Wanɨ nɔ a mʉtʉ wa ɨzangɨya ka Bʉngama ba kʉgʉ wa lɨsyɛ ?
18
1 Ko ngbingo yi nɨnɔ aka nɔ, babɨbya ka Yeso bakpudoku ndɨ, bamuuso bɛ : « Kʉsɔ wa bʉngama ba kʉgʉ wa lɨsyɛ, wanɨ nɔ a mʉtʉ wa ɨzangɨya ? »2 Yeso amaka kʉwa ndɨ miki mʉkɛdɛ, amomoso lugo kabʉ. 3 bɨkya ndɨ bɛ : « Nakamʉbɨkya lɨngʉnʉ, kiko nɨ mokoikonigʉ, na miko mʉdɔngɔnɨ abhɛ bomiki bakɛkɛkɛ, makingyigʉ ndɛkɛ kʉsɔ wa Bʉngama ba kʉgʉ wa lɨsyɛ. 4 Kiko nɨ mʉmbanzʉ isisini, iko mʉdɔngɔnɨ abhɛ miki mʉkɛdɛ yi nɨmʉ, ɨyɨ nɔ iko banʉ mudhingi ka Bʉngama ba kʉgʉ wa lɨsyɛ. 5 Na kiko nɨ mʉmbanzʉ atilyini miki mʉkɛdɛ mʉdɔngɔnɨ abhɛ nɨmʉ ko lino kamɨ, etilyi ɨmɨ bɨkpɛ.
Mʉtʉʉ kʉgʉ wa bʉnyɛ
6 « Luki limoti, mʉmbanzʉ kamakya bemoti ka bomiki nɨbana bɛbɨnɨkyana ba ka bʉnyɛ, iko bi bɨnza bɛ bakpɨkɨlɨ lɨtalʉ lakpʉ ko singasʉ na badɨkɨta ko libo lidhingi bikudhumu. 7 Kumbu ka ɔbɨlɨ ! Bopisi a bayakpʉ kogwo ka bʉnyɛ ! Ka lɨngʉnʉ, a bɨnza bɛ bopisi ba kugwakʉ ikito. Luki limoti, kumbu ka mʉmbanzʉ nɨnɔ odhwonosogo !
8 « Kiko nɨ kʉbɔkʉkɔ ikanɨ kʉgʉkɔ kakʉ umokyini ka bʉnyɛ, kɔ na wombimbo byɨ ! A bɨnza kʉ kakʉ kogulyo ka ɔbɨlɨ wa lɨngʉnʉ nɨ wa kʉbɔkʉkɔ kumoti ikanɨ na mʉdɨlɨ. Ka lɨngʉnʉ, kɛgʉ bɨnza kogulyo kʉ na mabɔkʉ ikanɨ magʉ masɨ, na bumbimbo ko buku ba bɛnzɛ na bɛnzɛ. 9 Na kiko nɨ liso umokyini ka bʉnyɛ, muko na wombimbo byɨ ! A bɨnza kʉ kakʉ kogulyo ka ɔbɨlɨ wa lɨngʉnʉ nɨ wa no liso limoti aka. Ka lɨngʉnʉ, kɛgʉ bɨnza kogulyo kʉ no miso masɨ, na bumbimbo ko buku nɨbɔ kolimikigʉ ndɛkɛ.
Lizuni ka kɔndɔlɔ nɨnɔ obungogo ndɨ
10 « Wiminyonito, makaminonitɔgʉ gʉtʉgʉ bemoti ka bomiki bi nɨba payaya ! Ka lɨngʉnʉ, nakamʉbɨkya ambɛ bamalaika kabʉ nɨbɔ kʉgʉ wa lɨsyɛ ba masyɛ masɨ buwobhi na Bhabha. [ 11 Mika Mʉmbanzʉ odhoku ndɨ ka ɔbɨlɨ kauukuso nɨbɔ bobungogo ndɨ.]
12 « Makatamanaga bʉ ? Kiko nɨ mʉmbanzʉ a mbɛɨ na bakɔndɔlɔ mɨya, bemoti obungogo. Ambɛ, kʉsɨgʉ mbɛɨ batɛkɛ kʉbɔmʉ na kʉbɔmʉ ka ngʉpa, aga kakɨsa nɨnɔ bemoti obungogo ndɨ ?
13 « Nakamʉbɨkya lɨngʉnʉ ambɛ, ngbingo nɨnɔ amɨna mino, ogwo magyagya kʉgbɛ, kakɨtaga bɛyɔ ikogo mino na magyagya ka nɨbɔ bakɔndɔlɔ batɛkɛ kʉbɔmʉ na kʉbɔmʉ, nɨbɔ bakobungogʉ ndɨ. 14 A mʉdɔngɔnɨ bɛgɛyɔ, Obhonu nɨnɔ kʉgʉ wa lɨsyɛ kapagɨgʉ bɛ gʉtʉgʉ bemoti aka ka bomiki nɨbana obungogi.
Kapá mʉmbanzʉ nɨnɔ ogyi bʉnyɛ mʉtʉʉ
15 « Kiko nɨ mamakʉ ugyilyini bʉnyɛ, wɨnda kamɨna, miko ibunu na ɨyɨ aka. Na kiko nɨ umukonini, mɨgɨlya kʉwa bata yʉkanana. 16 Luki limoti, kiko nɨ kumukonigʉ, mʉva mʉtʉ wagɔgɔ bemoti ikanɨ batʉ baba, kyɛ ‹ lɨkpʉmʉka imibhisikosi lɨngʉnʉ kambwa ka badhɛmʉ baba ikanɨ basaa. › a 17 Kiko nɨ okyini kaʉmʉkana, wɨnda katʉmbʉlaga ka kanisa. Kakya gɔnɨ kamʉkana kanisa, wava abhɛ mʉtʉ nɨnɔ kamibhigʉ Kunzi na mʉgya manyɛ abhɛ bandɔmbɛ ba manzanza.
18 « Nakamʉbɨkya lɨngʉnʉ, lasɨ nɨlɔ makandɨla ndɛkɛ ka ɔbɨlɨ, ɨkandɨlatʉ ndɛkɛ gɔnɨ kʉgʉ wa lɨsyɛ. Na lasɨ nɨlɔ makʉla ndɛkɛ ka ɔbɨlɨ, ɨkʉlatʉ ndɛkɛ kʉgʉ wa lɨsyɛ bɛgɛyɔ.
19 « Nakamʉbɨkya bata ka lɨngʉnʉ, kiko nɨ batʉ baba lugo kunu ka ɔbɨlɨ bukononini kakʉnga lasɨ, Bhabha nɨnɔ kʉgʉ wa lɨsyɛ ʉpátʉ luki li nɨlɔ. 20 Ka lɨngʉnʉ, pa nɨyɔ batʉ baba ikanɨ basaa bomumukoni mino ko lino kamɨ, ɨmɨ, na wa lugo kabʉ. »
Bhɨbhʉ ka mʉgya-ligubho nɨnɔ akya ndɨ kapɨlya
21 Kʉwa wa, Pɛtɛlɛ akpʉda ndɨ Yeso, amuuso bɛ : « Mombukwono dhosu, kiko nɨ mika-mama egyilyini bʉnyɛ, nakwanana kapɨlya kadhwɛ nganga yɨnga ? Kadhwɛ nganga madɨya na ɨka ? » 22 Yeso asikisyo ndɨ bɛ : « Nakaʉbɨkya ambɛ, kɛgʉ asɨ kadhwɛ nganga madɨya na ɨka aka. Luki limoti, nganga batɛkɛbɛ madɨya na ɨka nganga madɨya na ɨka.
23 « Kinili, likingyosi la Bʉngama ba kʉgʉ wa lɨsyɛ a mʉdɔngɔnɨ abhɛ ngama bemoti, nɨnɔ a ndɨ kapa bɛ bagya-ligubho kakɨ babɨkyɨ ɨsabʉ ya bolubu kabʉ. 24 Ngbingo yi nɨnɔ apʉnga ndɨ mino kaumuusogo, badhulyoku ndɨ na bemoti nɨnɔ a ndɨ no lubu wo buyi bakpʉ kʉgbɛ.
25 « Mʉgya-ligubho yi nɨnɔ kɛgʉ ndɨ no pisi yɨkalya lubu yi nɨnɔ. Mombukwono dhakɨ akpamya ndɨ bɛ bagabhɨ, pa imoti na mukakɨ, bomikakɨ na makpʉmʉka kakɨ masɨ, kadhwɛ kʉ kwa kʉ igiso mino lubu kakɨ.
26 « Mʉgya-ligubho yi nɨnɔ obuno ndɨ moli kambwa ka mombukwono dhakɨ, abɨkya bɛ : ‹ Ɨpɨlyanɔ baka ! Nakalyatʉ lubu kakʉ wasɨ. › 27 Mombukwono dhakɨ akwilyo ndɨ kumbu. Asa lubu yi nɨnɔ, akpamya ndɨ bɛ aga.
28 « Ngbingo yi nɨnɔ opupo ndɨ mino, babhangana na dhakɨ mʉgya-ligubho. Dhakɨ mʉgya-ligubho yi nɨnɔ a ndɨ no lubu kakɨ mʉkɛdɛ wa bambuma mɨya. Kʉwa wa, agwi ndɨ, ambɨmbɨta ko singasʉ bɨmbɨtɨtɨ, abɨkya ndɨ bɛ : ‹ Ɨkalya makpʉmʉka kamɨ ! ›
29 « Dhakɨ mʉgya-ligubho yi nɨnɔ obuno ndɨ moli kambwa kakɨ. Abɨkya bɛ : ‹ Ɨpɨlyanɔ baka ! Nakalyatʉ makpʉmʉka kakʉ. ›
30 « Luki limoti, akya ndɨ. Aga kamokyisiso dhakɨ nɨnɔ ka ndabʉ ya ligbito, kadhwɛ ko ngbingo nɨnɔ akalya ndɛkɛ mino lubu yi nɨnɔ.
31 « Ngbingo yi nɨnɔ bawai dhakɨ bagya-ligubho bɨna ndɨ mino bɛyɔ, mambɛngɨ ʉtʉla ndɨ kʉgbɛ, baga katʉmbʉlyaga mombukwono dhabʉ masɨ nɨmɔ okitonogi bi.
32 Kʉwa wa, mombukwono dhabʉ amaka ndɨ mʉgya-ligubho yi nɨnɔ, ɨyɨ aka na ɨyɨ bɛ : ‹ Wa mʉgya-ligubho wanyɛ ! Ngbingo yi nɨnɔ wɨtatanaga ndɨ mino na ɨmɨ bɛ nʉpɨlyɨ lubu kakʉ, nʉpɨlyatʉ ndɨ ka masɨ. 33 Ɨwɛ, wakakwananɨgʉ bi kapɨlya dhakʉ mʉgya-ligubho, mʉdɔngɔnɨ bɛyɔ ɨmɨ nʉpɨlya ndɨ mino ? ›
34 Lɨmbɛngɨ akandɨkanaga kʉwa ndɨ mombukwono dhakɨ bɨsʉlʉ-sʉlʉ. Asʉta ndɨ alʉkʉ nɔ bɛ bagyagyɨ kadhwɛ kʉ kwa kʉ akalya ndɛkɛ mino makpʉmʉka kakɨ masɨ. »
35 Yeso abɨkya ndɨ bata bɛ : « Bhabha nɨnɔ a kʉgʉ wa lɨsyɛ amʉgya ndɛkɛ bɛgɛyɔ, kiko nɨ bemoti kunu kɛgʉ kapɨlya mamakɨ na lɨmbɛngɨ kakɨ lasɨ. »