɛkɛ bata ka ndabʉ kakɨsa mukumbo kakɨ. Mʉdɔngɔnɨ abhɛ mʉtʉ yi nɨnɔ ikogo ndɛkɛ ko tiko kakwananɨgʉ ndɛkɛ bata kaɨga kʉ kakɨ. 32 Eee, tomomoni sɛ nɨlɔ asilyo ndɨ muko Lɔtɨe.b 33 Mʉtʉ yi nɨnɔ akɨsaga kabuulyo ɔbɨlɨ kakɨ, aputikosotʉ ndɛkɛ; luki limoti mʉtʉ yi nɨnɔ aputikosogo ɔbɨlɨ kakɨ, abuulyogotʉ ndɛkɛ. 34 Nakamʉbɨkya bɨngbanganya ambɛ ko bhiti ya lɨsyɛ li nɨlɔ, bambanzʉ baba bikogo ndɛkɛ bakanga ka kanga imoti : Kunzi ava ndɛkɛ bemoti, asa nagɔgɔ. 35 Boko baba bikogo ndɛkɛ kadhwa mʉpʉnga pa imoti : bava ndɛkɛ bemoti, basa nagɔgɔ. 36 [ Balʉkʉ baba bikogo ndɛkɛ kagya ligubho ko tiko : bava ndɛkɛ bemoti, basa nagɔgɔ.c] »
37 Babɨbya bamuuso ndɨ Yeso bɛ : « Mombukwono dhosu, makpʉmʉka mi nɨmɔ igyonoso ndɛkɛ yanɨ ?d »
Yeso umigisyo bɛ : « Ngbingo yi nɨnɔ manda ma nyama ikogo mino ka pa imoti bɛnɛ, bombu basɨ nɨbɔ balyaga makɔlɔ bamʉmʉkanaga wa gɔ wa. »