Mʉtʉʉ ka Yeso ko bhulyo yibuno ndʉwa
(Malɨkɔ 10:1-12)
19
1 Ngbingo yi nɨnɔ Yeso ama ndɨ mino kabɨkyaga makpʉmʉka mi nɨmɔ, atʉkya ndɨ kʉ ka iwili ya Galilaya. Ɨnda kʉwa ndɨ ka iwili ya Yudhɛa kʉsyakʉ wo libo Yɔlɔdhanɨ. 2 Bambaza budhingi ka bambanzʉ babɨbya ndɨ. Kʉ bɛyɔ, uukuso nɨbɔ ba ndɨ na bokolobu.3 Kʉwa wa, Bafalisayɔ bemoti-bemoti bakpudoku ndɨ kakɨngɨlaga, bamuuso ndɨ bɛ : « Ambɛ, mʉtʉʉ kusu akpamyatʉ mʉlʉkʉ kasikiso mukakɨ ko bhulyo ya bʉnyɛ basɨ ? »
4 Yeso usikisyo ndɨ bɛ : « Makanotongulogigʉ ndɛkɛ ibunu bɛ katʉkya ka mʉpʉnganagɨ ‹ Kunzi agya ndɨ mʉlʉkʉ na muko ? › a 5 Kumbuso yi, abɨkya ndɨ bɛ : ‹ Kinili, mʉlʉkʉ asaga ndɛkɛ abhakɨ na amakɨ. Bavanana na mukakɨ, ɨbʉ basɨ baba bɨɨta kʉwa nzʉyɨ yimoti. › +\fr 19:5 Mʉpʉnganagɨ 2:24 6 Kʉwa wa, bakikigʉ bata baba, luki limoti, nzʉyɨ yimoti. Yɛkɨ a bɛyɔ, mʉmbanzʉ kogbonosonito lasɨ nɨlɔ Kunzi amatana. »
7 Bafalisayɔ bamuuso bata ndɨ bɛ : « Ko bhulyo ɨkɨ Musa akpamya ndɨ bɛ mʉlʉkʉ akwanana kapá mukakɨ bhalʉa mubuno ndʉwa kambwa kasikiso ? »
8 Yeso usikisyo ndɨ bɛ : « Musa amʉkpamyaga ndɨ kausikiso boko kunu bɛyɔ ko bhulyo ya mambɛngɨ mapʉ kunu. Luki limoti, ka mʉpʉnganagɨ kabɨkyagʉ ndɨ bɛyɔ. 9 Nakamʉbɨkya ambɛ, kiko nɨ mʉmbanzʉ akpumyini mukakɨ nɨ kagwigʉ ka bɨlya, ava wagɔgɔ, mʉlʉkʉ yi nɨnɔ ogyini bɨlya. »
10 Kʉwa wa, babɨbya ka Yeso babɨkya ndɨ bɛ : « Kiko nɨ mʉtʉʉ a bɛyɔ kʉgʉ ka mʉlʉkʉ na mukakɨ, kɛgʉ nɛkɨ bɨnza kavanana ! »
11 Yeso usikisyo ndɨ bɛ : « Bambanzʉ basɨ bakakwananɨgʉ kaʉkana mʉtʉʉ mi nɨma. Kiki nɨbɔ aka bɔ Kunzi ʉpʉnaga ndɨ. 12 Kabyɛnɛnɛ na nɨyɔ, bambanzʉ bemoti-bemoti bakakwananɨgʉ kavanana, kyɛ bɨbʉkʉta ndɨ ɨbʉ bɛyɔ aka yɔ. Bagɔgɔ kyɛ bambanzʉ bɔ bʉgya ndɨ bɛ bakobukutonitɔgʉ ɨbʉ. Na bagɔgɔ nɨbɔ bakakwananɨgʉ kavanana ko bhulyo ya bʉngama ba kʉgʉ wa lɨsyɛ. Nɨnɔ akwanana kaʉkana mʉtʉʉ mi nɨma ʉkana. »
Yeso udukilyini bomiki bʉbʉnga
13 Kʉwa wa, bambanzʉ badhulyoku ndɨ Yeso na bomiki. Bagya ndɨ bɛyɔ kyɛ Yeso ubhisilyi mabɔkʉ na kaʉlʉmbɨlya. Luki limoti, babɨbya kakɨ bʉnyakɨlya ndɨ batʉ nɨbɔ. 14 Yeso ʉbɨkya kʉwa ndɨ babɨbya kakɨ bɛ : « Usoni bomiki bodhuku kʉ kamɨ na makukpingbonitɔgʉ. Ka lɨngʉnʉ, bʉngama ba kʉgʉ wa lɨsyɛ a ko bhulyo ka nɨbɔ ba mʉdɔngɔnɨ abhɛ ɨbʉ. »
15 Kʉwa wa, Yeso ubhisilyo ndɨ bomiki bi nɨbɔ mabɔkʉ. Kumbuso yi, atʉkya ndɨ wa.
Mʉwanza bemoti wa lɨngama bakanzɨna na Yeso
16 Kʉwa wa, mʉwanza bemoti adhulyoku ndɨ Yeso, amuuso bɛ : « Muwonisili, bʉnza tino bɔ nakwanana kagya, kyɛ ninisoni na ɔbɨlɨ wa bɛnzɛ na bɛnzɛ ? »
17 Yeso asikisyo ndɨ bɛ : « Ko bhulyo ɨkɨ yɔ wo mino kemuuso kʉgʉ wa bʉnza ? Ka lɨngʉnʉ, mʉtʉ bemoti aka nɔ a wanza ! Wakapa kogulyo ka ɔbɨlɨ wa bɛnzɛ na bɛnzɛ, byɛgɛ mʉtʉʉ. »
18 Mʉwanza nɔ amuuso kʉwa ndɨ Yeso bɛ : « Mʉtʉʉ tino ? »
Yeso asikisyo ndɨ bɛ : « Wakamwɔnitɔgʉ mʉmbanzʉ, wakogyonitɔgʉ bɨlya, wakibonitɔgʉ, wakabukulyogonitɔgʉ mʉmbanzʉ lɨkpʉmʉka. 19 Mʉbanga abhakʉ na amakʉ na mʉpa mamakʉ mʉdɔngɔnɨ bɛyɔ wɨpaga mino ɨwɛ mombukwono dhakʉ. o »
20 Mʉwanza nɔ abɨkya ndɨ bɛ : « Nabyɛgɛ mʉtʉʉ mi nɨmɔ masɨ. Ɨkɨ bata yɔ esikyoni ? »
21 Yeso abɨkya kʉwa ndɨ bɛ : « Wakapa kaiko wanza, waga na wagabha makpʉmʉka kakʉ masɨ. Na buyi bi, ʉlʉpyaga batʉ ba yangya. Kʉwa wa, wiko wanibhisilyo lɨngama kʉgʉ wa lɨsyɛ. Kumbuso yi, wodhoku kɛbɨbya. »
22 Nɨyɔ mʉwanza nɔ ʉkana ndɨ mino bɛyɔ, atʉkya ndɨ wa nɨ analya kumbu kyɛ a ndɨ na lɨngama lakpʉ kʉgbɛ.
23 Kʉwa wa, Yeso ʉbɨkya ndɨ babɨbya kakɨ bɛ : « Nakamʉbɨkya lɨngʉnʉ, ambɛ : ‹ A yapʉpʉ kʉgbɛ mʉtʉ wa lɨngama kogulyo ka bʉngama ba kʉgʉ wa lɨsyɛ ! › 24 Nakamʉbɨkya bata ambɛ : ‹ A yopoli ka ngamiya kakɨtanaga ka ngala ya mʉsada. Luki limoti, a bata yapʉpʉ kʉgbɛ mʉtʉ wa lɨngama kogulyo ka bʉngama ko Kunzi ! › »
25 Ngbingo yi nɨnɔ babɨbya bʉkana ndɨ mino bɛyɔ, bombomboyo ndɨ kʉgbɛ. Bimuuso kʉwa ndɨ bɛ : « Kiko nɨ a bɛyɔ, wanɨ sɛ kʉwa nɔ akwanana kaʉka ? »
26 Yeso ʉnda ndɨ bizumuuu, ʉbɨkya bɛ : « Ka bambanzʉ, nɨlɔ kakwananɨgʉ. Luki limoti, ko Kunzi, masɨ akwananatʉ. »
27 Kʉwa wa, Pɛtɛlɛ abɨkya ndɨ bɛ : « Ibusu, tosoni ndɨ masɨ kaʉbɨbya. Tinisono kʉwa ndɛkɛ ibusu na ɨkɨ ? »
28 Yeso usikisyo ndɨ bɛ : « Ka lɨngʉnʉ nakamʉbɨkya ibunu nɨbɔ mɛbɨbya ndɨ : ka ɔbɨlɨ wa mbɨya, ngbingo yi nɨnɔ Mika Mʉmbanzʉ iko ndɛkɛ mino ko kiti kakɨ wa ɨbhɨbha, ibunu miko ndɛkɛ gɔnɨ bakikonono ko bokiti tɛkɛbɛ na baba. Miko ndɛkɛ kakɔ mʉngɨmbɔ mo giyo tɛkɛbɛ na baba ka Baɨzalɛlɨ.
29 « Na mʉmbanzʉ wasɨ kasa ndɨ ndabʉ kakɨ, ikanɨ bamamakɨ, abhakɨ, amakɨ, bomikakɨ, ikanɨ tiko kakɨ ko bhulyo kamɨ, inisonotʉ ndɛkɛ bata nomu nganga mɨya imoti kakɨtaga. Na inisono gɔnɨ na ɔbɨlɨ wa bɛnzɛ na bɛnzɛ. 30 Luki limoti, budhingi nɨbɔ ba ka mambwa mbɨya wanʉ, biko ndɛkɛ kumbuso. Na budhingi nɨbɔ ba kumbuso mbɨya wanʉ, biko ndɛkɛ ka mambwa.