Yeso utikini babɨbya bagɔgɔ batɛkɛbɛ madɨya na ɨka na baba
10
1 Kumbuso yi, Mombukwono dhosu ʉpʉnaga bambanzʉ bagɔgɔ batɛkɛbɛ madɨya na ɨka na baba, ʉtɨka ndɨ baba-baba kambwa kʉsɔ wa bagʉdʉ basɨ no giyo yasɨ nɨyɔ ɨyɨ mombukwana dhakɨ a ndɨ mino kaɨnda. 2 Kambwa wa lɨgʉndʉ kabʉ, ʉbɨkya bɛ : « Kʉsɔ wa ligubho la Mongoni Manza, masɔlɔ nɨmɔ a ko tiko a makpʉ, luki limoti bagya ligubho ba bakɛdɛ. Mubikyoni nɛkɨ mombukwono tiko yi nɨyɔ ambɛ utikiku bambanzʉ budhingi kopupiso masɔlɔ kakɨ. 3 Wogoni ! Namutiki kabɨkyaga Mongoni Manza abhɛ bomikya bakɔndɔlɔ lugo ko bosukopi. 4 Makovonitɔgʉ buyi, kʉgba, gʉtʉgʉ bɛkpakʉ aka; makokitisogonitɔgʉ ngbingo wakpʉ ko pisi kiko nɨ makaumuuso bambanzʉ.5 Ngbingo yi nɨnɔ miko banʉ mino kaingyo ka ndabʉ imoti, uuso kunu iki bɛ : ‹ Kunzi oduki mazɨyɔ ka batʉ basɨ nɨbɔ ba kʉsɔ wa ndabʉ yi nɨyɨ. › 6 Kiko nɨ mombukwana mugi amutilyini na mazɨyɔ, Kunzi apá mazɨyɔ kʉ kakɨ na ka ndabʉ kakɨ. Kiko nɨ kamutilyigʉ na mazɨyɔ, Kunzi kapɨgʉ mazɨyɔ ka ndabʉ yi nɨyɔ. 7-8 Ngbingo yi nɨnɔ mogulyo banʉ mino ka gʉdʉ bemoti na batʉ ba gʉdʉ yi nɨnɔ bakamʉtɨlya, wikoni ka ndabʉ imoti aka. Lyoni na momwo nɨmɔ aka mɔ bamʉpá kyɛ mʉgya-ligubho okwononi kaiko na mʉkalya kakɨ. Makokitogonitɔgʉ ka bandabʉ dhidhidhi kaɨkʉkʉngya. 9 Huukusoni batʉ ba bokolobu nɨbɔ ba kʉ, mʉbɨkya batʉ basɨ bɛ : ‹ Bʉngama ko Kunzi amukpudiniku. › 10 Luki limoti, ngbingo yi nɨnɔ mogulyo banʉ mino kʉsɔ wa gʉdʉ bemoti nɨ batʉ ba gʉdʉ bakamutilyigʉ, puponi wa, mɨnda ka pa yangba, mabɨkya bɛ : 11 ‹ Tibhumini libungua la gʉdʉ kunu, gʉtʉgʉ nɨlɔ a ka bakagba kusu aka. Luki limoti, wibhoni bɨnza ambɛ Bʉngama ko Kunzi amukpudiniku. › » 12 Yeso omotiloku bɛ : « Nakamʉbɨkya lɨngʉnʉ aka ambɛ ka lɨsyɛ lɨkɔ mʉngɨmbɔ ka bambanzʉ, Kunzi ugyogyiso ndɛkɛ batʉ ba gʉdʉ yi nɨnɔ kʉgbɛ kaʉkɨtaga batʉ ba Sɔdhɔmʉ.b »
Batʉ ba bagʉdʉ nɨbɔ bamʉya kabhaɨlya
(Matayɔ 11.20-24)
13 « Kumbu kakʉ, gʉdʉ wa Kolazini ! Kumbu kakʉ gʉdʉ wa Bhɛtɛsaidha ! A lɨngʉnʉ bɛ Kunzi agya ndɨ makpʉmʉka mʉmbanga-mbanga kʉnʉ ku kunu nɨ kogyigʉ sɛ ka Tilo na Sidhɔna, bagʉdʉ nɨbɔ bakɛgʉ ndɨ ka baYudha. Kagya ndɨ kʉ bɛyɔ, ibha bambanzʉ nɨbɔ kʉ bowonisoni ndɨ kumbu kabʉ ndɛlɨ, bimokisyo botu ba ya lɨlɛbʉ, bibubiso nzʉyɨ na libhu bitu. 14 Kinili, ka lɨsyɛ lɨkɔ mʉngɨmbɔ ka bambanzʉ, Kunzi amugyogyiso ndɛkɛ kʉgbɛ kakɨtaga Tilo na Sidhɔna. 15 Sɛ kʉwa ibunu batʉ ba Kapɛlɛnaʉmʉ, makasɨma bɛ Kunzi amudokisotʉ banʉ kadhwɛ kʉgʉ wa lɨsyɛ ? Makotomononitɔgʉ gʉtʉgʉ iki yi ɨkɛdɛ aka ! Amusiso ndɛkɛ kadhwɛ ka lɨbyɛ lodhu. »
16 Yeso ʉbɨkya bata babɨbya kakɨ batɛkɛbɛ madɨya na ɨka bɛ : « Mʉmbanzʉ nɨnɔ akamʉmʉkana, akɛmʉkana ɨmɨ; mʉmbanzʉ nɨnɔ akamʉmʉya, akɛmʉya ɨmɨ, na mʉmbanzʉ nɨnɔ akɛmʉya, akamʉya nɨnɔ etikoku ndɨ. » Kumbuso yi baga ndɨ.
Igoku ka babɨbya batɛkɛbɛ madɨya na ɨka na baba
17 Ngbingo yi nɨnɔ babɨbya batɛkɛbɛ madɨya na ɨka na baba bigononoku mino, ba kʉwa ndɨ nɨ botumini na magyagya bɨdɛ, banabɨkya bɛ : « Mombukwono dhosu, gʉtʉgʉ malɨmba aka akatɨmʉkana ngbingo yi nɨnɔ ta mino kaʉpamyaga ko lino kakʉ ! »
18 Yeso umigisyo bɛ : « Namɨna ndɨ Mumuyoniso ko Kunzi kogwoku kʉgʉ wa lɨsyɛ mʉdɔngɔnɨ abhɛ ngbangbata kangɨnana. 19 Hukononi : namʉpá ndɨ ngu kaʉdɨtaga banzʉka, banakwaa-gbanɨ, no ngu yasɨ kakɨtaga Mumuyoniso, luki gʉtʉgʉ limoti aka kamʉgyɨgʉ ndɛkɛ bʉnyɛ. 20 Luki limoti, makogwonitɔgʉ magyagya asɨ kyɛ malɨmba akamʉmʉkana; gwoni magyagya mudhingi kʉgbɛ kyɛ Kunzi okpikoni ndɨ mino kunu kʉgʉ wa lɨsyɛ. »
Yeso akamibhikoso Abhakɨ ka babɨbya kakɨ
21 Ko ngbingo yi nɨnɔ gɔnɨ nɔ, Yeso otumo na magyagya ko ngu ya Lɨmbɛngɨ Lotu, abɨkya bɛ : « Bhabha ooo, Ngama wa masɨ nɨmɔ kʉgʉ wa lɨsyɛ na nɨmɔ kʉnʉ ka lɨtɔmbʉ, nubhibhisini kyɛ uwonisi batʉ nɨbɔ bakibhigʉ luki makpʉmʉka mʉmbanga-mbanga nɨmɔ ʉsʉmɨlya ndɨ bagʉgʉ na batʉ ba yimibho. Iyo Bha, a bɛyɔ kyɛ wabhaɨlya ndɨ bɛ igyonosi bɛyɔ aka yɔ. »
22 Sɛ kʉwa wa ʉbɨkya batʉ nɨbɔ ba ndɨ wa bɛ : « Bhabha epóni makpʉmʉka masɨ. Gʉtʉgʉ mʉmbanzʉ bemoti aka kibhigʉ bɨnza bɛ Miki nɨ wanɨ kiki nɨ Bhabha aka, na gʉtʉgʉ mʉmbanzʉ bemoti aka kibhigʉ bɛ Bhabha nɨ wanɨ kiki nɨ Miki aka na sɛ kʉwa nɨbɔ Miki akabhaɨlya kaumibhiso. »
23 Kumbuso yi, Yeso oikono ndɨ miso ka babɨbya kakɨ aka na ʉbɨkya bɛ : « Ma na ngasa kaɨna nɨlɨna makaɨna lɨ ! 24 Ka lɨngʉnʉ, nakamʉbɨkya bɨngbanganya ambɛ, bogyalandʉ na bangama bakpʉ nɨbɔ ba ndɛlɨ ba ndɨ na tamanaga bɛ bininɔ gʉtʉgʉ makpʉmʉka mʉmbanga-mbanga nɨmana makaɨna mbɨya wanʉ, luki limoti bakɨnagʉ ndɨ. Ba ndɨ gɔnɨ na mʉsasa kaʉkana nɨmana makaʉkana mbɨya wanʉ, luki limoti bakʉkanagʉ ndɨ. »
Lizuni ka muSamalia wanza
25 Kʉwa wa, muwonisili wa Mʉtʉʉ ka Musa bemoti amaga ndɨ kakɨngɨla Yeso, amuuso bɛ : « Muwonisili, nakwanana pɨyɛ kagya bʉnɨ kainisono na ɔbɨlɨ wa bɛnzɛ na bɛnzɛ ? »
26 Yeso asikisyo bɛ : « Bokpiko sɛ mbɛyɨ kʉsɔ wa Mʉtʉʉ bʉnɨ ? kanaga bʉnɨ kʉsɔ yi wa watangʉlaga mino ? »
27 Alʉkʉ nɔ amigisyo bɛ : « Mʉpa Mombukwana dhakʉ Kunzi na lɨmbɛngɨ kakʉ lasɨ, na mʉtamanagɨ kakʉ masɨ, no ngu kakʉ yasɨ, na yimibho kakʉ yasɨ.c » Na : « Wapa wai dhakʉ bɛyɔ aka yɔ wɨpaga mino.d »
28 Yeso amigisyo bɛ : « Ɛɛɛ, wosikisyiku bɨnza. Gya nɛkɨ bɛyɔ winisono na ɔbɨlɨ wa bɛnzɛ na bɛnzɛ. »
29 Yɛkɨ muwonisili wa mʉtʉʉ a ndɨ kapa kowoniso bungbingbili kakɨ, amuuso Yeso bɛ : « Wai sɛ kʉwa nɨ wanɨ ? »
30 Yeso amigisyo na mʉtʉmbʉlagɨ bɛ : « A ndɨ lɨsyɛ limoti, mʉtʉ bemoti otukyoku ka Yelusalɛma kosyo ka mugi ma Yeliko. Kadhwɛ ko pisi, abhangana na bonzikabʉ, bagwi, babhʉma, bakʉpya makpʉmʉka masɨ, banyɔ botu, basa buwobhi kokwo, baga. 31 Kumbuso yi, kumu-kumu bemoti a ndɨ kosyoku ko pisi yi nɨyɔ gɔnɨ yɔ. Nɨyɔ amɨna mʉtʉ yi nɨnɔ, ɨkɨta ka kpɔlɔ, akpangba, aga yakakɨ. 32 Kagya yɨkɛdɛ bɛnɛ, muLawie odhoku wa gɔ wa. Nɨyɔ amɨna alʉkʉ nɔ, ɨkɨta gɔnɨ ka kpɔlɔ, akpangba, aga. 33 Luki limoti, muSamalia bemoti nɨnɔ otukyoku ndɨ ɨyɨ byɨ, a ndɨ ɨyɨ kobyeku ko pisi yi nɨyɔ gɔnɨ yɔ. Nɨyɔ odhweku wa alʉkʉ nɔ a ndɨ mino koubukono wa, amɨna, akwilyo kumbu. 34 Akpudoku, asʉkʉsa bapwayɨ, agya na vinya, ogbodyo na molingo, akanda. Kumbuso yi abhɨnɨka kʉgʉ wa punda kakɨ, aga na ɨyɨ ka ndabʉ ka bobhikof bɛ batʉkɨ. 35 Nɨyɔ lɨsyɛ asyɛ kʉwa na bʉgala bi, muSamalia anyɔ buyi bambuma babag apá mombukwana ndabʉ, abɨkya bɛ : ‹ Mʉtʉka alʉkʉ yi nɨmʉna bɨnza. Buyi kakɨtaga kʉgʉ wa nɨba, wokpiko, nakalya banʉ nɨ ɨmɨ ko ngbingo wa kigoku. › »
36 Ka mulibo Yeso amuuso kʉwa bɛ : « Wanɨ nɔ lugo ka batʉ nɨbɔ basaa bɔ akaʉmɨnɨkyana abhɛ kiko ndɨ wai dhakɨ mʉtʉ yi nɨnɔ bonzikabʉ babhʉma ndɨ nɔ ? »
37 Muwonisili wa Mʉtʉʉ ka Musa asikisyo bɛ : « Nɨnɔ awonisilo ndɨ sɨpananɨsɔ. »
Yeso opipiloku kʉwa na ɨyɨ bɛ : « A bɛyɔ, wɨnda, ɨwɛ wogyoku bɛgɛyɔ ! »
Yeso ogoni kanda Malata ɨbʉ na Malia
38 Ngbingo yi nɨnɔ Yeso na babɨbya kakɨ ba ndɨ mino ka lɨgʉndʉ, Yeso ogulyo ndɨ ka mugi mimoti kʉ muko bemoti nɨnɔ ina ndɨ bɛ Malata atɨlya ndɨ mino kʉ kakɨ. 39 A ndɨ na mamakɨ bemoti mʉsɨka yi nɨnɔ ina ndɨ bɛ Malia. Ɨyɨ Malia odhoku ndɨ kaiko kambwa ka Mombukwono dhosu, anʉkana mʉtɨwɨ kakɨ. 40 Luki limoti, Malata a ndɨ kadanga bɨdanga-danga na ligubho la lilolombi. Odhoku ka kpɔlɔ ka Yeso ko ngbingo mʉkɛdɛ, abɨkya bɛ : « Mombukwono dhosu, wɨna mbɛyɨ bɛyɔ Malia esi mino mʉkaka na mogubho masɨ bɛnɛ ! Ɨbɨkyɨlya nɛkɨ yakakɨ ambɛ esingyiku kʉwa kaambamba. »