Yeso aukusini mʉtʉ wo kolobu ka lɨsyɛ la kimumbiso
14
1 Lɨsyɛ limoti la kimumbiso, Yeso ɨnda ndɨ kʉ ka ngama bemoti ka baFalisayɔ nɨnɔ amaka ndɨ kalyalya kʉ kakɨ. Bambanzʉ bi nɨbɔ ba ndɨ wa, ba ndɨ kanda Yeso bizumuuu bɛ bagwisiso no pisi tino. 2 Wɨna sɛ, alʉkʉ bemoti wo kolobu ya ngunde a ndɨ wakamaga kambwa ka Yeso wa. 3 Kʉwa wa, Yeso umuuso bowonisili ba mʉtʉʉ na baFalisayɔ bɛ : « Mʉtʉʉ kusu akpamyatʉ ikanɨ amʉyatʉ kaukuso mʉmbanzʉ ka lɨsyɛ la kimumbiso ? »4 Luki limoti badhakyana ndɨ biwo. Kʉwa wa Yeso avɨla ndɨ alʉkʉ nɔ, aukuso na abɨkya bɛ : « Wɨga kʉ kakʉ. » 5 Kumbuso yi Yeso ʉbɨkya ndɨ bowonisili ba mʉtʉʉ na baFalisayɔ bɛ : « Wanɨ nɔ lugo kunu, mikakɨ ikanɨ ngɔmbɛ kakɨ ogwini ka lɨbyɛ, kakwananɨgʉ kanyɔ bɨkwa gʉtʉgʉ ka lɨsyɛ la kimumbiso aka ?
6 Lɨkpʉmʉka li nɨlɔ ʉmbanga ndɨ kaigisyo.
Kunzi ʉbhɨnɨkaga batʉ bi nɨbɔ bisisogo
7 Yɛkɨ Yeso ɨnaga ndɨ bɛ batʉ nɨbɔ bʉmakaga ka malɨlɨ bakɨsaga kaiko ka moliki ma kambwa aka, ʉpá kʉwa ndɨ ɨbʉ basɨ mʉtɨwɨ mi nɨma : 8 Ngbingo yi nɨnɔ mʉmbanzʉ umoki mino ko dhumo wo vononi, wakikonitɔgʉ ka buliki ba kambwa. Kyɛ yagɔgɔ bamokito gɔnɨ mʉmbanzʉ wa ɨbhɨbha kaʉkɨtaga ɨwɛ. 9 Na mʉmbanzʉ yi nɨnɔ amumoki ibunu basɨ baba, akwanana kodhoku kaʉbɨkya bɛ : ‹ Mʉsɨlya mbɛyɨ alʉkʉ yi nɨmʉ buliki bi nɨba. › Wɨnda kʉwa wa kaiko ka buliki ba kumbuso mutumo no suni bɨdɛ. 10 Luki limoti, ngbingo yi nɨnɔ bumoki mino ko dhumo, wɨnda kaiko ka buliki ba kumbuso, ibha ngbingo yi nɨnɔ mombukwono dhumo odhoku mino, ʉbɨkyɨ nɨ ɨyɨ bɛ : ‹ Waia, dha wiki kʉnʉ kambwa. › Kʉwa wa, wiko na ɨbhɨbha kambwa ka bambanzʉ basɨ nɨbɔ mika na ɨbʉ kalyalya. 11 A bɛyɔ, mʉtʉ wasɨ nɨnɔ ɨbhɨnɨkaga, Kunzi asisogotʉ. Na nɨnɔ isisogo, Kunzi abhɨnɨkagatʉ. »
12 Kumbuso yi, Yeso abɨkya mʉtʉ yi nɨnɔ amaka ndɨ nɔ bɛ : « Ngbingo yi nɨnɔ wo mino kaʉmaka bambanzʉ kalyalya kʉ kakʉ na bʉsɔbɨ ikanɨ gʉtʉgʉ na bʉgɔgɔ aka, wakumokonitɔgʉ bawai dhakʉ, bamamakʉ, lɨvananza kakʉ, gʉtʉgʉ bapɨmbanɨ kakʉ aka nɨbɔ ba mukumbo. Kyɛ ɨbʉ bakwananatʉ gɔnɨ kaʉmaka ko ngbingo kabʉ iko kʉwa abhɛ bakʉkalyaga bi ka masɨ nɨmɔ upi bi. 13 Luki limoti, ngbingo yi nɨnɔ wo mino kalyisiso dhumo, hʉmaka bokwino, batʉ bakɨgyagya, nɨbɔ ba mʉdhɨlɨ na nɨbɔ ba bokolobu ba ya mamɔmɔ. 14 Wakagya bɛyɔ, Kunzi udukilyatʉ bʉbʉnga kyɛ ɨbʉ bakakwananɨgʉ kaumigisyo. Kunzi ʉkalya ndɛkɛ gɔnɨ ko ngbingo yi nɨnɔ batʉ basɨ nɨbɔ bagya ndɨ bʉnza babhɨlɨla ndɛkɛ mino. »
Yeso akatwa lizuni ko bhulyo ka batʉ bi nɨbɔ bʉmakaga ko dhumo
(Matayɔ 22.1-10)
15 Nɨyɔ bʉkana mʉnzɨna mi nɨmɔ bɛyɔ, mʉtʉ bemoti lugo ka nɨbɔ ba ndɨ kalyalya pa imoti na Yeso abɨkya bɛ : « Ɨgyagya ka mʉtʉ yi nɨnɔ alyalya ndɛkɛ ko dhumo nɨnɔ wa Bʉngama ko Kunzi ! »
16 Yeso amigisyo na lizuni li nɨlɨ : « Mʉtʉ bemoti alyisiso ndɨ dhumo mudhingi na ʉmaka ndɨ bambanzʉ budhingi. 17 Nɨyɔ ngbingo wa malɨlɨ a kʉwa ndɨ buwobhi kaɨtʉlyana, atɨka mʉgya-ligubho kakɨ kaʉbɨkyaga bambanzʉ basɨ nɨbɔ ʉmaka ndɨ bɛ bodhuku kyɛ ngbingo wa malɨlɨ itulyonini ! 18 Luki limoti ɨbʉ basɨ, yɨkaka-yɨkaka babɨkyaga ndɨ bɛ ʉpɨlyɨ. Mʉtʉ wa kambwa abɨkya mʉgya-ligubho nɔ bɛ abikyiku mombukwana dhakɨ bɛ : ‹ Noluwi bi tiko, okwononi bɛ naga mbɛyɨ bi kaɨnoku yi. Kikiliki, ɨpɨlyatʉ. › 19 Mʉtʉ nagɔgɔ abɨkya bɛ : ‹ Nuluwi bi bangɔmbɛ tɛkɛbɛa ko bhulyo ya ligubho lɨkpɔ tiko, nakaɨnda kaʉnda ikanɨ bakwananatʉ kagya ligubho li nɨlɔ. Nukungi ambɛ kikiliki, ɨpɨlyatʉ baka. › 20 Mʉtʉ nagɔgɔ bata abɨkya bɛ : ‹ Navi bi muko mbɨya-mbɨya wanʉ, kinili nakɛgʉ ɨmɨ kaɨnda kʉ. › 21 Mʉgya-ligubho ɨga ndɨ ka mombukwana dhakɨ, apága mongoni mi nɨmɔ masɨ. Nɨyɔ ʉkana bɛyɔ, lɨmbɛngɨ akandɨkanaga bɨsʉlʉ-sʉlʉ, abɨkya mʉgya-ligubho kakɨ nɔ bɛ : ‹ Wɨnda nɛkɨ mbangʉ ka bapa ba ya ɨmbaa na ka bopisi ba ya gʉdʉ, idhulyoku wanʉ na batʉ ba yangya, nɨbɔ ba kɨgyagya, nɨbɔ ba bokolobu ba ya mamɔmɔ na nɨbɔ ba mʉdhɨlɨ. › 22 Ngbingo yi nɨnɔ mʉgya-ligubho igoku mino, abɨkya bɛ : ‹ Ngama, nogyi mʉdɔngɔnɨ bɛyɔ aka yɔ webikyi mino, luki limoti pa atʉ mbɛyɨ bata aka. › 23 Kʉwa wa abɨkya mʉgya-ligubho kakɨ bɛ : ‹ Syo ka mʉ ma sɛngɨ na ka bapa bayagɔgɔ kʉ wakwanana mino kaʉtakanya bambanzʉ. Hʉbɨkya batʉ basɨ nɨbɔ wabhangana na ɨbʉ bɛ bodhuku ibha dhumo kamɨ otumi. › 24 Ka lɨngʉnʉ nakamʉbɨkya ambɛ : ‹ lugo ka batʉ bi nɨbɔ bʉmaka ndɨ kambwa, kɛgʉ na mʉtʉ gʉtʉgʉ bemoti aka nɨnɔ alyalya ndɛkɛ ko dhumo kamɨ ! › »
Babɨbya ka Yeso bokwononi kaasa makpʉmʉka masɨ
(Matayɔ 10.37-38)
25 Kʉwa wa Yeso osyo ndɨ ko pisi, ambaza mudhingi ka bambanzʉ a ndɨ kabɨbya kaʉkana mʉtɨwɨ kakɨ. Oikono ndɨ miso kʉ kabʉ, ʉbɨkya basɨ bɛ : 26 « Mʉmbanzʉ iko mʉbɨbya kamɨ ibha ɛpa kʉgbɛ kakɨtaga abhakɨ, amakɨ, mukakɨ, bomikakɨ, bamamakɨ, gʉtʉgʉ kakɨtaga ɔbɨlɨ kakɨ mombukwana dhakɨ yi aka. Kogyi bɛyɔ, kakwananɨgʉ kaiko mʉbɨbya kamɨ. 27 Mʉmbanzʉ yi nɨnɔ kɛgʉ kabhɨnɨka mʉsalabha kakɨ na kɛbɨbya kakwananɨgʉ kaiko mʉbɨbya kamɨ. 28 Ka lɨngʉnʉ, wanɨ mbɛyɨ nɔ lugo kunu kapa kopiko mʉnala, kapʉngɨgʉ mbɛyɨ kaiko, atamana bɛ ligubho li nɨlɔ alya buyi bɨnga. Kumbuso yi, anda ikanɨ atʉ no buyi budhingi nɨbɔ akwanana komosisyo nobu ligubho li nɨlɔ. 29 Luki limoti, kakpɔ asɨ mubumbe aka nɨ komagʉ mʉnala mi nɨmɔ, batʉ basɨ nɨbɔ biko kaɨna, biko asɨ katɨbha aka. 30 Banabɨkya bɛ : ‹ Yooo ! mʉtʉ yi nɨmʉna abʉkʉlaga ndɨ bɛ opiko mʉnala, luki limoti agyagya ! › 31 Mʉdɔngɔnɨ bata abhɛ ngama bemoti mudhingi kapa kaɨnda kabhʉmana na ngama wagɔgɔ, apʉnga mbɛyɨ iko na imuuso bɛ : ‹ Na na basʉdha ɛlɔfʉ tɛkɛbɛ aka, nakwananatʉ kakpumyo nobu mumuyoniso kamɨ nɨnɔ a ɨyɨ na ɨbʉ bɛlɔfʉ batɛkɛbɛ baba ? › 32 Kɨna bɛ kakwananɨgʉ kakpumyo, atɨkɨlya ngama yi nɨnɔ wagɔgɔ nɔ batʉtʉmbwa nɨ a mbɛyɨ asɨ byɨ aka kakʉnga bɛ bʉkananɨ kʉsɔ wa mazɨyɔ. » 33 Kʉwa wa Yeso opipiloku bɛ : « Gʉtʉgʉ mʉtʉ bemoti aka lugo kunu, kakwananɨgʉ kaiko mʉbɨbya kamɨ kiko nɨ kanosigʉ makpʉmʉka masɨ nɨmɔ a nomu. »
Liniko la ndapulu kɛgʉ na ɨzangɨya