Kɔndɔlɔ nɨnɔ obungogo ndɨ inisonini bata
15
1 Lɨsyɛ limoti, bandɔmbɛ ba manzanza na batʉ bagɔgɔ ba yɨgya-yanyɛ basɨ bakpudoku ndɨ Yeso kamʉkana. 2 Luki limoti baFalisayɔ na bowonisili ba mʉtʉʉ ka Musa bapʉnga ndɨ kaɨnzɨnzɨnya, banabɨkya bɛ : « Alʉkʉ yi nɨmʉna akaʉtɨlya na kalyalya na batʉ ba yɨgya-yanyɛ ! » 3 Yeso utulyoku kʉwa ndɨ lizuni li nɨlɨ :4 « Mʉtʉ bemoti lugo kunu kiko na bakɔndɔlɔ mɨya, bemoti lugo kabʉ obungogo, kakwananɨgʉ kaʉsa nɨbɔ batɛkɛbɛ kʉbɔmʉ na kʉbɔmʉ bɔ kʉ ka ɨsa, aga kakɨsa nɨnɔ iko nɨ obungogini bi kadhwɛ kʉ kwa kʉ aminoku mino ? 5 Ngbingo yi nɨnɔ amɨna mino, ogwo magyagya kʉgbɛ. Abhɨnɨka ka mambɨga. 6 Kumbuso yi ɨga kʉ kakɨ, ʉmaka bawai dhakɨ na bapɨmbanɨ kakɨ, ʉbɨkya bɛ : ‹ Dhoniku kogwo magyagya pa imoti na ɨmɨ kyɛ naminini kɔndɔlɔ kamɨ nɨnɔ obungogo ndɨ ! › 7 Nakamʉbɨkya ambɛ a mʉdɔngɔnɨ bɛgɛyɔ mʉtʉ wanyɛ oikosogo mino ɔbɨlɨ kakɨ. Kunzi ogwogo magyagya kʉgbɛ kakɨtaga nɨmɔ ikogo nomu ka batʉ banza batɛkɛbɛ kʉbɔmʉ na kʉbɔmʉ nɨbɔ bakɛgʉ no nzoi yi ikoso ɔbɨlɨ kabʉ. »
Lɨfalanga nɨlɔ obungo ndɨ inisonini bata
8 Yeso abɨkya kʉwa wa bɛ : « Kiko nɨ muko bemoti a na bambuma tɛkɛbɛ, bemoti yi obungo, kakwananɨgʉ katʉna tala, akpaga ndabʉ, akɨsa bɨwɛsɛɛɛ kadhwɛ kʉ kwa kʉ aminoku mino ? 9 Ngbingo yi nɨnɔ amɨna mino, ʉmaka bawai dhakɨ na bapɨmbanɨ kakɨ ʉbɨkya bɛ : ‹ Dha mogwini ɨgyagya pa imoti na ɨmɨ kyɛ naminini ambuma yi nɨnɔ ebungi bi ! › 10 Nakamʉbɨkya ambɛ a mʉdɔngɔnɨ bɛgɛyɔ : Kunzi na bamalaika kakɨ bogwogo magyagya mudhingi ko bhulyo ka mʉtʉ wanyɛ gʉtʉgʉ bemoti aka nɨnɔ oikosogo ɔbɨlɨ kakɨ. »
Miki nɨnɔ obungogo ndɨ iginiku ka abhakɨ
11 Yeso opipiloku na lizuni li nɨlɨ : « Mʉtʉ bemoti a ndɨ no bomiki balʉkʉ bi baba. 12 Mupipilo abɨkya abhakɨ bɛ : ‹ Bhabha, ipoku ɨmɨ mukumbo ma lisimo li la kamɨ nɨmɔ bakwanana ndɛkɛ kɛpá nɨ wokwini. › Kʉwa wa bhabha agbananaga ndɨ mukumbo kakɨ lugo ka bomikakɨ baba bi nɨbɔ. 13 Kumbuso wa masyɛ makɛdɛ, mupipilo agabha masɨ nɨmɔ bapá ndɨ mɔ, aga ndɨ no buyi bi ka mugi mimoti ma byɨ. Kʉ bɛyɔ, apʉta ndɨ buyi kakɨ basɨ, anakpakyana gbalɨ. 14 Nɨyɔ ama kagabha buyi basɨ gbalɨ, ayʉndɨ mudhingi ogulyo ndɨ ka mugi mi nɨmɔ, apʉnga ndɨ ka yangya ka makpʉmʉka masɨ. 15 Ogulyo ndɨ ligubho ka mʉtʉ bemoti wa mugi mi nɨmɔ. Mʉlʉkʉ yi nɨnɔ atɨka ndɨ ko tutu kaubuulyogo bangʉya kakɨ. 16 Ikogotʉ ndɨ gɔnɨ na mʉsasa kalya malɨlɨ nɨmɔ bangʉya balyaga ndɨ mɔ, luki limoti kɛgʉ gʉtʉgʉ ndɨ na mʉtʉ bemoti aka nɨnɔ akwanana ndɨ kapá yi.
17 Kʉwa wa apʉnga ndɨ koikosogo lɨmbɛngɨ. Ɨyɨ aka bɛ : ‹ Bagya ligubho nɨbɔ ka bhabha balyalyaga bɨnza, na ba na malɨlɨ mudhingi kakɨtaga ! Luki limoti, ɨmɨ na sɛ kʉwa ɨmɨ kokwo na nza kʉnʉ ! 18 Nakaɨga kʉ ka bhabha, nabikyoku ambɛ : « Bhabha, nogyoni ndɨ bʉnyɛ ko miso ko Kunzi na ko miso kakʉ. 19 Nakokwononigʉ bata ambɛ ɨmaka bɛ mikakʉ. Ɨva gʉtʉgʉ kʉwa asɨ abhɛ mʉgya-ligubho kakʉ bemoti aka bɛnɛ. » › 20 Kʉwa wa, ava ndɨ lɨgʉndʉ kaɨga kʉ ka abhakɨ.
Ngbingo yi nɨnɔ a mbɛyɨ ndɨ mino asɨ byɨ aka na mʉsɛngɨ, abhakɨ amɨna, amibho na akwilyo kumbu kʉgbɛ. Aga ndɨ mbangʉ katɨlya, aputito bipututu. 21 Kʉwa wa miki aka na ɨyɨ bɛ : ‹ Bhabha, ɨmɨ nogyoni ndɨ bʉnyɛ ko miso ko Kunzi na ko miso kakʉ, nakokwononigʉ bata ɨwɛ kɛmaka bɛ mikakʉ. › 22 Luki limoti nɨyɔ badhwɛ ka mʉsɛngɨ, abhakɨ ʉbɨkya bagya-ligubho kakɨ bɛ : ‹ Dhoniku na kutuko nɨkwɔ kwanza kʉgbɛ, mamokisyo mikamɨ. Mumokyoni pɛtɛ ka kpɛngbɛ, mamokisyogo bɛkpakʉ. 23 Dhoniku na ngɔmbɛ nɨnɔ wanvʉdʉ-nvʉdʉ, mamwɔ. Tolyolyini na togwo magyagya. 24 A bɛyɔ, mikamɨ nɨnɔ a ndɨ abhɛ kokwo mukwo, iginiku wapʉpʉ. A ndɨ nɨ obungogini, inisonini bata ! › Kʉwa wa, bapʉnga ndɨ dhumo.
25 Ko ngbingo yi nɨnɔ, pʉta a ndɨ ɨyɨ ka ligubho ko tiko. Nɨyɔ a kʉwa ndɨ kaigoku, adhwɛ buwobhi na mʉsɛngɨ, ʉkana kʉwa byɛmbɨ nɨbɔ ogwonono bɔ. 26 Amaka bemoti ka bagya-ligubho, amuuso bɛ lɨkpʉmʉka tino lɔ akakɨtanaga kʉnʉ. 27 Alʉkʉ nɔ asikisyo bɛ : ‹ Mamakʉ iginiku wapʉpʉ, kinili abhakʉ amwisisilyini ngɔmbɛ yi nɨnɔ wanvʉdʉ-nvʉdʉ. › 28 Kʉwa wa pʉta angbʉta ndɨ, akya kogulyo ka ndabʉ. Abhakɨ opupoku ndɨ kaɨtatanaga na ɨyɨ bɛ ogulyinɔ baka, 29 luki limoti miki asikisyo ndɨ abhakɨ bɛ : ‹ Hʉkana ! Ɨmɨ nikogo kaugugubhyo ka byanga budhingi, nakobunagʉ mʉtɨwɨ kakʉ gʉtʉgʉ lɨsyɛ limoti aka. Luki limoti wakɛpágʉ gʉtʉgʉ ɨmɨ mikya mɛmɨ aka bɛ togwi na ɨyɨ magyagya na bawai. 30 Luki limoti yɛkɨ mikakʉ nɨnɔ apʉta ndɨ buyi kakʉ na badanda igiku ɨyɨ, wamwɨlya ɨwɛ ngɔmbɛ nɨnɔ wanvʉdʉ-nvʉdʉ ! › 31 Abhakɨ asikisyo bɛ : ‹ Mikamɨ, ɨwɛ wikogo pa imoti na ɨmɨ masyɛ masɨ. Mukumbo kamɨ masɨ a makakʉ. 32 Luki limoti okwononi mbɛyɨ bi kalyiso dhumo aka na kogwo magyagya, kyɛ mamakʉ yi nɨmʉna wakamɨna mʉ, a kʉwa ndɨ abhɛ kokwo mukwo, luki limoti iginiku wapʉpʉ. A ndɨ nɨ obungogini, luki limoti inisonini bata ! › »